Paliye chinthu chingakangishe ŵanthu amene okonda vakufuna Mulungu kuti aleke kumutumikila

1-2. Kansi wolemba muyakine enena chinji, ndipo tikambilane chinji mu nkhani ino?

MASIKU ŵano ŵanthu mamiliyoni anyinji onena kuti okhulupilila Yesu, koma ove okonkhejalini vinthu venzephunzisa yove. (2 Tim. 4:3, 4) Kulaŵila chendi, wolemba muyakine ulwendo uyakine enena kuti: “Koma kuti pakati pasu pali munthu monga ni Yesu masiku ŵano, wamene angonena vinthu monga ni mwenzenenela Yesu . . . , kansi sembe tumukana munthu wamene uyo monga ni mwechichitila ŵanthu kumukana Yesu vyaka 2.000 vapita?  . . . Yankho ni yakuti: Eye, sewo sembe tumukana munthu wamene uyo.”

² Yesu penze pano pachalo, ŵanthu anyinji emumvwa yove penzephunzisa ndipo emuwona yove ochita vodabwisa, koma ove ekana kumukhulupilila. Ndaŵa yanji? Mu nkhani yapita, tikambilana vifukwa 4 vamene vichitisha ŵanthu kumukana Yesu chifukwa cha venzenena komasoti kuchita. Lomba tiyeni tikambilanesoti vifukwa viyakine vokwana 4. Tiwonesoti chifukwa chake ŵanthu masiku ŵano okana ophunzila a Yesu komasoti mwatingankhalile osimikijila kuti paliye chinthu chilichonse chamene chingatikangishe kutumikila Yehova.

(1) YESU ENZEVE SANKHO

3. Kansi Yesu esankha kuchita chinji chamene chichitisha kuti ŵanthu ayakine amukane?

³ Penze akali pano pachalo, Yesu esankha kukatijana na ntundu uliwonse wa ŵanthu. Yove enzekulya pamozi na ŵanthu olemela komasoti amphamvu, koma yove enzetolasoti nthawe ikulu ali pamozi na ŵanthu osauka komasoti okandililiwa. Kuyangijila pali vamene ivi, yove enzechitila chifundo ŵanthu ayakine amene enzewonewa kuti ni “ochimwa.” Ŵanthu ayakine omeka emukana Yesu chifukwa cha vinthu vechichita yove. Ove ekonsha ophunzila ŵake kuti: “Ndaŵa yanji mwewo mukulya na kumwa pamozi na okhomesha nsonkho komasoti na ŵanthu ochimwa? Poyankha Yesu enena kuti: “Ŵanthu athanzi ofunalini dokota, koma olwala niye omufuna. Newo niliyewele kuzaita ŵanthu olungama, koma ochimwa kuti alape.”​—Lk. 5:29-32.

4. Mokatijana na mneneli Yesaya, kansi Ayuda enzefunika kuyembekezela votyani vokhuza Mesiya?

⁴ Kansi Malemba onena kuti tyani? Kale Mesiya akaliyewela, mneneli Yesaya emufotokoza kuti ni mmozi wamene akuti azakaniwe na chalo. Ulosi wamene uyo winenelatu kuti: “Yove enyozewa ndipo ŵanthu enzemupewa. Enze munthu wamene eziŵa kuŵaŵa komasoti wamene eziŵa matenda. Sewo tenzelola kumbali kuti osati tiwone chinso chake. Enyozewa ndipo timuwona monga watyala-tyala.” (Yes. 53:3) Ulosi winena kuti Mesiya ‘ŵanthu azamupewe,’ tetyo Ayuda mu nthawe ya Yesu enzefunika kuyembekezela kuti Yesu azakaniwe.

5. Kansi ŵanthu anyinji masiku ŵano oŵawona tyani ophunzila a Yesu?

⁵ Kansi masiku ŵano tukumana na vuto imo na imo? Eye. Asogoleli a vipembezo anyinji onkhala okondwela keno ŵanthu asankha kunkhala mu vipembezo vawo vakuwona kuti ni vofunika ngako, volemela komasoti akowonewa kuti ni anzelu na ichi chalo. Ove olola kuti ŵanthu amene awo ankhale mu chipembezo chawo, olo kuti ŵanthu amene awo ochita vinthu vakuzonda Yehova Mulungu. Koma asogoleli a vipembezo ozondana na atumiki a Yehova amene ni akhama komasoti a minkhalidwe iweme chifukwa chakuti ŵanthu anyinji muli ichi chalo oŵawona kuti ni osafunika. Monga ni mwechinenela Paulo, Mulungu osankha vinthu vuwonewa kuti ni “vatyala-tyala.” (1 Akor. 1:26-29) Tetyo, kwa Yehova, atumiki ŵake onse okhulupilika ni ofunika.

