Kansi mukumbukila?

Kansi mwiŵelenga bwino-bwino magazini a Nsanja za Mulonda za chino chaka? Chabwino, yejani kuyankha makonsho aŵa ali mnyansi:

Kansi “kuchinja maganizo ŵanu” kupamikijapo kuchita chinji? (Aro. 12:2)

Kuchinja maganizo kupamikijapo vinyinji kupambana pa kuchita tyala ntchito ziweme. Vamene ivi vupamikijapo kufufuza umunthu wasu wankati, nochinja kuti tikokonkheja mfundo za Mulungu mwatingakwanishile pamoyo wasu.—Nsanja ya Mulonda 01/2023, pedji 8-9.

Kansi tingankhale tyani oganiza luweme patuwona vochitika va muli chino chalo?

Sewo tuchita chidwi kuwona vochitika va masiku ŵano mwavukwanilishila ulosi. Mmalo mouja ŵanthu maganizo ŵasu ponena za vochitika vamene ivi nosokoneza ntendele, sewo tingachite luweme kukambilana vayafalisa gulu ya Yehova. (1 Akor. 1:10)—Nsanja ya Mulonda 02/2023, pedji 16.

Kansi ubatizo wa Yesu wenze wosiyana tyani na wa ophunzila ŵake?

Chifukwa chakuti yove evyalikila mu ntundu wamene wenze wolipeleka kwa Mulungu, Yesu enzefunikilalini kuchita kulipeleka kwa Yehova monga ni mwatuchitila sewo. Yesu enzeve uchimo, munthu wangwilo. Yove enzefunikilalini kulapa machimo ŵake.—Nsanja ya Mulonda 03/2023, pedji 5.

Kansi tingayavye tyani ayakine kuti ayankhepo pamisonkhano?

Tingalaŵile ndemanga zasu mwachidule, vamene vingapeleke mwayi kuli ayakine kuti ayankheko. Tingapewe soti kutomola mfundo zinyinji pa ndemanga imozi. Tikachita tetyo, tingasiye mbali ziyakine zangalaŵilepo ayakine.—Nsanja ya Mulonda 04/2023, pedji 23.

Kansi “Nsewu utuŵa” wilembewa pa Yesaya 35:8 utanthauza chinji?

Nsewu ukulu wophiphilisila wamene uyu, choyamba utanthauza nsewu wa Ayuda wofuma ku Babulo kuluta ku chalo chawo. Lomba tyani ponena za m’vyaka valombapano ngako? M’vaka vakuvuli chikaliyefwika chaka cha 1919, ntchito yowamya nsewu iyamba kuchitika—kumasulila nodinda Baibolo, kupamikijapo vinthu viyakine. Ŵanthu a Mulungu ankhala oyenda mu “Nsewu utuŵa” kulowa m’paladaiso wauzimu wamene utisogolela ku madaliso a Ufumu wa Mulungu.—Nsanja ya Mulonda 05/2023, pedji 15-19.

Kansi malangizo ali pa Miyambo 9, onena za anakazi ophiphilisila otyani?

Lemba ya Miyambo yunena za “mwanakazi wopusa” wamene oitila ŵanthu munjila ya “kumanda”, komasoti za “nzelu ngayo-ngayo,” yamene ili monga ni mwanakazi wamene oitila ŵanthu “munjila yomvwisha vinthu” komasoti yaku moyo. (Miy. 9:1, 6, 13, 18)—Nsanja ya Mulonda 06/2023, pedji 22-24.

Kansi Mulungu ewonesha tyani kulichefya komasoti kulolela pochita vinthu na Loti?

Yehova elangiza Loti kuti afume mu Sodomu nothaŵila kudela ya malupili. Koma Loti pechimupapatila kuti athaŵile ku Zowari, Mulungu echimvwa pempho yake.—Nsanja ya Mulonda 07/2023, pedji 21.

Kansi mwanakazi angachite tyani keno munalume wake ololela vinthu volaula?

Mwanakazi ofunika kukumbukila kuti yove niyelini ali na vuto. Yove angafunikile kuika maganizo pa ushamwali wake na Mulungu, komasoti kuganizila nkhani za anakazi otomolewa m’Baibolo amene enzekumana na mavuto ndipo efwana chitonthojo kwa Mulungu. Mwanakazi angamuyavye mwanalume wake kupewa vinthu vamene vingakulishe vuto yake yololela vinthu volaula.— Nsanja ya Mulonda 08/2023, pedji 14-17.

Kansi kuziŵa vinthu kungatiyavye tyani kunkhala ofasa ŵanthu akotishusha chifukwa cha vatukhulupilila?

Keno munthu otishusha, sewo tufunikila kuwona konsho olo mawu oshusha ŵangalaŵile monga njila yotiyavya kuziŵa maganizo kapena nkhaŵa yake. Tikachita tetyo tingankhale okonzeka kuchita naye vinthu mofasa ngako.— Nsanja ya Mulonda 09/2023, pedji 17.

Kansi tingaphunzile chinji kuli Mariya pankhani ya mwatingafwanile mphamvu?

Pechiziŵa kuti yove azankhale mama wa Mesiya, Mariya efwana mphamvu kufumila kuli ayakine. Mngelo Gabrieli na Elizabeti emulimbikisa Mariya mwauzimu. Sewo nase tingafwane mphamvu kufumila kuli okhulupilila ayasu.—Nsanja ya Mulonda 10/2023, pedji 15.

Kansi Yehova angayankhe tyani mapemphelo ŵasu?

Yove olonjeza kuti akoyankha mapemphelo ŵasu komasoti kuganizila mwakukatijilana na cholinga chake. (Yer. 29:12) Mulungu angayankhe mapemphelo olingana mwanjila zosiyana, koma yove akotiyavya nthawe zonse.—Nsanja ya Mulonda 11/2023, pedji 21-22.

Lemba ya Aroma 5:2 yunena za “chiyembekezo,” lomba ndaŵa yanji chiyembekezo chutomolewa soti mu vesi 4?

Munthu akamvwa uthenga uweme angankhale na chiyembekezo chakuzasangalala na moyo m’paladaiso pano pachalo. Koma akayamba kukumana na mavuto, kupilila, komasoti Mulungu akayamba kukondwela naye, chiyembekezo chake chutang’a ngako ndipo chunkhala ngacho-ngacho.—Nsanja ya Mulonda 12/2023, pedji 12-13.