Osati mukokaikila kuti Yehova okukondani

1. Kansi ndaŵa yanji mwipeleka moyo wanu kwa Yehova? (Onanisoti chithunzi.)

KANSI mukumbukila pa nthawe yemwilipeleka kwa Yehova mu pemphelo? Mwewo mwepanga chosankha chamene icho chifukwa chakuti mwenzemuziŵa luweme komasoti mwenzemukonda ngako. Mwemulonjeza kuti muzaike chifunilo chake pamalo oyamba pa moyo wanu nopitilija kumukonda na ntima wanu wonse, moyo wanu wonse, maganizo ŵanu wonse komasoti mphamvu zanu zonse. (Mko. 12:30) Kufumila nthawe yamene iyo chikondi chanu kuli yove chukulila-kulila mpaka pano. Munthu muyakine akakukonshani kuti, “Kansi mumukonda chendi Yehova?” Kansi mungamuyankha kuti tyani? Mosakaikila mungamuyankhe kuti “Numukonda ngako kupambana munthu aliyense komasoti chinthu chilichonse!”

2-3. Kansi Yehova ofuna kuti tinkhale osimikija zachinji, ndipo tikambilane chinji munkhani ino? (Yeremiya 31:3)

² Lomba mungayankhe kuti tyani keno munthu muyakine wakukonshani kuti, “Kansi musimikijila kuti Yehova okukondani?” Kansi mungawaye-waye kuyankha poganiza kuti nimwe wosayenelela kukondewa na Yehova? Kalongosi muyakine wamene enzeliwona kuti okondewalini penze mwana enena kuti: “Numukonda Yehova na ntima wangu wonse. Newo nusimikijila vamene ivi. Koma nthawe zinyinji nukhulupililalini kuti Yehova onikonda.” Koma kansi Yehova okuwonani tyani?

³ Yehova ofuna kuti mukokhulupilila kuti yove okukondani. (Ŵelenga Yeremiya 31:3.) Umboni wake ni wakuti Yehova ekudonselani kuli yove. Ndipo pemwilipeleka kuli yove nobatizika, yove ekupasani chinthu chantengo wapalulu ngako, chamene ni chikondi chake chokhulupilika. Vamene ivi vuwonesha kuti okukondani ngako ndipo azalekelini kukukondani. Pakuti Yehova ali na chikondi chokhulupilika kuli atumiki ŵake, yove oŵawona kuti ni “chuma chapadela.” Tetyo mwewo namwe nimwe apadela ngako kwa Yehova. (Mki. 3:17) Yehova ofuna kuti mwewo namwe mukolimvwa monga ni mwenzemvwila ntumwi Paulo. Paulo elemba mofumila pansi pa ntima kuti: “Nasimikija ntima kuti imfwa, moyo, angelo, maboma, vinthu vamene vilipo, vinthu vamene vikuza, mphamvu, nsinkhu, kunoka olo cholengewa chilichonse vizakwanishelini kutisiyanisha na chikondi cha Mulungu.” (Alo. 8:38, 39) Munkhani ino, tikambilane chifukwa chake tusimikijila kuti Yehova otikonda, komasoti vinthu vingatiyavye kuti tikwanishe kuchita vamene ivi.

NDAŴA YANJI MUFUNIKILALINI KUKAIKILA KUTI YEHOVA OKUKONDANI?

4. Kansi Satana ofuna kuti tikokhulupilila wenye wakuti tyani, ndipo tingachite tyani kuti timushushe?

⁴ Kusimikijila kuti Yehova otikonda kungatiyavye kulimbana na “viŵembu” va Satana. (Aife. 6:11) Satana angachite vilivonse vangakwanishe kuti atikangishe kutumikila Yehova. Njila imozi yakuchitila vamene ivi ni kutichitisha kuganiza kuti Yehova otikondalini. Koma wamene uyu ni wenye ukulu. Baibolo yuyelekezela Satana na mphondolo. (1 Pet. 5.8, 9) Mphondolo zukonda kukata nyama zamene ziliye mphamvu komasoti zamene zingakwanishelini kuliteteza. Molingana na vamene ivi, Satana nthawe zinyinji otiukila akawona kuti tafoka, taŵeŵa olo keno tili na chisoni chifukwa cha mavuto ŵetikumana nawo kuvuli. Yove angatiukilesoti keno tukumana na mavuto pali pano komasoti keno tuchita wowa chifukwa cha vinthu va kusogolo. (Miy. 24:10) Satana ofuna kuti sewo tifoke noleka kutumikila Yehova. Koma tingakwanishe ‘kumushusha Mdyelekezi’ komasoti vinthu vonse viipa vakutichitila keno tuchita vonse vatingakwanishe kuti tikokhulupilila ngako kuti Yehova otikonda.—Yako. 4:7.

