Malifalensi a Utumiki komasoti Moyo wasu wachikhilisitu kabuku kamisonkhano

Malifalensi a Utumiki komasoti Moyo wasu wachikhilisitu kabuku kamisonkhano

MEYI 5-11

CHUMA CHUPEZEKA M’MAWU A MULUNGU MIYAMBO 12

Kukata ntchito mwakhama kupindulisha

Nsanja ya Mulonda 06/2016 pedji 30 ndim. 6

Nkhalidwe ya ntengo wapalulu kupambana dayamondi

Akhilisitu ayakine ovutika ngako kuti afwane vofunika pa moyo. Koma m’malo mochita vinthu viliye chilungamo, ove okata ntchito mwakhama. Akochita vamene ivi owonesha kuti kunkhala na minkhalidwe ya Yehova monga chilungamo nikofunika ngako kupambana chinthu chilichonse pa moyo wawo.—Miy 12:24; Aif 4:28.

Nsanja ya Mulonda 1/02/2015 pedji 5 ndim. 4-6

Kansi mungachite tyani kuti mukosangalala na ntchito yanu?

Konsho yosilijila yamene iyi niyofunika chendi kuiganizila chifukwa munthu osangalala ngako na ntchito yake ngako-ngako akawona kuti yuyavyasoti ŵanthu ayakine. Yesu enena kuti: “Kupasa kutichitisha kunkhala okondwela ngako kupambana kulondela.” (Ntch 20:35) Osati mukoluŵa kuti kuyangijila pa makasitomo komasoti mabwana ŵanu, palisoti ŵanthu ayakine amene opindula na ntchito yanu. Ŵanthu amene aŵa angankhale am’banja mwanu komasoti ŵanthu ovutika.

Ŵanthu am’banja mwanu. Tata wamene okata ntchito mwakhama oyavya m’banja yake munjila ziŵili. Choyamba, yove oyavya kuti akofwana vofunika va m’banja mwake, monga chakulya, vovwala komasoti malo oyona. Akochita vamene ivi okhala kuti okwanilisha udindo wechimupasa Mulungu wosamalila “ŵanthu amene ni udindo wake kuŵasamalila.” (1 Tim. 5:8) Yachiŵili, tata wamene okata ntchito mwakhama opeleka chisanzo chiweme kuli ŵana ŵake. Shane watatomola munkhani yapita, enena kuti: “Atata ŵangu ni chisanzo chiweme pa nkhani yolimbikila ntchito. Ove ankhala okata ntchito ya vokhoma-khoma kwa vyaka vinyinji. Vinthu vakupanga vuyavya ŵanthu anyinji. Chisanzo chawo chiweme cheniyavya kuwona kufunika kokata ntchito na manja ŵasu.”

Ŵanthu ovutika. Ntumwi Paulo elangiza Akhilisitu kuti “akolimbikila kukata ntchito . . . kuti akokwanisha kufwana vinthu vamene angakwanishe kupasako munthu wala aliye.” (Aif 4:28) Keno tukwanisha kukata ntchito nofwana ndalama zamene zingayavye banja yasu, vingankhale vosavuta kufwanasoti ndalama zatingayavyile ŵanthu ovutika. (Miy 3:27) Tetyo tikokatasoti ntchito mwakhama tukwanisha kuyavya ŵanthu ayakine. Ndipo kuchita vamene ivi kutiyavya kuti tikonkhala osangalala.

Kusakila-sakila Mfundo zingatiyavye

Achinyata mafunsa mutu 95 ndim. 10-11

Kansi nine wopilila?

● Mukowona mavuto ŵanu moyenelela. Mukosiyanisha pakati pa mavuto akulu-akulu na atontho-atontho. Baibolo yunena kuti: “Munthu wopusa owonesha kuti wakhumudwa nthawe yamene iyo, koma munthu wochenjela akachitiliwa vinthu viipa oviwaya-waya.” (Miy 12:16) Tetyo ni mavutolini onse angakusoŵesheni ntendele.

“Ayangu anyinji kusikulu okonda kudandaula pa vinthu vamene ni vosafunika ngako. Tetyo ayawo akoŵatembeja pa intaneti ove oganiza kuti achita luweme—m’malo mowona vinthu moyenelela nofwana njila yangasilijile mavuto amene awo.”—Joanne.

MEYI 12-18

CHUMA CHUPEZEKA M’MAWU A MULUNGU MIYAMBO 13

Osasephewa na “laiti ya ŵanthu aipa”

Insight-2 pedji 196 ndim. 2-3

Laiti

Njila ziyakine zophiphilisila zenzeikatishila ntchito. Lambi yuphiphilisila chinthu chilichonse changakatishile ntchito munthu kuti asanikile njila. Pokatishila ntchito mawu amene aŵa ophiphilisila, lemba ya Miyambo yusiyanisha munthu wolungama na muipa ponena kuti: “Kungweleŵela kwa laiti ya munthu wolungama kuyangijilika ngako. Koma laiti ya ŵanthu aipa izazimyiwe.” (Miy 13:9) Kungweleŵela kwa laiti ya ŵanthu olungama kuyangijilika ngako, koma lambi ya ŵanthu aipa olo kuti ingweleŵele tyani, komasoti olo kuti vinthu pamoyo wawo vikoŵayendela luweme tyani, Mulungu azawonesheshe kuti apitilije kunkhala munfinzi, ndipo kwendo yawo izakhubulwe. Amene aŵa niye mapeto ŵakuyembekezela ŵanthu amene otembelela makolo ŵawo.—Miy 20:20.

Nsanja ya Mulonda 15/07/2012 pedji 12 ndim. 3

Tumikilani Mulungu wamene opeleka ufulu

Keno Satana ekwanisha kunyengelela ŵanthu aŵili amngwilo komasoti angelo ayakine kuti akane ulamulilo wa Mulungu, niye kuti sewo nase angakwanishe kutinyengelela. Satana aliye chinje. Yove oyeja-yeja kutipusisha kuti tikoganiza kuti mfundo za Mulungu ni zoŵeŵesha komasoti zutikangisha kunkhala osangalala. (1 Yoh. 5:3) Ŵanthu anyinji oganiza tetyo, ndipo keno sewo tutandala nawo ngako tingayambe kutolelako maganizo monga ni amene aŵa. Kalongosi muyakine wa vyaka 24 wamene echita chiwele-wele enena kuti: “Neyamba kutolela maganizo aipa ŵenze nawo ayangu, chifukwa chakuti nenzefunalini kuwoneka wosiyana na ove.” Payakine mwewo namwe muvutika chifukwa chakuti muwoneka wosiyana na ayanu.

