NKHANI YOPHUNZILA N.° 4
NYIMBO N.° 18 Tutembeja chifukwa cha dipo
Kansi nsembe ya dipo yutiphunzisa chinji?
“Vinthu vechichita Mulungu potiwonesha chikondi.”—1 YOH. 4:9.
CHOLINGA CHANKHANI
Munkhani ino, tiwone minkhalidwe yochitisha chidwi ya Yehova Mulungu komasoti Yesu Khilisitu yamene yuwonekela kupitila munsembe ya dipo.
1. Kansi tupindula tyani tikapezeka pa Mwambo wokumbukila imfwa ya Yesu Khilisitu?
YEHOVA etipasa mphaso yapalulu ngako pechitumija Mwana wake kuti azafwile ŵanthu! (2 Ako. 9:15) Chifukwa chakuti Yesu epeleka moyo wake, mwewo mungakwanishe kunkhala paushamwali uweme na Yehova. Mwewo mulisoti na chiyembekezo chakuzafwana moyo wosasila. Tili na vifukwa vinyinji viweme votembejela Yehova wamene etipasa nsembe ya dipo chifukwa chakuti otikonda ngako! (Alo. 5:8) Pofuna kutiyavya kuziŵa vatingachite kuti tipitilije kuwonesha kutembeja chifukwa cha nsembe yamene iyi, komasoti kuti osati tiluŵe vechitichitila Yehova pamozi na Mwana wake, Yesu elamula kuti tikochita Chikumbukilo cha imfwa yake chaka chilichonse.—Luk. 22:19, 20.
2. Kansi tikambilane chinji munkhani ino?
2 Chaka chino, Chikumbukilo chizachitike pa Chiŵelu pa 12 Epulayelo 2025. Tukaikilalini kuti tonse tufuna kuti tizapezekepo pa chochitika chamene ichi. Mwewo mungapindule ngako panthawe ya Chikumbukilo keno mupatula nthawe kuti muganizile vechitichitila Yehovaa pamozi na Mwana wake. Munkhani ino, tikambilane vayutiphunzisa nsembe ya dipo vokhuza Yehova pamozi na Mwana wake. Munkhani ikuza, tizakambilane mwatupindulila na dipo yamene iyi komasoti vatingachite powonesha kutembeja.
VAYUTIPHUNZISA DIPO VOKHUZA YEHOVA
3. Kansi imfwa ya munthu mmozi ingamasule tyani ŵanthu mamiliyoni anyinji? (Onanisoti chithunzi.)
3 Dipo yutiphunzisa kuti Yehova ni wachilungamo. (Deut. 32:4) Ndaŵa yanji tunena tetyo? Ganizilani ivi: Chifukwa chakuti Adamu aliyemvwile Mulungu, sewo tilondela uchimo wamene uchitisha kuti tikokufwa. (Alo. 5:12) Pofuna kutimasula ku uchimo na imfwa, Yehova etumija Mwana wake kuti azapeleke dipo. Koma kansi vingakwanishike tyani kuti moyo wa mngwilo wa munthu mmozi uwombole ŵanthu mamiliyoni anyinji? Ntumwi Paulo efotokoza kuti: “Pakuti kusamvwila kwa munthu mmozi wamene uyo [Adamu] kwichitisha kuti ŵanthu anyinji ankhale ochimwa, kumvwila kwa munthu mmozi wamene uyu [Yesu] kuzachitishesoti kuti anyinji ankhale olungama.” (Alo. 5:19; 1 Tim. 2:6) Kulaŵila mwa njila iyakine, sewo tenkhala akapolo a uchimo na imfwa chifukwa cha munthu mmozi wamngwilo wamene aliyemvwile Mulungu. Tetyo, penzefunikilasoti munthu mmozi womvwila wamene aliye uchimo kuti atimasule.
Munthu mmozi echitisha kuti tinkhale paukapolo wa uchimo na imfwa. Molingana na vamene ivi, munthu mmozi echitisha kuti timasuliwe (Onani ndime 3.)
