NKHANI YOPHUNZILA N.° 20
Kansi buku ya Chivumbulutso yufotokoza kuti n’chinji chikuti chizachitikile adani a Mulungu?
“Eŵaunganisha pamozi, kumalo amene m’Chiheberi oitiwa kuti Haramagedo.”—CHIV. 16:16.
NYIMBO N.° 150 Welani kwa Mulungu kuti muzapulumuke
VATIKUTI TIPHUNZILEa
1. Kansi buku ya Chivumbulutso yufotokoza vinthu votyani vokhuza ŵanthu a Mulungu?
BUKU ya Chivumbulutso yufotokoza kuti Ufumu wa Mulungu ulamulila kululu, yufotokozasoti kuti Satana epitikishiwa kululu. (Chiv. 12:1–9) Chifukwa cha kupitikishiwa kwamene uku, vichitisha kuti kululu kunkhale ntendele koma vileta mavuto kuli sewo. Ndaŵa yanji? Ndaŵa yakuti Satana ni wokalipa, ndipo oukila ŵala amene otumikila Yehova mokhulupilika pano pachalo.—Chiv. 12:12, 15, 17.
2. Kansi n’chinji chingatiyavye kuti tipitilije kunkhala okhulupilika kwa Yehova?
2 Kansi tingachite tyani kuti tipitilije kunkhala okhulupilika kwa Yehova olo kuti Satana otiukila? (Chiv. 13:10) Chinthu chimozi chingatiyavye, ni kuziŵa vinthu vikuti vizachitike kusogolo. Mwachisanzo, m’buku ya Chivumbulutso, ntumwi Yohane efotokoza ayakine mwa madaliso ŵatikuti tizasangalale nawo kwalombapano. Ayakine mwa madalliso amene aŵa, ni akuti adani a Mulungu azawonongewe. Lomba tiyeni tikambilane mwamene buku ya Chivumbulutso mwayufotokozela adani amene aŵa komasoti vikuti vizaŵachitikile.
ADANI A MULUNGU AMENE OFOTOKOZEWA MU “VIZINDIKILO”
3. Kansi viyakine mwa vizindikilo vamene vukatishiliwa ntchito m’buku ya Chivumbulutso ni votyani?
3 Mu vesi yoyamba ya buku ya Chivumbulutso, yutiuja mawu ŵatuŵelenga amene ofotokozewa mu “vizindikilo,” kapena kuti mawu ophiphilisila. (Chiv. 1:1) Pavuli pake, tuŵelenga vokhuza vinyama viyakine vamene vupanamila adani a Mulungu. Mwachisanzo, pali “chinyama chamene chufuma m’nyanja.” Chamene chili na “mansengo 10 na mitu 7.” (Chiv. 13:1) Chinyama chamene icho chukonkhelelewa na “chinyama chiyakine chamene chufuma pansi pachalo.” Chinyama chamene icho chulaŵila monga ni chinjoka ndipo chichitisha “mulilo kuponela pachalo.” (Chiv. 13:11-13) Pavuli pake, tuwona chinyama chiyakine “chisweta ngako” chamene palikwele hule. Vinyama vitatu vamene ivi vupanamila adani amene ankhala olimbana na Yehova Mulungu na Ufumu wake kwa nthawe itali. Tetyo, mpofunika kuti tiŵaziŵe kuti ni ŵani.—Chiv. 17:1, 3.
VINYAMA 4 VIKULU-VIKULU
Vove “vufuma m’nyanja.” (Dan. 7:1–8, 15-17) Vinyama vamene ivi vupanamila maboma amene enzelamulila komasoti kukhuza ŵanthu a Mulungu kuyambila mu nthawe ya Danieli. (Onani ndime 4, 7.)
4-5. Kansi vinthu vufotokozewa pa Danieli 7:15-17 vutiyayva tyani kumvwisha tanthauzo ya vizindikilo vamene ivi?