Nsanja ya Mulonda 15/07/2004 pedji 31 ndim. 6

“Munthu wochenjela oziŵa vakuchita”

Munthu wanzelu komasoti wantima uweme, wamene ochita vinthu mozindikila, odalisiwa. Solomo efotokoza momvwika luweme kuti: “Munthu wolungama akulya nokuta, koma maluvumo a ŵanthu aipa okhala aliye kanthu.” (Miy 13:25) Yehova oziŵa vinthu vingatipindulishe pa moyo wasu, m’banja, ushamwali wasu na ŵanthu ayakine, utumiki wasu olosoti kulondela malangizo. Tetyo keno tuchita vinthu mwanzelu pokonkheja malangizo am’Mawu ŵake, tizankhale na moyo wosangalala ngako.

Kusakila-sakila Mfundo zingatiyavye

Insight-2 pedji 276 ndim. 2

Chikondi

Chikondi chingatiluŵilishe. Tikaganizila vifukwa vamene ivi, n’vowonekelatu kuti munthu angankhale na chikondi chokhulupilika moyayviwa na mzimu wa Mulungu komasoti kuŵaziŵa luweme Malemba. Mwachisanzo: Tata angomukonda ngako mwana wake. Koma payakine angowonesha chikondi chamene icho monyanyila nolola kuti chimuluŵilishe, chifukwa cha mwakumvwila muntima mwake noyamba kupasa mwana wake chilichonse chakufuna, osamutana kanthu. Payakine angakangiwe kulemekeza udindo wake wozuzula mwana nthawe ziyakine, olo kumupasa chilango ngacho-ngacho. (Miy 22:15) N’vowonekelatu kuti kuwonesha chikondi chantundu wamene uyu kungankhale kumekela ŵanthu am’banja mwanu, ndipo mungawoneshe kuti nimwe olikonda. Baibolo yuwonesha kuti ŵanthu antundu wamene uyu aliye chikondi koma ali na chidani, chifukwa ochitalini vinthu vamene vingayayve ŵana ŵawo kuti azapulumuke. Miy 13:24; 23:13, 14.

MEYI 19-25

CHUMA CHUPEZEKA M’MAWU A MULUNGU MIYAMBO 14

Mukoganizila mosamala vamungachite pakachitika ngozi za m’chilengedwe

Nsanja ya Mulonda 02/2023 pedji 22-23 ndim. 10-12

Tikotembeja mphaso ya moyo yechitipasa Mulungu

Nthawe ziyakine tingakwanishelini kupewa vinthu viyakine vamene vingachitishe kuti moyo wasu unkhale pangozi. Koma olo n’tetyo vinthu monga nivamene ivi vikachitika tingankhale otetezeka nopulumuka keno tukonkha malangizo akuti tifume m’dela yamene iyo olosoti malangizo ayakine opelekewa na akulu-akulu aboma. (Alo 13:1, 5-7) Nthawe ziyakine tingaujiwe kuti kuchitike ngozi, tetyo tingachite luweme kukonkha malangizo ŵa akulu-akulu a boma otiyavya kukonzekela. Mwachisanzo, vingankhale voyavya kusunga manzi na vakulya vamene vingawonongekelini komasoti mankhwala othandizila munthu akachitiwa.

Kansi tingachite tyani keno matenda opasilana ofalikila mudela yatunkhala? Tufunikila kumvwila malangizo angatiteteze monga kusamba m’manja, kunkhala patali na patali, kuvwala masiki komasoti kunkhala kwaseka. Tikoyeja-yeja kukonkheja malangizo amene aŵa tuwonesha kuti tutembeja mphaso ya moyo yechitipasa Mulungu.

Panthawe yangozi zosiyana-siyana tingamvwe nkhani zawenye kufumila kuli ayasu, kuli ŵanthu ŵatili nawo pafupi na pafupi komasoti kuli ofalisa nkhani. M’malo mokhulupilila “mawu aliwonse” ŵatamvwa tingachite luweme kumvwila malangizo odalilika kufumila ku boma olo kuli a zaumoyo. (Ŵelengani Miyambo 14:15.) Bungwe Yutonga komasoti maofesi a nthambi oyeja-yeja kufufuza mfundo zachendi akaliye peleka malangizo okhuza misonkhano ya mpingo komasoti ntchito yolalikila. (Ahe 13:17) Kukonkheja malangizo amene aŵa kuyavya kuti sewo komasoti ŵanthu ayakine tinkhale otetezeka. Tuyavyasoti kuti mpingo unkhale na mbili iweme.—1 Pet. 2:12.

Nsanja ya Mulonda 07/2024 pedji 5 ndim. 11

Nkhalani otang’a ntima monga nimwenzele Zadoki

Kansi tingawoneshe tyani kutang’a ntima monga ni Zadoki tikasengewa kuti tiyavye enekwasu panthawe yovuta? (1) Mukomvwila malangizo. Pavochitika monga nivamene ivi, n’kofunika kupitilija kunkhala okatijana. Mukochita vinthu mokatijana na malangizo a ofesi ya nthambi ya m’chalo chanu. (Ahe 13:17) Akulu ofunika kuŵelenga nthawe zonse malangizo onena za vangachite pokonzekela masoka, komasoti onena za vangachite pakachitika masoka. (1 Ako. 14:33, 40) (2) Mukochita vinthu motang’a ntima koma mochenjela. (Miy 22:3) Mukoyamba mwaganiza mukaliyechita chinthu. Mukopewa vinthu vamene vingaike moyo wanu pangozi. (3) Mukodalila Yehova. Yehova ofuna kuti mwewo pamozi nenekwasu munkhale otetezeka. Yove angakuyavyeni kuti muyavye enekwasu paliye kuika moyo wanu pangozi.