6. Kansi tingaikonkheje tyani minkhalidwe ya Yesu, monga ni mwayufotokozela lemba ya Mateyu 11:25, 26?

⁶ Kansi ni chinji chingatiyavye kuti osati titaye chikhulupililo chasu? (Ŵelengani Mateyu 11:25, 26.) Osasemphewa na malingalilo a chino chalo okhuza mwakuŵawonela ŵanthu a Mulungu. Vomekejani kuti Yehova okatishila tyala ntchito ŵanthu olichefya kuti achite chifunilo chake. (Sal. 138:6) Ndipo ganizilani vinthu vachita yove pokatishila ntchito ŵanthu ŵala amene muli ichi chalo owonewa kuti aliye nzelu komasoti oziŵalini vinthu.

(2) YESU EWULULA VIPHUNZISO VAWENYE

7. Ndaŵa yanji Yesu etomola Afarisi kuti onyenga, ndipo ove echita tyani?

⁷ Motang’a ntima, Yesu ezuzula asogoleli a vipembezo a m’nthawe yake chifukwa chakuti ove enzephunzisalini ŵanthu kulambila Yehova mu njila iweme. Mwachisanzo, yove ewonesha kuti Afarisi enze achinyengo chifukwa ove enzeikila ngako nzelu mwangasambile kumanja kusiyana na mwangasamalilile makolo ŵawo. (Mt. 15:1-11) Ophunzila a Yesu payakine edabwa ngako na mawu ŵake. Tetyo, ove emukonsha kuti: “Kansi muziŵa kuti Afarisi akalipa na vala vamwanena?” Yesu eyankha kuti: “Mbewu iliyonse yamene iliyekomolewe na Atata ŵangu ŵakululu izanyuliwe. Ŵalekeni amene awo. Ove ni asogoleli asalola. Tetyo, keno munthu asalola osogolela asalola muyake, onse aŵili oponela m’chisengu.” (Mt. 15:12-14) Olo kuti asogoleli a vipembezo ekalipa naye Yesu chifukwa cha vinthu vechinena yove, Yesu aliyeleke kulaŵila vinthu vachendi.

8. Kansi Yesu ewonesha tyani kuti ni vonselini vikhulupililo vachipembezo vamene ni vovomelejeka kwa Mulungu?

⁸ Yesu ewoneshasoti kuti viphunziso viyakine vachipembezo venze vawenye. Yove aliyenene kuti vinthu vonse vavukhulupilila vipembezo ni vovomelejeka kwa Mulungu. Mmalomwake, yove elaŵila za ŵanthu anyinji amene akuti azayende mu nsewu ukuya ku chiwonongeko, koma atontho tyala niye akuti azayende mu nsewu wopapatija ukuya ku moyo. (Mt. 7:13, 14) Yove ewonesha luweme kuti ŵanthu ayakine angazanena kuti otumikila Mulungu, koma kulaŵila chendi ove azankhale kuti omutumikilalini. Yove echenjeja kuti: “Chenjelani na aneneli awenye amene owela kuli mwewo ovwala n’nga ni mbelele, koma nkati mwawo ali monga ni mphumphi zolusa. Mukaŵaziŵe na vitwazi vawo.”​—Mt. 7:15-20.

9. Kansi viphunziso viyakine vawenye vechiwulula Yesu ni votyani?

⁹ Kansi Malemba onena kuti tyani? Ulosi wa m’Baibolo winenelatu kuti Mesiya azalyewe chifukwa cholipeleka pa ng’anda ya Yehova. (Sal. 69:9; Yoh. 2:14-17) Khama yamene iyi ichitisha Yesu kuwulula viphunziso komasoti miyambo yawenye ya vipembezo. Mwachisanzo, Afarisi enzekhulupilila kuti mzimu ukufwalini; koma Yesu ephunzisa kuti akufwa aliyone. (Yoh. 11:11) Asaduki enzekhulupililalini kuti akufwa azaushiwe; koma Yesu eusha nshamwali wake Lazaro. (Yoh. 11:43, 44; Mac. 23:8) Afarisi enzephunzisa kuti mphamvu isawoneka kapena kuti Mulungu niye osankha vinthu vonse vikuti vizatichitikile olo vatikuti tichite; koma Yesu ephunzisa kuti ŵanthu angasankhe kutumikila Yehova olo yayi.​—Mt. 11:28.

