Kumasuliwa kwatuyembekezela kusogolo​—Kutipangisha kuti tikotembeja Mulungu na Khilisitu

Kansi mwewo mulimbana na vinthu votyani va nsiku na nsiku? Kansi nimwe mutu wa banja wamene musamalila maudindo anyinji? Kansi nimwe kolo ndipo muyeja-yeja kuchita vinthu na mphamvu kuti mupeze vofunika pa moyo? Kansi nimwe wachilumbwana wamene mukakamijiwa kuchita vinthu viyakine na ayanu aku sikulu? Kansi mwewo mulimbana na mavuto athanzi olo mavuto a ukalamba? Pachalo chonse ŵanthu olimbana na vinthu vosiyana-siyana. Akhilisitu anyinji okumana na viyeso vosiyana-siyana pa nthawe imozi. Tetyo, tuziŵa kuti lombapano Yehova atimasule ku mavuto onse amene aŵa.​—2Ak 4:16-18.

Poyembekezela nthawe yamene iyi, tulimbikisiwa poziŵa kuti Yehova omvwisha mavuto ŵasu, otembeja kukhulupilika kwasu komasoti kupilila ndipo watidalisa ngako. (Yer 29:11, 12) Yesu naye otiganizilasoti. Tikokwanilisha maudindo ŵasu Achikhilisitu, tunkhala osimikijila mawu ŵake akuti: “Newo nili namwe.” (Mt 28:20) Tikankhala na kuganizila kusogolo pa nthawe yati tizamasuliwe na Ufumu wa Mulungu, tutang’isha chiyembekezo chasu komasoti tunkhala opilila viyeso vatukumana navo.​—Aro 8:19-21.

LOLELANI VIDIYO YAKUTI PITILIZANI KUYANG’ANITSITSA YESU PAMENE MPHEPO YAMKUNTHO IKUBWERA!​—MADALITSO AMENE UFUMU UZABWERETSE, PAVULI PAKE YANKHANI MAKONSHO AŴA:

• Kansi n’chinji chichitika kuti ŵanthu ayambe kutalamuka kwa Mulungu, ndipo vokonkhapo vake venze votyani?

• Kansi ŵala okhulupilika kwa Yehova oyembekezela chinji kusogolo?

• Kansi chiyembekezo chodabwisa chamene ichi chizakwanishike tyani?

• Kansi ni madaliso otyani ŵamuyembekezela am’chalo chanyowani cholonjezewa?