Kusakila-sakila Mfundo zingatiyavye

Insight-2 pedji 1094

Kuganiza luweme

Koma olo n’tetyo, munthu wamene ali na luso yoganiza angozondewasoti. Mawu amene aŵa, olaŵiliwa pa lemba ya Miyambo 14:17, yamene yunena kuti: “Munthu wamene oganiza luweme ozondewa.” Nthawe zinyinji munthu wamene niwosaganiza luweme osakila-sakila vinthu vophoniyeka kuli munthu wamene okatishila ntchito luso yake yoganiza. Komasoti ŵanthu amene okatishila ntchito maluso ŵawo oganiza pochita chifunilo cha Mulungu ozondewa. Monga nimwechinenela Yesu Khilisitu kuti: “Pakuti mulilini mbali ya chalo, koma newo nekusankhani kufumila m’chalo, pachifukwa chamene ichi chalo chuzondana namwe.” (Yoh 15:19) Nichendi kuti mawu amene aŵa eŵamasulila kuti “kuganiza” pa lemba ya Miyambo 14:17 koma angapamikijeposoti maganizo aipa. Tetyo lemba yamene iyi, ingatanthauzesoti kuti munthu wamene oganizila vinthu viipa ozondewa. M’vilaŵilo viyakine pomasulila mawu amene aŵa enena kuti: Munthu wamene ochitila ayake viŵembu [“wa maganizo aipa”] ozondewa na ayake.”—ALA, VB.

MEYI 26–DJUNI 1

CHUMA CHUPEZEKA M’MAWU A MULUNGU MIYAMBO 15

Mukoyavya ayakine kunkhala na ntima wosangalala

Nsanja ya Mulonda 15/11/2010 pedji 31 ndim. 16

Tizayende mokatijana na ntima wasu wosayaŵanika!

Yobu enze na ntima wotandaja. (Yobu 31:31, 32) Nasesoti, olo kuti nise osauka koma tingakwanishe ‘kulondela luweme alwendo.’ (Alo 12:13) Tingakwanishe kuyaŵana na ayakine vinthu vitontho vatili navo poziŵa kuti “vingankhale luweme kulya vakulya va matepo koma pali chikondi, kusiyana na kulya nyama ya ng’ombe yoina koma pali chidani.” (Miy 15:17) Kulya vakulya visafuna vinthu vinyinji koma pali ntendele na Nkhilisitu muyasu wokhulupilika n’kopindulisha ngako mwauzimu.

Nsanja ya Mulonda 04/2018 pedji 23-24 ndim. 16-18

Tikotang’ishana ndipo “tikochita ngako vamene ivi”

Chingankhalelini chinthu chanzelu kuganiza kuti sewo tingakwashelini kutang’isha ŵanthu ayakine chifukwa chakuti tusoŵa nkhani zatingalaŵile tikotandala na ayakine. Tulaŵila tetyo chifukwa chakuti kutang’isha munthu kufunalini vinthu vinyinji. Olo kungosekelela patupeleka moni kuli munthu muyakine tunkhala kuti tamutang’isha. Keno munthu muyakine wayankha moni wasu koma osasekelela vingawoneshe kuti payakine pali vuto iyakine, tetyo kumumvwishila munthu wamene uyo kungamutang’ishe ngako.—Yako. 1:19.

Chisanzo pa nkhani yamene iyi ni mulumbwana muyakine zina yake Henri. Yove ekhumudwa ngako pechiwona kuti akwake komasoti atata ŵake amene enze nkulu aleka chonadi. Henri esangalala ngako wopanamila dela pechimutola noluta kumalo ayakine kuyagula chakulya, pavuli pake noyamba kutandala naye kuti amufotokozele vili muntima mwake. Yove eziŵa kuti angakwanishe kuyavya akwake amene awo kuti ajokele m’chonadi keno yove angapitilije kunkhala mphela wokhulupilika. Yove etang’ishiwa ngako pechiŵelenga lemba ya Salimo 46; Zefaniya 3:17; komasoti Maliko 10:29, 30.

Chisanzo cha Marthe komasoti Henri chuwonesha kuti nivokwanishika kutang’isha munthu wamene ali na nkhaŵa. Mfumu Solomo elemba kuti: “Mawu olaŵiliwa pa nthawe yoyenelela ni aweme ngako! Menso atuŵa opangisha kuti ntima usangalale. Uthenga uweme uchitisha kuti vifupa vinkhale vamphamvu.” (Miy 15:23, 30) Kuŵelenga magazini a Nsanja za Mulonda komasoti nkhani zapa webisaiti yasu kungatang’ishe munthu wamene ali na nkhaŵa. Paulo ewonesha kuti kuimbila nyimbo za Ufumu pamozi kutang’ishasoti munthu wamene ali na nkhaŵa. Yove elemba kuti: “Pitilijani kuphunzisana notang’ishana na masalimo, nyimbo zotamanda Mulungu komasoti nyimbo zauzimu zotembeja, pitilijani kuimbila Yehova m’mitima yanu.”—Akol. 3:16; Ntch 16:25.

Kusakila-sakila Mfundo zingatiyavye

Makonsho okonshewa phunzilo 39 ndim. 3

Kansi Nkhilisitu angalondele chithandizo chamankhwala akalwala?

2. Kansi nikonshe maganizo kuli madokota ayakine nikaliye londela chithandizo chamene icho? Kumvwa maganizo a ŵanthu anyinji kungakuyavyeni kusankha luweme ngako-ngako keno matenda ŵanu ni akulu.—Miy 15:22.

DJUNI 2-8

CHUMA CHUPEZEKA M’MAWU A MULUNGU MIYAMBO 16

Makonsho atatu amene angatiyavye kuti tikopanga vosankha viweme

Nsanja ya Mulonda 15/01/2014 pedji 19-20 ndim. 11-12

Achilumbwana mukosankha vochita mwanzelu

Tunkhala osangalala ngako tikotumikila Yehova. (Miy 16:20) Vuwoneka kuti Baruki wamene enze mulembi wa Yelemiya enze eluŵa mfundo yamene iyi. Pa nthawe iyakine kutumikila Yehova kwenzemukondweleshalini. Tetyo, Yehova emuuja kuti: “Koma wewo usakila vinthu vikulu-vikulu. Leka kusakila-sakila vinthu vamene ivo. Chifukwa nasala patontho kuleta soka kuli ŵanthu onse ndipo wewo nizakupase moyo wako kuti inkhale mphaso yako kulikonse kwaungalute.” (Yer 45:3, 5) Kansi muwona kuti n’chinji chamene sembe cheyavya Baruki kunkhala wosangalala? Kansi ni kusakila vinthu vikulu-vikulu olo ni kutumikila Mulungu mokhulupilika, nopulumuka Yerusalemu penzewonongewa?—Yako. 1:12.

