Mupaseni Yehova ulemelelo

1. Kansi ŵanthu anyinji masiku ŵano oganizila ngako chinji?

PAYAKINE mukwanisha kuwona kuti ŵanthu anyinji masiku ŵano oganizila ngako za ove osati ayawo. Mwachisanzo, ŵanthu anyinji ochita vinthu mopitilila malile pamalo otandalila apa intaneti na cholinga chakuti ŵanthu aŵaziŵe komasoti kuti aziŵe vakwanisha kuchita. Koma olo n’tetyo, pali ŵanthu tyala atontho amene opeleka ulemelelo kwa Yehova Mulungu masiku ŵano. Munkhani ino, tikambilane kuti kupeleka ulemelelo kwa Yehova kutanthauza chinji komasoti vutichitisha kuchita vamene ivi. Tikambilanesoti vatingachite kuti tikopeleka ulemelelo kwa Mulungu womuyenelela, komasoti vakuti azachite yove polemekeza zina yake kwalombapano.

KANSI KUPASA YEHOVA ULEMELELO KUTANTHAUZA CHINJI?

2. Kansi Yehova ewonesha tyani ulemelelo wake pa Lupili ya Sinai? (Onanisoti chapachikuto.)

² Kansi ulemelelo n’chinji? M’Baibolo mawu akuti “ulemelelo” angatanthauze chinthu chilichonse chamene chingachitishe munthu kunkhala wodabwisa. Yehova ewonesha ulemelelo wake mwanjila yapadela pakaliye pita masiku anyinji kufumila pechimasula ntundu wa Aisiraeli ku ukapolo ku Iguputo. Ganizilani vechitika: Aisiraeli mamiliyoni anyinji, esonkhana pafupi na Lupili ya Sinai, kuti amvwe Mawu a Mulungu. Nkumbi ufipa weziŵilija lupili yamene iyo. Mwazizizi, lupili yamene iyo yekolongelewa na usi,—pechitika chivomelezi champhamvu,—tuleza, kugunda kwa leza, komasoti kulila kwa mphamvu kwa lipenga. (Eks. 19:16-18; 24:17; Sal. 68:8) Ganizilani mwechidabwila Aisiraeli Yehova pechiŵawonesha mphamvu za ulemelelo wake.

3. Kansi kupasa Yehova ulemelelo kutanthauza chinji?

³ Koma tyani ponena za sewo taŵanthu? Kansi tingakwanishe chendi kumupasa ulemelelo Yehova? Eye, sewo tingakwanishe. Njila imozi yatingamupasile ulemelelo Yehova, nikuujako ayakine vokhuza mphamvu zake zodabwisa komasoti minkhalidwe yake yochitisha chidwi. Tingalemekezesoti Mulungu pomupasa ulemelelo chifukwa cha vinthu vatakwanisha kuchita moyavyiwa na yove. (Yes. 26:12) Mfumu Davide, epeleka chisanzo chiweme ngako pankhani yopeleka ulemelelo kwa Yehova. M’pemphelo yechipeleka pamenso pa mpingo wa Aisiraeli, Davide enena kuti: “Mwewo Yehova, ukulu, mphamvu, kuwama, ulemelelo na ulemu nivanu, chifukwa vinthu vonse vakululu na vapano pachalo nivanu.” Davide pechisilija kupemphela, “ŵanthu onse amene awo eyamba kutamanda Yehova.”—1 Mbiri 29:11, 20.

