Pitilijani kukonzekela nsiku ya Yehova

1. Kansi tufunikila kuchita tyani kuti tizapulumuke pa nsiku ya Yehova?

BAIBOLO ikolaŵila za “nsiku ya Yehova” yunena za nthawe yakuti azaweluze adani ŵake Yehova nopulumusha ŵanthu ŵake. M’masiku a kuvuli, nthawe ziyakine Yehova enzepeleka chiweluzo. (Yes. 13:1, 6; Eze. 13:5; Zef. 1:8) Mu nthawe yasu ino, “nsiku ya Yehova” izayambe na kuukiliwa kwa Babulo Nkulu ndipo izafwike pa chimake pa nkhondo ya Aramagedo. Kuti tizapulumuke pa “nsiku” yamene iyo, tufunikila kukonzekela palipano. Pa nkhani ya “chisauso chikulu” Yesu aliye nene tyala kuti tufunika kunkhala okonzekela “chisauso chikulu” koma enenasoti kuti “pitilijani kunkhala okonzeka.”—Mt. 24:21; Lk. 12:40.

2. Ndaŵa yanji tingapindule na buku ya 1 Atesalonika?

² Mu kalata yake yoyamba youjiliwa yoluta kuli Atesalonika, ntumwi Paulo ekatishila ntchito mafanizo anyinji kuti ayavye Akhilisitu kupitilija kukonzekela nsiku ikulu ya chiweluzo ya Yehova. Paulo enzeziŵa kuti nsiku ya Yehova ingafwikiletulini pa nthawe yamene iyo. (2 Ates. 2:1-3) Koma olo n’tetyo, yove elimbikisa abale ŵake kukonzekela nsiku yamene iyo monga kuti ifwike mailo, ndipo nasesoti tingakonkheje malangizo ŵake. Tiyeni tikambilane mwechifotokozela vinthu ivi vokonkhapo: (1) mwaikuti izawelele nsiku ya Yehova, (2) amene akuti azaleke pulumuka pa nsiku yamene iyo, komasoti (3) mwatingakonzekelele kuti tizapulumuke.

KANSI NSIKU YA YEHOVA IZAWELE TYANI?

3. Kansi nsiku ya Yehova izawele tyani monga ni kawalala usiku? (Onanisoti chithunzi.)

³ “Monga ni kawalala usiku.” (1 Ates. 5:2) Yamene iyi ni imozi mwa mafanizo atatu amene ekatishiliwa ntchito pofotokoza za kufwika kwa nsiku ya Yehova. Nthawe zinyinji akawalala ochita vinthu mokulumija komasoti pakati pa usiku pa nthawe yamene ŵanthu oiyembekezelalini. Nsiku ya Yehova izafwikesoti mozizimusha komasoti modabwisa kuli ŵanthu anyinji. Olo Akhilisitu achendi angadabwe kuwona kukulumija kwa mwavuchitikila vinthu. Koma mosiyana na ŵanthu aipa sewo tizawonongewelini.

4. Kansi nsiku ya Yehova ili monga ni voŵaŵa va povyala munjila yotyani?

⁴ “Monga voŵaŵa vapovyala va mwanakazi wa vumo.” (1 Ates. 5:3) Mwanakazi ali na vumo angaziŵiletulini nthawe ngayo-ngayo yakuti azavyale. Koma olo n’tetyo yove okaikilalini kuti vamene ivi vizachitike. Vamene ivi vikachitika, kuvyala kuwoneka monga ni kozizimusha, koŵaŵa, komasoti kuliye mapeto. Molingana na vamene ivi, tuziŵalini nsiku olo nthawe yaikuti izayambe nsiku ya Yehova. Koma olo n’tetyo, sewo tukhulupilila kuti nsiku yamene iyo ikuza ndipo chiweluzo cha Mulungu pa ŵanthu aipa chizachitike mozizimusha komasoti chizaŵe chosathaŵika.