4 Tikaliyephunzila kuti adani amene aŵa ni ŵani, tufunika kumvwisha kuti vinyama vamene ivi komasoti hule vupanamila chinji. Njila iweme yamene ingatiyavye kumvwisha vamene ivi, ni kulola kuti Baibolo ifotokoze yeka. Vinyinji mwa vizindikilo vatufwana m’buku ya Chivumbulutso vifotokozewa kale m’mabuku ayakine a m’Baibolo. Mwachisanzo, mneneli Danieli elota maloto ndipo m’maloto amene awo ewona “vinyama vikulu-vikulu vokwana 4 vufuma m’nyanja.” (Dan. 7:1–3) Danieli otifotokozela kuti vinyama vamene ivi vupanamila chinji. Vinyama vikulu-vikulu vamene ivi vupanamila “mafumu” okwana 4, kapena kuti maboma. (Ŵelengani Danieli 7:15-17.) Kafotokozedwe kamene aka komvwika luweme kotiyavya kumvwisha kuti vinyama vufotokozewa m’buku ya Chivumbulutso vupanamilasoti maboma.
5 Lomba tiyeni tikambilane vizindikilo viyakine vamene vufotokozewa m’buku ya Chivumbulutso. Patukambilana vamene ivi, tiwone mwaingatiyavyile Baibolo kumvwisha tanthauzo ya vizindikilo vamene ivi. Tiyambe na kukambilana za vinyama vosiyana-siyana va kusanga. Choyamba, tiwone kuti vinyama vamene ivi vupanamila chinji. Pavuli pake, tiwone vikuti vizachitikile vinyama vamene ivi. Posilijila, tikambilane kuti vochitika vamene ivi vutanthauza chinji kuli sewo.
KUZIŴIKA KWA ADANI A MULUNGU
CHINYAMA CHA MITU 7
Chinyama chamene ichi “chufuma m’nyanja” ndipo chili na mitu 7, mansengo 10, na visote vachifumu vokwana 10. (Chiv. 13:1–4) Chinyama chamene ichi chupanamila maboma onse amene ankhala olamulila ŵanthu mpaka pano. Mitu 7 yupanamila maulamulilo amphamvu a pachalo okwana 7 amene ankhala oshushana ngako na ŵanthu a Mulungu. (Onani ndime 6–8.)
6. Kansi chinyama cha mitu 7 chutomolewa pa Chivumbulutso 13:1–4 chutanthauza chinji?
6 Kansi chinyama cha mitu 7 chutanthauza chinji? (Ŵelengani Chivumbulutso 13:1–4.) Tuwona kuti chinyama chamene icho chuwoneka monga ni kaingo, koma mendo ŵake ali monga ni chimbalangondo ndipo pakamwa pake pali monga ni mphondolo ndipo chili na mansengo 10. Vinyama vokwana 4 vutomolewa m’buku ya Danieli chapitala 7, navo vuwonekasoti teti. Koma m’buku ya Chivumbulutso, kawonekedwe konse ka vinyama vamene ivi kopezeka tyala mu chinyama chimozi osati vinyama 4 vosiyana-siyana. Chinyama chamene ichi chupanamilalini tyala boma imozi olo Ufumu wa pachalo chonse. Yohane enenasoti kuti chinyama chamene icho chulamulila “ŵanthu a fuko iliyonse, ntundu uliwonse, chilaŵilo chilichonse, na chalo chilichonse.” Tetyo, tinganene kuti ulamulilo wa chinyama chamene ichi ni ukulu kupambana boma iliyonse. (Chiv. 13:7) Tetyo, vuwoneka kuti chinyama chamene ichi chupanamila maboma onse amene olamulila ŵanthu mpaka pano.b—Mlal. 8:9.
7. Kansi mutu uliwonse wa chinyama pa mitu 7 upanamila chinji?
7 Kansi mutu uliwonse pa mitu 7 upanamila chinji? M’buku ya Chivumbulutso chapitala 17, tufwanamo yankho ya konsho yamene iyi chifukwa chakuti chapitala chamene ichi chufotokoza za chifanizilo cha chinyama chutomolewa m’buku ya Chivumbulutso chapitala 13. Pa Chivumbulutso 17:10, tuŵelenga kuti: “Palisoti mafumu 7. Ndipo 5 apona, imozi ilipo, iyakine ikaliyefwika. Koma ikafwika, yufunika kuzankhala kanthawe katontho.” Pa maulamulilo onse andale awakatishila ntchito Satana, olinganijiwa na “mitu” chifukwa chakuti aliye mphamvu zinyinji. Amene aŵa ni maufumu a pachalo amene ankhala olamulila ŵanthu a Mulungu olo kuŵaletela mavuto akulu. Kuzafwika mu nthawe ya ntumwi Yohane, mafumu 5 amene aŵa enze elamulila kale, monga: Iguputo, Asuri, Babulo, Mediya na Perisiya, komasoti Girisi. Ulamulilo wa namba 6 wa pachalo wa Roma, wenze ukalilamulila pamene ntumwi Yohane pechiwoneshewa mensomphenya. Kansi ni boma yotyani yamene ikuti izankhale na ulamulilo wamphamvu pachalo chonse, kapena kuti mutu wa namba 7 komasoti wosilijila?
