MUTU 05
Baibolo ni uthenga wa Mulungu kuli sewo
Yehova etipasa mphaso yantengo wapatali ya—mabuku 66 amene opanga Baibolo. Koma payakine mungolikonsha kuti: ‘Kansi Baibolo ifumila kuni? N’nga eilemba niŵani?’ Kuti tiyankhe makonsho amene aŵa tiyeni tikambilane mwamene uthenga wa Mulungu wa m’Baibolo mwawafwikila kuli sewo.
1. Lomba keno ŵanthu niye elemba Baibolo, ndaŵa yanji tinganene kuti niyofumila kwa Mulungu?
Baibolo ilembewa na analume opitilila 40 m’vyaka vam’ma 1.600. Buku yoyambilila ilembewa m’chaka cha 1513 B.C.E. ndipo buku yosilijila ilembewa m’chaka cha 98 C.E. Ndipo elemba Baibolo efumila ku mitundu yosiyana-siyana. Koma olo n’tetyo, mbali zonse za m’Baibolo nizokatijana. Vikwanishika tyani vamene ivi? Vikwanishika chifukwa Mulungu niye elemba Baibolo. (Ŵelengani 1 Atesalonika 2:13.) Ŵanthu amene awo elemba Baibolo aliyelembe maganizo ŵawo. M’malo mwake, ove “elaŵila mawu ofumila kwa Mulungu mosogolelewa na mzimu utuŵa.”a (2 Petulo 1:21) Pokatishila ntchito mzimu wake utuŵa, Mulungu ewujila olo echitisha ŵanthu kuti alemba maganizo ŵake.—2 Timoteyo 3:16.
2. Kansi munthu aliyense angapindule nayo Baibolo?
Mulungu epanga Baibolo kuti ipindulishe ŵanthu a “chalo chilichonse, fuko iliyonse, chilaŵilo chilichonse, na ntundu uliwonse”. (Ŵelengani Chivumbulutso 14:6.) Niye chifukwa chake, Mulungu wachitisha kuti Baibolo ikopezeka muvilaŵilo vinyinji kupambana buku iliyonse yamene inkhalako kale. Pafupi-fupi pachalo chonse ŵanthu angakwanishe kuŵelenga uthenga uweme wayufotokoza Baibolo, viliye kanthu kuti ŵanthu amene awo onkhala kuni olo kuti olaŵila chotyani.
3. Kansi Yehova waiteteza tyani Baibolo?
Baibolo ikumana na mavuto anyinji, koma Yehova aliye lole kuti chinthu chilichonse chimukangishe kufalisa uthenga wake kuli sewo. Koma ŵanthu amene enzekonda Baibolo ekopela ndipo eikopela mosamala ngako pa manja. Olo kuti ŵanthu a mphamvu eyeja-yeja kuti awononge Baibolo, koma ŵanthu ayakine enze okonzeka kuika moyo wawo pangozi kuti aiteteze. Yehova aliye lole kuti munthu olo chinthu chilichonse chimukangishe kulaŵila nase. Baibolo yunena kuti: “Mawu a Mulungu wasu azankhalepo mpaka kale-kale.”—Yesaya 40:8.
VATI TIPHUNZILE
Tiphunzile vinyinji vokhuza mwamene Mulungu mwachiujilila ŵanthu kuti alembe Baibolo, mwechiitetezela komasoti vechichita kuti ŵanthu onse akokwanisha kuŵelenga Mawu ŵake.
4. Baibolo yufotokoza wamene Elemba
Lolelani VIDIYO. Pavuli pake ŵelengani 2 Timoteyo 3:16, ndipo mukambilane makonsho aŵa okonkhapo.
Lomba keno ŵanthu niye elemba Baibolo, ndaŵa yanji tinganene kuti niyofumila kwa Mulungu?
Kansi mwewo muganiza kuti vingankhale vomvwika kukhulupilila kuti Mulungu enzeuja ŵanthu maganizo ŵake kuti alembe Baibolo?