4. Ndaŵa yanji Yehova elola kuti ŵana omvwila ŵa Adamu akokufwa?
4 Kansi penzefunikila chendi kuti Yehova achitetumija Yesu Khilisitu kuti azatifwile kuti timasuliwe ku uchimo na imfwa? Ndaŵa yanji Yehova aliyelelo kuti ŵana omvwila ŵa Adamu ankhale na moyo kosasila paliye kuchita tumija Yesu? Payakine tingaganize kuti njila yamene iyo sembe inkhala iweme yosilijila mavuto. Koma pasogolo pake, ŵanthu sembe eganiza kuti Adamu aliyechite chimo ikulu ngako komasoti kuti ŵana ŵake ni osachimwa. Koma vamene ivi n’vachendilini.
5. Ndaŵa yanji tukaikilalini kuti Yehova akochita vinthu mwachilungamo nthawe zonse?
5 Komasoti kuti Yehova elola kuti ŵana ŵa Adamu na Hava amene aliye ungwilo ankhale na moyo kosasila paliye dipo, sembe efwaya mfundo zake zolungama pankhani ya chiweme na chiipa. Monga vokonkhapo vake, ŵanthu sembe odela nkhaŵa poganiza kuti payakine Yehova azafwayesoti mfundo zake zolungama nokangiwa kukwanilisha vinthu vakulonjeza kusogolo. Ŵanthu sembe okhulupililalini kuti Mulungu azakwanilishe chendi vinthu vonse vakulonjeza kusogolo. Koma tufunikalini kukaikila kuti vamene ivi vizachitike chendi. Ndaŵa yanji? Chifukwa chakuti Yehova ekonkheja mfundo zake zolungama olo kuti enzefunika kupeleka Mwana wake kuti akwanishe kuchita vamene ivo. Tetyo, tingakaikilelini kuti nthawe zonse akochita vinthu viweme.
6. Kansi ninkhalidwe yotyani yechitisha kuti Yehova atumije Mwana wake? (1 Yohani 4:9, 10)
6 Pali nkhalidwe iyakine yapadela yamene yechitisha kuti Yehova atumije Yesu kuti azatiwombole. Yove echita vamene ivi chifukwa chakuti otikonda. (Yoh. 3:16; ŵelengani 1 Yohani 4:9, 10.) Nkhani ya dipo yuwonesha kuti Yehova ofunalini tyala kuti sewo tinkhale na moyo kosasila, koma ofunasoti kuti tinkhale m’banja yake. Ganizilani ivi: Adamu pechichimwa, Yehova aliyemulole kuti apitilije kunkhala m’banja ya atumiki ŵake. Chifukwa cha vamene ivi, panthawe yetivyalika tenzelini m’mbali ya banja ya Mulungu. Koma pokatishila ntchito dipo, Yehova otikhululukila machimo ŵasu, ndipo kwalombapano azayavye ŵanthu onse amene omukhulupilila komasoti kumumvwila kuti ankhale m’banja yake. Olo palipano, sewo tingakwanishe kunkhala paushamwali uweme ngako na Yehova komasoti na Akhilisitu ayasu. Kulaŵila chendi, Yehova otikonda ngako!—Alo. 5:10, 11.
7. Kansi mavuto ŵechikumana nawo Yesu otiyavya tyani kumvwisha kuti Yehova otikonda ngako?
7 Sewo tingamvwishe luweme mwakutikondela Yehova tikaganizila mavuto ŵechipilila kuti apeleke dipo. Satana, onena kuti paliye ntumiki wa Mulungu wamene angapitilije mphela kunkhala wokhulupilika keno okumana na mavuto. Pofuna kuti ashushe wenye wamene uyu, Yehova elola kuti Yesu ayambe watamana poyamba akaliye kufwa. (Yobu 2:1-5; 1 Pet. 2:21) Yehova ewona Yesu penzenyozewa na ŵanthu, masodja penzemuniyata, komasoti pechimukhomelela pachimuti. Pavuli pake Yehova ewona Mwana wake wokondewa akufwa imfwa iipa ngako. (Mat. 27:28-31, 39) Yehova sembe ekwanisha kukangisha vamene ivi kuti osati vichitike. Mwachisanzo, adani a Yesu pechinena kuti: “Lomba Mulungu wamene uyo amupulumushe keno omufuna chendi,” Yehova sembe emupulumusha panthawe yamene iyo letu. (Mat. 27:42, 43) Koma olo n’tetyo, kuti Mulungu echita vamene ivo, nsembe ya dipo sembe iliyepelekewe ndipo sewo taŵanthu sembe tiliye chiyembekezo chilichonse. Chifukwa cha vamene ivi, Yehova elola kuti Mwana wake akumane na mavuto mpaka kufwa.
