NKHANI YOPHUNZILA N.° 5
NYIMBO N.° 108 Chikondi cha Mulungu n’chokhulupilika
Mwatupindulila na chikondi cha Yehova
“Yesu ewela m’chalo kuzapulumusha ochimwa.”—1 TIM. 1:15.
CHOLINGA CHANKHANI
Munkhani ino, tiwone mwatupindulila chifukwa cha dipo komasoti mwatingamutembejele Yehova chifukwa cha nsembe yamene iyi.
1. Kansi tingachite tyani kuti timukondweleshe Yehova?
TIYELEKEZELE kuti mwapasa munthu muyakine mphaso iweme ngako komasoti yapadela yamene ingamuyavye. Mwewo mungakhumudwe ngako keno munthu wamene uyo waika mphaso yanu m’khadi bokisi ndipo oikatishilalini ntchito! Koma mosiyana na vamene ivi, mungasangalale ngako keno yove oikatishila ntchito luweme komasoti okutembejani. Kansi tuphunzilapo chinji? Yehova epeleka Mwana wake chifukwa cha sewo. Yove angakondwele ngako keno tumutembeja chifukwa cha mphaso yapadela yamene iyi komasoti chikondi chake chamene chimuchitisha kuti apeleke dipo!—Yoh. 3:16; Alo. 5:7, 8.
2. Kansi tikambilane chinji munkhani ino?
2 Koma olo n’tetyo, pakapita nthawe itali sewo tingaleke kuwona kuti dipo nimphaso yantengo wapatali. Koma keno tumutembejalini Yehova chifukwa cha mphaso ya dipo yamene niyantengo wapatali, vingankhale monga taiika pamalo ofisika amene tukwanishalini kuiwona olo kuiganizila. Kuti vamene ivi osati vitichitikile, tufunikila kuganizila vinthu vonse vawatichitila Mulungu komasoti Khilisitu pafupi-pafupi. Nkhani ino, itiyavye kuwona mwatingachitile vamene ivi. Tiwone mwatupindulila na dipo palipano, komasoti madaliso ŵatuyembekezela kusogolo. Tikambilanesoti vatingachite kuti tikomutembeja Mulungu chifukwa cha chikondi chake, ngako-ngako panthawe ino ya Chikumbukilo.
MWATUPINDULILA PALIPANO
3. Kansi ninjila yotyani yatupindulila na nsembe ya dipo palipano?
3 Nsembe ya dipo ya Khilisitu iyamba kale kutipindulisha. Mwachisanzo, Yehova otikhululukila machimo ŵasu kupitila munsembe yamene iyi. Yehova niwosakakamijika kuti akotikhululukila machimo ŵasu. Koma yove ochita vamene ivi chifukwa chakuti ofuna kutikhululukila. Powonesha kutembeja, wamasalimo muyakine eimba kuti: “Mwewo Yehova, nimwe muweme komasoti wokonzeka kukhululuka.”—Masal. 86:5; 103:3, 10-13.
4. Kansi Yehova epeleka nsembe ya dipo kuli ŵanthu otyani? (Luka 5:32; 1 Timoteyo 1:15)
4 Ŵanthu ayakine angaganize kuti ni osayenelela kuti Yehova aŵakhululukile machimo ŵawo. Kulaŵila chendi, paliye munthu woyenelela kuti Mulungu amukhululukile machimo ŵake. Ntumwi Paulo enzeziŵa kuti yove enze ‘wosayenelela kuitiwa kuti ntumwi.’ Koma enenasoti kuti: “Chifukwa cha kuwama ntima kukulu kwa Mulungu nili tetino monga ni mwanilili.” (1 Ako. 15:9, 10) Sewo tikalapa machimo ŵasu, Yehova otikhululukila. Ndaŵa yanji? Yove otikhululukilalini chifukwa chakuti nise oyenelela, koma chifukwa chakuti otikonda. Tetyo, keno mulimvwila chisoni chifukwa choganiza kuti nimwe osayenelela kuti Yehova akukhululukileni, mukokumbukila kuti Yehova aliyepeleke nsembe ya dipo chifukwa cha ŵanthu asachimwa. Yove epeleka nsembe yamene iyi kuli ŵanthu aliye ungwilo amene olimvwila chisoni chifukwa cha machimo ŵawo ndipo ofuna kuchinja.—Ŵelengani Luka 5:32; 1 Timoteyo 1:15.