10. Ndaŵa yanji anyinji masiku ŵano otikana chifukwa cha vinthu vatuphunzisa?

¹⁰ Kansi masiku ŵano tukumana na vuto imo na imo? Eye. Ŵanthu anyinji otikana ndaŵa yakuti tukatishila ntchito Baibolo kuti tiŵawoneshe kuti malingalilo ayakine a vipembezo ni awenye. Asogoleli a vipembezo ophunzisa ŵanthu ŵawo kuti Mulungu olanga ŵanthu aipa ku mulilo. Ove okatishila ntchito chiphunziso chamene ichi chawenye kuti apitilije kutonga ŵanthu. Ŵanthu amene olambila Yehova, Mulungu wachikondi, oyavya ŵanthu kumvwisha kuti chiphunziso chamene ichi ni chawenye. Asogoleli a vipembezo ophunzisasoti kuti mzimu ukufwalini. Sewo tuwulula mwechiyambila chiphunziso chachikunja chamene ichi, ndipo kuti chiphunziso chamene ichi​—ni chachendi, sembe—paliye angafunikile kuzaushiwa. Sewo tusimikijila kuti chiphunziso chamene ichi chililini m’Baibolo yayi. Ndipo olo kuti vipembezo vinyinji vuphunzisa kuti chilichonse chatuchita chisankhiliwatu na Mulungu olo na mphamvu iyakine isawoneka, sewo tuphunzisa kuti munthu ali na ufulu wosankha ndipo angasankhe kutumikila Mulungu. Kansi asogoleli a vipembezo ochita chinji tikoŵaulula kuti ni aphunzisi awenye? Nthawe zinyinji ove okalipa!

11. Mokatijana na mawu a Yesu amene opezeka pa lemba ya Yohane 8:45-47, kansi Mulungu ofuna kuti ŵanthu ŵake akochita chinji?

¹¹ Kansi ni chinji chingatiyavye kuti osati titaye chikhulupililo chasu? Keno sewo tukonda choonadi, tufunika kukhulupilila komasoti kumvwila vakunena Mulungu. (Ŵelengani Yohane 8:45-47.) Mosiyana na Satana Mdyelekezi, sewo tikanelini choonadi olo patontho. Sewo tuchitalini chinthu chilichonse chamene chukatijanalini na vatukhulupilila. (Yoh. 8:44) Mulungu ofuna kuti ŵanthu ŵake ‘akonyansiwa na chiipa’ komasoti ‘akokatishisha chiweme,’ monga ni mwechichitila Yesu.​—Aro. 12:9; Ahe. 1:9.

(3) YESU ETAMANISHIWA

12. Ndaŵa yanji Ayuda anyinji emukana Yesu chifukwa cha mwechipailiwa?

¹² Kansi chifukwa chiyakine chechikanila Yesu Ayuda ni chotyani? Paulo enena kuti: “Sewo tulalikila za Khilisitu wamene epachikiwa. Kuli Ayuda, chamene ichi ni chinthu chokhumudwisa.” (1 Akor. 1:23) Ndaŵa yanji Ayuda anyinji emukana Yesu chifukwa chakuti yove epachikiwa pa chimuti chotamanilapo? Kuli ove, imfwa ya Yesu pa chimuti chotamanilapo ichitisha kuti yove awoneke monga ni chigaŵenga komasoti wochimwa, niye chifukwa chake ove ekana kumukhulupilila​—kuti yove enze Mesiya.​—Deut. 21:22, 23.