Mkwasu muyakine zina yake Ramiro, enzewona kuti kutumikila ayakine n’kokondwelesha ngako. Yove enena kuti: “Nifumila m’banja yosauka yamene yunkhala pa malupili ŵa Andes. Tetyo wenze mwayi ukulu ngako nkulu wangu pechinena kuti anilipilile kuti nilute ku yunivesiti. Koma nenze nichingobatizika kwalombapano, ndipo mpainiya muyakine enze enisenga kuti nikalalikile naye pamozi kukatauni kayakine katontho. Neluta kukatauni kamene ako ndipo nephunzila kugela sisi. Pavuli pake nekonza malo ŵangu akuti nikogelelamo ŵanthu kuti nikokwanisha kufwana vinthu vofunika pa moyo. Petenzesenga ŵanthu kuti tikophunzila nawo Baibolo, anyinji enzevomela komasoti kutembeja. Papita nthawe neyamba kusonkhana na mpingo wa chilaŵilo cha kwamene uko wamene wenze wechingonkhazikishiwa kwalombapano. Kufwika pano nankhala nuchita upainiya kwa vyaka 10. Paliye ntchito yamene inganikondweleshe kupambana kuyavya ŵanthu kumvwa uthenga uweme mu chilaŵilo chawo.”

Nsanja ya Mulonda 15/09/2013 pedji 17 ndim. 1-3

Kansi mwachinja?

Tonse tuchita vinthu mokatijana na dela yetikulila komasoti kwatunkhala. Ndipo tusiyana pa nkhani ya vovwala, vakulya komasoti chinkhalidwe. Vamene ivi vingachitike chifukwa tutolela ŵanthu ŵatunkhala nawo komasoti mwavilili vinthu pa moyo wasu.

Koma tusiyanasoti pa vinthu vofunika ngako kupambana vovwala komasoti vakulya. Mwachisanzo, mokatijana na mwetikulila, pali vinthu viyakine vatuwona kuti ni voyenela, pamene vinthu viyakine tuviwona kuti ni vophoniyeka. Tuchitasoti vinthu viyakine pokonkheja chikumbuntima chasu. Baibolo yunena kuti nthawe zinyinji ‘ŵanthu amitundu iyakine aliye chilamulo ochita mwachibadwa vinthu vili mu chilamulo.’ (Alo 2:14) Kansi vamene ivi, vutanthauza kuti keno Mulungu aliye peleke lamulo yolesha vinthu viyakine, niye kuti tingakonkheje vatuwona olo vakuwona ŵanthu am’dela yasu kuti nivoyenelela?

Akhilisitu ofunikalini kukonkheja maganizo ŵawo olo a ŵanthu ayakine. Tulaŵila tetyo pa vifukwa viŵili. Choyamba, Baibolo yutiuja kuti: “Pali njila yuwoneka monga ni iweme kuli munthu, koma pa mapeto pake yuleta imfwa.” (Miy 16:25) Chifukwa chakuti sewo niselini angwilo, sewo seka tingakwanishelini kusankha luweme vinthu vamene vingatiyavye pa moyo wasu. (Miy 28:26; Yer 10:23) Chachiŵili, Baibolo yuwonesha kuti chalo chonse chili m’manja mwa Satana. Tetyo maganizo komasoti mfundo zakuyendela ŵanthu anyinji a muli ichi chalo zufumila kwa Satana wamene ni “mulungu wa nthawe ino.” (2 Ako. 4:4; 1 Yoh. 5:19) Tetyo keno tufuna kuti Yehova atidalise tufunika kukonkheja malangizo ali pa Aloma 12:2.—Ŵelengani.

Kusakila-sakila Mfundo zingatiyavye

Insight-1 pedji 629

Chilango

Vokonkhapo vakumvwila komasoti kusamvwila. Ŵanthu aipa, opusa komasoti amene aliye minkhalidwe iweme owonesha kuti ozondana na chilango cha Yehova mwakukana malangizo ŵake. (Sl 50:16, 17; Miy 1:7) Vokonkhapo vakusamvwila malangizo, vingapangishe kuti munthu alondele chilango chikulu ngako. Monga nimwayunenela lemba ya Miyambo kuti: “Koma visilu vupasiwa chilango molingana na kupusa kwawo kwamene uko.” (Miy 16:22) Kusamvwila kwamene uku, kungalete wamba, nsoni, matenda komasoti kufwa mokulumija. Mbili ya Aisilaeli yuwonesha chisanzo cha mavuto akulu amene angawele chifukwa chakusamvwila. Ove aliyekonkheje malangizo ŵechiŵapasa aneneli. Kusamvwila kwawo kwewonesha kuti aliyetembeje kuti Yehova eŵateteza komasoti kuŵadalisa. Pamapeto pake ove elondela chilango chikulu chamene nikugonjesewa kunkhondo—komasoti kutolewa kuluta kuukapolo.—Yer 2:30; 5:3; 7:28; 17:23; 32:33; Ho 7:12-16; 10:10; Zef 3:2.

DJUNI 9-15

CHUMA CHUPEZEKA M’MAWU A MULUNGU MIYAMBO 17

Mukonkhala mwa ntendele m’banja mwanu

Ukani 09/2014 pedji 11 ndim. 2

Vamungachite kuti osati mukosunga chakuntima

Lifufuzeni mokwanila. Baibolo yuwonesha kuti ŵanthu ayakine ‘okonda kukalipa’ komasoti ‘okonda kupya ntima.’ (Miy 29:22) Kansi niye mwamulili mwewo? Likonsheni kuti: ‘Kansi newo nukulumija kupya ntima? Kansi nukhumudwa mokulumija? Kansi nukhumudwa olo pankhani zitontho-zitontho?’ Baibolo yunena kuti “wamene onkhalila kulaŵila za nkhani iyakine osilija ushamwali wapantima.” (Miy 17:9; Mla 7:9) Vamene ivi vingachitikesoti m’banja. Tetyo keno mukonda kusunga chakuntima mungalikonshe kuti, ‘Kansi ningachite tyani kuti nikonkhala woleza ntima mwanalume olo mwanakazi wangu akanikhumudwisa?’— 1 Pet. 4:8.

Nsanja ya Mulonda 1/05/2008 pedji 10 ndim. 6-11 ndim. 1

Kusilija mavuto

1. Sankhani nthawe yakuti mukambilane za vuto yamene iyo. “Chilichonse chili na nthawe yake . . . Nthawe yokezula na nthawe yoŵila, nthawe yonkhala chelele na nthawe yolaŵila.” (Mla 3:1, 7) Monga ni mwatawonela, nkangano uli kumayambililo kwa nkhani ino, mavuto ayakine angachitishe kuti mukoŵaŵiwa ntima. Pamukambilana nkhani iyakine, ndipo mwawona kuti mwayamba kupya ntima, yambani mwapanama kukambilana nkhani yamene iyo. Kukonkheja malangizo opezeka pa lemba ya Miyambo 17:14 kungateteze nkatijano wanu m’banja. Yove yunena kuti: ‘Kuyambisha ndewo kuli monga ni kubowola damu kuti manzi afumemo. Tetyo nkangano ukaliye yambika fumamponi.’