4. Kansi Yesu emupasa tyani Yehova ulemelelo?

⁴ Yesu penze pano pachalo, etamanda Atata ŵake pouja ŵanthu kuti ove niye emupasa mphamvu zochitila vodabwisa. (Mko. 5:18-20) Yesu enzepelekasoti ulemelelo kwa Yehova kupitila munjila yenzelaŵilila vokhuza Atata ŵake, komasoti mwenzechitila vinthu na ŵanthu ayakine. Panthawe iyakine, Yesu enzephunzisa m’malo opemphelela. Pagulu ya ŵanthu ŵenzephunzisa, penze mwanakazi muyakine wamene enzetamana na mzimu uipa kwa vyaka 18. Yove enze wobenda nsana, ndipo enzekwanishalini kuŵelamuka. Yesu enzeziŵa kuti mwanakazi wamene uyo enze wokhumudwa ngako ndipo enzefuna kumuyavya. Tetyo, Yesu eluta pafupi na yove ndipo elaŵila naye mowama ntima kuti: “Mayi, mwamasuka ku matenda ŵanu.” Tetyo, Yesu etambulula kwanja yake nomukata ndipo nthawe yamene iyo mwanakazi wamene uyo eŵelamuka nopanama bwino-bwino, ndipo “eyamba kutamanda Mulungu.” Yove etembeja ngako chifukwa chakuti Yehova emuyavya kuti ankhalesoti na thanzi iweme! (Luk. 13:10-13) Mwanakazi wamene uyo enze na vifukwa viweme vopasila Yehova ulemelelo ndipo nase tufunika kuchitasoti chimozi-mozi.

KANSI N’CHINJI CHUCHITISHA KUTI TIKOPASA YEHOVA ULEMELELO?

5. Kansi tili na vifukwa votyani volemekezela Yehova?

⁵ Sewo tupasa Yehova ulemelelo chifukwa chakuti tumulemekeza ngako. Sewo tili na vifukwa vinyinji ngako volemekezela Yehova. (Sal. 96:4-7) Mulungu ali na mphamvu zochitila chilichonse chakufuna ndipo oŵeŵalini. Nzelu zake ziliye malile, zuwonekela luweme kupitila muvinthu vechipanga. Yove etipasa moyo komasoti otisamalila. (Chiv. 4:11) Yove ni wokhulupilika. (Chiv. 15:4) Chilichonse chakuchita chumuyendela luweme komasoti okwanilisha malonjezo ŵake nthawe zonse. (Yos. 23:14) N’vosadabwisa kuti mneneli Yelemiya, ponena za Yehova elemba kuti: “Pakati pa ŵanthu onse anzelu am’mitundu ya ŵanthu komasoti pakati pa maufumu ŵawo onse paliyeletu aliyense wolingana na mwewo”! (Yer. 10:6, 7) Kulaŵila chendi, sewo tili na vifukwa viweme vopasila ulemu—Atata ŵasu akululu. Koma tufunika kumuchitila vinyinji Yehova kuyangijila pakumupasa ulemu. Yove ali na minkhalidwe iweme yamene yuchitisha kuti tikomukonda ngako. Sewo tumukonda Mulungu.

6. Ndaŵa yanji sewo tumukonda Yehova?

⁶ Tulemekeza Yehova chifukwa chakuti tumukonda ngako. Ganizilani za minkhalidwe iweme inyinji yali nayo Yehova yamene yuchitisha kuti tikomukonda. Yove ni wachifundo komasoti muweme ntima. (Sal. 103:13; Yes. 49:15) Tikankhala na chisoni, yove vumukhuza. (Zek. 2:8) Yove otiyavya kuti tinkhale naye paushamwali uweme. (Sal. 25:14; Mach. 17:27) Yove ni wolichefya. Baibolo yunena kuti: “Mulungu oseluka mnyansi kuti awone kululu na chalo. Ousha munthu wonyozeka pomuchosa mulukungu.” (Sal. 113:6, 7) Vifukwa vonse vamene ivi, vutichitisha kunkhala na ntima wofuna kulemekeza Mulungu wasu Nkulu.—Sal. 86:12.

7. Kansi tili na mwayi wotyani wapadela?

⁷ Tulemekeza Yehova chifukwa chakuti tufuna kuti ayakine amuziŵe. Ŵanthu anyinji oziŵalini chonadi chokhuza Yehova. Ndaŵa yanji? Chifukwa chakuti Satana olaŵila vinthu vawenye vokhuza Mulungu ndipo ŵanthu ovikhulupilila. (2 Ako. 4:4) Satana, wachitisha kuti ŵanthu akoganiza kuti Yehova otiŵelengelalini komasoti niye oyambisha mavuto anyinji ŵatukumana nawo. Koma sewo tuziŵa chonadi chokhuza Mulungu wasu! Sewo tili na mwayi woujako ayakine vinthu vachendi vokhuza Mulungu komasoti kuŵayavya kuti nawosoti akomutamanda. (Yes. 43:10) Salimo 96, yulimbikisa ngako ŵanthu kuti akopeleka ulemelelo kwa Yehova. Patukambilana mawu ayakine oujiliwa a musalimo yamene iyi, ganizilani njila zamungakatishile ntchito kuti mukopeleka ngako ulemelelo kwa Yehova womuyenelela.

