GAWO 7

Mwamungaphunzisile mwana wanu

“Ndipo mawu aŵa ŵanukulamula lelo akonkhala pa ntima pako, na kuŵakhomelela mwa ŵana ŵako.”—Deuteronomo 6:6, 7.

Pechipanga makonzedwe a banja, Yehova epasa makolo udindo wosamalila ŵana ŵawo. (Akolose 3:20) Tetyo ni udindo wanu makolo kuphunzisa ŵana ŵanu kuti akule luweme na kuti akokonda Yehova. (2 Timoteyo 1:5; 3:15) Mufunikilasoti kuziŵa vili muntima wa mwana wanu. Kuyangijila pamene apa, mufunikila kunkhala chisanzo chiweme. Kuti mum’phunzise luweme mwana wanu mawu a Yehova, mufunikila kuŵaziŵa luweme poyamba mawu ameneawo.—Salimo 40:8.

1 CHITISHANI KUTI ŴANA ŴANU AKOLAŴILA NAMWE MOMASUKA

VAYUNENA BAIBOLO: “Wokulumija kumvwa, wodekha polaŵila.” (Yakobo 1:19) Mosakaikila mufuna kuti ŵana ŵanu akolaŵila namwe momasuka. Ofunikila kuziŵa kuti nimwe okonzeka kumvwishila keno ofuna kulaŵila namwe. Nkhalani omasuka kuti ŵana ŵanu akwanishe kufotokoza vili muntima mwawo. (Yakobo 3:18) Keno ŵana oganizila kuti muŵakalipile oIo kuŵapeza vifukwa, angamasukelini namwe. Nkhalani oleza ntima na ŵana ŵanu, ndipo nthawe zonse mukowonesha kuti muŵakonda.—Mateyu 3:17; 1 Akorinto 8:1.

VAMUNGACHITE:

Mukomvwishila keno ŵana ŵanu olaŵila namwe.
Mukokambilana na ŵana ŵanu nthawe zonse osati tyala keno pali mavuto.

2 YEJA-YEJANI KUMVWISHA MAGANIZO ŴAWO PAKULAŴILA

VAYUNENA BAIBOLO: “Munthu owonesha kumvwisha pa vinthu azafwane viweme.” (Miyambo 16:20) Nthawe ziyakine mungafunikile kumvwishila luweme mawu a ŵana ŵanu kuti muziŵe vakutanthauza olo mwakumvwila muntima mwawo. Nsiku zinyinji, ŵana okondayangijila mawu polaŵila, pamene ofuna kutanthauza vinthu viyakine. “Aliyense oyankhila nkhani akaliyeimvwisha luweme ni wopusa.” (Miyambo 18:13) Tetyo osakulumija kukalipa.—Miyambo 19:11.

Mama okalipila mwana wake chifukwa cha vinthu vawaŵauja

VAMUNGACHITE:

Olo kuti ŵana ŵanu alaŵile votyani, osaŵatenda mawu, ndipo osakalipa kamangu.
Mukokumbukila mwemwenzemvwila mwewo na vinthu vemwenzewona kuti ni vofunika pemwenze pa nsinkhu walipo ove.

3 ONESHANI KUTI NIMWE OKATIJANA

VAYUNENA BAIBOLO: “Mwana wangu, mvwila malangizo ŵa atata ŵako, ndipo osasiya malamulo ŵa amayi ŵako.” (Miyambo 1:8) Yehova epasa atata na amama udindo wolela ŵana. Mufunikila kuphunzisa ŵana ŵanu kuti okokulemekezani nokumvwilani. (Aefeso 6:1-3) Ŵana oziŵa keno makolo ŵawo “okatijanalini maganizo.” (1 Akorinto 1:10) Tetyo keno mwaphoniyana maganizo osakonda kukangana pali ŵana ŵanu, chifukwa chakuti angaleke kukulemekezani.

Tata watolela pambali mwana muyakine kuti amulangize ndipo ŵana ayakine ali m’chipinda chiyakine

VAMUNGACHITE:

Mufunikila kukambilana nokatijana mwamungalangizile ŵana ŵanu.
Mukasiyana maganizo na muyanu wamuukwati pa nkhani yolangiza ŵana, mukoyeja-yeja kumvwishila maganizo a muyanu.

4 NKHALANI NA PULOGILAMU

VAYUNENA BAIBOLO: “Phunzisa mwana mu njila yomuyenelela.” (Miyambo 22:6) Kuphunzisa luweme ŵana kuchitikalini mwangozi. Tetyo mufunikila kunkhala na pulogilamu yophunzisa ŵana ŵanu, vamene ivi vingayangijilepo kuŵalangiza. (Salimo 127:4; Miyambo 29:17) Kulangiza kutanthauzalini tyala kuŵapasa chilango, koma kuyangijilapo kuyavya ŵana ŵanu kuti amvwishe chifukwa chake ofunikila kumvwila malamulo. (Miyambo 28:7) Mufunikilasoti kuŵaphunzisa kukonda Mawu a Yehova nomvwisha mfundo zake. (Salimo 1:2) Vamene ivi vingayavye ŵana ŵanu kuti ankhale na chikumbuntima chiweme.—Aheberi 5:14.

VAMUNGACHITE:

Yeja-yejani kuyavya ŵana ŵanu kuti akowona Mulungu kuŵa munthu ngaye-ngaye, wakufunikila kudalila.
Ŵayavyeni kuti akokwanisha kuziŵa vinthu viyakine viipa vakufunikila kupewa, monga vupezeka pa malo otandalila apa intaneti. Aphunziseni kuti akopewa ŵanthu oyona ŵana atontho-atontho.

Makolo ophunzisa mwana wawo kufumila ali ntontho mpaka kuyabatizika — “Phunzisani mwana mu njila yomuyenelela.”