Sewo tililini seka

1-2. (a) Ndaŵa yanji tinganene kuti tunkhalalini seka panthawe ya mavuto? (b) Kansi tikambilane chinji munkhani ino?

TIKAKUMANA na mavuto akulu, tingalimvwe monga tili mukabote katontho panyanja ndipo kuli chimphepo chankuntho. Koma olo kuti vili tetyo, sewo tunkhalalini seka panthawe ya mavuto. Atata ŵasu achikondi owona tikakumana na mavuto komasoti olonjeza kuti akotiyavya. Chifukwa chakuti otikonda, Yehova otiuja kuti: ‘Nikuyavyeni.’—Yes. 41:10.

² Munkhani ino, tikambilane mwakutiyavyila Yehova munjila izi zokonkhapo: (1) yove otisogolela, (2) otisamalila, (3) otiteteza, komasoti (4) otitonthoja. Yehova otisimikijila kuti olo kuti takumana na mavuto akulu tyani, yove azatiluwelini. Mulungu angatisiyelini chendi. Chifukwa cha vamene ivi sewo tililini seka.

YEHOVA OTISOGOLELA

3-4. Kansi Yehova otisogolela tyani? (Salimo 48:14)

³ Ŵelengani Salimo 48:14. Yehova oyembekezelalini kuti sewo tikolisogolela seka. Kansi Yehova oŵasogolela tyani atumiki ŵake okhulupilika masiku ŵano? Njila imozi yakuchitila vamene ivi nikupitila m’Baibolo. (Sal. 119:105) Kupitila m’Mawu ŵake oujiliwa, Yehova otiyavya tikafuna kupanga vosankha komasoti otiyavya kuti tinkhale na minkhalidwe iweme, yamene yutiyavya kuti tinkhale osangalala ngako palipano komasoti kuti tikafwane moyo wosasila.a Mwachisanzo, yove otilesha kusunga chakuntima, otiphunzisa kuti tikochita vinthu vonse mwachilungamo, komasoti kuti tikokonda ayasu mofumila pansi pa ntima. (Sal. 37:8; Ahe. 13:18; 1 Pet. 1:22) Keno tuwonesha minkhalidwe yamene iyi yofumila kwa Mulungu, tingankhale makolo aweme, mwanalume olo mwanakazi muweme komasoti tingankhale shamwali muweme kuli ayasu.

⁴ Kuyangijila pamene apo, Yehova echitisha kuti nkhani za ŵanthu ayakine zilembewe m’Baibolo ndipo ove enzekumana na mavuto komasoti enzelimvwa molingana na sewo. (1 Ako. 10:13; Yako. 5:17) Keno tuŵelenga nkhani za ŵanthu amene aŵa nozikatishila ntchito pa moyo wasu, tupindula munjila ziŵili. Njila yoyamba, tuziŵa kuti niselini oyamba kukumana na mavuto amene awo, koma ayakine ekumana nawo ndipo ekwanisha kuŵapilila. (1 Pet. 5:9) Komasoti njila yachiŵili, vutiyayva kuwona vatingachite polimbana nawo.—Alo. 15:4.

5. Kansi Yehova okatishila ntchito ŵani potisogolela panjila ikuya ku moyo?

⁵ Komasoti Yehova epanga makonzedwe kuti akotisogolela pokatishila ntchito enekwasu na akalongosi.b Mwachisanzo, sewo tili na opanamila madela amene onyungila mipingo nthawe zonse pofuna kutitang’isha. Nkhani zawo zutang’isha chikhulupililo chasu komasoti zutiyavya kuti tipitilije kunkhala okatijana. (Ntchi. 15:40–16:5) Nawosoti akulu okata ntchito mwakhama poyavya aliyense wa sewo kuti apitilije kunkhala paushamwali wotang’a na Yehova. (1 Pet. 5:2, 3) Makolo osogolela ŵana ŵawo mwauzimu, oŵaphunzisa kuti ankhale na luso yoganiza luweme, komasoti minkhalidwe iweme. (Miy. 22:6) Palisoti anakazi Achikhilisitu otang’a mwauzimu, amene oyavya akalongosi achisimbi kupitila muvochita vawo viweme, poŵapasa malangizo anzelu komasoti kuŵatang’isha mwachikondi.—Tito 2:3-5.

