Kansi Kuziŵa Mulungu Kungakuyavyeni Tyani Mwewo?

Mfundo zataphunzila munkhani zakuvuli, zatiyavya kufwana yankho yakonsho yakuti, Kansi Mulungu niŵani? Moyavwiwa na Baibolo, sewo taziŵa kuti zina yake ni Yehova ndipo nkhalidwe yake ikulu ni chikondi. Tawonasoti vinthu vechichita kale kuvuli komasoti vakuti azachite kusogolo pofuna kuti azayavye ŵanthu. Koma pakali vinthu vinyinji vamungaphunzile vokhuza Mulungu. Koma olo n’tetyo, payakine mungalikonshe kuti, Kansi kuphunzila vinthu vamene ivi kunganiyavye tyani?

Yehova otilonjeza kuti ‘tikamusakila yove azalole kuti timufwane.” (1 Mbiri 28:9) Ganizilani za madaliso apadela amene ŵatingafwane keno tusakila-sakila Mulungu nomuziŵa luweme—amene ni ‘kunkhala paushamwali wotang’a na Yehova’! (Sal. 25:14) Kansi ushamwali wamene uyu ungakuyavyeni tyani?

Kunkhala na moyo wosangalala. Baibolo yunena kuti Yehova ni “Mulungu wachisangalalo.” (1 Tim. 1:11) Kunkhala paushamwali na Mulungu komasoti kukonkheja minkhalidwe yake kungakuyavyeni kunkhala na moyo wosangalala, ndipo vamene ivi vingachitishe kuti munkhale na thanzi iweme. (Sal. 33:12) Komasoti mungapewe minkhalidwe iipa, mungankhale na minkhalidwe iweme —komasoti mungokatijana na ŵanthu ayakine. Kuchita vamene ivi kungakuyavyeni soti kuti munkhale na moyo wosangalala. Mwewo mungankhale na maganizo olingana ŵenze nawo Wamasalimo muyakine. Yove enena kuti: “Kuli newo, kuvwendela kwa Mulungu ni chinthu chiweme.”—Sal. 73:28.

Kusamaliliwa. Yehova elonjeza atumiki ŵake kuti: “Nizakupase nzelu nokulangiza njila yakuti uyendemo.” (Sal. 32:8) Vamene ivi vuwonesha kuti Yehova osamalila ntumiki wake aliyense mokatijana na vinthu vakufunikila. (Sal. 139:1, 2) Keno muyeja-yeja kuti munkhale paushamwali wotang’a na Yehova, muzakwanishe kuwona kuti nthawe zonse yove onkhala wokonzeka kukuyavyani.

Sogolo iweme. Kuyangijila pa kukuyavyani kuti munkhale na moyo wosangalala palipano, Yehova Mulungu okupasanisoti mwayi wonkhala na sogolo iweme. (Yes. 48:17, 18) Baibolo yunena kuti: “Moyo wosasila azaufwane akaphunzila noziŵa za mwewo, Mulungu mmozi wachendi, komasoti za Yesu Khilisitu wamene mwewo mwemutuma.” (Yoh. 17:3) Muli ino nthawe yamene niyovuta, chiyembekezo chawatipasa Mulungu chunkhala monga ni nangula chifukwa chutiyavya kuti osati tinyang’anye.—Ahe. 6:19.

Vinthu vatakambilana, ni vifukwa vitontho tyala vamene vutichitisha kufunishisha kuti timuziŵe luweme Mulungu komasoti tinkhale naye paushamwali. Kuti muziŵe vinyinji, konshani wa Mboni za Yehova aliyense kapena lutani pa webisaiti yasu ya jw.org/ny.