MUTU 34
Kansi tingawoneshe tyani chikondi chasu kwa Yehova?
Kansi mwewo mulimvwa kuti muli pafupi na Mulungu kufumila pemwiyamba kuphunzila Baibolo? Kansi mungakonde kupitilija kutang’isha ushamwali wanu na yove? Tetyo keno mumukonda ngako Yehova, yove akusamalileni. Koma kansi mwewo mungawoneshe tyani kuti mumukonda Yehova?
1. Kansi tingawoneshe tyani kuti tumukonda Yehova?
Tingawoneshe kuti tukonda Yehova keno tumvwila yove. (Ŵelengani 1 Yohane 5:3.) Yove okakamijalini aliyense kuti amumvwile. Yove epasa aliyense wa sewo udindo wosankha kumumvwila olo kusamumvwila. Ndaŵa yanji? Ndaŵa yakuti Yehova ufuna kuti ŵanthu “akomumvwila kufumila pansi pa ntima.” (Aroma 6:17) Mwanjila iyakine, yove ofuna kuti mwewo mukomumvwila na ntima wonse, osati mokakamijika. Mu mbali 3 na 4 ya buku yamene ino zikuyavyeni kuziŵa mwamungawoneshele chikondi chanu kwa Yehova pochita vinthu vumukondwelesha nopewa visamukondwelesha.
2. Ndaŵa yanji kungankhale kovuta kuwonesha chikondi chasu kwa Yehova?
“Olungama okumana na mavuto anyinji ngako.” (Salimo 34:19) Tonse tulimbana na kusoŵa ungwilo kwasu. Ndipo sewo teŵanthu nthawe ziyakine tukumana na mavuto a zachuma, kusoŵa chilungamo, komasoti mavuto ayakine. Keno tukumana na mavuto, vunkhala vovuta kuti tichite vakufuna Yehova kuli sewo. Ivi vuchitika chifukwa chakuti kuchita chinthu chophoniyeka ni chinthu chosavuta. Koma, keno mwewo mukhulupilila nomvwila Yehova, muwonesha kuti mukonda ngako yove kupambana chinthu chiyakine chilichonse. Ndipo mwewo musimikijile kuti nimwe ofunika ngako. Mwanjila yamene iyi Yehova ankhale wofunika ngako kuli mwewo. Yove akusiyenilini.—Ŵelengani Salimo 4:3.
VATI TIPHUNZILE
Tiphunzile chifukwa chake Yehova otembeja ngako kumvwila kwanu komasoti tiwone chinthu chingakuyavyeni kuti mupitilije kunkhala wokhulupilika kuli yove.
3. Nkhani yamene yukukhuzani mwewo
M’Baibolo, m’buku ya Yobu, Satana elaŵila wenye wokhuza Yobu komasoti ŵanthu onse otumikila Yehova. Ŵelengani Yobu 1:1, 6–2:10, ndipo pavuli pake mukambilane makonsho aŵa:
Kansi Satana, elaŵila kuti Yobu omvwila Mulungu chifukwa cha chinji?—Onani Yobu 1:9-11.
Kansi Satana olaŵila kuti chinji kuli ŵanthu onse kupamikijapo mwewo?—Onani Yobu 2:4.
Ŵelengani Yobu 27:5b, ndipo pavuli pake mukambilane konsho iyi:
Kansi Yobu ewonesha tyani kuti enzekonda Yehova na ntima wake wonse?
Yobu ewonesha kuti enzekonda Yehova mwa kunkhala wokhulupilika mphela kuli yove
Nasesoti tuwonesha kuti tukonda Yehova ponkhala okhulupilika mphela kuli yove
4. Mukokondwelesha ntima wa Yehova
Ŵelengani Miyambo 27:11, ndipo pavuli pake mukambilane makonsho aŵa:
Kansi Yehova akumvwa tyani keno muchita vinthu mwanzelu komasoti mukomumvwila? Ndaŵa yanji mwanena tetyo?
5. Ni vokwanishika kunkhala okhulupilika kwa Yehova
Tuyeja-yeja kuujako ayakine vokhuza Yehova chifukwa chakuti tumukonda. Ndipo tuchita vamene ivi powonesha kuti nise okhulupilika kuli yove olo kuti nthawe ziyakine vingankhale vovuta. Lolelani VIDIYO, ndipo pavuli pake mukambilane makonsho aŵa.
Kansi mwewo vukuvutani kuujako ayakine vokhuza Yehova?
Mokatijana na mwatawonela mu vidiyo iyi, n’chinji chiyavya Grayson kuti asilije wowa?
Keno tukonda vakufuna Yehova nozondana na vasafuna yove, tingavutikelini kunkhala okhulupilika kuli yove. Ŵelengani Salimo 97:10, ndipo pavuli pake mukambilane makonsho aŵa:
Molingana na mwamwaphunzilila, kansi viyakine mwavinthu vakukonda Yehova ni votyani? Kansi ni vinthu votyani vakuzondana navo?
Kansi mungachite tyani kuti muyambe kukonda vinthu viweme nozonda viipa?
6. Vinthu vutiyendela luweme keno tumvwila Yehova
Ŵanthu omvwila Yehova vinthu vuŵayendela luweme nthawe zonse. Ŵelengani Yesaya 48:17, 18, ndipo pavuli pake mukambilane makonsho aŵa:
Mokatijana na lemba iyi, kansi ni vomvwika kukhulupilila kuti nthawe zonse Yehova akotipasa malangizo noziŵa kuti atiyavye? Ndaŵa yanji mwanena tetyo?
Pofwika pano kansi kuphunzila Baibolo komasoti vokhuza Mulungu wachendi, Yehova, kwakuyavyani tyani?
ŴANTHU AYAKINE ONENA KUTI: “Kansi vochita vangu vingakondweleshe Mulungu?”
Kansi mungaŵelenge lemba yotyani yamene ingamuyavye kuziŵa kuti Yehova okondwela olo kukalipa na vatuchita?
MFUNDO ZACHIDULE
Mungawoneshe kuti mukonda Yehova pomumvwila nopitilija kunkhala okhulupilika kuli yove olo kuti mukumana na mavuto.
Makonsho oweleja
Kansi mwaphunzila votyani pa chisanzo cha Yobu?
Kansi mungawoneshe tyani kuti mukonda Yehova?
N’chinji chingakuyavyeni kuti mupitilije kunkhala okhulupilika kwa Yehova?
PHUNZILANI VINYINJI
Onani vingakuyavyeni kunkhala okhulupilika kwa Yehova komasoti mumpingo.
Onani vakunena Satana vokhuza ŵanthu.
Onani mwangawoneshele ŵana kuti okonda Yehova.
Kansi wachilumbwana wamene okakamijiwa na ayake kuchita vinthu viipa angachite tyani kuti ankhale wokhulupilika mphela kwa Mulungu?