NKHANI YOPHUNZILA N.° 16
NYIMBO N.° 87 Ŵelani! Musisimuliwe
Kunkhala paushamwali uweme na enekwasu na akalongosi nikuweme kuli sewo!
“Onankoni! Niviweme komasoti nivokondwelesha ngako enekwasu akankhala pamozi mokatijana!”—SAL. 133:1.
CHOLINGA CHA NKHANI INO
Munkhani ino, tikambilane malangizo amene angatiyavye kuti tikonkhala luweme na ayasu komasoti madaliso anyinji amene ŵatingafwane keno tunkhala mokatijana na Akhilisitu ayasu.
1-2. Kansi nichinthu chotyani chofunika ngako kwa Yehova, ndipo yove ofuna kuti sewo tikochita chinji?
PALI tyala vinthu vitontho vofunika kwa Yehova kupambana mwatuchitila vinthu na ŵanthu ayasu. Yesu ephunzisa kuti tufunikila kukonda ayasu monga nimwatulikondela seka. (Mat. 22:37-39) Vamene ivi vupamikijapo kunkhala aweme ntima olo kuli ŵanthu amene otumikilalini Yehova. Keno tuwonesha kuwama ntima kwamene uku, tukonkheja Yehova Mulungu wamene “oŵalishila zuŵa yake ŵanthu aweme na aipa kumo, ndipo olokweshela mvula ŵanthu olungama na osalungama kumo.”—Mat. 5:45.
2 Olo kuti Yehova okonda ŵanthu wonse, yove okonda ngako ŵanthu amene ochita vinthu viweme. (Yoh. 14:21) Mulungu ofuna kuti sewo tikomukonkheja. Yove otilimbikisa kuti “tikokonda ngako” akwasu na akalongosi komasoti kuti ‘tikoŵaonesha chikondi ngacho-ngacho.’ (1 Pet. 4:8; Alo. 12:10) Chikondi cha ntundu wamene uyu, tingachilinganije na chikondi chatuwonesha achibale ŵasu ŵatukonda olo ayasu apantima.
3. Kansi tufunikila kukumbukila chinji pankhani yachikondi?
3 Molingana na maluŵa am’dimba yasu yamaluŵa amene ofunikila kuŵasamalila kuti apitilije kukula, tufunikilasoti kuchita khama kuti tipitilije kukonda ayasu. Ntumwi Paulo elangiza Akhilisitu ayake kuti: “Pitilijani kukonda akwasu.” (Ahe. 13:1) Yehova ofuna kuti sewo tipitilije kukonda ayasu. Munkhani ino, tiwone chifukwa chake tufunikila kunkhala paushamwali uweme na Akhilisitu ayasu komasoti vatingachite kuti tipitilije kuŵakonda.
CHIFUKWA CHATUFUNIKILA KUNKHALILA PAUSHAMWALI UWEME NA AYASU
4. Mokatijana na Salimo 133:1, kansi tingachite tyani kuti tipitilije kutembeja nkatijano wasu wapachalo chonse? (Onanisoti chithunzi.)
4 Ŵelengani Salimo 133:1. Sewo tukatijana na mawu ŵechilemba wamasalimo muyakine, amene owonesha kuti kunkhala paushamwali wotang’a na Akhilisitu ayasu amene okonda Yehova ‘nikuweme’ komasoti ‘nikokondwelesha ngako.’ Koma molingana na munthu wamene angakangiwe kuwona kuwama kwa chimuti chifukwa chakuti ochiwona nsiku iliyonse, nasesoti tingakangiwe kuwona kuwama kwa m’katijano watili nawo na enekwasu na akalongosi. Sewo tukwanisha kuwona enekwasu na akalongosi pafupi-pafupi payakinesoti kwa maulwendo anyinji sondo iliyonse. Kansi tingachite tyani kuti tikowonesha kutembeja nthawe zonse? Keno tupatula nthawe yoganizila kufunika kwa Nkhilisitu aliyense mumpingo kuli sewo, tikoŵakonda ngako enekwasu na akalongosi.
Osati mukokuwaya-waya kuwama kwa nkatijano wasu wa Chikhilisitu (Onani ndime 4.)