8. Ndaŵa yanji tukaikilalini kuti Yehova echimvwa chisoni penzewona Mwana wake otamana? Fotokozani. (Onanisoti chithunzi.)
8 Osati tikoganiza kuti Mulungu okhuziwalini na mavuto chifukwa chakuti ali na mphamvu zonse! Mulungu epanga ŵanthu mwanjila yakuti akokwanisha kukhuzika. Ndipo chifukwa chakuti Baibolo yunena kuti sewo tipangiwa muchifanizilo chake, n’vomvwika kunena kuti naye okhuzika muntima mwake. Baibolo yufotokoza kuti Mulungu ‘okhumudwa’ komasoti ‘akumvwa chisoni.’ (Sal. 78:40, 41) Komasoti ganizilani nkhani ya Abulahamu na Isaki. Payakine mukumbukila kuti Mulungu elamula Abulahamu kuti apeleke nsembe mwana wake mmozi yeka. (Gen. 22:9-12; Ahe. 11:17-19) Ganizilani kukula kwa chisoni chenze nacho Abulahamu penze esala patontho kuti apaye mwana wake. Kansi muganiza kuti Yehova echimvwa chisoni chikulu ntundu wanji penzewona Mwana wake okhomelelewa pachimuti mwankhanza komasoti kupaiwa na ŵanthu asaziŵa Mulungu!—Onani vidiyo yapa jw.org yakuti Tsanzirani Chikhulupiriro Chawo—Abulahamu, Mbali Yachiwiri.
Yehova vemukhuza ngako muntima mwake penzewona Mwana wake otamana (Onani ndime 8.)
9. Kansi mungaphunzile chinji kufumila pa Aloma 8:32, 38, 39, pankhani ya chikondi cha Yehova?
9 Nsembe ya dipo yutiphunzisa kuti paliye munthu wamene otikonda ngako—monga nimwakutikondela Yehova. Olo akwasu komasoti azishamwali wasu apantima, angatikondelini monga nimwakuchitila Mulungu. (Ŵelengani Aloma 8:32, 38, 39.) N’vowonekelatu kuti Yehova otikonda ngako kupambana mwatulikondela seka. Kansi mwewo mufuna kunkhala na moyo kosasila? Ziŵani kuti Yehova niye vakufuna kupambana mwewo. Kansi mufuna kuti Mulungu akukhululukileni machimo ŵanu? Yehova niye vakufuna kupambana mwamuchitila mwewo. Chinthu chikulu chakufuna Mulungu kuli sewo, n’chakuti tikowonesha kutembeja nsembe ya dipo yechitipasa, kumukhulupilila, komasoti kumumvwila. Dipo ni mphaso ya ntengo wapatali yamene yuwonesha kuti Yehova otikonda ngako. Ndipo m’chalo cha nyowani tizaphunzile vinthu vinyinji ngako vokhuza chikondi cha Yehova.—Mlal. 3:11.
VAYUTIPHUNZISA DIPO VOKHUZA YESU
10. (a) Ndaŵa yanji Yesu enzevutika maganizo akaganizila za imfwa yake? (b) Kansi Yesu eituŵisha tyani zina ya Yehova? (Onanisoti bokosi yakuti “Kukhulupilika kwa Yesu kwetuŵisha zina ya Yehova.”)
10 Yesu oganizila ngako vokhuza mbili ya Atata ŵake. (Yoh. 14:31) Yesu etamana ngako maganizo pechiziŵa kuti mbili ya Atata ŵake iipe chifukwa chakuti yove enzeyembekezela kupaiwa monga munthu wonyoza Mulungu. N’chifukwa chake yove epemphela kuti: “Atata, keno n’vokwanishika lolani kuti kapu iyi inipitilile.” (Mat. 26:39) Koma chifukwa chakuti Yesu epitilija mphela kunkhala wokhulupilika kwa Yehova mpaka kufwa kwake, yove ewonesha kuti vinthu vechilaŵila Satana vokhuza Atata ŵake nivawenye.
