Kansi mwewo muziŵa?

Ndaŵa yanji tinganene kuti nyimbo zenze zofunika ngako kuli Aisiraeli?

M’CHINKHALIDWE cha Aisiraeli kuimba nyimbo chenze chinthu chofunika ngako. Nthawe zinyinji, Baibolo yutomola ŵanthu amene enzekatishila ntchito vipangizo voimbila komasoti amene enzeimba nyimbo. Ndipo pafupi-fupi gawo imozi mwa magawo 10 a Malemba, niyopangiwa na nyimbo, ndipo chisanzo chiweme pankhani yamene iyi, ni buku ya Masalimo, Nyimbo ya Solomo, komasoti Malilo. Buku iyakine yunena za moyo wa ŵanthu am’Baibolo yunena kuti “Baibolo yuwonesha luweme kuti Aisiraeli enzekatishila ntchito nyimbo muvochitika vinyinji pa moyo wawo.”

Nyimbo za moyo wa nsiku na nsiku. Aisiraeli enzeimba nyimbo pofuna kuwonesha mwakumvwila muntima mwawo. (Yes. 30:29) Anakazi enzeimba pokatishila ntchito vipangizo voimbila monga maseche, kuimba nyimbo mosangalala, komasoti kuvina pavikondwelelo vosiyana-siyana vamene venzechitika akafuna kuzoza mfumu ya nyowani, masodja akapambana kunkhondo, komasoti pavikondwelelo vokhuza kulambila. (Ower. 11:34; 1 Sam. 18:6, 7; 1 Maf. 1:39, 40) Aisiraeli enzeimbasoti nyimbo pofuna kuwonesha kuti ali na chisoni munthu muyakine akamwalila. (2 Mbiri 35:25) N’vowonekelatu kuti Aisiraeli enzekonda ngako kuimba nyimbo.

Mafumu ŵa Aisiraeli enzekonda nyimbo. Mfumu Sauli eita Davide kuti akankhale kung’anda yake ya chifumu kuti akomuimbila nyimbo. (1 Sam. 16:18, 23) Pechinkhala mfumu, Davide epanga vipangizo voimbila, epeka nyimbo ziweme, komasoti elinganija kuti pankhale gulu ya oimba kuti akoimba nyimbo pakachisi wa Yehova. (2 Mbiri 7:6; Amo. 6:5) Mfumu Solomo enze na oimba analume komasoti anakazi m’bwalo yake yachifumu.—Mlal. 2:8.

Aisiraeli enzeimba nyimbo polambila Yehova. Chinthu chofunika ngako n’chakuti Aisiraeli enzeimba nyimbo polambila Yehova. Analume okwanila 4.000 enzeimba nyimbo pokatishila ntchito vipangizo voimbila pakachisi waku Yerusalemu. (1 Mbiri 23:5) Ove enzeimba pokatishila ntchito vinganga, myando, azeze komasoti malipenga vamene venze vipangizo voimbila nyimbo. (2 Mbiri 5:12) Koma analume aluso poimba nyimbo amene aŵa ni ovelini ŵeka enzeimba nyimbo polambila Yehova. Aisiraeli anyinji enzeimba nyimbo poluta ku Yerusalemu kuyachita vikondwelelo. Nyimbo zamene izi, zenzeitiwa kuti nyimbo zokwelela kutauni. (Sal. 120-134). Kuyangijila pamene apo, mabuku ŵa Ayuda onena kuti Aisiraeli enzeimba masalimo ayakine pakulya chakulya cha Pasika.a

Masiku ŵano, nyimbo nizofunikasoti ngako kuli atumiki a Yehova. (Yako. 5:13) Kuimba nyimbo nimbali yakulambila kwasu. (Aife. 5:19) Nyimbo zutiyavya kunkhala okatijana na Akhilisitu ayasu. (Akol. 3:16) Komasoti nyimbo zutitang’isha tikakumana na mavuto. (Mach. 16:25) Kuimba nyimbo ninjila imozi yowoneshela kuti tumukhulupilila Yehova komasoti tumukonda.