6. Kansi tufunikila kuchita chinji kuti tipindule na malangizo a Yehova?

⁶ Yehova wapeleka vonse vatufunikila kuti akotisogolela luweme. Kansi sewo tingawoneshe tyani kutembeja kwasu? Lemba ya Miyambo 3:5, 6 yunena kuti: “Ukokhulupilila Yehova na ntima wako wonse, ndipo osati ukodalila luso yako yomvwisha vinthu.” Tikachita tetyo, “yove azayondolole njila [zasu]” kutanthauza kuti azatiyavye kuti tikwanishe kupewa mavuto anyinji nonkhala na moyo wosangalala. Tutembeja ngako kuti Yehova otipasa malangizo achikondi amene oyavya munthu aliyense payeka-payeka!—Sal. 32:8.

YEHOVA OTISAMALILA

7. Kansi Yehova otisamalila munjila zotyani? (Afilipi 4:19)

⁷ Ŵelengani Afilipi 4:19. Yehova otisogolelalini tyala mwauzimu, koma odalisasoti khama yasu pokata ntchito kuti tifwane chakulya, vovwala komasoti malo oyona. (Mat. 6:33; 2 Ates. 3:12) Olo kuti kudela nkhaŵa vinthu vakuthupi n’kwachibadwa, Yehova otilimbikisa kuti osati tikodela nkhaŵa mopililila malile pankhani ya vinthu vamene ivi. (Mat. 6:25) Ndaŵa yanji? Chifukwa chakuti Atata ŵasu Yehova, angasiyelini atumiki ŵake okhulupilika panthawe yakufunikila thandizo. (Mat. 6:8; Ahe. 13:5) Sewo tingakaikilelini vakutilonjeza kuti akotipasa vinthu vatufunikila pa moyo wasu.

8. Kansi Yehova emuchitila chinji Davite?

⁸ Ganizilani vechichita Yehova poyavya Davite. Panthawe yovuta yenze nsanga kuthaŵa mdani wake, Yehova enzemusamalila yove pamozi na analume ŵenze nawo kuti apitilije kunkhala na moyo. Poganizila mwechimusamalilila Yehova kwa vyaka vinyinji, Davite enena kuti: “Nenze mwana ndipo lomba nakula, koma nikaliyewonapo kuti munthu aliyense wolungama wasiiwa olo ŵana ŵake osenga chakulya.” (Sal. 37:25) Payakine mwewo mwewonapo kale mwakuwoneshela chikondi chake Yehova posamalila atumiki ŵake olipeleka.

9. Kansi Yehova oŵasamalila tyani atumiki ŵake masiku ŵano panthawe ya ngozi za m’chilengedwe? (Onanisoti chithunzi.)

⁹ Yehova osamalilasoti ŵanthu ŵake panthawe ya ngozi zam’chilengedwe. Mwachisanzo, Akhilisitu oyambilila pechikumana na vuto ya njala, Akhilisitu am’vyalo vosiyana-siyana epeleka vinthu vofunika kuti ayavye enekwasu na akalongosi amene enze pamavuto. (Ntchi. 11:27-30; Alo. 15:25, 26) Nawosoti ŵanthu a Mulungu masiku ŵano owonesha ntima wopasa. Pakachitika ngozi za m’chilengedwe, Yehova owonesha chikondi polimbikisa atumiki ŵake kuti apeleke chakulya, manzi, vovwala komasoti mankhwala kuli ŵanthu onkhala m’dela yokhuziwa. Enekwasu na akalongosi amene okata ntchito zomanga m’gulu yasu, oŵamyasoti mang’anda ŵa enekwasu na akalongosi komasoti Ng’anda zawo za Ufumu zikawonongeka. Ndipo atumiki a Yehova, oyayva Akhilisitu ayawo mwammaganizo komasoti mwauzimu amene aluza okondewa ŵawo, ndipo ochita vamene ivo mokulumija.c

10-11. Kansi mwaphunzila chinji kufumila pa vechitikila Borys?

