Achilumbwana​—pitilijani kupita pasogolo mwauzimu pavuli pakuti mwabatiziwa

1. Kansi ni vinthu viweme votyani vakwanisha kale kuchita achilumbwana anyinji?

CHAKA chilichonse, Akhilisitu anyinji achilumbwana obatiziwa. Kansi mwewo namwe mwibatizika kale? Keno n’tetyo, ziŵani kuti abale na alongo komasoti Yehova osangalala chifukwa cha vamene ivo. (Miy. 27:11) Ganizilani vamwakwanisha kale kuchita pofwika pano. Mwankhala muphunzila Baibolo mwakhama kwa vyaka ndithu. Kuphunzila kwamene uku kwakuyavyani kusimikijila kuti Baibolo ni Mawu a Mulungu. Kupambana pamene apa mwiziŵa munecho wa buku yamene iyi yopatulika noyamba kumukonda. Chifukwa chokonda ngako Yehova mwifwika polipeleka kuli yove nobatiziwa. Vamene ivi n’vokondwelesha ngako.

2. Kansi tikambilane chinji mu nkhani ino?

² N’vosakaikisha kuti chikhulupililo chanu chenzeyesewa pemwenzeyeja-yeja kuti mubatiziwe. Koma olo n’tetyo, pamukula mukokumana na mayeselo ayakine. Satana ayeje-yeje kukuchitishani kuti muleke kukonda Yehova komasoti kuti muleke kumutumikila. (Aef. 4:14) Osalola kuti vamene ivi vikuchitikileni. Lomba kansi n’chinji chingakuyavyeni kuti mupitilije kunkhala okhulupilika kwa Yehova nokwanilisha lonjezo yemwipanga polipeleka kuli yove? Mufunika kupitilija kupita pasogolo—nochita ‘khama’ kuti munkhale Mkhilisitu wotang’a mwauzimu. (Ahe. 6:1) Koma kansi mungachite tyani vamene ivi?

KANSI MUNGACHITE TYANI KUTI MUPITILIJE KUPITA PASOGOLO?

3. Kansi Akhilisitu onse ofunika kuchita chinji pavuli pakuti abatiziwa?

³ Tikabatiziwa tonse tufunika kukonkheja malangizo ŵechipeleka ntumwi Paulo kuli Akhilisitu a ku Efeso. Yove eŵalimbikisa kuti ankhale ‘achikulile’ mwauzimu. (Aef. 4:13) Venze monga oŵauja kuti, ‘Pitilijani kupita pasogolo.’ Tingamvwishe venzetanthauza Paulo pechiyelekezela kukula mwauzimu na vuchitika keno mwana okula. Makolo omekela komasoti kusangalala ngako mwana wawo akangovyalika. Koma sikuti mwana wamene uyo opitilija kunkhala kalucheche mpaka kale-kale. M’kupita kwa nthawe ofunika kukula kapena kuti ‘kuleka vachibwana.’ (1 Akor. 13:11) Niyesoti mwavunkhalila na sewo Akhilisitu. Tikabatiziwa, tufunika kupitilija kukula mwauzimu. Lomba tiyeni tiwone mfundo ziyakine zamene zingatiyavye.

4. Kansi ni minkhalidwe yotyani yamene ingakuyavyeni kuti mupite pasogolo mwauzimu? Fotokozani. (Afilipi 1:9)

⁴ Mukokonda ngako Yehova. Palipano mumukonda kale ngako Yehova. Koma mungakwanishe kuyangijila chikondi chanu chamene ichi. Motyani? Ntumwi Paulo efotokoza njila imozi yochitila vamene ivi pa Afilipi 1:9. (Ŵelengani.) Paulo epemphela kuti chikondi cha Akhilisitu a ku Filipi “chipitilije kukula.” Tetyo, tingakwanishe kukulisha chikondi chasu pa Yehova. Tingachite vamene ivi popitilija “kuziŵa vinthu molondola komasoti kuziŵa bwino ngako vinthu.” Keno tumuziŵa bwino Yehova, niyesoti patuyamba kumukonda ngako komasoti kutembeja minkhalidwe yake na mwakuchitila vinthu. Tunkhala ofunishisha kumukondwelesha nopewa chilichonse chamene chingamukhumudwise. Noyeja-yeja kuziŵa chifunilo chake komasoti na mwatingachitile vinthu mokatijana na chifunilo chake chamene icho.