8. Kansi mutu wa namba 7 wa chinyama upanamila ŵani?
8 Monga mwatikuti tiwonele, maulosi a m’buku ya Danieli otiyavya kuziŵa mutu wa namba 7 komasoti wosilijila wa chinyama. Kansi ni ulamulilo wamphamvu wotyani wa pachalo chonse wamene wankhala ulamulila mu nthawe ino ya mapeto, kapena kuti mu “nsiku ya Ambuya”? (Chiv. 1:10) Ni maulamulilo aŵili amphamvu amene okatila ntchito pamozi, United Kingdom komasoti United States of America, m’mawu ayakine tinganene kuti ni Britain na America wamene ni ulamulilo wamphamvu ngako pachalo chonse. Tetyo, tinganene kuti wamene uyu niye mutu wa namba 7 wa chinyama chutomolewa pa Chivumbulutso 13:1–4.
CHINYAMA CHA MANSENGO AŴILI CHAMENE CHUWONEKA MONGA NI MWANA WA MBELELE
Chinyama chamene ichi “chufuma pansi pa chalo” ndipo chulaŵila “monga ni chinjoka.” Chove chuchitisha “mulilo kupona pachalo kufuma kululu” ndipo chuchita vizindikilo monga ni “mneneli wawenye.” (Chiv. 13:11-15; 16:13; 19:20) Chinyama cha mansengo aŵili chamene chutomolewa kuti mneneli wawenye, chupanamila ulamulilo wa Britain na America chifukwa chakuti chuluŵilisha ŵanthu onkhala pachalo noŵauja kuti ‘apange chizindikilo cha chinyama’ chamene chili na mitu 7 na mansengo 10. (Onani ndime 9.)
9. Kansi chinyama cha “mansengo aŵili monga ni a mwana wa mbelele” chupanamila chinji?
9 Buku ya Chivumbulutso chapitala 13 yupitilija kutiuja kuti mutu wa namba 7 wamene uyu, wamene ni ulamulilo wamphamvu ngako pachalo chonse wa Britain na America, uchitasoti vinthu monga ni chinyama chili na “mansengo aŵili monga ni a mwana wa mbelele, koma chiyamba kulaŵila monga ni chinjoka.” Chinyama chamene ichi “chichita vizindikilo vikulu mwakuti chichitisha olo mulilo kuponela pachalo kufumila kululu ŵanthu olola.” (Chiv. 13:11-15) M’machapitala 16 mpaka 19 a buku ya Chivumbulutso, ofotokoza kuti chinyama chamene ichi ni “mneneli wawenye.” (Chiv. 16:13; 19:20) Danieli efotokoza kuti chinthu chiyakine cholingana na chamene ichi, kapena kuti ulamulilo wamphamvu wa pachalo chonse wa Britain na America, ‘uzalete chiwonongeko choyofya.’ (Dan. 8:19, 23, 24) Ivi niye vichitika pa nthawe ya nkhondo yachiŵili ya pachalo chonse. Mabomba aŵili amene echitisha kuti nkhondo isile, epangiwa na asayansi aŵili aku Britain na America. Ulamulilo wamphamvu pachalo chonse wa Britain na America wichitisha kuti ‘mulilo upone pachalo kufumila kululu.’
CHINYAMA CHISWETA NGAKO
Hule yamene yupanamila Babulo Nkulu, yakwela pa chinyama chamene ichi. Chinyama chamene ichi chufotokozewa kuti ni mfumu ya namba 8. (Chiv. 17:3–6, 8, 11) Poyamba, hule yusogolela chinyama chamene icho, koma pavuli pake yuwonongewa na chinyama chamene icho. Hule yupanamila ufumu wa pachalo chonse wa chipembezo chawenye. Masiku ŵano, chinyama chamene ichi chupanamila bungwe ya United Nations, yamene yulimbikisa mabungwe a ndale pachalo chonse. (Onani ndime 10, 14-17.)