13. Kansi ŵala ekana Yesu aliyefune kukhulupilila chinji?

¹³ Ayakine mwa Ayuda amene ekana Yesu, eyifya kusamuziŵa kuti yove ni wosalakwa, etalijiliwa wenye komasoti kuti aliyechitiliwe vinthu mwachilungamo. Ŵanthu amene enzetonga mulandu wa Yesu enzenyoza chilungamo. Oweluza a khoti ikulu Yachiyuda eungana mokulumija kuti aweluze Yesu ndipo ove aliyekonkheje malamulo okhuza chiweluzo. (Lk. 22:54; Yoh. 18:24) Oweluza aliyechite chilungamo pechimvwa milandu komasoti maumboni otalijila wenye Yesu. Ndipo ove nawo eyeja-yeja kufwana “umboni wawenye woshushana na Yesu kuti amupaye.” Koma ove aliyekwanishe kuufwana, tetyo nkulu wa ansembe eyesa Yesu kuti alaŵile chinthu chiipa kuti ove amunene kuti ni wophoniya. Vamene ivi venze vosakatijana na malamulo ovomelejeka. (Mt. 26:59; Mk. 14:55-64) Ndipo Yesu pechiushiwa kwa akufwa, oweluza achinyengo elipila masodja Achiroma “ndalama zinyinji zasiliva” amene enzeteteza manda ŵake kuti afalise nkhani yawenye, nofotokoza chifukwa chake m’manda mwamene umo mwenzeve kanthu.​—Mt. 28:11-15.

14. Kansi Malemba elosela vinthu votyani vokhuza imfwa ya Mesiya?

¹⁴ Kansi Malemba onena kuti tyani? Olo kuti m’masiku a Yesu Ayuda enzeyembekezelalini kuti Mesiya azafunikile kufwa, onani vinthu ivi viloselewa m’Malemba: “Pa chifukwa chamene ichi, nizamupase gawo pamozi na anyinji ndipo yove azayaŵane vechilonda na amphamvu, chifukwa ekhutula moyo wake mu imfwa ndipo ewonewa monga mmozi wa ochimwa. Yove etakula chimo ya ŵanthu anyinji ndipo eloŵelelapo kuti ayavye ophoniya.” (Yes. 53:12) Niye chifukwa chake Yesu pechiimbiwa mulandu wochita chinthu chiipa ngako nopaiwa, chenzelini chifukwa chiweme chakuti Ayuda amukane.

15. Kansi ni milandu yotyani yawenye yakutalijiliwa a Mboni za Yehova yamene yachitisha ayakine kuŵakana?

¹⁵ Kansi masiku ŵano tukumana na vuto imo na imo? Mosakaikila! Yesu eyopejelewa mulandu wawenye ndipo eimbiwa mulandu wakuti ni wophoniya, ndipo masiku ŵano ŵanthu ochitasoti chimozi-mozi kuli a Mboni za Yehova. Onani visanzo viyakine. Ku United States pakati pa vyaka vam’ma 1930 na 1950, kwitongewa milandu inyinji ku makhoti na cholinga chofuna kuteteza ufulu wasu wolambila Mulungu. Oweluza ayakine enze na malingalilo ophoniyeka ponena za sewo. Ku Quebec, chipembezo na Boma onse ekata ntchito pamozi kuti aleshe ntchito yasu. Ofalisa anyinji emangiwa chifukwa choujako tyala ayawo vokhuza Ufumu wa Mulungu. Ku Germany, boma ya Nazi, ipaya abale achilumbwana anyinji okhulupilika. Ndipo kwalombapano vyaka vakuvuli, anyinji mwa abale ŵasu ku Russia eweluziwa komasoti kuikiwa mu djeli chifukwa cholaŵila vokhuza Baibolo, chifukwa a boma enena kuti ntchito yamene iyi ni “ntchito yoyofwa.” Ndipo olo Baibulo la Dziko Latsopano la Malemba Opatulika mu chilaŵilo cha ku Russia ileshewa ndipo iwonewa monga “chinthu choyofwa” chifukwa chakuti yukatishila ntchito zina yakuti Yehova.

16. Monga ni mwayufotokozela lemba ya 1 Yohane 4:1, ndaŵa yanji tufunikalini kusemphewa na nkhani zawenye zokhuza ŵanthu a Yehova?

¹⁶ Kansi ni chinji chingatiyavye kuti osati titaye chikhulupililo chasu? Ziŵani nkhani yonse. Pa ulaliki wake wapalupili, Yesu echenjeja kuti ŵanthu ayakine ‘azatalijile wenye komasoti kunenela vinthu viipa’ ophunzila ŵake. (Mt. 5:11) Munecho wa wenye wamene uyu ni Satana. Yove olimbikisa ŵala oshusha kuti afalise vinthu viipa ponena za ŵala okonda choonadi. (Chiv. 12:9, 10) Sewo tufunika kuukana wenye unenewa na ŵala otishusha. Tufunikalini kulola olo patontho kuti wenye wamene uyu utichitishe wowa wotumikila Mulungu olo kufokesha chikhulupililo chasu.​—Ŵelengani 1 Yohane 4:1.