KANSI TINGAMUPASE TYANI YEHOVA ULEMELELO WOMUYENELELA?

8. Kansi ninjila yotyani yatingamupasile ulemelelo Yehova? (Salimo 96:1-3)

⁸ Ŵelengani Salimo 96:1-3. Tingapeleke ulemelelo kwa Yehova kupitila muvinthu vatulaŵila vokhuza Yove. M’mavesi amene aŵa, ŵanthu a Mulungu osengewa kuti ‘aimbile Yehova,’ ‘atamande zina yake,’ ‘alengeze uthenga uweme wachipulumuso chake,’ komasoti kuti ‘alengeze ntchito zake zodabwisa pakati pa mitundu yonse ya ŵanthu.’ Sewo tingapase ulemelelo Atata ŵasu akululu pokatishila ntchito njila zonse zamene izi. Atumiki a Yehova akale enze ofunishisha kuujako ayakine zaminkhalidwe iweme komasoti vinthu viweme vechiŵachitila. (Dan. 3:16-18; Mach. 4:29) Kansi tingaŵakonkheje tyani?

9-10. Kansi muphunzila chinji pa vechitikila Angelena? (Onanisoti chithunzi.)

⁹ Ganizilani vechitikila kalongosi muyakine zina yake Angelena,a wamene onkhala ku America. Yove eteteza zina ya Yehova motang’a ntima pakampani iyakine yenzekata ntchito. Chifukwa chakuti yove enze wanyowani pakampani yamene iyo, eitiwa kunsonkhano pamozi na ayake anyowani ŵenzekata nawo ntchito pakampani. Pansonkhano wamene uyo, aliyense epasiwa mwayi wofotokoza vokhuza mbili yake. Angelena, ekonzekela chithunzi chowonesha chisangalalo chenze nacho monga wa Mboni za Yehova. Nthawe yake yakuti alaŵile peisala patontho kukwana, wantchito muyake efotokoza kuti yove ekulila m’banja ya Mboni za Yehova. Yove elaŵila vinthu viipa vokhuza a Mboni komasoti vakukhulupilila. Angelena enena kuti: “Newo nechita wowa ngako. Koma niliyefune kuti ŵanthu akhulupilile wenye wamene uyo wokhuza Yehova. Tetyo, nenzefuna kuŵauja vinthu vachendi vokhuza yove.”

¹⁰ Muyake wakuntchito pechisilija kulaŵila, Angelena epemphela chamuntima. Pavuli pake, euja muyake wakuntchito mowama ntima kuti: “Newo nilelewa molingana na wewo. Nilelewa na makolo Amboni za Yehova, ndipo mpaka pano nine wa Mboni.” Olo kuti vinthu venzelini luweme, Angelena echita vinthu modekha. Yove ewonesha ayake akuntchito mafoto ŵake komasoti ŵa azishamwali ŵake otumikila Yehova mosangalala, ndipo eŵafotokozela vinthu vakukhulupilila mwaulemu. (1 Pet. 3:15) Kansi vokonkhapo vake venze votyani? Angelena pechisilija kulaŵila, ntima wa muyake wala waku ntchito wenkhala pansi. Yove efwika potomola vinthu viyakine viweme vechiwona penze mulumbwana komasoti penzechitila vinthu pamozi na Amboni za Yehova. Angelena enena kuti: “Zina ya Yehova tuwamila kuiteteza. Sewo tili na mwayi ukulu ngako woteteza zina yake.” Sewo nase tili na mwayi ukulu wotamanda Yehova komasoti kumulemekeza, olo kuti ŵanthu ayakine omunyoza.