¹⁰ Yehova owoneshasoti ntima wopasa posamalila ŵanthu amene omulambilalini. Pofuna kumukonkheja, sewo tuwonesha kuwama ntima kuli ayasu poŵauja vinthu vatukhulupilila mpata ukapezeka. (Agal. 6:10) Keno tuchita vamene ivi tingaŵayavye kuti aziŵe vinyinji vokhuza Yehova. Ganizilani vechitikila Borys waku Ukraine wamene ni titcha nkulu pasikulu iyakine m’chalo chawo. Olo kuti Borys niwa Mbonilini, nthawe zonse enzechita vinthu mowama ntima na ŵana asikulu a Mboni za Yehova ndipo enzelemekeza vinthu vakukhulupilila. Chifukwa chankhondo, Borys ethaŵa mudela yenzenkhala noluta mudela yotetezeka m’chalo chamene icho, ndipo enekwasu eyamba kumuyavya. Pavuli pake, Borys epezekapo pa Mwambo wokumbukila imfwa ya Yesu. Pokumbukila vinthu vechikumana navo, Borys enena kuti: “Amboni za Yehova enzechita nane vinthu mowama ntima ngako ndipo enzenisamalila luweme. Nuŵatembeja ngako a Mboni za Yehova.”

¹¹ Sewo nase tingakonkheje Atata ŵasu akululu amene ni achifundo keno tuwonesha chikondi kuli ŵanthu amene okumana na mavuto, viliyekanthu keno ni Akhilisitu ayasu olo yayi. (Luk. 6:31, 36) Tufuna kuti chikondi chatuŵawonesha chiŵayavye kunkhala ophunzila Akhilisitu. (1 Pet. 2:12) Viliye kanthu keno ove achinje olo yayi, sewo tizankhale osangalala chifukwa chakuti “kupasa kutichitisha kunkhala okondwela ngako.”—Ntchi. 20:35.

YEHOVA OTITETEZA

12. Kansi Yehova olonjeza kuti akoŵateteza tyani atumiki ŵake monga gulu? (Salimo 91:1, 2, 14)

¹² Ŵelengani Salimo 91:1, 2, 14. Yehova etilonjeza kuti akotiteteza mwauzimu masiku ŵano. Yove azalolelini kuti Satana aipishe kulambila kwachendi. (Yoh. 17:15) Komasoti tukaikilalini kuti “chisauso chikulu” chikezeyamba, Yehova azateteze ŵanthu ŵake osati mwauzimu tyala, komasoti mwakuthupi mokatijna na vechitilonjeza.—Chiv. 7:9, 14.

13. Kansi Yehova otiteteza tyani aliyense payeka-payeka?

¹³ Kansi Yehova otiteteza tyani aliyense payeka-payeka? Pokatishila ntchito Malemba, Yehova otiyavya kusiyanisha pakati pa chiweme na chiipa. (Ahe. 5:14) Keno tukatishila ntchito mfundo zatufwana m’Mawu a Mulungu, tunkhala otetezeka mwauzimu komasoti mwakuthupi. (Sal. 91:4) Kuyangijila pamene apo, Yehova otitetezasoti pokatishila ntchito mpingo. (Yes. 32:1, 2) Kunkhala pakati pa ŵanthu amene okonda Yehova nokonkheja mfundo zake, kutitang’isha komasoti kutiyavya kupewa kutolela minkhalidwe ya ŵanthu aipa.—Miy. 13:20.

14. (a) Ndaŵa yanji Mulungu otitetezalini kumayeselo ayakine? (b) Kansi lemba ya Salimo 9:10 yutisimikijila chinji? (Onani mawu amnyansi.)

