“Wewo uzankhale na newo m’Paladaiso”

1. Yesu pechisala patontho kufwa, kansi enena chinji kuli chigaŵenga chamene chenzekhomelelewe pambali pake? (Luka 23:39-43)

YESU na ŵanthu aŵili enzepachikiwe kumbali kwake amene enze vigaŵenga, etamana penzesilijika patontho-patontho. (Lk. 23:32, 33) Ŵanthu aŵili amene aŵa enzelaŵila mawu onyoza Yesu, ndipo ivi viwoneshelatu kuti enzelini ophunzila ŵake. (Mt. 27:44; Mk. 15:32) Koma mmozi mwa ove echinja maganizo ŵake. Yove enena kuti: “Yesu, mukanikumbukile mukayaloŵa mu Ufumu wanu.” Yesu eyankha kuti: “Shuwa nukuuja lelo, wewo uzankhale na newo m’Paladaiso.” (Ŵelengani Luka 23:39-43.) Paliye umboni uwonesha kuti chigaŵenga chamene ichi chenze chivomela uthenga wokhuza “Ufumu wakululu,” wenzelalikila Yesu pa utumiki wake. Ndipo Yesu aliyenene kuti munthu wamene uyo azankhale mu Ufumu wakululu. (Mt. 4:17) Yesu enzenena za Paladaiso akuza kusogolo. Ndaŵa yanji tunena tetyo?

2. Kansi n’chinji chuwonesha kuti chigaŵenga chamene chilapa chenze Myuda?

² Vuwoneka kuti chigaŵenga chamene icho chamene chilapa, chenze Myuda. Chove chiuja muyake kuti: “Kansi wewo uyopalini Mulungu ayi, powona kuti nawe ulondela chilango cholingana na cha munthu wamene uyu?” (Lk. 23:40) Ayuda enzelambila Mulungu mmozi, koma ŵanthu a mitundu iyakine enzekhulupilila milungu inyinji. (Eks. 20:2, 3; 1 Akor. 8:5, 6) Kuti vigaŵenga vamene ivo venzelini Ayuda, sembe chala chigaŵenga chikonsha kuti, “Kansi wewo uyopalini milungu ayi?” Kuyangijila pamene apa, Yesu aliyetumijiwe kuli ŵanthu a mitundu iyakine, koma kuli “mbelele zotaika za ng’anda ya Isiraeli.” (Mt. 15:24) Mulungu enze eulula kuli Aisiraeli kuti azaushe akufwa. Vingachitike kuti chigaŵenga chamene icho chamene chilapa cheziŵa vamene ivi, ndipo monga mwakuwoneshela mawu ŵake chezindikila kuti Yehova azaushe Yesu kuti alamulile mu Ufumu wa Mulungu. Vuwoneka kuti munthu wamene uyo enzeyembekezela kuti Mulungu azamuushe naye.

3. Kansi vuwoneka kuti n’chinji chiwela m’maganizo mwa chigaŵenga, Yesu pechinena za Paladaiso? Fotokozani. (Genesis 2:15)

³ Chifukwa chakuti chigaŵenga chamene chilapa chenze Myuda, vuwoneka kuti chenzeziŵa vokhuza Adamu na Hava na za Paladaiso wechiŵakonzela Yehova. Tetyo, vuwoneka kuti chigaŵenga chamene icho chenzekhulupilila kuti Paladaiso wechinena Yesu ni malo aweme ngako akuti azankhale pano pachalo.—Ŵelengani Genesis 2:15.

4. Kansi mawu a Yesu ŵechiuja mmozi mwa vigaŵenga ofunika kutichitisha kuganizila chinji?

⁴ Mawu ŵechilaŵila Yesu kuuja chigaŵenga, ofunika kutichitisha kuganizila mwati uzankhalile moyo m’Paladaiso. Kulaŵila chendi, tingaphunzilepo kanthu vokhuza Paladaiso kufumila pa ulamulilo wantendele wa Mfumu Solomo. Baibolo yunena kuti Yesu ni nkulu kupambana Solomo. Ndipo tingayembekezele kuti Yesu, azakate ntchito pamozi na olamulila ayake powamya chalo kunkhala Paladaiso muweme ngako. (Mt. 12:42) N’pomvwika kuti a “mbelele ziyakine” ofunika kuchita chidwi na vakufunikila kuchita kuti ayenelele kuzankhala na moyo wosasila m’Paladaiso.—Yoh. 10:16.