11. Kansi atumiki achendi a Mulungu oikonkheja tyani mfundo yapa Salimo 96:8 kufumila kale-kale?

¹¹ Ŵelengani Salimo 96:8. Tingamupase Yehova ulemelelo pokatishila ntchito vinthu vasu vantengo wapatali. Kufumila kale-kale, atumiki achendi a Mulungu ankhala opeleka ulemelelo kwa Yehova pokatishila ntchito njila yamene iyi. (Miy. 3:9) Mwachisanzo, Aisiraeli enzepeleka ndalama komasoti vinthu vawo vantengo wapatali poyavya pa ntchito yomanga komasoti kusamalila kachisi. (2 Maf. 12:4, 5; 1 Mbiri 29:3-9) Ophunzila ayakine enzetumikila Yesu Khilisitu pamozi na atumwi ŵake pokatishila ntchito “chuma chawo.” (Luk. 8:1-3) Komasoti Baibolo yunena kuti Akhilisitu ayakine penzetamana chifukwa cha njala, enekwasu na akalongosi amene enzenkhala m’madela ayakine enzeŵatumijila ndalama. (Mach. 11:27-29) Nase masiku ŵano tingalemekeze Yehova kupitila mu vopeleka vasu.

12. Kansi vopeleka vasu vingamupase tyani Yehova ulemelelo? (Onanisoti chithunzi.)

¹² Ganizilani chochitika chiyakine chamene chuwonesha kuti vopeleka vasu vuleta ulemelelo pa zina ya Yehova. Lipoti yamu 2020, yefotokoza vokhuza chilala chamene chekhuza ngako chalo cha Zimbabwe. Ŵanthu anyinji enze pangozi yakuti angafwe chifukwa chakusoŵa chakulya, kupamikijapo kalongosi muyakine zina yake Prisca. Olo kuti kwenze chilala, Prisca epitilija mphela kukata ntchito yake yolalikila pachitatu na pachisanu sondo iliyonse, olo munthawe yolima. Maneba ŵake enzemuseka chifukwa choluta muutumiki m’malo mwakuyalima kumunda, ndipo enzenena kuti: “Wewo ufwe nayo njala.” Motang’a ntima, Prisca enzeŵayankha kuti, “Yehova angasiyelini atumiki ŵake.” Pakaliye pita nthawe itali, yove elondela chakulya gulu yasu peyenzepeleka thandizo m’chalo chamene icho. Gulu yasu yekwanisha kupeleka thandizo yamene iyo chifukwa cha vopeleka vatuchita. Maneba a Prisca edabwa ngako, ndipo emuuja kuti “Mulungu okuyavya nthawe zonse, tetyo tufuna tiziŵe vinyinji vokhuza yove.” Chifukwa cha vamene ivi, maneba ŵake 7 eyamba kupezeka pamisonkhano yasu ya mpingo

13. Kansi vochita vasu vingalete tyani ulemelelo kwa Yehova? (Salimo 96:9)

¹³ Ŵelengani Salimo 96:9. Tingapase Yehova ulemelelo kupitila muvochita vasu. Nkulu wa Ansembe wamene enzetumikila pa kachisi wa Yehova, enzefunikila kunkhala ntuŵa mwakuthupi. (Eks. 40:30-32) Nasesoti tufunika kunkhala atuŵa mwakuthupi komasoti kupewa kuchita chilichonse chakuzondana nacho Yehova. (Sal. 24:3, 4; 1 Pet. 1:15, 16) Tufunika kuyeja-yeja mwakhama kuti ‘tivule umunthu wakale’,—kutanthauza kuleka kuchita vinthu viipa,—novwala ‘umunthu wanyowani’—kutanthauza kuti tikoganiza komasoti kuchita vinthu vamene vuwonesha minkhalidwe yaulemelelo wa Yehova. (Akol. 3:9, 10) Moyavyiwa na Yehova, olo ŵanthu achiwele-wele ngako komasoti achiwawa, angakwanishe kuchinja novwala umunthu wanyowani.

