Kupilila

Mfundo yofunika kuiganizila: “Epitilija na khama kuphunzisa nolalikila uthenga uweme.”—Mac 5:42.

Vechichita Paulo

Mtumwi Paulo olalikila uthenga uweme kuli gulu ya ŵanthu ku malo okumanilanako a pa sikulu.

VIDIYO: Paulo epilila ku Efenso

1. Lolelani VIDIYO, kapena ŵelengani Machitidwe 19:8-10. Ndipo ganizilani makonsho aŵa:

M’malo mogonja penzeshushiwa, kansi Paulo epilila tyani noyavya ŵanthu ewonesha chidwi?
Kansi Paulo ewelela kangani kuti akaphunzise ŵanthu achidwi amene aŵa, ndipo evichita nthawe itali tyani?

Kansi tuphunzila chinji kuli Paulo?

2. Tufunika nthawe na khama kuti tipange maulwendo oweleja okata ntima na kuyambisha maphunzilo a Baibolo.

Konkhejani Paulo

3. Chinjani ndandanda yanu kuti ikatijane na nthawe yakupezeka na mpata munthu wamene uyo. Likonsheni kuti: ‘Ni nthawe yanji paningakumane naye? Kansi nikuni ndipo ni panthawe yanji paningakambilane naye momasuka?’ Mukonkhala wokonzeka kuluta nthawe iliyonse yamwapangana olo kuti nimwe opanikizika.

4. Pangannani nthawe yokumana. Pavuli pa kukambilana kulikonse, mukopangana nthawe yamungazekambilanasoti na munthu wamene uyo. Mukoyeja-yeja kusunga nthawe yamwapangana.

5. Nkhalani na chiyembekezo. Osakulumija kuganiza kuti munthu wamene opezekalini pang’anda kapena wala onkhala bize niye kuti aliye chidwi. (1 Akor. 13: 4, 7) Mukonkhala woleza ntima nokatishila ntchito luweme nthawe yanu.—1 Akor. 9:26.

ONANISOTI

Mac. 10:42; 1 Akor. 9:22, 23; 2 Akor. 4:1; Aga. 6:9