5. Kansi chisauso chikulu chulingana tyani na mmatemwa kucha?

⁵ Monga ni mmatemwa kucha. Fanizo ya Paulo yachitatu yutomolasoti akawalala amene oiŵa usiku. Koma Paulo ochinja kafotokozedwe ka vinthu ndipo vuwoneka kuti oyelekezela nsiku ya Yehova na mmatemwa kucha. (1 Ates. 5:4) Akawalala amene owela pakati pa usiku angakwanishelini kuziŵa kuti nthawe yusila. Kungweleŵela kwa nsiku yokonkhapo kungaŵafwane mozizimusha noŵaulula. Molingana na vamene ivi, chisauso chikulu chizaulule ŵanthu ŵala amene molingana na akawalala amene onkhala mu mfinzi opitilija kuchita vinthu vasakondwela navo Mulungu. Mosiyana na ove, sewo tingankhale okonzekela pokana minkhalidwe yasakondwela nayo Mulungu noyamba kukonkheja “chilichonse chiweme chilichonse cholungama na chachendi.” (Aef. 5:8-12) Pasogolo pake Paulo efotokoza mafanizo aŵili olingana ponena za ŵanthu amene azapulumukelini.

KANSI NIŴANI AKUTI AZAWONONGEWE PA NSIKU YA YEHOVA?

6. Kansi ŵanthu anyinji aliyone mwanjila yotyani? (1 Atesalonika 5:6, 7)

⁶ “Ŵala ali yone.” (Ŵelengani 1 Atesalonika 5:6, 7.) Paulo eyelekezela ŵanthu amene azapulumukelini pa nsiku ya Yehova na ŵanthu ŵala amene aliyone. Ove oziŵalini chilichonse pa nkhani ya vinthu vili ŵazenguluke komasoti mwayupitila nthawe. Tetyo, chinthu chiyakine chofunika chikachitika ove oziŵalini ndipo angachitepolini kanthu. Ŵanthu anyinji masiku ŵano ali yone mwauzimu. (Aro. 11:8) Ove aliye chidwi na umboni uwonesha kuti tunkhala “mmasiku osilijila” komasoti kuti chisauso chikulu chifwike lombapano. Vinthu pachalo vikachinja ngako ŵanthu anyinji ochita chidwi ndipo vuŵachitisha kunkhalako na chidwi na uthenga wasu wa Ufumu. Koma olo n’tetyo anyinji oyona mmalo mopitilija kunkhala menso. Olo ŵanthu ŵala amene okhulupilila za nsiku ya chiweluzo oganiza kuti ikali kutali. (2 Pet. 3:3, 4) Koma nsiku iliyonse chunkhala chinthu chofunika ngako kuli sewo kupitilija kunkhala menso.

7. Kansi ŵanthu akuti azawonongewe na Mulungu olingana tyani na ŵanthu okolwa?

⁷ “Ŵala ali kolwe.” Ntumwi Paulo eyelekezela ŵanthu ŵala akuti azawonongewe na Mulungu na achakolwa. Ŵanthu akakolwa ochelwa kuziŵa vinthu vuchitika ndipo osankha vinthu mophoniyeka. Molingana na vamene ivi, ŵanthu aipa omvwilalini machenjezo a Mulungu. Ove osankha njila ya moyo yamene ikuya ku chiwonongeko. Koma Akhilisitu oujiwa kuti apitilije kunkhala oganiza luweme komasoti omvwisha luweme vinthu. (1 Ates. 5:6) Kaswili muyakine wamaphunzilo a Baibolo enena kuti “munthu wamene omvwisha luweme vinthu, opitilija kunkhala wodekha ndipo ochitalini wowa. Yove okwanisha kuchita luweme vinthu ndipo vamene ivi vumuyavya kupanga chosankha chiweme.” Ndaŵa yanji tufunika kupitilija kunkhala odekha komasoti onkhazikika? Tufunika kuchita vamene ivi kuti osati tiloŵelele mu nkhani za ndale olo minkhalidwe iipa ya masiku ŵano. Mzimu wofunishisha kunkhala na mbali mu vochitika monga ni vamene ivi upitilije kukula-kula nsiku ya Yehova payuvyendela. Koma olo n’tetyo, tufunikilalini kudela nkhaŵa za mwati tizachitile pa vochitika monga ni vamene ivo. Mzimu wa Mulungu uzatiyavye kunkhala odekha komasoti onkhazikika m’maganizo nopanga vosankha mwa nzelu.—Lk. 12:11, 12.