KANSI MOYO UZANKHALE TYANI M’PALADAISO?

5. Kansi muganiza kuti moyo uzankhale tyani m’Paladaiso?

⁵ Kansi n’chinji chuwela m’maganizo mwanu mukaganizila mwati uzankhalile moyo m’Paladaiso? Payakine muganizila malo aweme ngako monga mwewenzele munda wa Edeni. (Gen. 2:7-9) Payakine mukumbukila za ulosi wechilemba Mika unena za ŵanthu a Mulungu kuti “aliyense azankhale pansi pa chimuti chake cha mpesa.” (Mik. 4:3, 4) Payakine mukumbukilasoti mavesi ayakine a m’Baibolo amene onena kuti pazankhale vakulya vinyinji. (Sal. 72:16; Yes. 65:21, 22) Tetyo, mungakwanishe kuyelekezela kuti muli pa malo aweme ngako, mulinkhale pa thebo ndipo pali vakulya vinyinji viweme. Mungayelekezele kuti mukumvwa kavumba kaweme ngako ka vomela na maluŵa. Ndipo mosakaikila mungayelekezele kuti muli pamozi na banja yanu—azishamwali ŵanu pamozi na ŵanthu oushiwa—ndipo museka notandala pamozi. Vonse vamene ivi ni malotolini. Mosakaikila, vinthu vamene ivi vizachitike pano pachalo. M’paladaiso tizakatesoti ntchito yokondwelesha.

6. Kansi tizachite chinji m’Paladaiso? (Onani chithunzi.)

⁶ Yehova etilenga kuti tikosangalala na ntchito. (Mlal. 2:24) Tizankhale bize ngako mu Ulamulilo wa Khilisitu wa vyaka 1.000. Ŵanthu akuti azapulumuke pa chisauso chikulu, komasoti mamiliyoni anyinji akuti azaushiwe, azafunikile vovwala, vakulya, komasoti malo onkhala. Kuti tizafwane vinthu vamene ivi tizafunike kukata ntchito ikulu yokondwelesha. Molingana na Adamu na Hava amene eujiwa kuti asamalile chalo, tizankhale na ntchito yokondwelesha yokonza chalo kunkhala Paladaiso. Ganizilanisoti mwati tizasangalalile kuphunzisa ŵanthu mamiliyoni anyinji akuti azaushiwe amene oziŵalini vinyinji vokhuza Yehova na cholinga chake, komasoti kuyavya ŵanthu anyinji okhulupilika amene enkhalako Yesu akaliyewela, kuphunzila vinthu vinyinji vichitika kufumila pechimwalila.

7. Kansi tingankhale osimikijila za chinji, ndipo ndaŵa yanji?

⁷ Tingankhale osimikijila kuti m’Paladaiso tizankhale mwantendele, tizankhale na chilichonse chatufunikila, komasoti mwadongosolo. Ndaŵa yanji? Ndaŵa yakuti Yehova watiziŵisha kale mwati uzankhalile moyo mu ulamulilo wa Mwana wake. Chisanzo pa nkhani yamene iyi ni ulamulilo wa Mfumu Solomo.

ULAMULILO WA MFUMU SOLOMO UTIYAVYA KUZIŴA MWATI UZANKHALILE MOYO M’PALADAISO

8. Kansi mawu opezeka pa Salimo 37:10, 11, 29 ŵechilemba Mfumu Davide ekwanilishiwa tyani? (Onani “Makonsho ofumila kuli oŵelenga” m’magazini ino.)