5-6. Kansi n’chinji chingatiyavye kuti tikomukonda ngako Yehova? Fotokozani.

⁵ Tingayambe kukonda ngako Yehova keno tingamuziŵe bwino ngako Mwana wake, wamene enzewonesha bwino ngako minkhalidwe ya Atata ŵake. (Ahe. 1:3) Njila iweme yatingaziŵile Yesu ni kuphunzila mabuku 4 a Uthenga uweme. Keno muliye chiyoloŵezi choŵelenga Baibolo nsiku iliyonse, tyani osayamba palipano? Keno muŵelenga nkhani zokhuza Yesu mukoganizila ngako minkhalidwe yake. Yove enzemasuka na ŵanthu mwakuti nthawe iyakine enyamula ŵana mmanja mwake. (Mk. 10:13-16) Enzechitisha ophunzila ŵake kunkhala omasuka; mwakuti akotandala naye ove enzeyopalini kufotokoza mwenzemvwila. (Mt. 16:22) Pochita vamene ivi, Yesu enzekonkheja Atata ŵake ŵakululu. Yehova naye ni womasuka na ŵanthu. Tingakwanishe kupemphela kuli yove ndipo keno tupemphela tingamuuje vonse va muntima mwasu. Nise osimikijila kuti angatiweluzelini chifukwa cha vamene ivi. Yove otikonda komasoti otidela nkhaŵa.—1 Pet. 5:7.

⁶ Yesu enzechitila chifundo ŵanthu. Ntumwi Mateyu elemba kuti: “Powona chigulu cha ŵanthu, yove eŵamvwila chisoni, chifukwa enze onyuka-nyuka na otaika monga ni mbelele ziliye chiŵeta. (Mt. 9:36) Lomba kansi naye Yehova akumvwa tyani? Yesu enena kuti: “Atata ŵangu ŵakululu ofunalini kuti mmozi mwa tuŵana twamene utu akawonongeke.” (Mt. 18:14) Vamene ivi n’volimbikisa ngako! Tetyo, tikamuziŵa luweme Yesu tuyambasoti kumukonda ngako Yehova.

7. Kansi kutandala na Akhilisitu otang’a mwauzimu kungakuyavyeni tyani?

⁷ Mungaphunzilesoti mwamungakulishile chikondi komasoti mungapite pasogolo keno mutandala na abale na alongo otang’a mwauzimu a mumpingo mwanu. Mukowona mwakusangalalila. Ove odandaulakolini olo patontho chifukwa chosankha kutumikila Yehova. Mukoŵasenga kuti akufotokozeleni vinthu vamene vankhala vuŵachitikila pa moyo wawo. Mukafuna kusankha vochita pa nkhani iyakine yofunika mukoŵasenga malangizo. Mukokumbukila kuti, “pakankhala alangizi anyinji ŵanthu opulumuka.”—Miy. 11:14.

8. Kansi mungachite tyani keno nthawe ziyakine mukaikila vayunena Baibolo?

⁸ Osati mukokaikila vamukhulupilila. Monga mwatawonela mu ndime 2, Satana oyeja-yeja kuti akukangisheni kupita pasogolo mwauzimu. Njila iyakine ya mwangachitile vamene ivi ni kukuchitishani kuti mukokaikila vinthu viyakine vayuphunzisa Baibolo. Mwachisanzo, payakine mungamvwe mfundo yosalemekeza Mulungu yakuti vinthu vichitachinja kufumila ku vinthu viyakine. Vingachitike kuti pemwenze ntontho mwenze mukaliyeganizilapo ngako za nkhani yamene iyi. Koma pamwakula mwayamba kuphunzila vamene ivi ku sikulu. Vakulaŵila aticha ŵanu polimbikisa mfundo yamene iyi vingawoneke monga n’vomvwika. Koma olo n’tetyo, payakine vingachitike kuti ove aliyesakile-sakile kuti afwane umboni wosimikijila kuti kuli Nyamalenga. Kumbukilani mfundo yapa Miyambo 18:17, yamene yunena kuti: “Woyamba kufotokoza mbali yake pa mulandu owoneka monga olaŵila vachendi, koma muyake owela nomufufuza.” Mmalo mwa kungokhulupilila vilivonse vamwamvwa ku sikulu, mukosakila-sakila mosamala mfundo za choonadi cha m’Mawu a Mulungu. Mukosakila-sakila m’mabuku ŵasu. Mukotandala na abale na alongo amene poyamba enzekhulupilila kuti vinthu vichitachinja. Mukoŵakonsha kuti akufotokozelenkoni chamene chiŵachitisha kuyamba kukhulupilila kuti kuli Nyamalenga wamene otikonda. Kuchita vamene ivi kungakuyavyeni kuti mukoganizila umboni wakuti kuli Nyamalenga.

