Nifwana chisangalalo ngacho-ngacho mwa kudalila Yehova

NTHAWE YENIYAMBA KUDALILA YEHOVA PA MOYO WANGU

Nivyalika mu 1948 m’kamunzi katontho kum’mwela chaku nchingulo kwa Nigeria. Panthawe yamene iyo, amalume ŵangu a Moustapha, na nsaza wawo wa atata, komasoti nkulu wangu woyamba kuvyalika Wahabi, ebatizika monga Amboni za Yehova. Penenze na vyaka 9, atata ŵangu emwalila. Vamene ivi venikhumudwisa ngako. Wahabi eniuja kuti tizaŵawonesoti atata pa nthawe ya chiukililo. Mawu otang’isha amene aŵa, enichitisha kuti niyambe kuphunzila Baibolo. Pofwika mu 1963, newo nibatizika. Nawo akwangu atatu ebatizikasoti.

Mu 1965, niyamba kukatijana na nkulu wangu Wilson ku Lagos, ndipo nisangalala ngako kuziŵana na apainiya onkhazikika mumpingo wa Ibobe. Kuwona chisangalalo komasoti khama yawo pa utumiki kwenitang’isha, ndipo m’mwezi wa Djanuwale mu 1968, nane niyamba kutumikila monga mpainiya.

M’bale muyakine wapa Beteli zina yake Albert Olugbebi, elinganija nsonkhano wapadela wa sewo achilumbwana wokhuza kusoŵa kwa apainiya apadela kumpoto kwa chalo cha Nigeria. Nikaliye luŵa mawu opapatila ŵechilaŵila m’bale Olugbebi akuti: “Mwewo mukali alumbwana, ndipo mungakatishile ntchito nthawe na mphamvu zanu potumikila Yehova. Pali mautumiki anyinji ŵamungachite!” Pofuna kukonkheja mzimu wolipeleka wa mneneli Yesaya, newo nilemba fomu yosenga utumiki.—Yes. 6:8.

Mu Meyi 1968, niujiwa kuti nikatumikile monga mpainiya wapadela mu tauni ya Kano, kumpoto kwa Nigeria. Vamene ivi venzechitika pa nthawe yankhondo ya ku Biafran, yamene iyamba mu 1967 mpaka mu 1970, nkhondo yamene iyi iyambisha mavuto ndipo ipaya ŵanthu anyinji kumpoto kwa Nigeria, ndipo pavuli pake itaukila kummawa kwa Nigeria. M’bale muyakine eyeja kuninyengelela kuti osati niluteko ku Nigeria. Koma newo nimuyankha kuti: “Natembeja chifukwa chonidela nkhaŵa. Koma keno Yehova ofuna kuti newo nichite utumiki wamene uyu, nukaikila lini kuti yove aŵe nane.”

KUDALILA YEHOVA M’DELA YA NKHONDO

Vinthu ku Kano venze vomvwisha chisoni ngako. Nkhondo ya paukwawo yenze iwononga tauni ikulu ya m’chalo chamene ichi. Tikaŵa muutumiki, nthawe ziyakine tenzefwana vitanda va ŵanthu amene echifwa pankhondo. Olo kuti ku Kano kwenze mipingo inyinji, abale anyinji enze ethaŵa. Ofalisa amene enze esala enzekwana lini 15, ndipo ove enze na wowa komasoti ofoka. Abale na alongo amene awo esangalala ngako petifwika sewo apainiya apadela amene tenzepo okwana 6. Sewo tiyamba kuŵalimbikisa ndipo ove eyamba kumvwako luweme. Sewo tiŵayavya kulinganija soti misonkhano na ntchito yolalikila, komasoti kutumija malipoti autumiki wakumunda nosenga mabuku ku ofesi ya nthambi.