⁸ Mfumu Davide iujiliwa kulemba mwati uzankhalile moyo mfumu yanzelu ikazayamba kulamulila. (Ŵelengani Salimo 37:10, 11, 29.) Kanyinji-kanyinji tuŵelenga Salimo 37:11 pokambilana na ŵanthu za Paladaiso akuza kusogolo. Vamene ivi n’vomvwika chifukwa Yesu ekata mawu apa lemba yamene iyi pa Ulaliki wake wapa Lupili, powonesha kuti azakwanilishiwe kusogolo. (Mt. 5:5) Koma mawu a Davide ewoneshasoti mwati uzankhalile moyo m’masiku a Mfumu Solomo. Solomo penzelamulila Isiraeli, ŵanthu a Mulungu enze na ntendele wapadela komasoti vinthu venzeŵayendela bwino m’chalo “chuyenda nkaka na uchi.” Mulungu enze enena kuti: “Mukapitilija kukonkheja malangizo ŵangu nosunga malamulo ŵangu . . . , nizakupaseni ntendele m’chalo chamene icho, mwakuti muzayone pansi paliye okuyofyani.” (Lev. 20:24; 26:3, 6) Malonjezo amene aŵa ekwanilishiwa Solomo pechinkhala mfumu ya Isiraeli. (1 Mbiri 22:9; 29:26-28) Ndipo Yehova elonjeza kuti ŵanthu aipa amene olambila milungu iyakine “azankhalepolinisoti.” (Sal. 37:10) Mawu opezeka pa Salimo 37:10, 11, 29 ekwanilishiwa kale kuvuli ndipo azakwanilishiwesoti kusogolo.

9. Kansi mfumukazi yaku Sheba inena chinji vokhuza ulamulilo wa Mfumu Solomo?

⁹ Mfumukazi yaku Sheba, ichimvwa za ntendele unyinji na vokhuza chuma chaku Isiraeli Solomo penzelamulila monga mfumu. Mfumukazi yamene iyi ichokela m’chalo chakutali noluta ku Yerusalemu kuti ikawone yeka mwevenzele vinthu. (1 Maf. 10:1) Peiwona ufumu wa Solomo, yove inena kuti: “Nechingoujiwako tyala vitontho. . . . Osangalala ni ŵanthu ŵanu, osangalala ni atumiki ŵanu amene aŵa amene otumikila pamenso panu nthawe zonse, na kumvwa nzelu zanu!” (1 Maf. 10:6-8) Koma mwevenzele vinthu mu ulamulilo wa Solomo, wenze tyala umboni uwonesha vati azachitile ŵanthu Yehova mu ulamulilo wa Mwana wake, Yesu.

10. Kansi Yesu opambana Solomo mu njila zotyani?

¹⁰ Yesu opambana Solomo pa vinthu vonse. Solomo enze munthu aliye ungwilo wamene echita machimo akulu-akulu amene eleta mavuto kuli ŵanthu a Mulungu. Koma Yesu ni Wolamulila wangwilo wamene ophoniyeshalini chilichonse. (Lk. 1:32; Ahe. 4:14, 15) Yesu enkhala mphela wokhulupilika kwa Mulungu olo kuti Satana enzemuyesa ngako. Khilisitu ewonesha kuti yove azachimwelini olo kuchita chinthu chamene chingawononge ŵanthu okhulupilika. Kulaŵila chendi, ni mwayi ukulu ngako kunkhala na Mfumu monga ni yamene iyi.

11. Kansi Yesu azayavyiwe na ŵani kulamulila?

¹¹ Yesu azankhale na olamulila ayake okwana 144.000 kuti akosamalila ŵanthu komasoti kuti akwanilishe cholinga cha Yehova chokhuza chalo. (Chiv. 14:1-3) Ove epilila mayeselo na mavuto anyinji penze pano pachalo, tetyo akomvwisha vati akokumana navo ŵanthu onkhala pano pachalo. Kansi olamulila ayake amene aŵa akochita chinji?

KANSI OZOZEWA AKOKATA NTCHITO YANJI?