10. Kansi “chifanizilo cha chinyama” chupanamila chinji? (Chivumbulutso 13:14, 15; 17:3, 8, 11)
10 Lomba tiyeni tikambilane za chinyama chiyakine. Chinyama chamene ichi chuwoneka monga n’cholingana na chinyama cha mitu 7, koma chove n’chisweta ngako. Chove chuitiwa kuti ‘chifanizilo cha chinyama’ ndipo chufotokozewa kuti ni “mfumu ya namba 8.”c (Ŵelengani Chivumbulutso 13:14, 15; 17:3, 8, 11.) Yohane ewona kuti “mfumu” yamene iyi iwonekela, pavuli pake ichizasoŵa, ndipo papita nthawe iwonekelasoti. Vamene ivi vuifotokoza luweme bungwe ya United Nations, yamene yulimbikisa ngako vochitika va ndale va pachalo chonse! Poyamba, bungwe yamene iyi yenzeitiwa kuti League of Nations. Pavuli pake, zina yamene iyi ichizasila nkati mwa nkhondo yachiŵili ya pachalo chonse. Pavuli pake, iyamba kuziŵikasoti kuti United Nations.
11. Kansi vinyama kapena kuti maboma ochita chinji, ndipo ndaŵa yanji tufunikalini kuŵayopa?
11 Pokatishila ntchito mawu ŵawo okopa, vinyama kapena kuti maboma olimbikisa ŵanthu kuti akoshusha Yehova pamozi na ŵanthu ŵake. Yohane enena kuti venze monga ove ounganisha “mafumu a pachalo chonse kwamene kuli ŵanthu” ku nkhondo ya Aramagedo yamene ni “nsiku ikulu ya Mulungu wamphamvu zonse.” (Chiv. 16:13, 14, 16) Koma sewo tizayopelini chilichonse. Mulungu wasu nkulu Yehova azachitepo kanthu mokulumija kuti apulumushe onse ŵala amene ali kumbali ya ulamulilo wake.—Eze. 38:21-23.
12. Kansi n’chinji chikuti chizachitikile vinyama vonse?
12 Kansi n’chinji chuchitikila vinyama vonse? Lemba ya Chivumbulutso 19:20 yuyankha kuti: “Chinyama chamene icho chikatiwa pamozi na mneneli wala wawenye, wamene echita vizindikilo pamenso pa chinyama chamene icho. Vizindikilo vamene ivo eluŵilisha navo olondela chizindikilo cha chinyama na olambila chifanizilo chake. Penze akali amoyo, onse aŵili eponyewa m’nyanja ya mulilo yuyaka na sulufule.” Tetyo, maboma olamulila amene aŵa, amene ni adani a Mulungu, azawonongewe mpaka kale-kale.
13. Kansi Akhilisitu okumana na vuto yotyani chifukwa cha maboma a ichi chalo?
13 Kansi vamene ivi vutanthauza chinji kuli sewo? Monga Akhilisitu, tufunika kunkhala okhulupilika kwa Mulungu na Ufumu wake. (Yoh. 18:36) Kuti tikwanishe kuchita vamene ivi, tufunikalini kuloŵelela mu nkhani za ndale za ichi chalo. Koma payakine vingankhale vovuta ngako kuli sewo kusaloŵelela mu ndale, chifukwa maboma a ichi chalo ofuna kuti tinkhale kumbali yawo kupitila mu vatulaŵila na vatuchita. Ŵala ŵanthu amene ogonja chifukwa cha kukakamijiwa kwamene uku, olondela chizindikilo cha chinyama. (Chiv. 13:16, 17) Tetyo, aliyense wamene angalondele chizindikilo chamene icho, Yehova angasangalalelini naye ndipo azaluze moyo wosasila. (Chiv. 14:9, 10; 20:4) Tetyo, n’chinthu chofunika ngako kupitilija kusaloŵelela mu ndale olo kuti maboma atikakamije tyani kuti tinkhale kumbali yawo!