5. Ndaŵa yanji tufunikilalini kukaikila kuti Yehova otikonda komasoti otisamalila?

⁵ Keno sewo tusimikijila kuti Yehova otikonda ushamwali wasu na yove ungankhale wotang’a. Ndaŵa yanji tunena tetyo? Chifukwa chakuti Yehova elenga ŵanthu munjila yakuti akokonda ŵanthu ayakine komasoti kuti akolimvwa kuti okondewa. Munthu muyakine akatiwonesha chikondi sewo nase tuyamba kumukonda. Tetyo tikawona kuti Yehova otikonda, chikondi chasu kuli yove niye pachukula ngako. Ndipo tikayamba kumukonda ngako, nayesoti niye pakutikonda ngako. (1 Yoh. 4:19) Baibolo yutiuja momvwika luweme kuti: “Vwendelani kuli Mulungu ndipo yovesoti azakuvwendeleni.” (Yako. 4:8) Koma kansi tingachite tyani kuti tinkhale osimikija kuti Yehova otikonda?

KANSI NI CHINJI CHINGAKUYAVYENI KUTI MUKOKHULUPILILA KUTI YEHOVA OKUKONDANI?

6. Kansi mufunikila kuchita chinji keno musimikijilalini kuti Yehova okukondani?

⁶ Pitilijani kupemphela kwa Yehova kuti akuyavyeni kumvwisha chifukwa chake yove okukondani. (Luk. 18:1; Alo. 12:12) Mungafunike kupemphela moweleja-weleja pa nsiku kuti yove akuyavyeni kumvwisha mwakukuwonelani. Nthawe ziyakine mungolimvwa kuti nimwe wosafunika ndipo vamene ivi vingachitishe kuti osati mukokhulupilila kuti Yehova okukondani. Koma olo ni tetyo, mukokhulupilila kuti Yehova ni nkulu kupambana ntima wanu. (1 Yoh. 3:19, 20) Yove okuziŵani luweme kupambana mwamuliziŵila mweka, ndipo owona minkhalidwe iweme yamuli nayo yamene mwewo pamweka mungakwanishelini kuiziŵa. (1 Sam. 16:7; 2 Mbiri 6:30) Tetyo, osati mukowaya-waya ‘kumukhutulila’ vili muntima mwanu komasoti kumusenga kuti akuyavyeni kukhulupilila kuti okukondani. (Sal. 62:8) Pavuli pake, yeja-yejani kuchita vinthu mokatijana na mapemphelo ŵanu pokonkheja mfundo izi zokonkhapo.

7-8. Kansi wa masalimo otisimikijila tyani kuti Yehova otikonda?

⁷ Mukokhulupilila Mawu a Yehova. Yehova epeleka mzimu wake wamphamvu kuli ŵanthu amene elemba Baibolo. Tetyo, tingakhulupilile kuti vinthu vechilemba vokhuza Yehova ni vachendi. Wamasalimo Davite efotokoza momvwika luweme ngako kuti Yehova otisamalila. Davite elemba kuti: “Yehova ali pafupi na ŵanthu ofwaika ntima. Yove opulumusha ŵanthu amene olimvwila chisoni.” (Sal. 34:18, mawu a mnyansi.) Nthawe ziyakine mukakhumudwa ngako mungaganize kuti paliye omvwisha mwamumvwila, komasoti kuti paliye angakuyavyeni. Koma Yehova olonjeza kuti pa nthawe monga ni yamene iyi yove onkhala namwe pafupi chifukwa owona kuti mufunikila ngako thandizo yake. Mu Salimo iyakine, Davite elemba kuti: “Sungani misozi yangu mu chola chanu chachikumba.” (Sal. 56:8) Yehova owona keno muvutika. Yehova okukondani ngako ndipo vumukhuza akakuwonani kuti muvutika. Molingana na manzi amene onkhala ofunika ngako kuli munthu wamene oyenda muchipululu chiliye manzi, nayosoti misozi yanu ni yofunika ngako kwa Yehova ndipo owona nthawe zonse mukankhala na chisoni komasoti keno mulila. Pa lemba ya Salimo 139:3, tuŵelenga kuti: “Muziŵa chilichonse chanuchita.” Yehova owona chilichonse chamuchita koma oganizila ngako vinthu viweme vamuchita. (Ahe. 6:10) Ndaŵa yanji? Chifukwa otembeja vinthu vonse vamuchita pofuna kuti mukomundwelesha.a