11. Kansi Yesu ewonesha tyani kuti okonda ŵanthu? (Yohani 13:1)
11 Nsembe ya dipo yutiphunzisasoti kuti Yesu oganizila ngako ŵanthu, maka-maka ophunzila ŵake. (Miy. 8:31; ŵelengani Yohani 13:1.) Mwachisanzo, Yesu enzeziŵa kuti mbali ziyakine za utumiki wake wa pano pachalo zizankhale zovuta ngako, maka-maka ntundu wa imfwa yenzeyembekezela. Koma Yesu ekwanisha kuchita vinthu vonse vamene ivo osati tyala chifukwa chakuti niye vechimutuma Yehova, koma chifukwa chakuti enzekonda ngako ŵanthu. Yesu ewonesha chikondi chikulu ngako kuli ŵanthu poŵalalikila, kuŵaphunzisa, komasoti kuŵayavya munjila zosiyana-siyana. Olo pa nsiku yechipaiwa na adani ŵake, Yesu esambika mendo ŵa atumwi ŵake, kuŵauja mawu otang’isha, komasoti kuŵapasa malangizo. (Yoh. 13:12-15) Penze pachimuti chotamanilapo, Yesu epatula nthawe kuti apeleke chiyembekezo kuli chigaŵenga chiyakine komasoti epanga makonzedwe akuti amayi ŵake akosamaliliwa luweme. (Luk. 23:42, 43; Yoh. 19:26, 27) Tetyo, Yesu ewonesha kuti okonda ngako ŵanthu, osati kupitila tyala muli imfwa yake koma kupitilasoti muvinthu vechichita pautumiki wake wa pano pachalo.
12. Kansi Yesu otiyavya tyani masiku ŵano?
12 Olo kuti Khilisitu echifwa “kamozi tyala,” yove akalipitilija kupeleka nsembe kwa Mulungu chifukwa cha sewo. (Alo. 6:10) Motyani? Yove akalipitilija kukata ntchito pofuna kutipasa vinthu vinyinji viweme vamene n’vokwanishika masiku ŵano chifukwa cha nsembe ya dipo. Ganizilani ntchito zinyinji zakukata. Yove otumikila monga Mfumu yasu, Nkulu wa ansembe komasoti Mutu wa mpingo. (1 Ako. 15:25; Aife. 5:23; Ahe. 2:17) Yove ololela ntchito younganisha Akhilisitu ozozewa komasoti gulu ikulu, yamene izasile kumapeto kwa chisauso chikulu.b (Mat. 25:32; Mko. 13:27) Yove owonesheshasoti kuti atumiki ŵake okhulupilika olyeshewa luweme mwauzimu m’masiku ŵano osilijila. (Mat. 24:45) Komasoti mu Ulamulilo wake wamu vyaka 1.000, yove azapitilije kutipasa vinthu vatufunikila. Kulaŵila chendi, Yehova epeleka Mwana wake chifukwa cha sewo!
PITILIJANI KUPHUNZILA VINTHU VANYOWANI
13. Kansi mungachite tyani kuti mupitilije kuganizila mwakukukondelani Mulungu komasoti Khilisitu?
13 Mwewo mungapitilije kuphunzila vinthu vanyowani vokhuza mwakutikondela Yehova Mulungu komasoti Yesu Khilisitu, keno mupitilija kuganizila zachikondi chamene icho. Mungachite luweme kuŵelenga mosamala mabuku a Uthenga uweme panthawe ya Chikumbukilo cha chino chaka. Mufunikilalini kuŵelenga vinthu vinyinji pa nthawe imozi. Mmalo mwake, mukoŵelenga luweme-luweme ndipo mukonkhala osamala kuti muwone vifukwa viyakine vamene vutichitisha kuti tikokonda Yehova komasoti Yesu Khilisitu. Komasoti mukoujako ayakine mfundo zamwafwana pakuŵelenga kwanu.
14. Mokatijana na lemba ya Salimo 119:97 na mawu amnyansi, kansi kufufuza kungatiyavye tyani kuti tipitilije kuphunzila vokhuza dipo komasoti nkhani ziyakine? (Onanisoti chithunzi.)
14 Keno mwankhala m’chonadi kwa vyaka vinyinji, payakine mungaganize kuti n’vosakwanishika kufwana mfundo ziyakine zanyowani munkhani zamene muziziŵa kale luweme, monga chilungamo cha Mulungu, chikondi chake, komasoti nsembe ya dipo. Koma kulaŵila chendi, sewo tipitilije kuphunzila vinthu vanyowani mpaka kale-kale pankhani zamene izi komasoti ziyakine. Kansi mungachite tyani vamene ivi? Mukoŵelenga nophunzila mfundo zochitisha chidwi za m’Baibolo zamene zupezeka m’mabuku ŵasu. Mukawona kuti nkhani iyakine muimvwishalini luweme, mukosakila-sakila m’mabuku ŵasu, pavuli pake mukoganizila kwa nsiku yonse vinthu vamwafwana komasoti vamwaphunzila vokhuza Yehova, Mwana wake, komasoti mwakukukondelani.—Ŵelengani Salimo 119:97 na mawu amnyansi.