5. Kansi sewo nise oyenelela kuti Yehova atikhululukile machimo ŵasu? Fotokozani.
5 Paliye munthu aliyense wasewo wamene ofunika kuganiza kuti niwoyenelela kuti Mulungu amuchitile chifundo, olo kuti watumikila kwa vyaka vinyinji. N’chendi kuti Yehova otembeja vinthu vatuchita pomutumikila mokhulupilika. (Ahe. 6:10) Yove etipasa Mwana wake monga mphaso yamahala, osati monga malipilo chifukwa cha utumiki watumuchitila. Chifukwa cha vamene ivi, kungankhale kuphoniya kuganiza kuti nise oyenelela kukhululukiliwa machimo chifukwa chakuti tuchita vinyinji potumikila Yehova. Keno tukhulupilila maganizo amene aŵa, vingatanthauze kuti Yesu enzefunikilalini kutifwila kuti machimo ŵasu akhululukiliwe.—Yelekezelani na Agalatiya 2:21.
6. Kansi ndaŵa yanji Paulo enzetumikila Yehova mwakhama?
6 Paulo enzeziŵa kuti enzewosayenelela kuti Mulungu amukhululukile machimo ŵake olo kuti enzechita vinyinji pomutumikila. Lomba, ndaŵa yanji yove enzetumikila Yehova mwakhama? Yove enzechitalini vamene ivo kuti ankhale woyenelela kuti Mulungu amukhululukile machimo ŵake, koma pofuna kutembeja chifukwa cha kuwama ntima kukulu kwa Yehova. (Aife. 3:7) Molingana na Paulo, sewo tupitilija kutumikila Yehova molipeleka pofuna kumutembeja chifukwa cha dipo, osati pofuna kuti tinkhale oyenelela kuti atichitile chifundo.
7. Kansi ninjila iyakine yotyani yatupindulila na nsembe ya dipo palipano? (Aloma 5:1; Yakobo 2:23)
7 Njila iyakine yatupindulila na nsembe ya dipo palipano, niyakuti tingakwanishe kunkhala paushamwali uweme na Yehova.a Mokatijana na veinena nkhani yapita, sewo tenzelini paushamwali na Mulungu panthawe yetivyalika. Koma chifukwa cha dipo, sewo tingakwanishe kunkhala “pantendele na Mulungu” komasoti kunkhala naye paushamwali uweme.—Ŵelengani Aloma 5:1; Yakobo 2:23.
8. Kansi ndaŵa yanji tufunikila kumutembeja Yehova chifukwa cha mwayi wa pemphelo?
8 Ganizilani mwayi uyakine ŵatili nawo chifukwa chakuti tili paushamwali na Yehova,—wamene ni mwayi wa pemphelo. Yehova akumvwalini tyala mapemphelo ŵatupeleka tikankhala pagulu, koma akumvwasoti mapemphelo ŵatupeleka tikankhala kwaseka. Tikapemphela, nkhaŵa zasu zuchepa. Koma palisoti chinthu chiyakine chiweme ngako chukwanishika chifukwa cha pemphelo. Pemphelo yutiyayva kuti tinkhale paushamwali uweme ngako na Mulungu. (Sal. 65:2; Yako. 4:8; 1 Yoh. 5:14) Panthawe yenze pano pachalo, Yesu enzepemphela moweleja-weleja chifukwa chakuti enzeziŵa kuti Yehova omvwishila komasoti kuti pemphelo yumuyavya kutang’isha ushamwali wake na Atata ŵake. (Luk. 5:16) Tutembeja ngako kuti tili na mwayi wonkhala azishamwali a Yehova chifukwa cha nsembe ya Yesu, komasoti kuti tingakwanishe kulaŵila na Yehova m’pemphelo!
VINTHU VIWEME VATUYEMBEKEZELA CHIFUKWA CHA DIPO
9. Kansi atumiki okhulupilika a Mulungu oyembekezela madaliso otyani kusogolo chifukwa cha dipo?
9 Kansi ni madaliso otyani ŵakuyembekezela atumiki okhulupilika a Mulungu chifukwa cha nsembe ya dipo? Yehova azaŵapase moyo wosasila. Ŵanthu anyinji oganiza kuti lonjezo yamene iyi niyosakwanishika chifukwa chakuti ŵanthu akufwa kufumila kale-kale ngako. Koma cholinga chenze nacho Yehova polenga ŵanthu chenze chakuti ankhale na moyo kosasila. Kuti Adamu aliye chimwe, sembe paliye okaikila kuti ŵanthu angankhale na moyo kosasila. Olo kuti n’kovuta kuganizila vokhuza moyo wosasila palipano, tingakhulupilile kuti tizankhale nawo, chifukwa tuziŵa kuti Yehova elipila ntengo wapalulu ngako—pechipeleka Mwana wake wokondewa pofuna kuti vamene ivi vikwanishike.—Alo. 8:32.