KANSI TINGACHITE TYANI POKONZEKELA NSIKU YA YEHOVA?

8. Kansi lemba ya 1 Atesalonika 5:8 yuyelekezela tyani minkhalidwe yamene ingatiyavye kunkhala menso komasoti kupitilija kuganiza luweme? (Onanisoti chithunzi.)

⁸ “Tivwale cholitetezela panganga . . . na . . . chisote.” Paulo etiyelekezela na masodja amene onkhala tchelu komasoti ovwala vovwala vakunkhondo. (Ŵelengani 1 Atesalonika 5:8.) Nsodja watchelu onkhala wokonzeka kuniyata nkhondo nthawe iliyonse. Mwamene umu niye mwavililisoti kuli sewo. Tupitilija kunkhala okonzekela nsiku ya Yehova povwala chovwala cholitetezela panganga cha chikhulupililo na chikondi komasoti chisote cha chiyembekezo. Minkhalidwe yamene iyi ingatiyavye ngako.

9. Kansi chikhulupililo chasu chutiteteza tyani?

⁹ Chovwala panganga chenzeteteza ntima wa nsodja. Chikhulupililo na chikondi vuteteza ntima wasu wophiphilisila. Minkhalidwe yamene iyi izatiyavye kupitilija kutumikila Yehova komasoti kukonkheja Yesu. Chikhulupililo chutisimikijila kuti Yehova azatipase mphaso chifukwa chomusakila-sakila na ntima wasu wonse. (Ahe. 11:6) Nkhalidwe yamene iyi izatilimbikise kunkhala mphela okhulupilika kwa Msogoleli wasu Yesu, olo kuti tikokumana na mavuto. Tingatang’ishe chikhulupililo chasu kuti tikwanishe kupilila mavuto mwa kuphunzila kufumila pa visanzo va masiku ŵano va ŵanthu amene enkhala mphela okhulupilika mosasamala kanthu za chinzunzo olo mavuto azachuma ŵechikumana nawo. Komasoti tingapewe ukuka wokonda chuma mwa kukonkheja ŵanthu amene esankha kunkhala na moyo wosafuna vinthu vinyinji kuti aike vinthu vokhuza Ufumu pa malo oyamba.b

10. Kansi kukonda Mulungu komasoti ayasu kutiyavya tyani kupilila?

¹⁰ Chikondi ni chofunikasoti kuti tikonkhala menso komasoti kuti tipitilije kunkhala oganiza luweme. (Mt. 22:37-39) Kukonda Mulungu kutiyavya kuti tikwanishe kupilila pokata ntchito yolalikila mosasamala kanthu za mavuto ŵatingakumane nawo. (2 Tim. 1:7, 8) Chifukwa chakuti tukonda ŵanthu amene otumikilalini Yehova, tupitilija kukata ntchito yolalikila nophunzisa ŵanthu a m’gawo yasu pokatishila ntchito ulaliki wapa foni olo m’makalata. Tujokelalini kuvuli chifukwa tili na chiyembekezo chakuti nsiku iyakine ŵanthu azachinje moyo wawo noyamba kuchita vinthu viweme.—Eze. 18:27, 28.