9. Kansi muphunzilapo chinji pa chisanzo cha Melissa?

⁹ Mulongo muyakine zina yake Melissa epindula ngako chifukwa chosakila-sakila nkhani yokhuza kulengewa kwa vinthu.b Yove enena kuti: “Ku sikulu nkhani yakuti vinthu vichitachinja yufotokozewa mu njila yakuti ikowoneka monga ni yachendi. Poyamba, nenzefunalini kusakila-sakila za nkhani yamene iyi. Chifukwa nenzeyopa kuti payakine ningafwane kuti nkhani yakuti vinthu vichitachinja ni yachendi. Koma niyamba kuganizila mfundo yakuti Yehova ofunalini kuti tikokhulupilila vinthu vamene viliye umboni. Tetyo, niyamba kusakila-sakila za nkhani yamene iyi. Niŵelenga buku yachipwitikizi yakuti, Existe um Criador Que Se Importa com Você? komasoti kabuku kakuti, Kodi Zamoyo Zinachita Kulengedwa? na kakuti, Mmene Moyo Unayambira—Mafunso 5 Ofunika Kwambiri. Mabuku amene aŵa niye ŵenenzefunikila chendi. Ndipo nenzefunishisha kuti sembe niŵaŵelenga kale-kale mabuku amene aŵa.”

10-11. Kansi n’chinji chingakuyavyeni kuti mupitilije kunkhala na minkhalidwe iweme? (1 Atesalonika 4:3, 4)

¹⁰ Mukopewa minkhalidwe iipa. Achilumbwana pakukula, chilakolako choyonana chunkhala champhamvu. Ndipo payakine ayakine angoŵakakamija kuti achite chiwelewelele. Satana ofuna kuti mukokungochita vamufuna. Lomba kansi n’chinji chingakuyavyeni kupewa kuchita minkhalidwe iipa? (Ŵelengani 1 Atesalonika 4:3, 4.) Keno mupemphela mukomufotokozela Yehova mwamumvwila. Ndipo mukomusenga kuti akupaseni mphamvu. (Mt. 6:13) Kumbukilani kuti Yehova ofuna kukuyavyani osati kukuweluzani. (Sal. 103:13, 14) Komasoti Mawu a Mulungu angakuyavyeni. Melissa, wamene tamutomolako kale enzevutika na maganizo ofuna kuchita vinthu viipa. Yove enena kuti: “Kuŵelenga Baibolo nsiku iliyonse kwiniyavya kuti osati nigonje. Kwenzeniyavya kukumbukila kuti nine wa Yehova ndipo nufuna kumutumikila.”—Sal. 119:9.

¹¹ Osayeja kulimbana nawo mweka mavuto ŵanu. Mukofotokozela makolo ŵanu vinthu vamulimbana navo. N’chendi kuti kukambilana nkhani zamene izi n’kupepulini koma n’kofunika ngako. Melissa enena kuti: “Nimusenga Yehova kuti aniyavye kunkhala wotang’a ntima ndipo nifotokozela atata ŵangu za vuto yangu, penichita vamene ivi niyamba kumvwa luweme muntima chifukwa niziŵa kuti Yehova osangalala nane.”