10. Kansi Akhilisitu ozozewa komasoti ambelele ziyakine oyembekezela chinji?
10 Olo kuti palipano tikaliyelondela moyo wosasila, Yehova ofuna kuti tikouganizila. Akhilisitu ozozewa oyembekezela kuyalondela moyo wosasila kululu kuti akalamulile chalo pamozi na Khilisitu. (Chiv. 20:6) Ambelele ziyakine oyembekezela paladaiso wapano pachalo, ndipo ŵanthu akolwalalini olo kumvwa chisoni. (Chiv. 21:3, 4) Kansi mwewo nimwe ambelele ziyakine ndipo muyembekezela kuzankhala pano pachalo kosasila? Mphaso yamene iyi ni itontholini poiyelekezela na moyo wakuti akalondele ozozewa kululu! Yehova etilenga kuti tikonkhala pano pachalo. Chifukwa cha vamene ivi, kunkhala pano pachalo kuzankhale kokondwelesha ngako.
11-12. Kansi ayakine mwa madaliso ŵatuyembekezela m’paladaiso ni otyani? (Onanisoti vithunzi.)
11 Ganizilani mwati uzankhalile moyo wanu m’paladaiso. Mwewo mukodelalini nkhaŵa kuti mungalwale olo kufwa. (Yes. 25:8; 33:24) Yehova azakupaseni chilichonse chaufuna moyo wanu. Kansi ni maphunzilo otyani ŵamufuna pamoyo wanu? Kansi mufuna kuziŵa vinyinji vokhuza nyama? Kansi mungasangalale kuphunzila kuimba nyimbo na chipangizo choimbila? Kansi mungasangalale kuphunzila kudolowing’a? M’paladaiso tizafunikile ŵanthu oziŵa kulemba mapulani ang’anda komasoti omanga. Ŵanthu azafunikilesoti kukata ntchito zolima, kupika vakulya, kupanga vipangizo vokatila ntchito, kukomola mbewu komasoti kuzisamalila. (Yes. 35:1; 65:21) Chifukwa chakuti muzankhale na moyo kosasila, mwewo muzankhale na nthawe yokwanila kuti muphunzile luso iliyonse yamufuna noikulisha.
12 Tizasangalale ngako kulondelasoti ŵanthu amene echifwa! (Mach. 24:15) Ganizilanisoti mwati muzasangalalile pophunzila vinthu vinyinji vokhuza Yehova kupitila muvinthu vechilenga. (Sal. 104:24; Yes. 11:9) Chinthu chiweme ngako n’chakuti tizasangalale ngako kutumikila Yehova paliye kuliimba mulandu mwanjila iliyonse! Kansi mwewo mungalole kuluza madaliso amene aŵa pochita vinthu viipa pofuna kuti ‘musangalaleko kwanthawe itontho’? (Ahe. 11:25) N’vowonekelatu kuti mungachitelini vamene ivi! Tufunika kuvomela kulitana chilichonse palipano kuti tizafwane madaliso amene aŵa. Mukokumbulila kuti tipitilijelini kuyembekezela kuti Paladaiso afwike mpaka kale-kale. Kwalombapano, paladaiso wamene uyu azankhale malo ŵatitikonkhalamo nsiku iliyonse. Madaliso onse amene aŵa ni okwanishika chifukwa chakuti Yehova otikonda ngako, mwakuti epeleka Mwana wake kuti atifwile!
Kansi ni madaliso otyani ŵamuyembekezela mwachidwi ngako m’paladaiso? (Onani ndime 11-12.)
VAMUNGACHITE KUTI MUWONESHE KUTEMBEJA CHIKONDI CHA YEHOVA
13. Kansi tingamutembeje tyani Yehova chifukwa chakuti otikonda? (2 Akolinto 6:1)
13 Kansi tingamutembeje tyani Yehova chifukwa cha nsembe ya dipo? Tingachite vamene ivi keno tuwona kuti kumutumikila niye chinthu chofunika ngako pamoyo wasu. (Mat. 6:33) Kupambana vonse, Baibolo yunena kuti Yesu echifwa “kuti amene ali na moyo osati ankhale na moyo wolikondwelesha ŵeka, koma ankhale na moyo wokondwelesha wamene eŵafwila noushiwa.” (2 Ako. 5:15) Yehova watiwonesha kuwama ntima kukulu ngako komasoti watikhululukila machimo ŵasu. Keno tuchita vonse vatingakwanishe pomutumikila tuwonesha kuti tuziŵa vinthu vawatichitila komasoti tumutembeja ngako.—Ŵelengani 2 Akolinto 6:1.
14. Kansi tingawoneshe tyani kuti tuŵadalila malangizo a Yehova?
14 Tingawoneshesoti kuti tumutembeja Yehova keno tumudalila komasoti kukonkheja malangizo ŵake. Motyani? Keno tufuna kupanga chosankha pa nkhani ya maphunzilo apalulu olo ntundu wa ntchito yatingavomele, tufunika kuganizila vakufuna Yehova kuti tichite. (1 Ako. 10:31; 2 Ako. 5:7) Keno tupanga chosankha mokatijana na chikhulupililo chasu mwa Yehova, vuyavya kuti chikhulupililo komasoti ushamwali wasu na yove utang’e ngako. Ndipo tuyamba kukhulupilila ngako kuti tizafwane moyo wosasila.—Alo. 5:3-5; Yako. 2:21, 22.
