Nkhani Yophunzila N.° 30
Pitilijani kukulisha chikondi chanu
“Tiyeni tikule mu vinthu vonse kupitila mu chikondi.”—AEF. 4:15.
NYIMBO N.° 2 Yehova niye zina yanu
VATIKUTI TIPHUNZILEa
1. Kansi mwiphunzila chinji pemwiyamba kuphunzila Baibolo?
KANSI mwewo mukumbukila nthawe yemwiyamba kuphunzila Baibolo? Payakine mwidabwa pemuziŵa kuti Mulungu ali na zina. Payakine mwesisimuliwa pemuziŵa kuti Mulungu onzunzalini ŵanthu kumulilo wa helo. Ndipo n’voziŵikilatu kuti mwewo mwikondwela na chiyembekezo chowonana soti na okondewa ŵanu amene emwalila, nonkhala nawosoti pamozi muchalo cha paradaiso.
2. Kuyangijila pa kuphunzila choonadi cha m’Baibolo, kansi mwapita soti tyani pasogolo? (Aefeso 5:1, 2)
2 Mukophunzila ngako Mawu a Mulungu, chikondi chanu pa Yehova niye pachukula. Chikondi chamene icho niye chikulimbikisani kuchita vemwiphunzila novikatishila ntchito. Mwewo mwipanga chosankha chiweme ngako chokatijana na mfundo za m’Baibolo. Mwechinja maganizo ŵanu na minkhalidwe yanu, chifukwa mwenzefuna kukondwelesha Mulungu. Monga mwana wamene okonkheja vochita va kolo yachikondi, mwewo mwenzekonkheja Atata ŵanu akululu.—Ŵelengani Aefeso 5:1, 2.
3. Kansi ni makonsho otyani ŵatingalikonshe?
3 Tingachite luweme kulikonsha kuti: ‘Kansi chikondi changu pa Yehova masiku ŵano n’champhamvu kupambana mwechenzele pa nthawe yeninkhala Mkhilisitu? Kufumila pa nthawe yenibatizika, kansi nuganiza komasoti kuchita vinthu monga ni mwakuchitila Yehova—maka-maka pankhani yowonesha chikondi kuli abale na alongo ŵangu?’ Keno “chikondi chemwenzenacho poyamba” chasila, osataya ntima. Vinthu volingana na vamene ivi, niye vechitikila soti Akhilisitu amu nthawe ya atumwi. Yesu aliye ŵasiye Akhilisitu amene awo, ndipo nase azatisiyelini soti. (Chiv. 2:4, 7) Yove oziŵa kuti sewo tingakwanishe kuyamba soti kumukonda ngako, monga ni mwetichitila poyamba petiphunzila choonadi.
4. Kansi tikambilane chinji mu nkhani ino?
4 Nkhani ino, ifotokoze vatingachite kuti tipitilije kukonda ngako Yehova komasoti ŵanthu ayakine. Pavuli pake, tikambilane viyakine mwa vinthu viweme vamene vingachitike keno sewo tukonda ngako Yehova komasoti abale na alongo ŵasu.
KULISHANI CHIKONDI CHANU PA YEHOVA
5-6. Kansi mtumwi Paulo ekumana na mavuto otyani pa utumiki wake ndipo n’chinji chimulimbikisa kupitilija kutumikila Yehova?
5 Mtumwi Paulo enzesangalala potumikila Yehova, koma kuchita vamene ivo, kwenzelini kupepu nthawe zonse. Nthawe zinyinji Paulo enzeyenda maulwendo atali-atali, ndipo masiku amene awo kuyenda ulwendo kwenze kovuta. Pa maulwendo ŵake, Paulo nthawe ziyakine enzekumana na “voyofya va m’mimana,” komasoti “voyofya va akapondo.” Yove nthawe ziyakine, enzechitiliwa soti vinthu viipa na ŵanthu oshusha. (2 Akor. 11:23-27) Komasoti abale Achikhilisitu a Paulo, ni nthawe zonselini penzetembeja khama yofumila pansi pa ntima yenzechita yove pofuna kuŵayavya.—2 Akor. 10:10; Afil. 4:15.
6 Kansi n’chinji chimuyavya Paulo kuti apitilije kutumikila Yehova? Paulo, ephunzila vinyinji vokhuza minkhalidwe ya Yehova kupitila m’Malemba komasoti mu vinthu vechikumana navo pa moyo wake. Paulo enze wosimikija ntima kuti Yehova enzemukonda. (Aro. 8:38, 39; Aef. 2:4, 5) Ndipo yove eyamba kumukonda ngako Yehova. Paulo ewonesha kuti enzekonda Yehova ‘potumikila atuŵa ndipo epitilija kuŵatumikila.’—Ahe. 6:10.