Koma olo n’tetyo, pali “nthawe yolaŵila.” Molingana na uzu wa mmunda, mavuto angakule ngako keno mungaŵalekelele kwa nthawe itali. Tetyo, osati mukoiwaya-waya vuto yamene iyo poganiza kuti isile yeka. Keno mwakatijana kuti muyambe mwaisiya nkhani yamene iyo lemekezani muyanu wamene uyo nosankha nthawe iyakine iweme kuti mukambilane. Kuchita vamene ivi kungakuyavyeni monse kuti mukonkheje malangizo am’Baibolo akuti: “Zuŵa osati ichome mukali kalipe.” (Aif 4:26) Tetyo, yeja-yejani kukwanilisha vamwakatijana.

Kusakila-sakila Mfundo zingatiyavye

Insight-1 pedji 790 ndim. 2

Linso

Manja komasoti menso vuwoneshelatu mwakumvwila munthu wamene uyo. Angawoneshelini chifundo (De 19:13); ‘angosunzumila’ olo ‘kukopela’ momeka komasoti kuchita vinthu vachinyengo. (Sl 35:19; Miy 6: 13; 16:30) Chifukwa chosafuna kuyavya ayake pankhani ziyakine, munthu wotetyo angafise menso ŵake. (Mt 13:15; Miy 28:27) Chisilu chutomolewa kuti menso ŵake akungoyenda-yenda mpaka “kumalekejelo aichi chalo,” paliye cholinga, ndipo maganizo ŵake alipaliponse kupatulapo pakunkhala. (Miy 17:24) Thanzi, mphamvu komasoti chisangalalo cha munthu vuwonekela kupitila mmenso ŵake. (1Sa 14:27-29; De 34:7; Yob 17:7; Sl 6:7; 88:9) Mfumu Yehosafati elaŵila na Yehova kuti: “Menso ŵasu ali pali mwewo.”—2Mb 20:12.

DJUNI 16-22

CHUMA CHUPEZEKA M’MAWU A MULUNGU MIYAMBO 18

Mukolaŵila mawu otang’isha kuli ŵanthu amene olimbana na mavuto athanzi

Nsanja ya Mulonda 10/2022 pedji 22 ndim. 17

Nzelu ngayo-ngayo yuŵilikija

Tikoyamba taganiza tikaliyelaŵila. Keno tusamalalini, tingayambishe mavuto akulu ngako na vatingalaŵile. Baibolo yunena kuti: “Pali munthu wamene olaŵila mosaganizila na mawu olasa monga ni chipula, koma lilimi ya munthu wanzelu yupojeka.” (Miy 12:18) Keno tupewa kutonja ŵanthu pali vala vinthu vakuphoniya, tuyavya kuti pankhale ntendele. (Miy 20:19) Keno tufuna kuti mawu ŵasu akonkhala otonthoja osati owononga kuli ŵanthu ayakine, tufunika kuŵelenga noganizila Mawu a Mulungu nthawe zonse. (Lu 6:45) Keno tuganizila vayunena Baibolo, mawu ŵasu angankhale monga ni “chisime cha nzelu” ndipo angatonthoje ayakine.—Miy 18:4.

Nkhani ziyakine phunzilo 19 pabokosi

Vingakuyavyeni keno mwayamba kulwala mwazizizi

Mukomvwishila akolaŵila. Njila iweme ngako yamungayayvile muyanu nikumvwishila akafuna kulaŵila namwe. Osati mukoganiza kuti mufunikila kuyankha pa chinthu chilichonse chawalaŵila. Nthawe zinyinji kumvwishila tyala n’kokwanila. Mukopewa kumuweluza koma mukoyeja-yeja kumumvwishila. Osati mukoganiza kuti muziŵa mwakumvwila mmuŵili mwake, ngako-ngako keno owoneka kuti olwalalini.—Miy 11:2.

Mukolaŵila vinthu votang’isha. Payakine mungasoŵe mawu ŵamungalaŵile. Mmalo monkhala chelele, mungalaŵile mawu atontho owonesha kuti mumumvwisha. Vamene ivi vingamutang’ishe. Mwachisanzo, keno muliye mawu ŵamunganene, yeja-yejani kulaŵila mawu osavuta koma ofumila pansi pantima monga akuti: “Nuziŵalini vaningalaŵile, koma ziŵani kuti nukukondani.” Koma osati mukolaŵila mawu monga akuti, “Pali ŵanthu ayakine amene otamana kupambana mwewo.” Olo akuti “Nkhasako mwewo chifukwa mulwala matenda a . . . ”

Mungawoneshe kuti mumufunila vinthu viweme keno muyeja-yeja kuti muziŵe vinyinji vokhuza matenda ŵake. N’vosakaikisha kuti azatembeje vinthu vamene ivi ndipo muzakwanishe kumuuja vinthu voyayva. (Miy 18:13) Koma osati mukonkhalila kupeleka malangizo okhuza matenda ŵake keno aliyekusengeni.

Mukomuyayva. Mmalo monkhalila kuganiza vamungachite pomuyayva, mukomukonsha vamungamuchitile. Koma mukokumbukila kuti muyanu wamene uyo payakine angavomelelini kuyavyiwa chifukwa ofunalini kukuvutishani. Keno n’tetyo, mukomuuja vinthu vamungachite monga kuyamugulila vinthu vofunika, kumukatila ntchito zapang’anda olo vinthu viyakine.—Aga 6:2.

Osati mutaye ntima. Muyanu akolwala nthawe ziyakine angakwanishelini kuchita vinthu vemwikatijana, komasoti angafunelini kutandala namwe. Mukochita naye vinthu moleza ntima komasoti kumumvwishila. Pitilijani kuyeja-yeja kumuyavya.—Miy 18:24.

Nsanja yogaŵila 01/2023 pedji 14 ndim. 3–15 ndim. 1

“Mukolaŵila molimbikisa.” —1 ATESALONIKA 5:14.

Payakine muyanu wamene uyo ali na nkhaŵa olo olimbana na vuto yoliwona kuti niwatyala-tyala. Mungamutang’ishe ngako komasoti kumutonthoja keno mumusimikijila kuti mumukonda, olo kuti muziŵalini vamunganene.