15. Kansi tingawoneshe tyani kutembeja panthawe ya Chikumbukilo?
15 Palisoti njila iyakine yatingamutembejele Mulungu chifukwa chakuti otikonda. Tingachite vamene ivi mwakukatishila ntchito nthawe ya Chikumbukilo kuti timutembeje ngako Yehova chifukwa cha nsembe ya dipo. Kuyangijila pa kulikonzekelesha kuti tikapezekepo pa Chikumbukilo, tingachitesoti luweme kuitilako ayakine. (1 Tim. 2:4) Mukoŵauja vinthu vikuti vizachitike pa Chikumbukilo ŵanthu ŵamuitila. Mavidiyo apa jw.org akuti Ndaŵa yanji Yesu echifwa? Na yakuti Kumbukilani imfwa ya Yesu, angakuyavyeni kuziŵa mwamungachitile vamene ivi. Akulu angachite vonse vangakwanishe kuti aitileko ŵanthu amene efoka. Ganizilani chisangalalo chunkhala kululu komasoti pano pa chalo keno mbelele ya Yehova yamene isokela yajokelasoti pa gulu ya ziyake! (Luk. 15:4-7) Pa nthawe ya Chikumbukilo, tiyeni tonse tinkhale na cholinga chopeleka moni osati kuli ophunzila Baibolo alombapano ŵeka, komasoti kuli ŵanthu amene enze eleka kusonkhana kwa nthawe itali. Tufuna kuti ove azalimvwe kuti alondelewa!—Alo. 12:13.
16. Ndaŵa yanji tingachite luweme kuganizila vokhuza kuyangijila utumiki wasu panthawe ya Chikumbukilo?
16 Kansi mungayangijileko utumiki wanu kuti muchite vinyinji pa nthawe ya Chikumbukilo? Kuchita vamene ivi ni njila iweme ngako yotembejela vinthu vonse vechitichitila Mulungu komasoti Khilisitu. Tikankhala na nthawe ikulu yochita utumiki, niyesoti patuwona kuti Yehova otiyavya, ndipo vamene ivi vutiyavya kuti tikomudalila ngako. (1 Ako. 3:9) Mukowonesheshasoti kuti mukonkheja ndandanda ya kuŵelenga Baibolo pa nthawe ya Chikumbukilo yamene ili mu kabuku ka Kuphunzila Malemba Nsiku iliyonse komasoti m’kabuku ka utumiki. Mungachitesoti luweme kuika ndandanda yamene iyi ya kuŵelenga Baibolo pa pulogilamu ya vinthu vamuphunzila.
17. Kansi n’chinji chakukondwela nacho Yehova? (Onanisoti bokosi yakuti “Njila zatingatembejele Yehova chifukwa chakuti otikonda.”)
17 Nthawe ziyakine mungakwanishelini kuchita vinyinji potumikila Yehova chifukwa cha mwavilili vinthu pamoyo wanu. Koma olo n’tetyo, mukokumbukila kuti Yehova olinganijalini vinthu vamumuchitila mwewo na vakumuchitila ayanu. Yove owona vili muntima mwanu. Yove osangalala akawona kuti mumutembeja mofumila muntima chifukwa cha nsembe ya dipo yechipeleka.—1 Sam. 16:7; Mko. 12:41-44.
18. Ndaŵa yanji tumutembeja ngako Yehova Mulungu komasoti Yesu Khilisitu?
18 Ni nsembe tyala ya dipo yamene yuchitisha kuti machimo ŵasu akhululukiliwe, tinkhale paushamwali na Yehova, komasoti tinkhale na chiyembekezo cha moyo wosasila. Tiyeni tikomutembeja Yehova nthawe zonse chifukwa cha chikondi chake chamene chemuchitisha kuti atipase madaliso onse amene aŵa. (1 Yoh. 4:19) Tiyenisoti tikomutembeja Yesu wamene etikonda ndipo elolela kuti afwe chifukwa cha sewo!—Yoh. 15:13.
NYIMBO N.° 154 Chikondi chisasila
a Yehova enzekhululukila machimo ŵa atumiki ŵake akale Yesu akaliyepeleka nsembe ya dipo. Yove enzechita vamene ivi chifukwa enzekaikilalini kuti Mwana wake azankhale wokhulupilika mpaka kufwa. Tetyo, venze monga kuti nsembe ya dipo yapelekewa kale olo kuti Yesu enze akaliyepeleka moyo wake.—Alo. 3:25.