Viliye kanthu kuti tankhala m’chonadi kwavyaka vinyinji tyani, tingapitilije mphela kuphunzila vinthu vanyowani vokhuza dipo vamene vingatiyavye kuti tikotembeja ngako vechitichitila Yehova pamozi na Yesu (Onani ndime 14.)
15. Ndaŵa yanji tufunikila kupitilija kuphunzila vinthu vanyowani vili m’Baibolo?
15 Osati mukotaya ntima keno muliyefwane mfundo iyakine yanyowani olo yochitisha chidwi panthawe yamuŵelenga olo kusakila-sakila mfundo zanyowani. Mwanjila iyakine, mwewo muli monga ni munthu wamene okumba golide. Koma yove ofokalini ndipo opitilija kusakila-sakila moleza ntima chifukwa chakuti kapisi kalikonse kagolide kawafwana olo kuti n’katontho ngako, nikantengo wapatali kuli yove. Chinthu chantengo wapatali ngako kupambana golide, ni mfundo iliyonse yanyowani yatingaphunzile kufumila m’Baibolo. Mfundo iliyonse yanyowani yatafwana pophunzila Baibolo, ni yantengo wapatali ngako kupambana golide! (Sal. 119:127; Miy. 8:10) Tetyo, nkhalani oleza ntima ndipo pitilijani kukonkheja ndandanda yanu yoŵelenga Baibolo.—Sal. 1:2.
16. Kansi tingamukonkheje tyani Yehova komasoti Yesu?
16 Panthawe yophunzila, mukowona njila zamungakatishile ntchito mfundo zamuphunzila. Mwachisanzo, mukokonkheja Yehova wamene ni wachilungamo pochita vinthu mosakondela. Mukokonkheja chikondi chechiwonesha Yesu kuli Atata ŵake komasoti kuli ŵanthu ayakine mwakunkhala ofunishisha kuchita vakufuna Yehova komasoti kuyavya ayakine, olo kuti kuchita vamene ivi n’kovuta ngako nthawe ziyakine. Komasoti mukokonkheja Yesu polalikila kuli ayakine kuti nawo ankhale na mwayi woziŵa vinthu viweme vawachita Yehova kuli ŵanthu komasoti kuti akhulupilile nsembe ya dipo ya Yesu.
17. Kansi tizakambilane chinji munkhani ikuza?
17 Keno tutembeja ngako nsembe ya dipo, vingatiyavye kuti tikomukonda ngako Yehova komasoti Mwana wake. Komasoti tikayamba kukonda ngako Mulungu pamozi na Mwana wake, nawosoti angayambe kutikonda ngako. (Yoh. 14:21; Yako. 4:8) Tetyo, tiyeni tikokatishila ntchito vinthu vakutipasa Yehova kuti tiziŵe vinyinji vokhuza nsembe ya dipo. Munkhani yokonkhapo, tizakambilane madaliso anyinji ŵatili nawo chifukwa chakuti Yesu etifwila komasoti vatingachite kuti tiwoneshe kutembeja chifukwa chachikondi cha Yehova.
NYIMBO N.° 107 Mulungu niye chisanzo chikulu cha chikondi
a KUMVWIKISHA LUWEME: “Kuganizila”, kutanthauza kuganiza ngako vokhuza nkhani iyakine noganizila mbali zosiyana-siyana kuti uimvwishe luweme.
b Kusonkhanishiwa kwa “vinthu vakululu” kwechitomola Paulo pa lemba ya Aifenso 1:10, n’kosiyana na kusonkhanishiwa kwa “osankhiwa” amene ŵechitomola Yesu pa Mateyo 24:31, komasoti Maliko 13:27. Paulo enzenena vokhuza nthawe yamene Yehova azasankhe ŵana ŵake auzimu poŵazoza na mzimu utuŵa. Yesu enzenena vokhuza nthawe yamene Akhilisitu ozozewa amene azankhale akali pano pachalo azaunganishiwe kululu panthawe ya chisauso chikulu.