Sewo apainiya apadela tiyamba kuphunzila chilaŵilo cha Chihausa. Pechiwona kuti tenzelalikila uthenga wa Ufumu mu chilaŵilo chawo, ŵanthu anyinji eyamba kutimvwishila. Koma olo n’tetyo, ŵanthu a m’chipembezo chiyakine chikulu chaku Kano enzesangalala lini na ntchito yasu yolalikila, tetyo tenzefunikila kuchita vinthu mosamala ngako. Nsiku iyakine, newo na muyangu tiutukishiwa na mwanalume muyakine wamene enze na chipula kumanja. Mwamwayi sewo tiutuka kupambana yove ndipo aliye kwanishe kutikata! Olo kuti kwenzechitika vinthu voyofya, Yehova etichitisha ‘kunkhala otetezeka’ ndipo chiŵelengelo cha ofalisa chiyamba kukula. (Sal. 4:8) Pali pano ku Kano, kuli ofalisa opitilila 500 amene otumikila m’mipingo yokwanila 11.

TIKUMANA NA CHINZUNZO MU CHALO CHA NIGER

Mu Ogasite 1968, pavuli pakuti nankhala ku Kano kwa miyezi tyala itontho, nitumijiwa ku Niamey yamene ni tauni ikulu ya Republic of Niger, pamozi na apainiya apadela ayakine aŵili. Pakaliye pita nthawe itali, sewo tiwona seka kuti dela ya ku Nchingulo kwa Africa, ni imozi mwa madela akupya ngako pachalo chonse. Sewo tenzefunikila kukata ntchito yolalikila mudela yakupya ngako komasoti kuphunzila chilaŵilo chikulu cha m’chalo chamene icho chamene ni Chifrench. Olo kuti kuchita vamene ivi kwenzelini kupepu, sewo tidalila Yehova ndipo tiyamba kulalikila m’tauni yamene iyo pamozi na ofalisa atontho a kwamene uko. Mu kanthawe katontho tyala, pafupi-fupi munthu aliyense mu Niamey wamene enzekwanisha kuŵelenga elondela buku yophunzilila Baibolo yakuti Coonadi Cimene Cimatsogolera ku Moyo Wamuyaya. Ŵanthu mpaka enzechita tisakila kuti tiŵapase mabuku!

Pakaliye pita nthawe itali, sewo tichizaziŵa kuti akulu-akulu aboma osangalala lini na Amboni za Yehova. Mu Djulayi 1969, tichita nsonkhano wadela woyamba m’chalo chamene icho, ndipo pefwika ŵanthu okwana pafupi-fupi 20. Sewo tenzeyembekezela mwachidwi kuwona ubatizo wa ofalisa aŵili anyowani. Koma pa nsiku yoyamba ya nsonkhano wamene uyo, apolisi efwika nopanamika mapulogilamu. Ove etola wopanamila dela komasoti apainiya apadela noluta nawo kupolisi. Ove etikonsha makonsho ndipo etilamula kuti mukawelesoti mailo muzafotokoze luweme. Sewo tiziŵa kuti akulu-akulu a boma angayambishe mavuto, tetyo tilinganija kuti nkhani ya ubatizo ikalaŵiliwe kung’anda ya m’bale muyakine, ndipo ofalisa amene awo tiŵabatiza mochenjela.

Pavuli pa masondo tyala atontho, boma ilamula kuti newo pamozi na apainiya apadela 5 tifumeko ku Niger. Ove etipasa tyala ma awazi 48 kuti tifuluke, ndipo tenzefunikila kukatishila ntchito ndalama zasu. Sewo timvwila ndipo tifulukila ku ofesi ya nthambi yaku Nigeria, kwamene tilondela utumiki wanyowani.

Newo nitumijiwa kuyatumikila m’munzi uyakine wa Orisunbare ku Nigeria, kwamene tenzesangalala pamozi na kagulu katontho ka ofalisa kakwamene uko powona vokonkhapo viweme va utumiki wasu. Koma pavuli pa miyezi 6, ofesi ya nthambi iniuja kuti nijokele ku Niger. Poyamba nidabwa ndipo nichita wowa, koma pavuli pake niyamba kusangalala poganizila kuti nikawonane soti na abale aku Niger!

Newo nijokelasoti ku Niamey. Pa nsiku yokonkhapo kufumila penifwika, munthu muyakine wabizinesi waku Nigeria eziŵa kuti nine wa Mboni, ndipo eyamba kunikonsha makonsho okhuza Baibolo. Newo niyamba kuphunzila naye Baibolo, ndipo pechileka chiyoloŵezi chake chopepa komasoti chakumwa ngako walwa, ebatizika. Nisangalala kulalikila pamozi na abale na alongo m’madela osiyana-siyana ku Niger komasoti powona kuti chaka na chaka ŵanthu anyinji akwamene uko olondela choonadi. Pa nthawe yenifwika, m’chalo chamene icho mwenze Amboni 31, ndipo pa nthawe yenenzefuluka nisiya Amboni okwanila 69.