5. Kansi chikondi chatuwoneshana m’gulu yasu chuŵakhuza tyani ŵanthu ayakine?
5 Ŵanthu amene nikoyamba kufwika pamisonkhano yasu odabwa ngako na chikondi chatuwoneshana. Kuwona tyala chikondi chatuwoneshana, kungaŵayavye kuziŵa kuti afwana chonadi. Yesu enena kuti: “Onse azaziŵe kuti nimwe ophunzila ŵangu—keno mukondana.” (Yoh. 13:35) Ganizilani vechitikila Chaithra, wamene ophunzila pa yunivesiti ndipo evomela kuphunzila Baibolo na wa Mboni za Yehova. Yove evomela pechimuitila kunsonkhano wachigawo. Pavuli pomvwishila nsonkhano wamene uyo pamenso na pamenso kwa nthawe yoyamba, yove efotokozela kalongosi enzemuphunzisa Baibolo kuti: “Makolo ŵangu akaliye nipasako hagi. Koma pansonkhano uno wachigawo napasiwa hagi na ŵanthu okwanila 52 pa nsiku tyala imozi! Nawona chikondi cha Yehova kupitila m’banja yamene iyi yauzimu. Newo nufuna kunkhala m’banja yamene iyi.” Chaithra epitilija kupita pasogolo ndipo ebatizika mu 2024. N’vowonekelatu kuti ophunzila Baibolo akawona ntchito zasu ziweme kupamikijapo chikondi chatuwoneshana, vuŵayavya kuti ayambe kutumikila Yehova.—Mat. 5:16.
6. Kansi kunkhala paushamwali uweme na enekwasu na akalongosi kungatiteteze tyani?
6 Kukatijana na enekwasu na akalongosi, kungatiteteze. Paulo elangiza Akhilisitu ayake kuti: “Pitilijani kutang’ishana nsiku na nsiku . . . kuti chinyengo champhamvu cha uchimo, osati chiyumishe ntima wa aliyense wa mwewo.” (Ahe. 3:13) Tikakhumudwa ngako noyamba kuvutika kuti tichite viweme, Yehova angakatishile ntchito Nkhilisitu muyasu wamene oziŵa za vuto yamene iyo kuti atiyavye. (Sal. 73:2, 17, 23) Kutang’ishiwa mwanjila yamene iyi, nikuweme ngako kuli sewo.
7. Kansi pali kukatijana kotyani pakati pa chikondi na nkatijano? (Akolose 3:13, 14)
7 Sewo tili m’gulu ya ŵanthu amene oyeja-yeja mwakhama kuti akowoneshana chikondi, tetyo tili na madaliso anyinji. (1 Yoh. 4:11) Mwachisanzo, chikondi chutiyavya kuti ‘tipitilije kulolelana,’ komasoti kuchita vinthu vamene vuyavya kuti tipitilije kunkhala okatijana. (Ŵelengani Akolose 3:13, 14; Aife. 4:2-6) Tetyo malo ŵasu ochitila misonkhano, nimalo aweme ngako kupambana malo agulu iliyonse pano pachalo.
MUKOWONESHA ULEMU KULI AYAKINE
8. Kansi Yehova otiyavya tyani kunkhala okatijana na enekwasu na akalongosi?
8 M’katijano watili nawo na enekwasu na akalongosi kuzenguluka pachalo chonse niwokwanishika chifukwa cha Yehova. Yehova watiyavya kuti tikwanishe kuchita vamene ivi olo kuti tiliye ungwilo. (1 Ako. 12:25) Baibolo yunena kuti sewo ‘Mulungu otiphunzisa kuti tikokondana.’ (1 Ates. 4:9) M’mawu ayakine tinganene kuti, kupitila m’Malemba Yehova otiuja vinthu ngavo-ngavo vatufunikila kuchita kuti tinkhale paushamwali uweme na ayasu. ‘Mulungu angatiphunzise’ keno tuganizila ngako mfundo zake komasoti kuzikatishila ntchito pamoyo wasu. (Ahe. 4:12; Yako. 1:25) Ndipo vamene ivi niye vakuchita a Mboni za Yehova.
9. Kansi tuphunzila chinji kufumila pa Aloma 12:9-13 pankhani yowoneshana ulemu?
9 Kansi Mawu a Mulungu otiphunzisa tyani kuti tinkhale paushamwali uweme na ayasu? Ganizilani vechilaŵila Paulo vokhuza nkhani yamene iyi pa Aloma 12:9-13. (Ŵelengani.) Onani kuti pa lemba yamene iyi yove enena kuti “pankhani yowoneshana ulemu mukoyamba nimwewo.” Kansi vamene ivi vutanthauza chinji? Tufunika kuyamba nisewo kuwonesha ayasu “chikondi ngacho-ngacho” poŵakhululukila, kuŵawonesha ntima wotandaja, ntima wopasa komasoti kuŵayavya munjila ziyakine. (Aife. 4:32) Mufunikalini kuyembekezela kuti mkwasu olo kalongosi, ayambe ni yove kukuwoneshani chikondi. “Mukoyamba nimwewo” kuchita vamene ivi. Ndipo muzawone kukwanilishiwa kwa mawu ŵechilaŵila Yesu akuti: “Kupasa kutichitisha kunkhala okondwela ngako kupambana kulondela.”—Ntchi. 20:35.