12. Kansi mungachite tyani kuti mukosankha vochita mwanzelu?

¹² Mukosogolelewa na mfundo za m’Baibolo. Pamukula patontho-patontho makolo ŵanu angayambe kukupasani ufulu wosankha mweka vochita olo n’tetyo, ziŵani kuti mukaliyefwika poziŵa vinyinji. Lomba kansi mungachite tyani kuti osati muchite vinthu vingasokoneze ushamwali wanu na Yehova? (Miy. 22:3) Mulongo muyakine zina yake Kari, efotokoza vimuyavya kuti akosankha vochita mwanzelu. Yove echizaziŵa kuti Mkhilisitu wotang’a mwauzimu ofunikilalini malamulo pa nkhani iliyonse. Yove enena kuti: “Nenzefunika kumvwisha mfundo za m’Baibolo mmalo mongoziŵa malamulo.” Keno muŵelenga Baibolo mukolikonsha kuti: ‘Kansi vamene ivi vanuŵelenga vuniuja chinji vokhuza maganizo a Yehova? Kansi nufwanamo mfundo zinganiyavye kuchita vinthu voyenela? Lomba kansi ningapindule tyani keno ningakatishile ntchito mfundo zamene izi?’ (Sal. 19:7; Yes. 48:17, 18) Keno muŵelenga Baibolo komasoti kuganizila ngako mfundo zake, vinkhale vosavuta kuti musankhe vochita vamene vingakondweleshe Yehova. Pamupitilija kupita pasogolo muwone kuti mufunikilalini malamulo pa nkhani iliyonse, chifukwa mumvwishe mwakuganizila Yehova pa nkhani zosiyana-siyana.

13. Kansi azishamwali ŵanu aweme angakuyavyeni tyani? (Miyambo 13:20)

¹³ Mukosankha azishamwali amene okonda Yehova. Monga mwatafotokozela kale, kusankha azishamwali aweme kungakuyavyeni kuti munkhale Mkhilisitu wotang’a mwauzimu. (Ŵelengani Miyambo 13:20.) Pa nthawe iyakine, mulongo muyakine zina yake Sara enzesangalalalini. Koma pechitika vinthu viyakine vamene vichitisha kuti ayambesoti kusangalala. Sara enena kuti: “Nifwana azishamwali aweme pa nthawe yoyenela. Newo na mulongo muyakine wachisimbi tenzekumana sondo iliyonse kuti tiphunzile Nsanja ya Mulonda. Nshamwali wangu muyakine eniyavya kuti niyambe kuyankhako pamisonkhano. Chifukwa choyavyiwa na ayangu amene aŵa niyamba kuwona kuti kuphunzila paneka komasoti kupemphela ni vinthu vofunika ngako. Vamene ivi viniyavya kuti ninkhale pa ushamwali wotang’a na Yehova ndipo niyambasoti kusangalala.”

14. Kansi Julien echita tyani kuti afwane azishamwali aweme?

¹⁴ Kansi mungafwane tyani azishamwali aweme amene angakuyavyeni? Julien, wamene palipano ni nkulu enena kuti: “Penenze ntontho nenzefwana azishamwali aweme nikokata ntchito yolalikila. Ayangu amene aŵa enze akhama ndipo eniyavya kuwona kuti munthu angosangalala na utumiki. Tetyo, niyamba kunkhala na cholinga chofuna kuzachita utumiki wa nthawe zonse. Nichizaziŵasoti kuti nenzeluza mwayi wonkhala na azishamwali aweme chifukwa chongofuna kunkhala na azishamwali a nsinkhu wangu ŵeka. Papita nthawe ninkhalasoti na azishamwali aweme ku Beteli. Visanzo vawo viniyavya kuti nikosankha luweme vosangalasa vamene vichitisha kuti ninkhale pa ushamwali uweme na Yehova.”

15. Kansi Paulo emuchenjeja chinji Timoteyo pa nkhani ya ŵanthu otandala nawo? (2 Timoteyo 2:20-22)

¹⁵ Tyani keno mwaziŵa kuti muyakine mumpingo angankhalelini munthu muweme wotandala naye? Paulo enzeziŵa kuti ayakine mumpingo woyambilila wa Chikhilisitu enzekondalini vinthu vauzimu. Tetyo, echenjeja Timoteyo kuti akoŵapewa. (Ŵelengani 2 Timoteyo 2:20-22.) Tuwona kuti ushamwali wasu na Atata ŵasu Yehova ni wantengo wapatali. Tetyo, tufunikalini kulola kuti aliyense asokoneze ushamwali wamene uyu wamene tankhala tuyeja-yeja mwakhama kuti tinkhale nawo.—Sal. 26:4.