¹⁴ Nthawe ziyakine, Yehova enzeteteza atumiki ŵake akale mwakuthupi. Koma olo n’tetyo, Yehova enzechitalini vamene ivi nthawe zonse. Nthawe ziyakine, sewo tukumana na mavuto chifukwa cha “vinthu vosayembekezeleka.” (Mlal. 9:11) Komasoti Yehova walola kuti atumiki ŵake akokumana na mavuto kufumila kale-kale komasoti kupaiwa pofuna kutiyayva kusimikijila kuti Satana niwawenye. (Yobu 2:4-6; Mat. 23:34) Vamene ivi vuchitikasoti masiku ŵano. Olo kuti Yehova olola kuti tikokumana na mavuto nthawe ziyakine, tukaikilalini kuti yove apitilije kusamalila ŵanthu amene omukonda.d—Sal. 9:10.

YEHOVA OTITONTHOJA

15. Kansi tutonthojewa tyani na Akhilisitu ayasu, Mawu a Mulungu, komasoti tikapemphela? (2 Akolinto 1:3, 4)

¹⁵ Ŵelengani 2 Akolinto 1:3, 4. Nthawe ziyakine tukumana na vinthu vomvwisha chisoni, nkhaŵa olo mavuto. Payakine mukumana na mavuto amene okuchitishani kulimvwa kuti muli mweka. Kansi pali aliyense wamene okumvwishani mwamumvwila? Yehova okumvwishani. Mulungu owonalini tyala mwatumvwila muntima mwasu chifukwa cha mavuto ŵatukumana nawo, koma yove ‘otitonthojasoti pa vuto iliyonse.’ Motyani? Tikamupapatila Yehova kuti atiyavye, yove otipasa “ntendele wa Mulungu wamene ŵanthu angakwanishelini kuumvwisha.” (Afil. 4:6, 7) Tutang’ishiwasoti tikoŵelenga Mawu a Yehova m’Baibolo wamene ni uthenga wake woluta kuli sewo. Kupitila m’Baibolo, Yehova otiyavya kuziŵa kuti otikonda ngako, otiphunzisa kuziŵa vatingachite kuti tinkhale anzelu komasoti otipasa chiyembekezo. Nayosoti misonkhano ya Chikhilisitu yutitang’isha ngako chifukwa enekwasu na akalongosi otiwonesha chikondi komasoti otitang’isha pokatishila ntchito Bailolo.

16. Kansi mwaphunzila chinji kufumila pa vechitikila Nathan na Priscilla?

¹⁶ Tingakwanishe kuwona mwakutitonthojela Yehova komasoti mwakutitang’ishila kupitila m’Baibolo tikawona vechitikila Nathan na Priscilla, amene onkhala ku America. Vyaka vinyinji kuvuli, ove efulukila kudela kwamene kwenzefunikila ofalisa anyinji. Nathan enena kuti: “Sewo tenzekhulupilila kuti Yehova adalise khama yasu.” Koma olo n’tetyo, ove pechifwika kudela yosoŵa eyamba kulwala mosayembekezeleka ndipo eyamba kukumana na mavuto azachuma. Papita nthawe, banja yamene iyo yejokela kwawo koma mavuto azachuma aliyesile. Nathan enena kuti: “Newo nedabwa kuti ndaŵa yanji Yehova aliye tidalise monga nimwetenzeganizila. Ndipo neyamba kuganiza kuti payakine nechita chinthu chiipa chamene Mulungu aliyekondwele nacho.” Koma olo n’tetyo, papita nthawe Nathan na Priscilla eziŵa kuti Yehova aliyeŵasiye panthawe yonse yenzekumana na mavuto. Nathan enena kuti: “Panthawe yetenzekumana na mavuto, Baibolo yenze monga nishamwali wasu wanzelu chifukwa yenzetitang’isha notisogolela. Sewo tenzeganizilalini ngako kukula kwa mavuto ŵasu, koma tenzeganizila ngako mwenzetiyayvila Yehova kuti tikwanishe kupilila ndipo vamene ivi vatiyavya kuti tizakwanishesoti kupilila tikezekumana na mavuto ayakine kusogolo.”