11. Kansi kukonda ayasu kutiyavya tyani? (1 Atesalonika 5:11)

¹¹ Kukonda ayasu kupamikijaposoti kukonda Akhilisitu ayasu. Tuwonesha chikondi chamene ichi mwa “kutonthojana notang’ishana.” (Ŵelengani 1 Atesalonika 5:11.) Molingana na masodja amene okatila ntchito pamozi kunkhondo sewo tutang’ishana muyake na muyake. N’chendi kuti, nsodja angamuchite nsodja muyake kunkhondo, koma angachitelini vamene ivi mwalona. Molingana na vamene ivi, tingachitelini abale na alongo ŵasu mwalona olo kuwejela kuchitiwa pa kuchitiwa. (1 Ates. 5:13, 15) Tuwoneshasoti chikondi polemekeza abale amene osogolela mpingo. (1 Ates. 5:12) Paulo penzelemba kalata yamene iyi, mpingo waku Tesalonika wenze ukaliye kwanisha chaka chimozi wankhazikishiwa kale. Analume amene enze esankhiwa kuti akosogolela mpingo wamene uyo payakine enzeziŵalini vinthu vinyinji ndipo payakine enzephoniyesha vinthu viyakine vinyinji. Koma olo n’tetyo, ove enzewamila kupasiwa ulemu. Chisauso chikulu pachuvwendela, sewo tufunika kudalila ngako akulu kupambana kale yonse kuti akotisogolela. Payakine vingankhale vosakwanishika kulondela malangizo aku likulu yapa chalo chonse komasoti ofesi ya nthambi; tetyo, nichinthu chofunika kuphunzililatu palipano kukonda komasoti kulemekeza akulu amumpingo wasu. Mosasamala kanthu za vinthu vingatichitikile, tiyeni tipitilije kunkhala oganiza luweme, tufunikalini kuganizila ngako pa vinthu vakuphoniyesha, koma tufunikila kuika maganizo ŵasu pa mfundo yakuti Yehova osogolela analume okhulupilika amene aŵa kupitila mwa Khilisitu.

12. Kansi chiyembekezo chasu chuteteza tyani maganizo ŵasu?

¹² Molingana na chisote chamene chuteteza mutu wa nsodja, chiyembekezo chasu cha chipulumuso chuteteza maganizo ŵasu. Tikankhala na chiyembekezo cha mphamvu, tuziŵa kuti vinthu vachingatipase ichi chalo ni vatyala-tyala. (Afil. 3:8) Chiyembekezo chasu chutiyavya kupitilija kunkhala odekha komasoti onkhazikika. Vamene ivi niye vichitikila Wallace na Laurinda, amene otumikila ku Africa. Nkati mwa masondo atatu tyala, onse amene aŵa eluza makolo ŵawo mu imfwa. Chifukwa cha mulili wa COVID-19, ove aliye kwanishe kuluta kwawo kuti akankhale pamozi na abanja ŵawo. Wallace elemba kuti: “Chiyembekezo cha chiukililo chuniyavya kuganizila vokhuza ove, osati mwenzewonekela akaliye mwalila m’chalo chino, koma mwakuti azankhalile mmasiku oyambilila mu chalo cha nyowani. Chiyembekezo chamene ichi chuninkhazika ntima pansi nikankhala na chisoni olo nikataya ntima.”

13. Kansi tingachite tyani kuti tilondele mzimu utuŵa?

¹³ “Osazimwa mulilo wa mzimu.” (1 Ates. 5:19) Paulo eyelekezela mzimu utuŵa na mulilo wamene uli nkati mwasu. Tikankhala na mzimu wa Mulungu, tunkhala achangu komasoti tunkhala na ntima wofunishisha kuchita viweme ndipo tunkhala na mphamvu zotumikila Yehova. (Aro. 12:11) Kansi tingachite tyani kuti tilondele mzimu utuŵa? Tingousenga mpemphelo, kuphunzila mawu oujiliwa a Mulungu, komasoti kunkhala okatijana na gulu yake yamene yusogolelewa na mzimu. Kuchita vamene ivi kungatiyavye kuti tikulishe “minkhalidwe ya mzimu utuŵa.”—Aga. 5:22, 23.