“SEWO TUZIŴALINI VINYINJI VOKHUZA NTCHITO YA UFUMU KU GUINEA”

Chakumapeto kwa 1977, nijokela ku Nigeria kuti nikachite kosi. Kumapeto kwa kosi yamene iyo ya masondo atatu, wogwirizanisa Komiti ya Nthambi Malcolm Vigo, eniŵelengela kalata yofumila ku nthambi yaku Sierra Leone. Abale enzesakila m’painiya wamene ali na thanzi iweme komasoti mbeta wamene okwanisha kulaŵila Chingelezi na Chifrench, kuti akatumikile monga wopanamila Dela ku Guinea. M’bale Vigo eniuja kuti cholinga chenilondelela kosi yamene iyo n’chakuti nikatumikile monga wopanamila dela. Yove enisimikijila kuti utumiki wamene uyu niupepulini. M’bale wamene uyu enilangiza kuti: “Uyambe wauganizila luweme utumiki wamene uyu ukaliye uvomela.” Nthawe yamene iyo letu newo niyankha kuti, “Pakuti Yehova niye wanituma, newo nilute.”

Nikwela ndeke noluta ku Sierra Leone, ndipo kwamene uko nikumana na abale apa ofesi ya nthambi. M’bale muyakine wamu Komiti ya Nthambi eniuja kuti, “Sewo tuziŵalini vinyinji vokhuza ntchito ya Ufumu ku guinea.” Olo kuti nthambi yamene iyo niye yenzelolela ntchito yolalikila m’chalo chapafupi cha Guinea, venze vosakwanishika kulaŵila na ofalisa chifukwa cha kukula kwa mavuto pankhani zandale m’chalo chamene icho. Ove echita vonse vangakwanishe kuti afwane m’bale wamene angalute kuyatandaja ku Gineia, koma aliyemufwane. Tetyo, ove eniuja kuti nilute ku Conakry yamene ni tauni ikulu ya Guinea, kuti nikayeje kusenga chilolezo ku boma kuti anilole kunkhala m’tauni yamene iyo.

Penifwika ku Conakry, niluta ku ofesi ya kazembe wa ku Nigeria ndipo nimufwana. Newo nimufotokozela kuti nufunishisha kukata ntchito yolalikila m’chalo chawo cha Guinea. Yove enilangiza kuti nufunika lini kunkhala m’chalo chawo chifukwa ningamangiwe kapena kuwonongewa. Yove enena kuti: “Ujokele ku Nigeria, ndipo ukakatile kwamene uko ntchito yolalikila,” koma newo nimuyankha kuti, “Newo nasimikija ntima kuti ninkhale kwamene kuno.” Tetyo, yove elembela nduna ya zamalamulo yaku Guinea kuti iniyavye, ndipo nduna yamene iyo inilondela noniyavya mwachikondi.

Papita tyala nthawe itontho, nijokela ku ofesi yanthambi yaku Sierra Leone ndipo niuja abale zachigamulo cheipeleka nduna yamene iyo. Abale eŵilikija mosangalala peniŵafotokozela mwamene Yehova mwechidalisila ulwendo wangu. Boma inilola kunkhala m’chalo cha Guinea!

Kufumila mu 1978 mpaka mu 1989, nenzetumikila monga wopanamila dela ku Sierra Leone m’chalo cha Guinea, komasoti monga wopanamila dela wokatijila ku Liberia. Poyamba nenzelwala-lwala. Vamene ivi nthawe ziyakine venzechitikila kumadela akutali. Koma abale enzechita vonse vangakwanishe kuti alute nane kuchipatala.