7. Kansi ni njila imozi yotyani yatingakulishile chikondi chasu pa Yehova?
7 Tingayambe kumukonda ngako Mulungu pophunzila Mawu ŵake mwakhama. Keno muŵelenga Baibolo, mukoyeja kuganizila vamene lemba iliyonse vayuwonesha vokhuza Yehova. Likonsheni kuti: ‘Kansi nkhani yamene iyi yuwonesha tyani kuti Yehova onikonda? Kansi yunipasa vifukwa votyani vomukondela Yehova?’
8. Kansi pemphelo ingatiyavye tyani kuti tikokonda ngako Mulungu?
8 Njila iyakine yatingakulishile chikondi chasu pa Yehova, nikumuuja vamuntima mwasu mpemphelo. (Sal. 25:4, 5) Tikachita tetyo, yove azayankhe mapemphelo ŵasu. (1 Yoh. 3:21, 22) Mulongo muyakine waku Asia, zina yake Khanh enena kuti: “Poyamba chikondi changu pa Yehova, chenzedalila pa vinthu venenzeziŵa, koma chikondi chamene icho chikula peniwona mwamene yove mwenzeyankhila mapemphelo ŵangu. Vamene ivi, venichitisha kufuna kuchita vinthu vomukondwelesha.”b
KULISHANI CHIKONDI CHANU KULI ŴANTHU AYAKINE
9. Kansi Timoteyo ewonesha tyani kuti enzepita pasogolo pa nkhani yowonesha chikondi?
9 Pavuli pa vyaka vinyinji kufumila pechitembenuka, Paulo ekumana na mulumbwana muweme ngako zina yake Timoteyo. Timoteyo enzekonda Yehova komasoti ŵanthu. Mtumwi Paulo euja ŵanthu aku Filipi kuti: “Niliye muyakine wamene ali na ntima monga ni [Timoteyo] wamene angakusamalileni chendi mwachilungamo.” (Afil. 2:20) Pamene apa Paulo, aliyenene za luso ya Timoteyo monga munthu wochita vinthu mwadongosolo kapena waluso yolaŵila nkhani pagulu, koma n’voziŵikilatu kuti Paulo enzewona kuti Timoteyo enzekonda ngako abale na alongo. N’vosakaikisha kuti mipingo yamene yenzetumikila Timoteyo, yenzeyembekezela mwachidwi kutandaja kwake.—1 Akor. 4:17.
10. Kansi Anna na mwanalume wake ewonesha tyani kuti enzekonda abale na alongo ŵawo?
10 Sewo nase tusakila-sakila njila zatingayavyileko abale na alongo ŵasu. (Ahe. 13:16) Ganizilani vichitikila Anna watatomola poyamba. Pavuli pachimphepo cha nkuntho, yove pamozi na mwanalume wake eluta ku ng’anda kwa banja iyakine ya Mboni, ndipo efwana kuti ntenje wa ng’anda yawo wapona na mphepo. Monga vokonkhapo vake, banja yamene iyo yenzeve vovwala vituŵa. Anna enena kuti: “Sewo titola vovwala vawo noluta navo kuyachapa, ndipo tiŵaletela vili votchisa komasoti vopeta-peta. Kuli sewo, vamene ivi venzelini vinthu vovuta kuvichita, koma chifukwa chakuti tevichita, sewo tankhala azishamwali apantima na ove mpaka pano.” Chikondi cha Anna na mwanalume wake kuli abale na alongo, chiŵalimbikisa kupeleka thandizo yofunikila.—1 Yoh. 3:17, 18.
11. (a) Kansi vatuchita poyeja-yeja kuti tiwoneshe chikondi vingaŵakhuze tyani ayakine? (b) Mokatijana na Miyambo 19:17, kansi Yehova ochita tyani keno sewo tuwonesha chikondi?
11 Tikankhala aweme mtima nowonesha chikondi kuli ŵanthu ayakine, ove angowona kuti tuyeja-yeja kukonkheja Yehova. Komasoti ove angatembeje ngako kuwama mtima kwasu kupambana mwatuganizila. Khanh watatomola poyamba, okumbukila luweme vokhuza ŵanthu amene emuyavya. Yove enena kuti: “Nuŵatembeja ngako alongo onse okondewa amene enzenitola poluta muutumiki. Ove enzewela kuzanitola kung’anda kwangu kuti nikalye nawo chakulya ndipo pojokela kung’anda, ove enzewoneshesha kuti nafwika luweme. Palipano, newo nuziŵa kuti penzefunikila khama ikulu kuti ove akwanishe kuchita vamene ivo. Ndipo ove ekwanisha kuchita vamene ivo chifukwa cha chikondi.” N’chendi kuti ni ŵanthulini onse amene azatitembeje chifukwa cha vinthu vatuŵachitila. Ponena za ŵanthu amene emuyavya Khanh, enena kuti: “Nenze wofunishisha kuti niŵawejele chifukwa cha kuwama mtima kukulu kwechiniwonesha, koma lomba newo nuziŵalini kwakunkhala onse ŵanthu amene awo. Koma olo n’tetyo, Yehova oziŵa kwakunkhala ove, ndipo nupemphela kuti yove aŵawejele mmalo mwa newo.” Khanh olaŵila vachendi. Yehova owona olo kanthu katontho kowonesha kuwama ntima kwatuchitila ŵanthu ayakine. Yehova owonasoti kanthu kamene yako kunkhala nsembe ya ntengo wapatali komasoti monga nkhongole yakuti azaweje.—Ŵelengani Miyambo 19:17.