12. Kansi Yehova azapeleke ntchito yotyani kuli a 144.000?

¹² Ntchito yechipasiwa Yesu pamozi na olamulila ayake ni ikulu ngako kupambana yechipasiwa Solomo. Mfumu Solomo enzefunika kusamalila ŵanthu mamiliyoni anyinji m’chalo chimozi tyala. Koma amene akuti azalamulile mu Ufumu wa Mulungu, akosamalila ŵanthu mabiliyoni anyinji pachalo chonse. Kulaŵila chendi, Yehova wapeleka mwayi ukulu ngako kuli a 144.000!

13. Kansi ni udindo uyakine wotyani wapadela wali nawo olamulila ayake a Yesu?

¹³ Molingana na Yesu, a 144.000 azatumikile monga mafumu komasoti ansembe. (Chiv. 5:10) Pokonkheja Chilamulo cha Mose, ansembe enzeyavya ŵanthu kuti apitilije kunkhala na thanzi iweme komasoti kuti ankhale pa ushamwali wotang’a na Yehova. Chilamulo chenze tyala “chithunzi-thunzi cha vinthu viweme vamene vikuza,” tetyo n’pomvwika kunena kuti olamulila ayake a Yesu azayavye ŵanthu a Mulungu kunkhala na thanzi iweme, noŵayavya kupitilija kunkhala pa ushamwali wotang’a na Yehova. (Ahe. 10:1) Palipano tuziŵalini mwamene mafumu na ansembe amene aŵa mwati akochitila kuti akolaŵijana na nzika za Ufumu wa Mulungu pano pachalo. Keno Yehova wakonza votyani, tukaikilalini kuti m’Paladaiso akuza, ŵanthu akuti azankhale pano pachalo akolondela malangizo ŵakufunikila.—Chiv. 21:3, 4.

KANSI A “MBELELE ZIYAKINE” OFUNIKA KUCHITA CHINJI KUTI AYENELELE KUZANKHALA M’PALADAISO?

14. Kansi pali kukatijana kotyani pakati pa a “mbelele ziyakine” na akwake a Khilisitu?

¹⁴ Yesu etomola ŵala akuti azalamulile naye pamozi kuti “kagulu ka mbelele.” (Lk. 12:32) Yove enenasoti za gulu yachiŵili yamene eitomola kuti a “mbelele ziyakine.” Magulu aŵili amene aŵa opanga gulu imozi yokatijana. (Yoh. 10:16) Onse amene ali m’magulu amene aŵa okatila ntchito pamozi masiku ŵano. Ndipo apitilije kukatila ntchito pamozi mpaka chalo chizankhale Paladaiso. N’chendi kuti pa nthawe yamene iyo a “kagulu ka mbelele” azankhale kuti ali kululu, ndipo a “mbelele ziyakine” azankhale na chiyembekezo cha kuzankhala na moyo wosasila pano pachalo. Koma pali vinthu vakufunikila kuchita a “mbelele ziyakine” palipano kuti ayenelele kuzankhala m’Paladaiso.

15. (a) Kansi a “mbelele ziyakine” okata tyani ntchito pamozi na akwake a Khilisitu? (b) Kansi mungakonkheje tyani chisanzo cha m’bale wamene ali mu sitolo? (Onani chithunzi.)

¹⁵ Mmozi mwa vigaŵenga wamene elapa, echifwa akaliyewonesha kutembeja kwake pa vechimuchitila Khilisitu. Mosiyana na chigaŵenga chamene ichi, sewo a “mbelele ziyakine” tili na njila zinyinji zowoneshela kutembeja pa vechitichitila Yesu. Mwachisanzo, tuwonesha kuti tumukonda pa mwatuchitila vinthu na abale ŵake ozozewa na mzimu. Yesu enena kuti azaweluze a mbelele ziyakine mokatijana na mwakuchitila vinthu na abale ŵake. (Mt. 25:31-40) Tingayavye abale a Khilisitu mwa kukata nawo mwakhama ntchito yolalikila nopanga ophunzila. (Mt. 28:18-20) Kuti tichite vamene ivi, tufunika kukatishila ntchito luweme mabuku ophunzilila Baibolo ŵakutipasa monga yakuti, Sangalalani na moyo kosasila! Keno mukaliyeyamba kuphunzila Baibolo na munthu, tyani kunkhalako na cholinga chakuti mukophunzila Baibolo na ŵanthu anyinji mulimonse mwamungakwanishile?