10. Kansi tingachite tyani kuti tinkhale akhama “pankhani yowoneshana ulemu”? (Onanisoti chithunzi.)
10 Chochitisha chidwi nichakuti pavuli pofotokozela Akhilisitu ayake kuti akoyamba ni ove kuwonesha ulemu ayawo, Paulo eŵadandaulila kuti: “Nkhalani akhama osati aulesi.” Munthu wakhama onkhala wolipeleka komasoti wolimbikila pa ntchito. Akapasiwa ntchito, yove oikata na ntima wonse. Lemba ya Miyambo 3:27, 28 yutilangiza kuti: “Osaleka kuchitila viweme ŵanthu amene ofunikila kuchitiliwa viweme vamene ivo keno ungakwanishe kuŵayavya.” Tetyo tikawona kuti munthu muyakine ofunikila thandizo, tufunikila kuchita vonse vatingakwanishe kuti timuyavye. Tufunikalini kuwaya-waya ndipo osati tikoganiza kuti munthu muyakine asamalile nkhani yamene iyo.—1 Yoh. 3:17, 18.
Tufunikila kuchitapo kanthu kuti tiyavye enekwasu na akalongosi amene okumana na mavuto (Onani ndime 10.)
11. Kansi n’chinji chingatiyavye kuti tinkhale paushamwali uweme na ayasu?
11 Njila iyakine yatingawoneshele ulemu kuli ayakine nikuŵakhululukila mokulumija keno atiphoniyela. Lemba ya Aifenso 4:26 yunena kuti: “Zuŵa osati ichome mukali kalipe.” Ndaŵa yanji? Vesi 27 yunena kuti kuchita vamene ivi kungankhale ‘kumupasa mpata Mdyelekezi.’ Kupitila m’Mawu ŵake, Yehova otiuja moweleja-weleja kuti tikokhululukila ayasu. Lemba ya Akolose 3:13 yutilangiza kuti ‘pitilijani . . . kukhululukilana na ntima wonse.’ Kukhululukila ayakine vophoniya vawo, ni imozi mwa njila ziweme ngako zamene zingatiyavye kunkhala nawo paushamwali uweme. Keno tuchita vamene ivi tuyavya “kusunga nkatijano wamene tuufwana moyavyiwa na mzimu utuŵa ponkhala mwantendele wamene uli monga nichomangila chamene chutikatanija.” (Aife. 4:3) Mwachidule tinganene kuti kukhululuka kungatiyavye kuti tinkhale okatijana komasoti mwantendele.
12. Kansi Yehova otiyavya tyani kuti tikokhululukilana?
12 N’chendi kuti nthawe ziyakine tingavutike kukhululukila ŵanthu amene atikhumudwisa. Koma tingakwanishe moyavyiwa na mzimu utuŵa wa Mulungu. Pavuli potidandaulila kuti “mukonkhala na chikondi ngacho-ngacho” komasoti kuti “nkhalani akhama,” Malemba otilangiza kuti: “Yakani na mzimu.” Munthu wamene ‘oyaka na mzimu’ onkhala wolipeleka ngako komasoti wachangu moyavyiwa na mzimu utuŵa wa Mulungu. (Alo. 12:11.) Tetyo, mzimu utuŵa wa Mulungu ungatiyavye kuti tinkhale na chikondi ngacho-ngacho komasoti kuti tikokhululukila ayasu na ntima wonse. Chifukwa cha vamene ivi, tikomupapatila Yehova mofumila pansi pa ntima kuti atiyavye.—Luk. 11:13.
“PAKATI PANU OSATI PANKHALE KUYAŴIKANA”
13. Kansi n’chinji chingayambishe mayaŵano pakati pasu?
13 Mumpingo muli ŵanthu “osiyana-siyana” amene alisoti na vinkhalidwe vosiyana-siyana. (1 Tim. 2:3, 4) Keno tingalekesamala, kusiyana kwamene uko kungapangishe kuti osati tikokatijana pankhani ya vosankha vamunthu aliyense payeka monga kavwalidwe, kuliwamililisha, kusamalila thanzi komasoti mafilimu ŵatulolela. (Alo. 14:4; 1 Ako. 1:10) Chifukwa chakuti Mulungu otiphunzisa kuti tikokondana, tufunikila kunkhala osamala popewa kuchitisha ŵanthu ayakine kuganiza kuti vinthu vatusankha sewo niye viweme ngako kupambana vakusankha ayakine.—Afil. 2:3.