⁸ Yehova okatishila ntchito Malemba amu Baibolo pofuna kukusimikijilani kuti okukondani ngako. Koma monga ni mwatawonela poyamba, Satana olimbikisa wenye wakuti Yehova okukondanilini. Tetyo keno mwewo nthawe ziyakine musimikijilalini kuti Yehova okukondani, mungachite luweme kulikonsha kuti ‘kansi newo nukhulupilila “tata wake wawenye” olo “Mulungu wachendi”?’—Yoh. 8:44; Sal. 31:5.

9. Kansi Yehova olonjeza chinji kuli ŵanthu amene omukonda? (Ekisodo 20:5, 6)

⁹ Ganizilani mwakuŵawonela Yehova ŵanthu amene omukonda. Ganizilani vinthu vechilaŵila Yehova kuli Mose komasoti kuli Aisilaeli. (Ŵelengani Ekisodo 20:5, 6.) Yehova olonjeza kuti apitilije mphela kuwonesha chikondi chokhulupilika kuli ŵanthu amene omukonda. Mawu amene aŵa otisimikijila kuti Mulungu apitilije kukonda ŵanthu amene omukonda. (Neh. 1:5) Tetyo keno nthawe ziyakine mwewo musimikijilalini kuti Yehova okukondani, mungachite luweme kulikonsha kuti, ‘kansi newo numukonda Yehova?’ Lomba ganizilani ivi: Keno mwewo mumukonda ndipo muchita vonse vamungakwanishe kuti mumukondweleshe, niye kuti yove okusimikijilani kuti okukondani ngako. (Dan. 9:4; 1 Ako. 8:3) Vamene ivi vutanthauza kuti keno mwewo musimikijila kuti mumukonda Yehova, mufunikilalini kukaikila kuti yove okukondani. Osati mukokaikila kuti yove okukondani nthawe zonse, ndipo azakusiyeni lini.

10-11. Kansi Yehova ofuna kuti mukoiwona tyani nsembe ya dipo? (Agalantiya 2:20)

¹⁰ Mukoganizila za mphaso ya ntengo wapalulu yamene ni dipo. Nsembe ya dipo ya Yesu Khilisitu ni mphaso ikulu ngako yechipeleka Yehova kuli ŵanthu. (Yoh. 3:16) Koma kansi Yehova etumija Mwana wake kuti azafwe chifukwa cha mwewo? Eye! Ganizilani vechichita ntumwi Paulo. Yove echita vinthu viipa ngako akaliye nkhala Mkhilisitu, ndipo pavuli pakuti wankhala Mkhilisitu yove enzefunikila kupitilija kulimbana na vofoka vake. (Alo. 7:24, 25; 1 Tim. 1:12-14) Koma olo ni tetyo, yove esimikijila kuti Yehova epeleka Mwana wake monga mphaso kuli yove. (Ŵelengani Agalantiya 2:20.) Mukokumbukila kuti Yehova niye euja Paulo kuti alembe mawu amene aŵa mu Baibolo. Tetyo, Yehova ofuna kuti sewo tiphunzilepo kanthu kufumila pa vinthu vechilemba Paulo. (Alo. 15:4) Mawu a Paulo owonesha kuti Yehova ofuna kuti mukokhulupilila kuti nsembe ya Yesu ni mphaso yofumila kuli Yehova. Mwewo mukayamba kuwona mphaso ya dipo mwanjila yamene iyi, muzatang’ishe chikhulupililo chanu chakuti Yehova okukondani mwewo pamweka.