“Shamwali ngaye-ngaye okukonda nthawe zonse.”—MIYAMBO 17:17.

Mukochita vamungakwanishe pomuyayva. Mmalo moganiza kuti muziŵa kale vamufunikila kuchita kuti mumuyayve, mukomusenga kuti akuujeni vakufuna yove kuti mumuchitile. Keno muyanu wamene uyo okwanishalini kukufotokozelani vakufunikila, mukoyeja kukambilana naye vinthu vamungachitile pamozi monga kuyanyunga kumalo ayakine. Payakinesoti mungamusenge kuti mukamugulile vinthu ku maketi, kumuyavya ntchito zapang’anda olosoti vinthu viyakine.—Aga 6:2.

“Mukonkhala oleza ntima.”—1 ATESALONIKA 5:14.

Ninthawe zonselini pangakumasukileni muyanu wamene uyo nokufotokozelani maganizo ŵake. Mukomusimikijila kuti nimwe okonzeka kumumvwishila panthawe iliyonse yangafune kuti akufotokozeleni maganizo ŵake. Chifukwa cha matenda amene awo ŵakulwala, payakine yove angalaŵile mawu olo kuchita vinthu viyakine vamene vingakukhumudwiseni. Ndipo nthawe ziyakine angachinje vinthu vemwipangana kuti muzachitile pamozi, komasoti angakalipe pa vinthu visaziŵika luweme. Tetyo, mukochita naye vinthu moleza ntima komasoti mukomumvwisha panthawe yamumuyayva.—Miy 18:24.

Kusakila-sakila Mfundo zingatiyavye

Insight-2 pedji 271-272

Madjiki

Kuchita madjiki nimwambo wakale-kale wenzekatishila ntchito ŵanthu akafuna kusankha vochita pankhani iyakine. Njila zenzekatishila ntchito pochita madjiki, zenze kuponya tumyala olo tunthu tutontho-tutontho monga tumapulanga komasoti kuyanja chovwala pansi pavuli pake novigwedeza. Madjiki akaponela mmozi mwa ŵanthu amene awo komasoti kulondelewa niye kuti esankhiwa. Molingana na lumbilo, madjiki enzepanamilasoti pemphelo. Vamene ivi vutanthauza kuti enzefunikila kusenga Yehova kuti aloŵelelepo noyembekezela kuti chifunilo chake chichitike. Madjiki (Chiheberi., goh·ralʹ) enzekatishiliwasoti ntchito pavochitika ngavo-ngavo komasoti mophiphilisila mokatijana na “gawo.”—Yos 15:1; Sl 16:5; 125:3; Yes 57:6; Yer 13:25.

Venzekatishila ntchito. Lemba ya Miyambo 16:33 yunena kuti: “Madjiki oponyewa pavovwala koma vonse vakuwonesha madjiki amene awo vufumila kwa Yehova.” Munthawe ya Aisilaeli enzekatishila ntchito madjiki pofuna kusilija nkangano. Baibolo yunena kuti: “Kuchita madjiki kusilija nkangano ndipo kusilija nkhani pakati pa ŵanthu amphamvu.” (Miy 18:18) Enzekatishilalinisoti ntchito madjiki amene aŵa pamasoŵela komasoti potchaya njuga. Penzeve kubetchelana, kuluza olo kuwina. Enzechitalini vamene ivi pofuna kulemekeza kachisi, ansembe komasoti kuyavya ŵanthu ayakine. Mosiyana navamene ivi masodja Achiloma enze namaganizo ophoniyeka ofuna kupindulapo kanthu kayakine mwadyela, ndipo lemba ya Salimo 22:18, yenze inenelatu kuti ove azachite madjiki pa vovwala va Yesu.—Mt 27:35.

DJUNI 23-29

CHUMA CHUPEZEKA M’MAWU A MULUNGU MIYAMBO 19

Nkhalani shamwali ngaye-ngaye kuli anekwasu na akalongosi

Nsanja ya Mulonda 11/2023 pedji 12-13 ndim. 16-17

Vatufunikila kuchita kuti tikokondana ngako

Mukoika maganizo ŵanu pa vinthu viweme vakuchita enekwasu na akalongosi ŵanu, osati pa viipa vakuchita. Ganizilani chisanzo ichi. Tiyelekezele kuti muli pa nsonkhano pamozi na gulu ya enekwasu na akalongosi. Mwankhala na nthawe iweme ndipo pavuli pa nsonkhano muchosa foto gulu yamene iyo ya enekwasu. Pasogolo pake, mwewo muchosa mafoto aŵili chifukwa chakuti foto yoyamba iliyechoke luweme. Tetyo mwankhala na mafoto okwanila atatu. Lomba pavuli pake, mwewo mwawona kuti pafoto iyakine pa atatu amene awo m’bale muyakine aliyesekelele. Kansi mwewo mungachite nayo tyani foto yamene iyo? Mungaifimvye chifukwa muli na mafoto ayakine aŵili amene gulu yonse yachoka luweme kupamikijapo mkwasu wala wamene enzeve sekelele pafoto yoyamba.

Tingalinganije mafoto ŵala ŵamungasunge na vinthu vamuganizila. Sewo nthawe zinyinji tunkhala na vinthu viweme vatingakumbukile, monga nthawe yetenzetandala na abale komasoti alongo ŵasu. Koma tiyelekezele kuti panthawe iyakine pemwenzetandala, Mkwasu olo kalongosi elaŵila olo kuchita vinthu viyakine mosakuganizilani. Kansi tufunikila kuchita chinji tikayamba kuganizila vamene ivo? Tyani kuyeja kuifimvya nkhani yamene iyo monga ni mwamungachitile na foto imozi pa mafoto ŵala? (Miy 19:11; Aef. 4:32) Sewo tingakwanishe kuluŵa za chimo itontho ya Mkwasu olo kalongosi wasu chifukwa tukumbukila vinthu vinyinji viweme vechitichitila pathawe iyakine petenzetandala naye pamozi munthu wamene uyo. Vamene ivo niye vinthu vatufunikila kuganizila komasoti kuvisunga m’maganizo mwasu.