Keno munthu opita pasogolo potumikila Yehova, yove osakila-sakila njila zoyavyilako ayakine. (Onani ndime 12.)
12. Kansi abale angawoneshe tyani kuti okonda mpingo? (Onanisoti vithunzi.)
12 Keno nimwe m’bale, kansi mungawoneshe tyani kuti mukonda ŵanthu ayakine ndipo muyeja-yeja kuŵayavya? M’bale muyakine wachilumbwana zina yake Jordan, ekonsha nkulu muyakine vangachite kuti akoyavya ngako Mumpingo. Nkulu wamene uyo emutembeja chifukwa cha vinthu venzechita vowonesha kupita kwake pasogolo, komasoti emupasa malangizo amene angamuyavye kuchita vinyinji. Mwachisanzo, yove elangiza Jordan kuti akofwika mokulumija pa Ng’anda ya Ufumu, kupeleka moni kuli ŵanthu ayakine, kutola nawo mbali pamisonkhano, kulalikila monkhazikika pamozi na ŵanthu am’kagulu kake kautumiki wakumunda, komasoti kusakila njila zangayavyileko ŵanthu ayakine. Jordan penzekonkheja malangizo amene awo, sikuti yove enzengophunzila tyala kuchita vinthu vanyowani, koma enzeyangijila soti chikondi chake kuli abale na alongo. Jordan ephunzila kuti m’bale akankhala ntumiki wothandiza, niye lini pakuyamba kuyavya ŵanthu ayakine, koma mmalo mwake yove onkhala kuti opitilija kuŵayavya.—1 Tim. 3:8-10, 13.
13. Kansi chikondi chimulimbikisa tyani m’bale muyakine zina yake Christian kuti ayenelelesoti kunkhala nkulu?
13 Lomba tyani keno mwewo mwetumikilapo kale monga ntumiki wothandiza komasoti monga nkulu masiku akuvuli? Yehova okumbukila ntchito yemwenzekata komasoti chikondi chanu chamene chenzekulimbikisani kuchita vamene ivo. (1 Akor. 15:58) Yove owonasoti chikondi chamupitilija kuwonesha. M’bale muyakine zina yeka Christian, ekhumudwa ngako pechichosewa pa udindo wake wonkhala nkulu. Koma olo n’tetyo, yove enena kuti: “Newo nisankha kuchita vonse vaningakwanishe kuti nitumikile Yehova chifukwa chomukonda—osati chifukwa chakuti nutumikila monga nkulu olo yayi.” Papita nthawe, yove ewejeleshewa soti kunkhala mkulu. Christian enena kuti: “Nenzechitako wowa patontho kuti niyambesoti kutumikila monga nkulu. Koma newo niganiza kuti, keno Yehova mwachifundo chake enzefuna kuti newo ninkhale soti nkulu, newo nenzefunikila kuchita vamene ivo chifukwa nenzemukonda komasoti nezekonda abale na alongo.”
14. Kansi muphunzila chinji pa vechinena mulongo muyakine waku Georgia?
14 Atumiki a Yehova owoneshasoti chikondi kuli ayawo. (Mt. 22:37-39) Mwachisanzo, mulongo muyakine waku Georgia zina yake Elena, enena kuti: “Poyamba, chinthu chamene chenzenilimbikisa kuti nikolalikila, chenze chikondi changu pa Yehova. Koma chikondi changu chamene icho kuli Atata ŵangu akululu pechikula, nacho chikondi changu kuli ŵanthu chikulasoti. Nenzeyeja-yeja kuganizila mavuto ŵenzekumana nawo komasoti nkhani yamene ingaŵafwike pa ntima. Nikaganizila ngako vokhuza ove mwanjila yamene iyi, niyesoti penenzefunishisha kuŵayavya.”—Aro. 10:13-15.