¹¹ Tutembeja ngako Yehova chifukwa chotumija Yesu pano pa chalo kuti azatifwile. Koma chifukwa chiyakine chechiwelela Yesu pano pa chalo ni kuzauja ŵanthu choonadi chokhuza Mulungu. (Yoh. 18:37) Yesu etiphunzisasoti choonadi chokhuza mwakutiwonela Yehova.

YESU ETIPHUNZISA KUTI YEHOVA OTIKONDA NGAKO

12. Ndaŵa yanji tingakhulupilile vinthu vechinena Yesu vokhuza Yehova?

¹² Yesu penze pano pa chalo enzesangalala kuuja ŵanthu minkhalidwe ya Yehova. (Luk. 10:22) Tingakhulupilile vinthu vechilaŵila Yesu vokhuza Yehova. Ndaŵa yanji? Chifukwa chakuti Yesu enzenkhala pamozi na Atata ŵake kululu kwa vyaka mabiliyoni anyinji ngako akaliyewela pano pa chalo. (Akol. 1:15) Yesu oziŵa mwakumukondela Atata ŵake. Owonasoti mwakuwoneshela chikondi Atata ŵake kuli angelo okhulupilika, komasoti atumiki ŵake okhulupilika pano pa chalo. Kansi Yesu eŵayavya tyani ŵanthu kusimikijila kuti Mulungu oŵakonda?

13. Kansi Yesu ofuna kuti tikomuwona tyani Yehova?

¹³ Yesu ofuna kuti tikoziŵa mwakutiwonela Yehova. Mu mabuku a Uthenga Uweme Yesu etomola Yehova kuti “Atata” kwa maulwendo opitilila 160. Ndipo penzelaŵila na ophunzila ŵake, yove enzekatishila ntchito mawu akuti “Atata ŵanu” olo “Atata ŵanu akululu.” (Mat. 5:16; 6:26) Yesu akaliye wela pano pa chalo, atumiki a Mulungu okhulupilika enzekatishila ntchito mazina audindo osiyana-siyana monga akuti: “Wamphamvu zonse,’ ‘Wammululu ngako, ‘Nyamalenga nkulu, ‘komasoti mazina ayakine. Koma nthawe zinyinji Yesu enzeita Yehova kuti Atata ŵasu. Mawu amene aŵa owonesha kuti Yehova ofuna kuti atumiki ŵake akomukonda monga ni mwakumvwila mwana kuli atata wake achikondi.” Tetyo Yesu etiphunzisa kuti Yehova otikonda monga ni mwakuchitila tata muweme wamene okonda ŵana ŵake amene ni antengo wapalulu. Tiyeni tiwone visanzo viŵili vuwonesha kuti Yesu enzekatishila ntchito mawu akuti “Atata.”

14. Kansi Yesu ewonesha tyani kuti aliyense wa sewo ni wofunika ngako kuli Atata ŵasu akululu? (Mateyo 10:29-31) (Onanisoti chithunzi.)

¹⁴ Choyamba, ganizilani mawu wechilaŵila Yesu opezeka pa Mateyo 10:29-31. (Ŵelengani.) Nthaki ni tunyoni tutontho-tutontho komasoti tuziŵalini kuwonesha chikondi kuli Yehova olo kumulambila. Koma olo ni tetyo, Atata ŵasu owona kuti nthaki imozi ni yofunika ngako mwakuti okwanisha kuziŵa ikapona pansi. Keno Yehova owona kuti kanyoni katontho kamene aka ni kofunika ngako, tingakaikilelini kuti yove oganizila aliyense wa sewo chifukwa tumukonda komasoti tumulambila! Yesu enenasoti kuti Atata ŵasu oziŵa kupaka kwa sisi yali nayo munthu aliyense mmutu mwake. Pakuti Yehova oziŵa olo vinthu vitontho-vitontho vokhuza sewo, tukaikilalini kuti otiganizila ngako. Ni vowonekelatu kuti Yesu ofuna kuti tikosimikijila kuti aliyense wa sewo ni wantengo wapalulu ngako kuli Atata ŵasu akululu.

