Kansi kupemphela kungakuyavyeni tyani?

Munthu muyakine zina yake Pamela elwala ngako ndipo eluta ku chipatala. Koma epemphela soti kwa Mulungu kuti amupase mphamvu yopilila vuto yamene iyi. Kansi kupemphela kwamene uko kwemuyavya?

Pamela emupeza na matenda a kansa ndipo enena kuti: “Nthawe zinyinji nenzechita wowa nikolondela mankhwala a kansa. Koma nikapemphela kwa Yehova Mulungu ntima wenze nkhala mmalo ndipo nenzekwanisha kuganiza luweme. Nenze vutika mphela na ululu koma pemphelo yuniyavya kuwona vinthu moyenelela. Ŵanthu akanikonsha kuti ‘muli tyani?’ Nuyankha kuti ‘Nili lini bwino, koma nusangalala.’”

Koma tufunika lini kulindila kuti tikumane na vuto ikulu kuti tipemphele. Tonse tukumana na mavuto keno nakulu olo atontho, ndipo tufunika kuyavyiwa kuti tikwanishe kulimbana na mavuto amene awo. Koma kansi kupemphela kungakuyavyeni?

Baibolo yulaŵila kuti: “Umutulile Yehova nkhaŵa zako ndipo yove azakuyavye. Ndipo yove azalole lini kuti munthu wolungama apone.” (Salimo 55:22) Lemba yamene iyi niyotang’isha ngako. Koma kansi kupemphela kungakuyavyeni tyani? Mukopemphela kwa Mulungu mu njila yovomelejeka, yove azakupaseni vinthu vamene vingakuyavyeni kulimbana na mavuto ŵanu.—Onani bokosi yakuti “Vamungafwane chifukwa chopemphela.”

Vamungafwane chifukwa chopemphela

Ntendele wamuntima

“Vosenga vanu viziŵike kwa Mulungu. Mukachita tetyo ntendele wa Mulungu wamene ŵanthu angakwanishe lini kuumvwisha uzateteze mitima yanu na maganizo ŵanu pamukonkha Khilisitu Yesu.” (Afilipi 4:6, 7) Pamufotokozela Mulungu nkhaŵa zanu, yove azakuyavyeni kuti ntima wanu unkhale mmalo komasoti kuti mukochita vinthu mwanzelu mukakumana na mavuto.

Nzelu yofumila kwa Mulungu

“Tetyo keno muyakine osoŵa nzelu akosenga kwa Mulungu, ndipo azamupase, pakuti yove opeleka mosayumila kwa onse komasoti opeleka mosatonja.” (Yakobo 1:5) Nthawe ziyakine tusankha lini vinthu mwanzelu keno tafyandikijika. Koma tikasenga kuti Mulungu atipase nzelu, angatikumbushe Mfundo zinyinji zoyavya zopezeka m’mawu ŵake Baibolo.

Mphamvu komasoti chilimbikiso

“Pa vinthu vonse nufwana mphamvu kufumila kwa Mulungu wamene onipasa mphamvu zanufunikila.” (Afilipi 4:13) Pakuti Yehova ni wamphamvu yonse, angakupaseni mphamvu zamufunikila kuti mukwanishe kulimbana na mavuto olo kuŵapilila. (Yesaya 40:29) Baibolo yutomola Yehova kuti ni “Mulungu wamene otitonthoja mwanjila iliyonse.” Yove angatilimbikise “pa mayeselo ŵasu wonse.”—2 Akolinto 1:3, 4.