16. Kansi tingachite chinji palipano pokonzekela kuzankhala nzika za Ufumu wa Mulungu?

¹⁶ Tufunikalini kuchitayembekezela kuti tizankhale m’Paladaiso kuti tinkhale ntundu wa munthu wakufuna Yehova. Palipano tingoyeja-yeja kunkhala ŵanthu a chilungamo m’volaŵila vasu, m’vochita vasu komasoti m’minkhalidwe yasu. Ndipo tingankhalesoti okhulupilika kwa Yehova, kuli muyasu wamu ukwati, komasoti kuli Akhilisitu ayasu. Keno tumvwila Yehova palipano muli chino chalo chiipa, vizankhalesoti vosavuta kuli sewo kumumvwila m’Paladaiso. Tingakulishesoti maluso ŵasu na minkhalidwe iweme kuti tiwoneshe kuti tukonzekela kuzankhala na moyo nthawe yamene iyo. Onani nkhani yakuti, “Kansi nimwe okonzeka ‘kuzalondela chalo chanyowani’?” yupezeka m’magazini ino.

17. Kansi tufunika kuliimba mulandu chifukwa cha machimo ŵetichita kuvuli? Fotokozani.

¹⁷ Tufunika kuyeja-yejasoti kuleka kuliimba mulandu chifukwa cha machimo akulu ŵetichita kuvuli. N’chendi kuti tuwonalini nsembe ya dipo kunkhala chifukwa ‘chochitila machimo mwalona.’ (Ahe. 10:26-31) Koma tingankhale osimikijila kuti keno tilapa chendi pavuli pochita machimo akulu, nosenga Yehova komasoti akulu kuti atiyavye, nochinja nkhalidwe yasu, yove etikhululukila na ntima wonse. (Yes. 55:7; Mac. 3:19) Kumbukilani mawu a Yesu ŵechiuja Afarisi akuti: “Newo niliyewele kuzaita ŵanthu olungama, koma ochimwa.” (Mt. 9:13) Nsembe ya dipo ili na mphamvu yoziŵilija machimo ŵasu onse.

MUNGANKHALE NA MOYO WOSASILA M’PALADAISO

18. Kansi mungakonde kuzakambilana chinji na chigaŵenga chamene chikhomelelewa pambali pa Yesu?

¹⁸ Yelekezelani kuti muli m’Paladaiso ndipo mutandala na chigaŵenga chilaŵila na Yesu. Mosakaikila, monse mwaŵili mungawoneshe kutembeja kwanu nsembe ya Yesu. Payakine mungamusenge kuti akufotokozeleni vinthu vichitika pa ma awazi osilijila a moyo wa Yesu pano pachalo komasoti mwechimvwila, Yesu pechiyankha pempho yake. Ndipo payakine yove angakukonsheni mwewenzele moyo m’masiku osilijila a chalo chiipa cha Satana. Tizankhale na mwayi ukulu wophunzila Mawu a Mulungu na ŵanthu monga ni chigaŵenga chamene ichi!—Aef. 4:22-24.

19. Ndaŵa yanji moyo m’Paladaiso uzankhale wokondwelesha? (Onani chithunzi chapachikuto.)

¹⁹ Moyo m’Paladaiso uzankhale wokondwelesha. Nthawe zonse tikonkhala na ŵanthu aweme komasoti ntchito iweme yati tikokata. Chinthu chiweme kupambana vonse, n’chakuti nsiku iliyonse tikoŵaziŵa luweme Atata ŵasu ŵakululu nosangalala na vinthu vatipasa. Nthawe zonse pakonkhala vinthu vinyinji vatingaphunzile vokhuza yove, ndipo pazankhalesoti vinyinji vatingaphunzile vokhuza chilengedwe chake. Chifukwa chakuti tizankhale na moyo utali, chikondi chasu pa Yehova chizakulesoti. Tumutembeja ngako Yehova na Yesu potilonjeza kuti tizankhale na moyo wosasila m’Paladaiso!