17. Kansi kalongosi muyakine zina ya Helga etonthojewa tyani? (Onanisoti chithunzi.)

¹⁷ Enekwasu na akalongosi angatitang’ishesoti ngako. Motyani? Ganizilani chisanzo cha Helga, wamene onkhala ku Hungary. Kwavyaka vinyinji yove enzelimbana na mavuto osiyana-siyana ndipo enzenkhala wokhumudwa komasoti enzeliwona kuti niwosafunika. Koma akaganizila vinthu vechikumana navo, yove okwanisha kuwona kuti Yehova enzekatishila ntchito enekwasu na akalongosi amumpingo kuti amutang’ishe. Yove elemba kuti: “Yehova enzeniyavya nthawe zonse akawona kuti nafoka chifukwa cha ntchito, kusamalila mwana wangu wamene enzelwala komasoti mayeselo ayakine. Paliye nsiku olo imozi pa vyaka vonse 30 kuvuli yamene Yehova aliyekwanilishe lonjezo yake ndipo enzenitang’isha. Nthawe zinyinji enzenilimbikisa kupitila m’mawu aweme owonesha kuganizila ayakine komasoti mawu otembeja ofumila kuli ayangu. Nthawe zinyinji Mulungu enzechitisha kuti Akhilisitu ayangu aniuje mawu owonesha kuwama ntima, kuniganizila, komasoti enzenitang’isha pokatishila ntchito ndemanga zawo ziweme. Enzenilembela mamesedji pafupi-pafupi, makalata komasoti enzenitembeja panthawe ngayo-ngayo yenenzefunikila vamene ivo.”

18. Kansi tingaŵatang’ishe tyani ayasu?

¹⁸ Sewo tili namwayi ukulu ngako wokonkheja Mulungu wasu potonthoja ŵanthu ayakine. Kansi tingachite tyani vamene ivi? Tingachite vamene ivi poŵamvwishila moleza ntima, kuŵauja mawu otonthoja komasoti kuŵayavya munjila ziyakine. (Miy. 3:27) Tuyeja-yeja kutonthoja munthu aliyense keno wakumana na mavuto, kupamikijapo ŵanthu amene otumikilalini Mulungu. Tikaziŵa kuti aneba ŵasu ali na chisoni, olwala, olo keno ali na nkhaŵa, sewo tuluta kuyaŵawona, kuŵamvwishila komasoti kuŵatang’isha pokatishila ntchito Malemba. Keno tukonkheja Yehova “Mulungu wamene otitonthoja pa vuto iliyonse,” tingayavye Akhilisitu ayasu kuti akwanishe kupilila mavuto ŵakukumana nawo, ndipo ŵanthu amitima iyumu angayambe kuwona kulambila kutuŵa munjila yoyenelela.—Mat. 5:16.

YEHOVA OTIYAVYA NTHAWE ZONSE

19. Kansi Yehova watichitila vinthu votyani, ndipo tingamukonkheje tyani?

¹⁹ Yehova ochita vinthu moŵaganizila ngako ŵanthu onse amene omukonda. Yove otisiyalini tikakumana na mavuto. Molingana na kolo yamene yusamalila mwana wake mwachikondi, Yehova osamalila atumiki ŵake okhulupilika. Yove otisogolela, otisamalila, otiteteza komasoti otitonthoja. Tukonkheja Atata ŵasu akululu amene ni achikondi keno tuyavya komasoti kutang’isha ayakine panthawe yakukumana na mavuto. Mavuto olo vinthu viyakine vikatichitikila, sewo tukaikilalini na patontho kumo kuti Yehova ali nase. Pala Yove elonjeza kuti: “Osati uchite wowa chifukwa newo nili nawe.” (Yes. 41:10) Mawu amene aŵa otipasa chidalilo chikulu ngako! Kulaŵila chendi sewo tililini seka.