Nsanja ya Mulonda 07/2023 pedji 9-10 ndim. 10-11

Pitilijani kukulisha chikondi chanu

Sewo nase tusakila-sakila njila zatingayavyileko akwasu na akalongosi ŵasu. (Ahe 13:16) Ganizilani vichitikila Anna watatomola poyamba. Pavuli pachimphepo cha nkuntho, yove pamozi na mwanalume wake eluta ku ng’anda kwa banja iyakine ya Mboni, ndipo efwana kuti ntenje wa ng’anda yawo wapona na mphepo. Monga vokonkhapo vake, banja yamene iyo yenzeve vovwala vituŵa. Anna enena kuti: “Sewo titola vovwala vawo noluta navo kuyawasha, ndipo tiŵaletela vili votchisa komasoti vopeta-peta. Kuli sewo, vamene ivi venzelini vinthu vovuta kuvichita, koma chifukwa chakuti tevichita, sewo tankhala azishamwali apantima na ove mpaka pano.” Chikondi cha Anna na mwanalume wake kuli akwasu na akalongosi, chiŵalimbikisa kupeleka thandizo yofunikila.—1 Yoh. 3:17, 18.

Tikankhala aweme mtima nowonesha chikondi kuli ŵanthu ayakine, ove angowona kuti tuyeja-yeja kukonkheja Yehova. Komasoti ove angatembeje ngako kuwama mtima kwasu kupambana mwatuganizila. Khanh watatomola poyamba, okumbukila luweme vokhuza ŵanthu amene emuyavya. Yove enena kuti: “Nuŵatembeja ngako akalongosi onse okondewa amene enzenitola poluta muutumiki. Ove enzewela kuzanitola kung’anda kwangu kuti nikalye nawo chakulya ndipo pojokela kung’anda, ove enzewoneshesha kuti nafwika luweme. Palipano, newo nuziŵa kuti penzefunikila khama ikulu kuti ove akwanishe kuchita vamene ivo. Ndipo ove ekwanisha kuchita vamene ivo chifukwa cha chikondi.” N’chendi kuti ni ŵanthulini onse amene azatitembeje chifukwa cha vinthu vatuŵachitila. Ponena za ŵanthu amene emuyavya Khanh, enena kuti: “Nenze wofunishisha kuti niŵawejele chifukwa cha kuwama mtima kukulu kwechiniwonesha, koma lomba newo nuziŵalini kwakunkhala onse ŵanthu amene awo. Koma olo n’tetyo, Yehova oziŵa kwakunkhala ove, ndipo nupemphela kuti yove aŵawejele mmalo mwa newo.” Khanh olaŵila vachendi. Yehova owona olo kanthu katontho kowonesha kuwama ntima kwatuchitila ŵanthu ayakine. Yehova owonasoti kanthu kamene ako kunkhala nsembe ya ntengo wapatali komasoti monga nkhongole yakuti azaweje.—Ŵelengani Miyambo 19:17.

Nsanja ya Mulonda 11/2021 pedji 9 ndim. 6-7

Pitilijani kuwoneshana chikondi chokhulupilika

Masiku ŵano, tukwanisha kulaŵila za munthu wamene wakata ntchito vyaka vinyinji pa kampani kuti ni wokhulupilika ku kampani yamene iyo. Koma payakine vingachitike kuti pa vyaka vonse vamene ivo aliyekumanepo na anecho a kampani yamene iyo ndipo payakinesoti okatijanalini na malamulo ŵake. Yove oikondalini kampani yamene iyo koma osangalala chifukwa ntchito yamene iyo yumupasa ndalama zakufunikila. Koma opitilija kukata ntchito yamene iyo mpaka pakuti azapumule olo kufwana ntchito iweme kuyakine.

Kusiyana kwamene kulipo pakati pa kukhulupilika, na chikondi chokhulupilika chamene chatomolewa mu ndime 6, ni volinga vamene vuchitisha munthu kuti akowonesha minkhalidwe yamene iyo. Mu nkhani zatuŵelenga m’Baibolo, kansi n’chinji chenzechitisha ŵanthu a Mulungu kuti akowonesha chikondi chokhulupilika? Ove enzechita tetyo, osati chifukwa chakuti niye venzefunika kuchita, koma niye venzefuna kuchita. Ganizilani chisanzo cha Davide. Yove enzefunishisha kuwonesha chikondi chokhulupilika kuli muyake wapantima Yonatani olo kuti atata ŵake a Yonatani enzefuna kumupaya Davide. Papita vyaka vinyinji Yonatani pechimwalila, Davide epitilija kuwonesha chikondi chokhulupilika kuli Mefiboseti mwana wa Yonatani.—1 Sam. 20:9, 14, 15; 2 Sam. 4:4; 8:15; 9:1, 6, 7.

Kusakila-sakila Mfundo zingatiyavye

Insight-1 pedji 515

Malangizo na Mulangizi

Yehova niye munecho wanzelu. Yove ofunikilalini mulangizi. (Yes 40:13; Alo 11:34) Mwana wake okwanisha kuchita vinthu monga “Mulangizi wodabwisa,” opeleka malangizo nosogolela chifukwa chakuti okonkheja malangizo ŵechimupasa Atata ŵake ndipo osogolelewa na Mzimu wa Mulungu. (Yes 9:6; 11:2; Yoh 5:19, 30) Vamene ivi vutisimikijila kuti malangizo opindulisha, ofumila kwa Yehova. Malangizo aliwonse amene oshushana na malangizo a Yehova ni osapindulisha. Angankhalelini malangizo oyavya olo patontho.—Miy 19:21; 21:30.

DJUNI 30–DJULAYI 6

CHUMA CHUPEZEKA M’MAWU A MULUNGU MIYAMBO 20

Vamungachite kuti munkhale na chibwenzi chiweme

Nsanja ya Mulonda 05/2024 pedji 26-27 ndim. 3-4

Vamungachite kuti mukolemekeza Yehova mukankhala pachibwenzi

Olo kuti kunkhala pachibwenzi nikosangalasa ngako, mwanalume pamozi na mwanakazi ofunika kuwona chibwenzi kunkhala chinthu chofunika ngako chifukwa niye chingachitishe kuti alungulane. Pansiku yaukwati, mwanalume na mwanakazi olumbila pamenso pa Yehova kuti akokondana nolemekezana muyake na muyake kwa moyo wawo wonse. Tikaliyelumbilila chinthu chiyakine, tufunika kuchiganizila mosamala ngako poyamba. (Ŵelengani Miyambo 20:25.) N’chimozi-mozisoti na malumbilo apaukwati. Kunkhala pachibwenzi kuyavya mwanalume na mwanakazi kuti aziŵane luweme muyake na muyake, ndipo pavuli pake opanga chosankha chiweme. Nthawe ziyakine, ŵanthu amene ali pachibwenzi osankha kuti alungulane; koma nthawe ziyakine osankha kuti asilije chibwenzi chawo. Ŵanthu akasankha kuti chibwenzi chawo chisile, vutanthauzalini kuti akangiwa. Mmalo mwake, vutanthauza kuti akwanilisha cholinga chechinkhalila pachibwenzi—chibwenzi chikasila, niye kuti apanga chosankha chiweme.