Nthawe iyakine, nenze nilwala ngako chifukwa nenze na njoka zam’mala. Pavuli pakuti napola, nichizaziŵa kuti abale enzechita wowa kuti ningaŵafwile ndipo enzekambilana za kwanganitumije! Olo kuti nikumana na vochitika voyofya monga ni vamene ivi, newo niliye ganizileko zosiya utumiki wangu. Komasoti nipitilija kukhulupilila kuti chitetezo ngacho-ngacho chufumila kwa Mulungu wamene niye angakwanishe kuusha ŵanthu akufwa.

KUDALILA YEHOVA MONGA BANJA

Mu 1988, nikumana na Dorcas, mpainiya wolichefya ngako, komasoti wokonda vinthu vauzimu. Pavuli pake, tilungulana ndipo yove eyamba kutumikila nane pamozi monga wopanamila dela. Dorcas wawonesha kuti nimwanakazi wachikondi komasoti wolipeleka. Newo pamozi na yove tankhala tuyenda maulwendo atali-atali makilomita 25 (15 mailosi) na mendo poluta kuyatandaja mipingo uku tilinyamule mitolo yasu. Kumipingo yakutali, tenzekatishila ntchito choyendela chilichonse chatingafwane ndipo tenzeyenda m’njila zamatika komasoti zamigelo ikulu-ikulu.

Dorcas ni mwanakazi wotang’a ntima ngako. Mwachisanzo, nthawe ziyakine tenzefunikila kutauka mimana yamene yenze na ng’wena. Paulwendo uyakine wamasiku 5, tenzefunikila kutauka mimana na maboti chifukwa chakuti mitano yamapulanga yenze ipasuka. Dorcas pechipanama kuti afume m’boti petifwika kusilya, eponela m’manzi amene enze onoka. Paliye aliyense wasewo wamene enzekwanisha kunyaya, ndipo mmana wamene uyo wenze na ng’wena. Mwamwayi, mulumbwana muyakine elumphila pammana pamene apo nomufumiya kunja. Tonse aŵili kwamasiku ayakine anyinji tenzelotela lini bwino usiku, koma tipitilija pautumiki wasu monga opanamila dela.

Kumayambililo kwa 1992, tonse tidabwa ngako petiziŵa kuti Dorcas ali na vumo. Apa lomba sewo tenzefunikila kupanga chosankha kuti tipitilije kutumikila monga apainiya apadela kapena yayi. Mwanakazi wangu na newo tiujana kuti, “Yehova watipasa mphaso!” Tetyo, tisankha kuti mwana wasu mwanakazi zina yake ankhale Jahgift. Papita vyaka 4 Jahgift wavyalika, naye mulongosi wake Eric, evyalika. Ŵana ŵasu onse aŵili enkhala chendi mphaso yofumila kwa Yehova. Jahgift watumikila kwa nthawe itali ku ofesi yomasulila mabuku ku Conakry, ndipo Eric ni ntumiki wothandiza.

Olo kuti m’kupita kwa nthawe Dorcas epanama kutumikila monga mpainiya wapadela, yove epitilija kutumikila monga mpainiya wonkhazikika olo panthawe yenzelela ŵana ŵasu. Moyavyiwa na Yehova, newo nipitilija kutumikila monga mpainiya wapadela wanthawe zonse. Pavuli pakuti ŵana ŵasu akula, Dorcas eyambasoti kutumikila monga mpainiya wapadela. Palipano, tonse tutumikila monga amishonale ku Conakry.

MAZIKO ACHITETEZO NGACHO-NGACHO

Nthawe zonse nankhala nuluta kulikonse kwawanituma Yehova. Kanyinji-kanyinji, mwanakazi wangu na newo tankhala tuwona kuti Mulungu otiteteza komasoti kutidalisa. Chifukwa chodalila Yehova m’malo modalila chuma, sewo tankhala tupewa mavuto komasoti nkhaŵa zinyinji zakunkhala nazo ŵanthu muli chino chalo chiipa. Dorcas na newo tawona seka na menso ŵasu kufumila pa vinthu vatakumana navo kuti munecho wachitetezo ngacho-ngacho ni “Mulungu wachipulumuso chasu”, Yehova. (1 Mbiri 16:35) Newo nine wosimikija ntima kuti moyo wa ŵanthu onse amene okhulupilila mwa Yehova, Mulungu ‘azazeŵeje noteteza moyo wawo mu bokisi ya moyo.’—1 Sam. 25:29.