Mangani chikhulupililo chanu mwa Yehova na Yesu pokatishila ntchito buku yakuti Sangalalani na moyo kosasila!

Kuti akondweleshe Mulungu, ŵanthu ophunzila Baibolo ofunika kunkhala na chikhulupililo chotang’a. (Ahe 11:6) Tingakwanishe kuŵafwika pa ntima pokatishila ntchito buku yakuti Sangalalani na moyo kosasila!. Buku yamene iyi yophunzilila ili na malemba ofunika ngako, yufotokoza vinthu momvwika luweme, ili na makonsho okata ntima, mavidiyo osangalasa, komasoti vithunzi viweme. Poyavya ophunzila kukulisha minkhalidwe ya Chikhilisitu na ushamwali wawo na Mulungu, tunkhala kuti tumanga na vinthu visakata mulilo.—1Ak 3:12-15.

Ŵanthu ayakine owona kuti n’kovuta kunkhala paushamwali na Mulungu, wamene omuwonalini. Tetyo, tufunika kuŵayavya kukulisha ngako chikhulupililo mwa Yehova.

LOLELANI VIDIYO YAKUTI MANGANI CHIKHULUPILILO CHANU MWA YEHOVA, POKATISHILA NTCHITO BUKU YAKUTI “SANGALALANI NA MOYO KOSASILA!” PAVULI PAKE YANKHANI MAKONSHO AŴA:

• Kansi tuziŵa tyani kuti mulongo uyu enze ekonzekela luweme kuti akachitishe phunzilo?

• Kansi yove ekatishila tyani ntchito makonsho oyangijila osankhiwa luweme kuti ayavye wophunzila kufotokoza maganizo ŵake komasoti mwakumvwila mawu ali pa Yesaya 41:10, 13?

• Kansi vidiyo komasoti mavesi a m’Baibolo amukhuza tyani wophunzila?

Ŵanthu anyinji omvwishalini za dipo, ndipo owonalini kuti ni mphaso yechiŵapasa Mulungu ove paŵeka. (Aga 2:20) Tetyo, tufunika kuŵayavya kukulisha chikhulupililo mu nsembe ya dipo ya Yesu.

LOLELANI VIDIYO YAKUTI MANGANI CHIKHULUPILILO CHANU MWA YESU, POKATISHILA NTCHITO BUKU YAKUTI “SANGALALANI NA MOYO KOSASILA!” PAVULI PAKE YANKHANI MAKONSHO AŴA:

• Kansi tuziŵa tyani kuti m’bale uyu enze ekonzekela luweme kuti akachitishe phunzilo?

• Kansi yove edjaila tyani kukatishila ntchito vinthu vili pa mbali yakuti “Phunzilani vinyinji” kuti akoyavya wophunzila?

• Ndaŵa yanji pemphelo niyofunika ngako kuli wophunzila?