Kansi mwewo muziŵa?

Kansi ntchelwa zamene zenzepezeka ku Babulo wakale komasoti mwenzeziumbila vuwonesha tyani kuti Baibolo yulaŵila vachendi?

AKASWILI ofukula vinthu vakale, afwana ntchelwa zoshoka zosaŵelengeka zamene zechikatishila ntchito pomanga tauni ya Babulo. Mokatijana na vechilaŵila kaswili muyakine wofukula vinthu vam’matongwe zina yake Robert Koldewey, ntchelwa zamene izo zenzeumbiliwa mu uvuni wamene wenze “kunja kwa tauni, kwamene kwenze lito iweme komasoti sanga ikulu . . . yankhuni.”

Akaswili ofukula vinthu vakale afwana umboni wamene uwonesha kuti akulu-akulu aboma aku Babulo, enzekatishilasoti ntchito mauvuni amene awo pochita vinthu viyakine viipa ngako. Pulofesa muyakine zina yake Paul-Alain Beaulieu, wamene nikaswili wa mbili komasoti chilaŵilo cha Asuri akale, enena kuti: “Mabuku anyinji ambili ya Babulo, owonesha kuti mfumu ilamula kuti ŵanthu amene aliyemvwile, . . . olo amene aliye lemekeze vinthu vopatulika, aponyewe mu uvuni wa mulilo noshokewa mwamene umo.” Mwachisanzo, buku iyakine ya munthawe ya Mfumu Nebukadinezara inena kuti: “Ŵawonongeni, ashokeni, muŵapaye mwa kuŵaponya pamulilo.”

Vamene ivi vukumbusha ŵanthu amene oŵelenga Baibolo vochitika vamene vililembewe pa Danieli chapitala 3. Mu chapitala chamene ichi tuŵelenga kuti Mfumu Nebukadinezara, ipanamika chifano chikulu chagolide mu chinshambo cha Dura kunja kwa tauni ya Babulo. Alumbwana atatu Achiheberi Sadirake, Mesake na Abedinego, pechikana kugwadila fano yamene iyo, Nebukadinezara ekalipa ngako ndipo elamula kuti uvuni wamene uyo usonkhelewe “kuwelejela maulwendo 7 kupambana mwenzechitila masiku onse,” ndipo yove elamula kuti analume atatu amene awo ‘aponyewe mu uvuni woyaka mulilo wamene uyo.’ Mngelo wamphanvu eŵapulumusha ku imfwa yankhaza yamene iyo.—Dan. 3:1-6, 19-28.

© The Trustees of the British Museum. Licensed under CC BY-NC-SA 4.0. Source

Ntchelwa zamene zipezeka ku Babulo, zuwoneshasoti kuti vayulaŵila Baibolo nivachendi. Zinyinji mwa ntchelwa zamene izo zenze na mawu olemekeza mfumu. Baibolo iyakine inena kuti: “Nebukadinezara Mfumu ya Babulo . . . Ng’anda yachifumu yamene yenimanga newo Mfumu Ikulu . . . Mbadwa zangu zilamulile mwamene umo mpaka kalekale.” Mawu amene aŵa olingana ngako na mawu amene elembewa pa Danieli 4:30, pamene Nebukadinezara pechilitama ponena kuti: “Kansi uyu ni Babulo lini Nkulu wamene wanamanga na mphanvu zangu zikulu komasoti na ulemelelo wangu ukulu na cholinga chakuti kunkhale ng’anda yachifumu?”