MAPETO OCHITISHA NSONI A HULE IKULU
14. Mokatijana na Chivumbulutso 17:3–5, kansi ni chinthu chodabwisa chotyani chechiwona ntumwi Yohane pavuli pake?
14 Ntumwi Yohane enena kuti ‘edabwa ngako’ na chinthu chechiwona. Kansi ewona chinji? Ewona mwanakazi alikwele pa chimozi mwa vinyama vaukali. (Chiv. 17:1, 2, 6) Mwanakazi wamene uyu owoneka monga ni “hule ikulu” ndipo oitiwa kuti “Babulo Nkulu.” Yove ochita “chigololo” na “mafumu a pachalo.”—Ŵelengani Chivumbulutso 17:3–5.
15-16. Kansi “Babulo Nkulu” ni ŵani, ndipo tuziŵa tyani vamene ivi?
15 Kansi “Babulo Nkulu” ni ŵani? Mwanakazi wamene uyo angapanamilelini gulu ya ndale, chifukwa chakuti buku ya Chivumbulutso yunena kuti yove ochita chigololo na asogoleli andale a pachalo. (Chiv. 18:9) Ndipo chifukwa chakuti yove alikwele pa chinyama chamene icho, vuwonesha kuti yove oyeja-yeja kulamulila maboma amene aŵa. Kuyangijila pamene apa, yove angapanamilelini amalonda achigolo a ichi chalo cha Satana. Amalonda amene aŵa, mmavesi ayakine a buku ya Chivumbulutso oitiwa kuti “amalonda oyenda-yenda a pachalo.”—Chiv. 18:11, 15, 16.
16 M’malemba, mawu akuti “hule” angatanthauze ŵanthu amene onena kuti otumikila Mulungu koma olambila mafano, olo kunkhala azishamwali a ichi chalo mwa njila iyakine. (1 Mbiri 5:25; Yak. 4:4) Mosiyana na vamene ivi, ŵala olambila Mulungu mokhulupilika oitiwa kuti “atuŵa” kapena kuti “ndola.” (2 Akor. 11:2; Chiv. 14:4) Babulo wakale enze likulu ya kulambila kwawenye. Tetyo, Babulo Nkulu angapanamile mitundu yonse ya kulambila kwawenye. Kulaŵila chendi, yove niye ufumu wa pachalo chonse wa chipembezo chawenye.—Chiv. 17:5, 18; onani nkhani yakuti “Kodi Babulo Wamkulu N’chiyani?” pa webisaiti ya jw.org.
17. Kansi n’chinji chikuti chizachitikile Babulo Nkulu?
17 Kansi n’chinji chikuti chizachitikile Babulo Nkulu? Lemba ya Chivumbulutso 17:16, 17 yuyankha konsho yamene iyi kuti: “Mansengo 10 ŵala awawona komasoti chinyama, vamene ivi vizazondane nayo hule yamene iyo. Vizaiwononge noisiya chinthaku. Vizalye minyomfu yake noinyekesha na mulilo, pakuti Mulungu eika vamene ivi m’mitima yawo kuti vichite mokatijana na maganizo ŵake.” N’chendi, Yehova azachitishe a mitundu kukatishila ntchito chinyama chisweta ngako, kapena kuti bungwe ya United Nations, kuti iukile ufumu wa pachalo chonse wa chipembezo chawenye nochiwonongelatu mpaka kale-kale.—Chiv. 18:21-24.
18. Kansi tingawoneshe tyani kuti tutolamolini mbali mu Babulo Nkulu mwa njila iliyonse?
18 Kansi vamene ivi vutanthauza chinji kuli sewo? Tufunika kupitilija kunkhala ku mbali ya “kulambila kutuŵa na kosaipishiwa kwa Mulungu wasu.” (Yak. 1:27) Tufunikalini olo patontho kutolela viphunziso vawenye, vikondwelelo vakunja, minkhalidwe yotailila, komasoti vochita va Babulo Nkulu vokhuza kukhulupilila mizimu! Ndipo tufunika kupitilija kuchenjeja ŵanthu ayakine kuti ‘afumemo,’ kuti Mulungu osati aŵaimbe mulandu chifukwa cha machimo ŵawo.—Chiv. 18:4.
CHIWELUZO CHOKHUZA MDANI NKULU WA MULUNGU
CHINJOKA CHA NTUNDU WOCHITISHA CHIDWI
Satana opeleka ulamulilo ku chinyama. (Chiv. 12:3, 9, 13; 13:4; 20:2, 10) Satana ni mdani nkulu wa Yehova ndipo azaponyewe mu chisengu kwa vyaka 1.000. Pavuli pake, Satana azaponyewe “m’nyanja ya mulilo na sulufule.” (Onani ndime 19-20.)