14. Kansi tufunikila kupewa chinji keno tufuna kupitilija kulondela mzimu wa Mulungu? (Onanisoti chithunzi.)

¹⁴ Pavuli pakuti Yehova watipasa mzimu wake utuŵa, tufunika kunkhala osamala kuti “osati tizimwe mulilo wa mzimu.” Mulungu opeleka mzimu wake kuli ŵanthu ŵala amene opitilija kunkhala na maganizo aweme komasoti minkhalidwe iweme. Yove angapitilijelini kutipasa mzimu wake keno sewo tili na maganizo aipa ndipo tuŵakonkheja. (1 Ates. 4:7, 8) Kuti tipitilije kulondela mzimu utuŵa, tufunikilalini soti “kunyoza mawu aulosi.” (1 Ates. 5:20) Mawu akuti “maulosi,” pa nkhani yamene iyi opanamila mauthenga opangiwa na mzimu wa Mulungu amene opamikijapo uthenga wonena za nsiku ya Yehova komasoti kufupika kwa nthawe yamene yasala. Sewo tuyejasotilini kutalimphisha nthawe yaikuti izafwike nsiku yamene iyi m’maganizo ŵasu, poganiza kuti Aramagedo izafwikelini pa nthawe yatikali na moyo. Mmalo mwake, sewo tuwonesha kuti tuyembekezela—kuti nsiku yamene iyi ifwike kwalombapano komasoti kuti tuikumbukila—popitilija kunkhala bize na “ntchito zuwonesha kuti nise olipeleka” nsiku iliyonse.—2 Pet. 3:11, 12.

“SIMIKIJILANI VINTHU VONSE”

15. Kansi tingapewe tyani nkhani za wenye komasoti uthenga woujiliwa wa viŵanda? (1 Atesalonika 5:21)

¹⁵ Kwalomba pano kusogolo, adani a Mulungu azalengeze mwanjila iyakine kuti: “Ntendele na chitetezo!” (1 Ates. 5:3) Wenye woujiliwa na viŵanda uzazule pachalo chonse, noluŵilisha ŵanthu anyinji. (Chiv. 16:13, 14) Lomba tyani ponena za sewo? Sewo tizasemphewelini keno ‘tusimikijila [kapena kuti, “kuyesa”] vinthu vonse.’ (Ŵelengani 1 Atesalonika 5:21.) Mawu Achigiriki ŵechimasulila kuti “simikijilani” eŵakatishila ntchito pofuna kufotokoza venzechita ŵanthu akafuna kuyesa nsimbi monga golide na siliva kuti asimikijile keno venze ngavo-ngavo chendi. Tetyo, tufunikila kuyesa vamene vatamvwa olo kuŵelenga kuti tiwone keno n’vachendi. Kuchita vamene ivi kwenze kofunika kwa Atesalonika, ndipo kuzankhale kofunika ngako kuli sewo chisauso chikulu pachuvwendela. Mmalo mongovomekeja vilivonse vanena ŵanthu ayakine, tukatishila ntchito luso yasu yoganiza polinganija vataŵelenga olo vatavwa na vayunena Baibolo komasoti gulu ya Yehova. Tikochita tetyo, tizasemphewelini na uthenga uliwonse wa viŵanda.—Miy. 14:15; 1 Tim. 4:1.

16. Kansi ni chiyembekezo chodalilika chotyani chatili nacho, ndipo chutilimbikisa kuchita tyani?

¹⁶ Monga gulu, atumiki a Yehova azapulumuke pa chisauso chikulu. Koma olo n’tetyo, sewo tuziŵalini vingachitike mailo. (Yak. 4:14) Koma olo n’tetyo mosasamala kanthu keno chisauso chikulu chizatifwane tikali na moyo olo payakine tafwa, tizalondele mphaso ya moyo wosasila tikapitilija kunkhala okhulupilika. Ozozewa akankhale kululu na Khilisitu. Ambelele ziyakine azankhale mpaladaiso pano pachalo. Tiyeni tonse tiike maganizo ŵasu pa chiyembekezo chiweme chamene ichi nopitilija kukonzekela nsiku ya Yehova!