14. Kansi tikoyeja-yeja kuchita tyani nthawe zonse, ndipo ndaŵa yanji?
14 Tingapewesoti vinthu voyaŵanisha mumpingo keno tuyeja-yeja kuti tikochita vinthu vamene vingatang’ishe ayakine nthawe zonse. (1 Ates. 5:11) Kwalombapano, ŵanthu anyinji amene enze efoka komasoti ochosewa ajokelasoti mumpingo. Ŵanthu amene aŵa taŵalondelasoti na manja aŵili! (2 Ako. 2:8) Onani vechitikila kalongosi muyakine wamene eluta ku Ng’anda ya Ufumu pavuli pa vyaka 10 kufumila pechinkhala wofoka. Yove enena kuti, “Enekwasu na akalongosi enzenipasa moni wa mmanja uku osekelela.” (Ntchi. 3:19) Kansi kuwama ntima kwamene uko kwechiwoneshewa kwemukhuza tyani? Yove enena kuti, “Vamene ivi venichitisha kuwona kuti Yehova oniyavya kuti niyambesoti kunkhala wosangalala.” Keno tuyeja-yeja kuchita vinthu vamene vingatang’ishe ayasu, Yesu Khilisitu angatikatishile ntchito potang’isha ŵanthu amene ‘okata ntchito yoŵeŵesha na olemewa.’—Mat. 11:28, 29.
15. Kansi tingatang’ishe nkatijano wasu mwanjila iyakinesoti yotyani? (Onanisoti chithunzi.)
15 Njila iyakine yatingatang’ishile nkatijano wasu nikupitila muvinthu vatulaŵila. Lemba ya Yobu 12:11 yunena kuti: “Kansi nipalalini kwatu yusiyanisha mawu molingana na mwayuchitila lilimi yamene yusiyanisha kuwama kwa chakulya?” Molingana na mwakuchitila wopika muweme wamene nthawe zonse oyamba walaŵa chakulya chake kuti aziŵe keno chili luweme akaliye yaŵila ŵanthu, tikoyamba taganizila mosamala vinthu vatufuna kulaŵila tikaliye vilaŵila. (Sal. 141:3) Cholinga chasu n’chakuti nthawe zonse tikosimikijila kuti mawu ŵatufuna kulaŵila ni otang’isha komasoti ‘angayavye ŵanthu amene omvwishila.’—Aife. 4:29.
Mukoganizila mosamala vinthu vamungalaŵile mukaliye laŵila (Onani ndime 15.)
16. Kansi niŵani ngako-ngako ofunikila kulaŵila mawu otang’isha?
16 Ngako-ngako mitu ya mabanja komasoti makolo, ofunika kunkhala osamala kuti akolaŵila mawu otang’isha. (Akol. 3:19, 21; Tito 2:4) Nawosoti akulu ofunika kunkhala pasogolo pankhani yopeleka chisanzo cholaŵila mawu otang’isha komasoti otonthoja monga achiŵeta a gulu ya mbelele za Yehova. (Yes. 32:1, 2; Agal. 6:1) Mwambi uyakine wa m’Baibolo utikumbusha kuti: “Mawu olaŵiliwa pa nthawe yoyenelela ni aweme ngako!”—Miy. 15:23.
“TIKOWONESHANA CHIKONDI NGACHO-NGACHO MU VOCHITA VASU”
17. Kansi nivinthu votyani vatingachite powonesha kuti tukonda ngako enekwasu na akalongosi?
17 Ntumwi Yohani etilimbikisa kuti: “Osati tikokondana na mawu ŵeka olo na pakamwa tyala, koma tikowoneshana chikondi ngacho-ngacho mu vochita vasu.” (1 Yoh. 3:18) Sewo tufuna kukonda enekwasu na akalongosi mofumila pansi pa ntima. Kansi tingakwanishe tyani kuchita vamene ivi? Keno tupatula nthawe yokwanila kuti titandale na enekwasu na akalongosi tizankhale nawo paushamwali uweme ngako komasoti tikokondana nawo ngako. Tetyo mukoyeja-yeja kufwana mipata yamungatandale na ayakine—kumisonkhano komasoti muutumiki. Mukopatula nthawe kuti mukanyungile ayanu. Keno tuchita vamene ivi tizawoneshe kuti ‘Mulungu otiphunzisa kuti tikokondana.’ (1 Ates. 4:9) Ndipo tizapitilije kuwona na menso ŵasu kuti “niviweme komasoti nivokondwelesha ngako enekwasu akankhala pamozi mokatijana!”—Sal. 133:1.
NYIMBO N.° 90 Tikotang’ishana