19. Kansi “chinjoka chikulu chisweta” niŵani?
19 Buku ya Chivumbulutso yufotokozasoti za “chinjoka chikulu chisweta.” (Chiv. 12:3) Chinjoka chamene ichi chiniyata nkhondo na Yesu pamozi na angelo ŵake. (Chiv. 12:7–9) Ndipo chinjoka chamene ichi chuukila ŵanthu a Mulungu, komasoti chupeleka mphamvu kuli vinyama kapena kuti maboma a ŵanthu. (Chiv. 12:17; 13:4) Kansi chinjoka chamene ichi ni ŵani? Ni “njoka yakale yala, yove oitiwa kuti Mdyelekezi na Satana.” (Chiv. 12:9; 20:2) Yove niye olamulila adani ayakine onse a Yehova.
20. Kansi n’chinji chikuti chizachitikile chinjoka?
20 Kansi n’chinji chuchitikila chinjoka? Buku ya Chivumbulutso 20:1–3 yufotokoza kuti mngelo azaponye Satana mu chisengu. Chisengu chamene icho chizankhale monga ni djeli kuli yove. Pa nthawe yakuti azankhale mu djeli yamene iyo, Satana ‘azaluŵilishelinisoti mitundu ya ŵanthu mpaka vyaka 1.000 vizasile.’ Posilijila, Satana na viŵanda vake azaponyewe “m’nyanja ya mulilo na sulufule.” Vamene ivi vutanthauza kuti azawonongewe mpaka kale-kale. (Chiv. 20:10) Yejani kuganizila kuti muli m’chalo muliye Satana pamozi na viŵanda vake. Yamene iyi izankhale nthawe yokondwelesha ngako!
21. Ndaŵa yanji tufunika kunkhala osangalala na vinthu vataŵelenga m’buku ya Chivumbulutso?
21 N’volimbikisa ngako kumvwisha tanthauzo ya vizindikilo vufotokozewa m’buku ya Chivumbulutso! Taphunzila kuti adani a Mulungu ni ŵani, ndipo tawonasoti vikuti vizaŵachitikile. N’chendi, “wosangalala ni munthu wamene oŵelenga mokweja, komasoti ŵanthu amene akumvwa mawu a ulosi wamene uyu”! (Chiv. 1:3) Koma adani a Mulungu akazachosewa, kansi ŵanthu okhulupilika azasangalale na madaliso otyani? Tizakambilane vamene ivi mu nkhani ikuza pa nkhani ziŵili zamene zufotokoza buku ya Chivumbulutso.
NYIMBO N.° 22 Ufumu wamene utonga—kululu uwele!
a Buku ya Chivumbulutso yufotokoza kuti adani a Mulungu ni ŵani pokatishila ntchito vizindikilo. Buku ya Danieli yutiyavya kumvwisha tanthauzo ya vizindikilo vamene ivi. Mu nkhani ino, tikambilane maulosi ayakine a m’buku ya Danieli polinganija na maulosi ayakine ofotokozewa m’buku ya Chivumbulutso. Vamene ivi vingatiyavye kuziŵa adani a Mulungu kuti ni ŵani. Pavuli pake, tikambilane vikuti vizaŵachitikile adani amene aŵa.
b Pali umboni uyakinesoti uwonesha kuti chinyama cha mitu 7 chupanamila maulamulilo onse a ndale amene ni “mansengo 10.” Namba ya 10 kanyinji-kanyinji m’Babolo yufotokoza chinthu chiyakine chokwanila.
c Mosiyana na chinyama choyamba, chifanizilo chamene ichi chiliye “chisote chachifumu,” ku mansengo ŵachine. (Chiv. 13:1) Vili tetyo chifukwa chakuti chove ‘chifuma muli ŵala mafumu 7’ ndipo chudalila mafumu amene awo kuti chikolamulila.—Onani nkhani yakuti, “Kodi Chilombo Chofiira Kwambiri Chomwe Chimatchulidwa M’chaputala 17 cha Chivumbulutso Chimaimira Chiyani?” pa webisaiti ya jw.org.