YEHOVA AZATIDALISE KENO TUWONESHA CHIKONDI KULI ŴANTHU AYAKINE
Kuchita vinthu mwachikondi kungalete madaliso kuli ŵanthu ayakine anyinji. (Onani ndime 15-16.)
15-16. Mokatijana na vithunzi ivi, kansi nimadaliso otyani ŵatufwana tikowonesha chikondi kuli ayakine?
15 Tikowonesha chikondi kuli abale ŵasu, ni ovelini ŵeka amene opindula. Mulili wa COVID-19 pewiyamba, m’bale muyakine zina yake Paolo pamozi na mwanakazi wake, eyavya alongo anyinji achikulile kuphunzila mwangakatishile ntchito vipangizo vamakono polalikila. Mulongo muyakine wamene poyamba enzevutika kukatishila ntchito chipangizo chake, ekwanisha kuziŵa mwangachitile vamene ivo. Yove ekwanisha kuchikatishila ntchito poitilako achibale ŵake ku Chikumbukilo. Ŵanthu ayakine okwana 60 mwa ŵanthu amene awo, epezeka pa Chikumbukilo pokatishila ntchito videoconference! Mulongo wamene uyu pamozi na enekwake onse epindula na vechichita Paolo na mwanakazi wake. Papita nthawe, mulongo wamene uyo elembela Paolo kuti: “Zikomo ngako chifukwa chotiphunzisa sewo achikulile. Nizaluŵelini mwawanisamalilila Yehova komasoti khama yanu yamwawonesha.”
16 Vochitika monga ni vamene ivi, vimuphuzisa Paolo phunzilo iyakine yofunika ngako. Vimukumbusha kuti chikondi n’chofunika ngako kupambana kuziŵa vinthu kapena luso yachibadwa. Yove enena kuti: “Pa nthawe yamene iyo newo nenzetumikila monga wopanamila dela. Masiku ŵano, nuziŵa kuti olo kuti payakine abale na alongo eluŵa nkhani zenenzelaŵila, ove akalikumbukila mphela thandizo yeniŵapasa.”
17. Kansi niŵanisoti amene akuti azapindule keno tuwonesha chikondi?
17 Keno sewo tuwonesha chikondi kuli ŵanthu ayakine, sewo nase tupindula munjila zetenzeleka yembekezela. Jonathan, wamene onkhala ku New Zealand, osimikijila vamene ivi. Nsiku iyakine pa Chiŵelu nzuŵa zuŵa ikupya ngako, yove ewona mpainiya olalikila mbali mwa nsewu. Jonathan eganiza zokata ntchito pamozi na mpainiya wamene uyo pa Chiŵelu nzuŵa nsiku yokonkhapo. Poyamba, yove aliyeziŵe kuti angapindule tyani kupitila muvochita vake vowonesha kuwama mtima kwake kwamene uko. Jonathan enena kuti, “Pa nthawe yamene iyo newo nenzesangalala lini na utumiki wakumunda. Koma penenzemvwishila njila zenzekatishila ntchito mpainiya wamene uyo pophunzisa nowona vitwazi va utumiki wake wakumunda, venichitisha kuti nikoukonda ngako utumiki wamene uyo. Komasoti nifwana nshamwali muweme wamene eniyavya kuti nikule mwauzimu, nikosangalala na utumiki, komasoti kuti nivwendele ngako kwa Yehova.”
18. Kansi Yehova ofuna kuti sewo tikochita tyani?
18 Yehova, ofuna kuti sewo tikomukonda ngako komasoti tikokonda ŵanthu ayakine. Molingana na mwataphunzilila, sewo tingakulishe chikondi chasu pa Yehova mwa kuŵelenga Mawu ŵake kuŵaganizila, komasoti kulaŵila naye nthawe zonse mpemphelo. Tingakulishe chikondi chasu kuli abale na alongo ŵasu poŵayavya pakafunikila kuchita vamene ivo. Chikondi chasu chikakula, tizavwendele ngako kwa Yehova komasoti tikoŵakonda ngako abale na alongo ŵasu. Komasoti tizasangalale na ushamwali wamene uyo kosasila!
NYIMBO N.° 109 Tikokondana kufumila pansi pa ntima
a Mosasamala kanthu keno nise alombapano mu choonadi kapena tankhala tutumikila Yehova kwa vyaka vinyinji, tonse tingapitilije mphela kupita pasogolo. Mu nkhani ino, tikambilane njila yofunika yokhuza mwatingachitile vamene ivo: mwakukulisha chikondi chasu kwa Yehova komasoti kuli ŵanthu ayakine. Patukambilana nkhani yamene iyi, ganizirani mwamwapitila kale pasogolo, komasoti vamungachite kuti mupite ngako pasogolo.
b Mazina ayakine achinjiwa.