(4) YESU EPELEKEWA KOMASOTI ETHAŴIWA

17. Kansi vinthu vichitika Yesu akaliyepaiwa payakine vichitisha tyani ŵanthu ayakine kumukana Yesu?

¹⁷ Wasala patontho kuti apaiwe, Yesu epelekewa na mmozi mwa atumwi ŵake okwana 12. Ntumwi muyakine ekana Yesu katatu, ndipo atumwi ŵake onse emuthaŵa usiku wakuti apaiwe mmawa mwake. (Mt. 26:14-16, 47, 56, 75) Yesu aliyedabwe navo vamene ivi. Yove enze enenelatu kuti vamene ivi vizachitike. (Yoh. 6:64; 13:21, 26, 38; 16:32) Vinthu vamene ivi pevichitika, ayakine payakine esankha kusafuna kunkhala ophunzila ŵake. Payakine ove eganiza kuti: ‘Keno ophunzila a Yesu niye mwakuchitila teti, newo nufunalini kunkhala mmozi wa ove!’

18. Kansi ni maulosi otyani ekwanilishiwa na vinthu vichitika Yesu wasala patontho kufwa?

¹⁸ Kansi Malemba onena kuti tyani? Vyaka mahandiledi anyinji Yesu akaliyewela pano pachalo, Yehova ewulula m’Mawu ŵake kuti Mesiya azapelekewe na ndalama 30 za siliva. (Zek. 11:12, 13) Womupeleka azankhale mmozi mwa azishamwali apantima a Yesu. (Sal. 41:9) Mneneli Zekariya nayesoti elemba kuti: “Paya nchiŵeta ndipo mbelele zake zimwajikane.” (Zek. 13:7) Ŵanthu a mitima iweme sembe aliyemukane Yesu chifukwa cha vochitika vamene ivi. Chikhulupililo chawo sembe chitang’ishiwa pewikwanilishiwa ulosi wamene uyu pali Yesu.

19. Kansi ŵanthu okhulupilika oziŵa votyani?

¹⁹ Kansi masiku ŵano tukumana na vuto imo na imo? Eye. Masiku ŵano, a Mboni za Yehova amene oziŵika luweme asiya kutumikila Yehova, ankhala ampatuko ndipo ankhala oyeja-yeja kupatusha ayakine. Ove afalisa malipoti aipa, nkhani zawenye, wenye unena a Mboni za Yehova mu manyunzipepa, pa wailesi, pa TV komasoti pa intaneti. Koma ŵanthu okhulupilika osemphewalini. Mmalomwake, ove oziŵa kuti Baibolo inenelatu kuti vinthu voteti vizachitike.​—Mt. 24:24; 2 Pet. 2:18-22.

20. Kansi tingapewe tyani kusemphewa na ŵala amene asiya kutumikila Yehova? (2 Timoteyo 4:4, 5)

²⁰ Kansi ni chinji chingatiyavye kuti osati titaye chikhulupililo chasu? Tufunika kutang’isha chikhulupililo chasu mwa kuphunzila nthawe zonse, kupemphela mosalekeja komasoti kunkhala otangwanika na ntchito yatapasiwa na Yehova kuti tiichite. (Ŵelengani 2 Timoteyo 4:4, 5.) Keno tili na chikhulupililo chotang’a, tichitelini wowa tikamvwa malipoti aipa okhuza a Mboni za Yehova. (Yes. 28:16) Kukonda kwasu Yehova, Mawu ŵake komasoti abale ŵasu, kutiyavye kupewa kusemphewa na ŵala amene asiya choonadi.

21. Olo kuti ŵanthu anyinji masiku ŵano akane uthenga wasu, kansi tingankhale osimikijila za chinji?

²¹ Mu nthawe ya atumwi, anyinji ekhumundwa komasoti emukana Yesu. Koma olo n’tetyo, ayakine emuvomela. Ayakine mwa ŵanthu emuvomela enze mmozi wa m’Bungwe Ikulu ya Ayuda komasoti “ansembe anyinji.” (Mac. 6:7; Mt. 27:57-60; Mk. 15:43) Molingana na vamene ivi, ŵanthu mamiliyoni anyinji asankha kukonkheja Yesu. Ndaŵa yanji? Ndaŵa yakuti ove oziŵa choonadi cha m’Malemba komasoti kuchikonda. Mawu a Mulungu onena kuti: “Okonda chilamulo chanu ofwana ntendele unyinji; ndipo paliye chinthu chingaŵakhumudwise.”​—Sal. 119:165.