Ŵanthu amene ali pachibwenzi ofunika kukumbukila kuti cholinga chawo nikuziŵa keno muyawo nimuweme kumanga naye banja olo yayi. Vamene ivi vutanthauza kuti mwanalume olo mwanakazi ofunikalini kuyamba chibwenzi na munthu koma pansi pantima oziŵa kuti azamangelini naye banja. Koma olo n’tetyo, ŵanthu amene ni mbeta ni ovelini ŵeka amene ofunika kunkhala na maganizo aweme pankhani yamene iyi. Tonse tufunika kukumbukila cholinga chonkhalila pachibwenzi. Mwachisanzo, ŵanthu ayakine oganiza kuti ŵanthu akayamba chibwenzi, mulimonse mwavingankhalile ofunika kuti alungulane. Kansi maganizo monga ni amene aŵa oŵakhuza tyani Akhilisitu amene ni mbeta? Kalongosi muyakine waku United States zina yake Melissa, enena kuti: “Mkwasu pamozi na kalongosi akayamba chibwenzi, Akhilisitu ayakine oganiza kuti azalungulane. Vamene ivi vuchitisha kuti Akhilisitu amene ali pachibwenzi apitilije mphela kunkhala pachibwenzi olo pavuli poziŵa kuti muyawo ni muwemelini kulungulana naye. Ŵanthu ayakine amene ni mbeta okanilatu kunkhala pachibwenzi. Vamene ivi vingayambishe mavuto akulu ngako.”

Nsanja ya Mulonda 05/2024 pedji 22 ndim. 8

Vamungachite kuti mufwane muyanu muweme wamungalungulane naye

Kansi mwewo mungachite tyani kuti mumuphunzile munthu muyakine koma munthu wamene uyo osaziŵa cholinga chanu? Mwewo mungakwanishe kuziŵa nkhalidwe yauzimu, umunthu wake, komasoti vochita va munthu wamene uyo potandala pagulu ya ŵanthu, olo pa misonkhano yampingo. Kansi azishamwali ŵake ni ŵanthu otyani, ndipo ni vinthu votyani vakukonda kulaŵila yove potandala? (Lu 6:45) Kansi volinga vali navo pa moyo wake n’vokatijana na vanu? Mungachite luweme kutandala na akulu amumpingo olo Akhilisitu otang’a mwauzimu. (Miy 20:18) Mungaŵakonshe kuti akuujeni vokhuza mbili yake komasoti minkhalidwe yali nayo. (Ru 2:11) Panthawe yamufufuza kuti mumuziŵe luweme munthu muyakine, mukopewa kuchita vinthu vamene vingamuchitishe kuti akonkhala wosamasuka. Mukolemekeza maganizo ŵake, nkhani zake zachisinsi, komasoti chilichonse chokhuza yove.

Nsanja ya Mulonda 05/2024 pedji 28 ndim. 7-8

Vamungachite kuti mukolemekeza Yehova mukankhala pachibwenzi

Kansi mwewo mungachite tyani kuti mumuziŵe luweme munthu muyakine? Mungachite vamene ivi pomukonsha makonsho nomumvwishila pakufotokoza. (Miy 20:5; Yako. 1:19) Monse aŵili mufunika kulaŵila vinthu vachendi, mwamumvwila muntima mwanu, komasoti kunena chilungamo muyanu akakukonshani. Payakine mungapange pulani kuti muchitile vinthu viyakine pamozi kuti mukwanishe kulaŵijana mosavuta monga kulyela pamozi, kunyungila pamozi, komasoti kuloŵa pamozi muutumiki. Mungaziŵane soti luweme popatula nthawe kuti mutandale na azishamwali komasoti achibale ŵanu. Kuyangijila pamene apo, mungapange pulani na cholinga chakuti muchitile vinthu viyakine pamozi kuti muwone mwakuchitila vinthu muyanu pavochitika vosiyana-siyana komasoti ŵanthu osiyana-siyana. Onani vakuchita Aschwin waku Netherlands. Ponena za Alicia wamene ni chibwenzi chake yove enena kuti: “Sewo tufufuza vinthu vamene vingatiyavye kuti tiziŵane luweme. Kanyinji-kanyinji vinthu vamene ivo vunkhala vosavuta monga kupikila pamozi, olo kukata ntchito ziyakine pamozi. Pokata ntchito monga ni zamene izi ukwanisha kuwona vinthu vakuchita luweme muyako na vasachita luweme.”

Mwewo mungaziŵanesoti luweme mwakuphunzila nkhani za m’Baibolo pamozi. Mukezelungulana, mukofunika kupatula nthawe kuti mukochita kulambila kwa pabanja, na cholinga chakuti mukoika Mulungu pasogolo m’banja mwanu. (Mla 4:12) Lomba muwona tyani kupatula nthawe kuti mukophunzila pamozi palipano panthawe yamukali pachibwenzi? N’chendi kuti palipano mukali pachibwenzi ndipo mukaliyemanga banja, ndipo mkwasu akaliyenkhala mutu kuti akosogolela kalongosi. Koma olo n’tetyo, kuphunzila pamozi monkhazikika kungakuyavyeni kuti muziŵe mwaulili moyo wanu wauzimu. Max pamozi na Laysa, yamene ni banja yaku United States, ifwana chinthu chiyakine chopindulisha. Yove enena kuti: “Kumayambililo kwachibwenzi chasu, sewo tenzephunzila vofalisa viyakine vunena za kunkhala pachibwenzi, ukwati, komasoti moyo wam’banja. Chifukwa chophunzila nkhani zamene izo sewo tekwanisha kukambilana vokhuza nkhani zinyinji zofunika ngako zamene sembe zetivuta kuti tiziyambishe.”

Kusakila-sakila Mfundo zingatiyavye

Insight-2 pedji 196 ndim. 7

Laiti

Mokatijana na lemba ya Miyambo 20:27 yamene yunena kuti: “Umphuye wa munthu ni laiti ya Yehova. Yusakila-sakila vinthu vankati mwantima wake.” Umphuye “wakuŵesa,” munthu olo kufumya mawu keno ni aweme olo aipa, owonesha umunthu wake wankati.—Yelekezelani na Ntchito 9:1.