Sekeletale angalembe kalata, koma uthenga uli mukalata ni wa munecho wa pakampani. Molingana na vamene ivi, ŵanthu niye elemba Baibolo, koma uthenga wake ni wofumila kwa Mulungu
5. Baibolo ipulumuka ku mavuto anyinji
Keno Baibolo ni yofumila kwa Mulungu, tuyembekezela kuti yove azaiteteze. Mu mbili yonse, analume ayakine a mphamvu eyeja-yeja kuti awononge Baibolo. Asogoleli a vipembezo enzefunalini kuti ŵanthu ankhale na Baibolo. Olo kuti enzetamanishiwa, ŵanthu anyinji eika moyo wawo pangozi kuti ateteze Baibolo. Kuti muphunzile za munthu wamene uyu, lolelani VIDIYO, ndipo pavuli pake mukambilane makonsho aŵa okonkhapo.
Kansi mwewo muli na chidwi choŵelenga Baibolo pamwaziŵa vonse vechichita ŵanthu kuti aiteteze? Ndaŵa yanji?
Ŵelengani Salimo 119:97, ndipo pavuli pake mukambilane konsho iyi:
Ndaŵa yanji ŵanthu anyinji enze okonzeka kuika moyo wawo pangozi kuti amasulile na kuifalisa Baibolo?
6. Ni buku ya ŵanthu onse
Baibolo ni buku yumasuliliwa komasoti kufalisiwa ngako kupambana buku iliyonse. Ŵelengani Machitidwe 10:34, 35, ndipo pavuli pake mukambilane makonsho aŵa okonkhapo:
Kansi ndaŵa yanji Mulungu ofuna kuti kŵake amasuliliwe na kufalisiwa muvilaŵilo vinyinji?
Kansi n’chinji chukuchitishani chidwi chokhuza Baibolo?
Pafupi-fupi
100%
ya ŵanthu pachalo
angaŵelenge Baibolo muchilaŵilo chawo ngacho-ngacho
Yupezeka muvilaŵilo vopitilila
3.000
Baibolo yonse olo mbali zake
5.000.000.000
Chamene ichi ni chiŵelengelo chikulu cha ma Baibolo amene edindiwa,
kupambana buku iliyonse
ŴANTHU AYAKINE ONENA KUTI: “Baibolo ni buku yakale yolembewa na ŵanthu.”
Kansi mwewo muganiza tyani?
Kansi pali umboni wotyani wakuti Baibolo ni Mawu a Mulungu?
MFUNDO ZACHIDULE
Baibolo ni Mawu a Mulungu, ndipo yove wawoneshesha kuti ikopezeka kuli ŵanthu a mitundu yonse.
Makonsho oweleja
Kansi vutanthauza chinji tikonena kuti Mulungu eujila ŵanthu kuti alembe Baibolo?
Kansi n’chinji chukusangalasani mwewo na kupulumuka kwa Baibolo, kumasuliliwa komasoti kufalisiwa kwake?
Kansi mwewo mukumvwa tyani mukaziŵa kuti Mulungu eyeja-yeja mwangakwanishile kuti akolaŵila namwe?
PHUNZILANI VINYINJI
Ŵelengani mbili yokhuza Baibolo—mweyenzelembelewe kale-kale komasoti mwaililembelewe ŵano masiku.
Phunzilani mweipulumukila Baibolo pa mavuto okwana atatu.
“Baibolo—Ni buku yamene ipulumuka muvinthu vinyinji” (Nsanja ya Olonda N.° 4 2016)
Onani mavuto ŵechikumana nawo ŵanthu kuti amasulile Baibolo.
Baibolo ikopelewa komasoti kumasuliliwa maulwendo anyinji. Kansi mungasimikijile tyani kuti uthenga wake uliyechinje?
“Kansi Baibolo ichinjiwa olo kusokonezewa?” (Nkhani yapa webisaiti)