KANSI KUNKHALA NA VOLINGA KUNGAKUYAVYENI TYANI KUTI MUPITE PASOGOLO?

16. Kansi mungankhale na volinga votyani?

¹⁶ Mukonkhala na volinga vothandiza. Mukosankha volinga vamene vingatang’ishe chikhulupililo chanu komasoti kukuyavyani kuti munkhale Mkhilisitu wotang’a. (Aef. 3:16) Mwachisanzo, mungasankhe kuti mukophunzila pamweka komasoti kuŵelenga Baibolo nthawe zonse. (Sal. 1:2, 3) Olosoti mungakonze zakuti mukopemphela pafupi-pafupi komasoti mofumila pansi pa ntima. Payakinesoti mungawone kuti mufunika kulilesha pa nkhani yosankha vosangalasa komasoti mwamukatishilila ntchito nthawe yanu. (Aef. 5:15, 16) Yehova asangalale akawona kuti mwewo muyeja-yeja kupita pasogolo.

17. Kansi kuyavya ayakine kungakuyavyeni tyani?

¹⁷ Mungankhale Mkhilisitu wotang’a keno muyavya ŵanthu ayakine. Yesu enena kuti: “Kupasa kuleta chisangalalo chikulu kupambana kulondela.” (Mac. 20:35) Mupindule ngako keno mukatishila ntchito nthawe na mphamvu zanu poyavya ayakine. Mwachisanzo, mungankhaleko na cholinga chakuti mukoyavya achikulile komasoti olwala mumpingo mwanu. Payakine mungoluta kuyaŵagulilako vinthu olosoti kuŵayavya mwangakatishilile ntchito vipangizo vawo vamakono. Keno nimwe m’bale mungankhaleko na cholinga chakuti munkhale ntumiki wothandiza kuti mukotumikila abale na alongo ŵanu. (Afil. 2:4) Mungawoneshesoti kuti mukonda ŵanthu amene alilini mumpingo poŵalalikila uthenga uweme wa Ufumu. (Mt. 9:36, 37) Keno n’vokwanishika, mungaliikile cholinga chakuti muchiteko utumiki uyakine wa nthawe zonse.

18. Kansi kuchita utumiki wa nthawe zonse kungakuyavyeni tyani kuti mukule mwauzimu?

¹⁸ Kuchita utumiki wa nthawe zonse kungakuyavyeni kuti mupite pasogolo mwauzimu. Upainiya ungakusegulileni mwayi woloŵa nawo Sikulu ya Akhilisitu Olalikila za Ufumu. Mungakwanishesoti kuyatumikila pa Beteli olo kukata nawo ntchito ya zomanga-manga. Mpainiya muyakine wachisimbi zina yake Kaitlyn enena kuti: “Penichingobatiziwa, kuloŵa mu utumiki na abale na alongo oziŵa vinthu vinyinji niye kwiniyavya ngako kuti nikule mwauzimu. Chisanzo chawo chiniyavya kuziŵa mfundo zinyinji za m’Baibolo komasoti kuti niyangijile luso yangu yophunzisa.”

19. Kansi mufwane madaliso otyani mukapitilija kupita pasogolo mwauzimu?

¹⁹ Pamupitilija kupita pasogolo mwauzimu mufwane madaliso anyinji. Mupewe kukatishila ntchito mphamvu zanu pochita vinthu vosathandiza. (1 Yoh. 2:17) Mupewesoti voŵaŵa vamene vuwela chifukwa chosankha vinthu molakwika. Mmalomwake, vinthu vikokuyendelani bwino ndipo mufwane chisangalalo ngacho-ngacho. (Miy. 16:3) Chisanzo chanu chiweme chingatang’ishe Akhilisitu ayanu, achilumbwana na achikulile kumo. (1 Tim. 4:12) Ndipo chofunika ngako n’chakuti munkhale na ntendele na moyo wokhutila, vamene vuwela chifukwa chakuti Yehova osangalala namwe komasoti chifukwa chakuti muli naye pa ushamwali uweme komasoti wotang’a.—Miy. 23:15, 16.