14. Kansi muphunzila chinji kufumila pa vechitikila Jack? (Onanisoti chithunzi.)

¹⁴ Ganizilani vechitikila Jack, wamene enze munthu wachiwawa komasoti woyofya, ndipo ŵanthu enzemuita kuti chiŵanda. Chifukwa cha milandu yechipalamula, Jack egamuliwa kuti apaiwe. Koma olo n’tetyo, panthawe yenzeyembekezela kuti nsiku yamene iyo ifwike, Jack evomela kuti akophunzila Baibolo na mkwasu muyakine wamene enzenyungila ŵanthu enze kudjeli kwenze Jack. Olo kuti Jack enzechita vinthu vinyinji viipa, yove echinja ndipo pavuli pake ebatizika nonkhala wa Mboni za Yehova. Jack enze echinja ngako mwakuti peifwika nsiku yakuti apaiwe, magadi ayakine amene enzelondela kudjeli, elila penzelailana naye. Ndipo nkulu wa apolisi wamene enzekata ntchito kwamene uko enena kuti: “Jack enze nkaidi muipa ngako kuno ku djeli. Koma lomba, yove ali m’gulu ya ŵanthu aweme ngako.” Pavuli pa imfwa ya Jack, enekwasu amene ewela kuzachitisha misonkhano ya sondo na sondo, eziŵana na nkaidi muyakine wamene kenze koyamba kupezeka pamisonkhano. Kansi n’chinji chemuchitisha kuti apezekepo? Yove edabwa na mwechichinjila Jack vochita vake, ndipo enzefuna kuziŵa vangachite kuti akolambila Yehova. Kulaŵila chendi, vochita vasu vingapeleke ulemelelo kuli Atata ŵasu akululu!—1 Pet. 2:12.

KANSI YEHOVA AZAILEMEKEZE TYANI ZINA YAKE KWALOMBAPANO?

15. Kansi Yehova azailemekeze tyani zina yake kwalombapano? (Salimo 96:10-13)

¹⁵ Ŵelengani Salimo 96:10-13. Mavesi amene aŵa osilijila amu Salimo 96, ofotokoza kuti Yehova ni Woweluza wolungama komasoti Mfumu. Kansi Yehova azailemekeze tyani zina yake kwalombapano? Yove azachite vamene ivi poweluza ŵanthu. Kwalombapano, yove azawononge Babulo nkulu wamene ochitisha kuti ŵanthu akonyoza zina yake ituŵa. (Chiv. 17:5, 16; 19:1, 2) Ŵanthu ayakine akezewona kuwonongewa kwa Babulo nkulu, angezeyamba kulambila Yehova movomelejeka pamozi na sewo. Posilijila pake panthawe ya Alumagedo, Yehova azawononge chalo chonse chiipa cha Satana powononga ŵanthu onse amene omushusha komasoti kunyoza zina Yake. Koma azapulumushe ŵanthu onse amene omukonda, kumumvwila, komasoti amene omupasa ulemelelo. (Mko. 8:38; 2 Ates. 1:6-10) Pavuli pa chiyeso chosilijila chamene chikuti chizachitike kumapeto kwa Ulamulilo wa vyaka 1.000 wa Khilisitu, Yehova azatuŵishiletu zina yake. (Chiv. 20:7-10) Panthawe yamene iyo, “chalo chizazule na ŵanthu oziŵa ulemelelo wa Yehova monga nimwayuzulila nyanja na manzi.”—Hab. 2:14.

16. Kansi mwasimikijila ntima kuchita chinji? (Onanisoti chithunzi.)

¹⁶ Vizankhale vokondwelesha ngako munthu aliyense pano pachalo akezeyamba kupasa ulemelelo Yehova woyenelela zina yake! Koma nthawe yamene iyo ikaliyefwika, sewo tingachite mbali yasu pomupasa ulemelelo Yehova pokatishila ntchito mpata uliwonse watingafwane. Pofuna kusimikijila mfundo yofunika ngako yamene iyi, Bungwe Yutonga yasankha Salimo 96:8, kuti inkhale lemba yasu ya chaka cha 2025. Lemba yamene iyi yunena kuti: “Mupaseni Yehova ulemelelo woyenelela zina yake.”