15. Kansi mawu a Yesu opezeka pa Yohani 6:44, otiuja chinji vokhuza Atata ŵasu akululu?

¹⁵ Onani chisanzo chachiŵili cha mwechikatishila ntchito Yesu mawu akuti “Atata.” (Ŵelengani Yohani 6:44.) Atata ŵanu akululu ekuyavyani kuti—muŵaziŵe—noyamba kuŵakonda. Ndaŵa yanji echita vamene ivi? Chifukwa ewona kuti muli na minkhalidwe iweme. (Ntchi. 13:48) Pa nthawe yamene Yesu pechilaŵila mawu apa Yohani 6:44, owoneka kuti enzenena mawu a Yehova opezeka pa Yeremiya 31:3. Pamene apa Yehova enzeuja ŵanthu ŵake kuti: “Nakudonsela kuli newo na chikondi chokhulupilika. [olo kuti nipitilije mphela kukuwonesha chikondi chokhulupilika].” [Yer. 31:3; mawu amnyansi.; yelekezelani na Hoseya 11:4.] Ganizilani tanthauzo ya vamene ivi. Atata ŵasu ŵachikondi akululu nthawe zonse owona minkhalidwe iweme yamene tingaiwonelini pasewo seka.

16. (a) Kansi Yesu etiphunzisa chinji, ndipo ndaŵa yanji tufunika kukhulupilila? (b) Kansi ni chinji chingakuyavyeni kusimikijila kuti Yehova ni Atata ŵasu achikondi? (Onani bokosi yakuti “Atata ŵatufunikila tonse.”)

¹⁶ Yesu penze nena vokhuza Yehova kuti Atata ŵasu, mmawu ayakine tingalaŵile kuti yove enzetanthauza kuti: “Yehova ni Atata ŵangu lini tyala, koma mwewo namwe ni Atata ŵanu soti. Ndipo nukusimikijilani kuti okukondani komasoti okudelani nkhaŵa ngako monga munthu pa mweka.” Tetyo keno nthawe ziyakine mukaikila kuti Yehova okukondani mungachite luweme kulikonsha kuti, ‘kansi nufunikilalini kukhulupilila mawu a Mwana wamene oŵaziŵa luweme Atata ŵasu komasoti wamene olaŵila vachendi nthawe zonse?’—1 Pet. 2:22.

PITILIJANI KUYEJA-YEJA KUTI MUKOKHULUPILILA KUTI YEHOVA OKUKONDANI

17. Ndaŵa yanji tufunikila kusimikijila kuti Yehova otikonda?

¹⁷ Sewo tufunikila kupitilija kutang’isha chikhulupililo chasu chakuti Yehova otikonda. Monga ni mwatawonela, mdani wasu Satana wamene ni wochenjela ochita vonse vangakwanishe kuti atikangishe kutumikila Yehova. Ofuna kutifokesha. Tetyo yove apitilije kuyeja-yeja kutichitisha kukhulupilila kuti Yehova otikondalini. Koma osati tilole kuti Satana apambane!—Yobu 27:5.

18. Kansi mungachite tyani kuti mupitilije kukhulupilila kuti Yehova okukondani?

¹⁸ Mu nkhani ino, taphunzila vamungachite kuti mukosimikijila kuti Yehova okukondani chendi. Mungachite luweme kumusenga Yehova kuti akuyavyeni kuziŵa minkhalidwe iweme yamuli nayo. Mukoganzila ngako mavesi amu Baibolo amene ofotokoza vakuchita Yehova posamalila ŵanthu amene omukonda. Mukokumbukila kuti Yehova okonda munthu wamene omukonda nthawe zonse. Osati mukoluŵa kuti Yehova epeleka mwana wake monga mphaso kuli mwewo pamweka. Ndipo mukokhulupilila kuti Yehova ni Atata ŵanu monga ni mwechilaŵilila Yesu. Lomba tyani keno munthu muyakine waku konshani kuti: “Kansi musimikijila kuti Yehova okukondani?” Muzayankhe motang’a ntima kuti: “Eye onikonda! Ndipo nuyeja-yeja nsiku iliyonse kuwonesha chikondi changu kuli yove!”