MAVUTO A MULI ICHI CHALO

1 | Mukoteteza thanzi yanu

CHIFUKWA CHAKE NI VOFUNIKA

Mavuto olo ngozi za chilengedwe zingakhuze thanzi yasu mu njila zosiyana-siyana.

Vinthu viipa vikachitika, ŵanthu onkhala na nkhaŵa, ndipo amene onkhala na nkhaŵa kwa nthawe itali angalwale.
Kukayambika milili, vipatala vukangiwa kusamalila luweme olwala, chifukwa ofunika kusamalila ŵanthu anyinji pa nthawe imozi ndipo mankhwala osoŵa.
Masoka oleta mavuto a zachuma ndipo vamene ivi vuchitisha kuti ŵanthu akangiwe kufwana vinthu vofunika monga chakulya chupasa thanzi komasoti okangiwa kulipila thandizo ya chipatala.

Vamufunika kuziŵa

Kulwala ngako komasoti kuvutika maganizo kungasokoneze mwamuganizila ndipo vamene ivi vingachitishe kuti osati mukochita vinthu vosamalila thanzi yanu. Posilijila pake matenda ŵanu angayangijilike.
Keno mungaleke kusamalila mavuto athanzi ŵamuli nawo, mavuto amene awo angakule ngako ndipo angawononge moyo wanu.
Mukankhala na thanzi iweme, mungavutike lini kusankha vinthu mwanzelu pa nthawe yamwakumana na mavuto.
Keno nimwe wolemela olo wosauka, mungakwanishe kuchita vinthu vamene vingateteze thanzi yanu.

Vamungachite pali pano

Munthu wanzelu oziŵilatu vinthu viipa vingachitike kusogolo keno angakwanishe ndipo ochita vinthu mosamala kuti avipewe. Vamene ivi vingakate soti ntchito pa nkhani ya thanzi yanu. Nthawe zinyinji mungapewe kutola matenda olo kuyavya kuti osati yafalikile ngako ponkhala aunkhondo. Pakuti kupewa kupambana kuchija.

“Tikoyeja-yeja kunkhala aukhondo komasoti kusamalila pa ng’anda pasu, tunkhala kuti tupulumusha ndalama zamene sembe tezikatishila ntchito poluta kuchipatala komasoti kugula mankhwala.”—Andreas.a

a Mazina ayakine achinjiwa m’magazini ino.

MAVUTO A MULI ICHI CHALO—Panthawe ya mavuto mukoteteza thanzi yanu pochita vinthu ivi

Pa nthawe ya mavuto, mukoteteza thanzi yanu pochita vinthu ivi vokonkhapo

MUKONKHALA AUKHONDO

Mukonkhala aukhondo

Baibolo yunena kuti: “Wochenjela ni wala wamene ochita akawona soka ofisama.” (Miyambo 22:3) Mukoziŵilatu komasoti kupewa vinthu vamene vingaike moyo wanu pangozi.

Mukosamba mmanja na sopo pafupi-pafupi ngako-ngako mukafuna kulya chakulya komasoti mukofuma kutoileti.
Nthawe zonse mukowamya m’ng’anda mwanu nofafazilamo mankhwala opaila tudoyo komasoti kupukuta malo na vinthu vatukatishila ntchito pafupi-pafupi.
Keno nivokwanishika, osati mukonkhala pafupi na ŵanthu amene olwala matenda opasilana.

MUKOKULYA VAKULYA VUPASA THANZI

Mukokulya vakulya vopasa thanzi

Baibolo yunena kuti: “Paliye munthu wamene ezondapo kale muwili wake, koma oulyesha noukonda.” (Aifenso 5:29) Tuwonesha kuti tukonda muwili wasu tikoulyesha noukonda.

Mukokumwa manzi anyinji.
Mukokulya vitwanzi komasoti ndiyo zamatepo osiyana-siyana.
Osati mukokulya vamafuta ngako, munyu unyinji komasoti shuga unyinji.
Osati mukopepa fwaka, kumwa walwa unyinji komasoti kumwa mankhwala osokoneza tomfwe.

“Kuti osati tikolwala-lwala tikoyeja-yeja kulya vakulya vupasa thanzi; kuleka kuchita tetyo, niye kuti tingowononga tundalama tutontho twatufwana, kulipila kuti tipeze thandizo yachipatala. Tuwona kuti niviweme kukatishila ntchito ndalama zamene izi kugula chakulya chupasa thanzi.”—Carlos.

MUKOCHITA MASOŴELA OTANG’ISHA MUŴILI KOMASOTI MUKOYONA MOKWANILA

Mukochita masoŵela otangisha muŵili

Baibolo yunena kuti: “Kupumula patontho kulibwino kupambana kukata ntchito mwakhama noutukisha mphepo.” (Mlaliki 4:6) Nichendi kuti tufunika kukata ntchito koma tufunikilasoti kupumula mokwanila.

Mukochita masoŵela otang’isha muŵili. Mungayambe patontho-patontho koma moweleja-weleja. Kuchita masoŵela otang’isha muwili kungakuyavyeni ngako, keno nimwe achikulile, olemala, kapena mulwala matenda onkhalisha.
Mukoyona mokwanila

Mukopumula mokwanila. Keno mungoyona lini mokwanila mungodela ngako nkhaŵa komasoti mungokangiwa kuika maganizo ŵanu onse pa vinthu vamufuna kuchita. Vamene ivi keno vingachitike kwa nthawe itali, vingawononge thanzi yanu.
Mukoliikila nthawe yakuti mukoyona ndipo mukoyona chendi nthawe yamene iyo. Mukoyeja-yeja kuyona komasoti kuuka nthawe yamene iyo yemwilinganija.
Mukopewa kulolela TV komasoti kukatishila ntchito vipangizo vamakono mukaluta kuyayona.
Osati mukokulyangako, komasoti kumwa vakumwa vunkhala na caffeine, monga khofi komasoti osati mukokumwa walwa keno mwasala patontho kuyayona.

“Nuwona kuti kuyona kukhuza ngako thanzi yangu. Ngati niliye yone mokwanila nthawe ziyakine mutu uniŵaŵa ndipo muŵili ufwaya. Koma nikayona mokwanila, nuwona kuti nine wokonzeka kuchita chilichonse chanufuna kuchita! Nunkhala na mphamvu zinyinji ndipo nulwala-lwala lini.”—Justin.