Malifalensi a Kabuku ka Misonkhano ya Umoyo na Utumiki
NOVEMBER 4-10
CUMA CUPEZEKA M’MAU A MULUNGU | 1 YOHANE 1-5
“Musakonde Calo Kapena Vinthu va m’Calo”
w05-CN 1/1 peji 10 ndime 13
Tolelani Cisanzo Cecitipasa Yesu
13 Ayakine angaganize kuti ni vinthu lini vonse va m’calo cino vamene ni viipa. Olo n’tetyo, vinthu va m’calo cino vingatitangwanishe kuti tisatumikile bwino Yehova. Ndipo vinthu va m’calo cino vingatilimbikishe lini kunkhala pa ushamwali na Mulungu. Tetyo, tikayamba kukonda vinthu va m’calo cino, olo vinthu vamene vuoneka kuti ni vabwino, niye kuti tili pangozi. (1 Timoteyo 6:9, 10) Kuyangizhyila apo, vinthu vinyinji va m’calo cino ni viipa cendi ndipo vingawononge maganizo ŵasu. Ngati tuonelela mafilimu olo mapulogilamu a pa TV amene oonesha zaciwawa, kukonda cuma kapena ciwelewele, tingayambe kuona kuti vinthu ivi ni vabwino noyamba kukopeka navo. Ngati tutandala na ŵanthu amene colinga cao cikulu pa umoyo ni kunkhala opeza bwino, kapena kunkhala na mwayi wa mabizinesi aweme, nase tingayambe kuona kuti zinthu izi niye zofunika ngako pa umoyo wasu.—Mateyu 6:24; 1 Akorinto 15:33.
w13-CN 8/15 peji 27 ndime 18
Ganizilani Mtundu wa Munthu Wamufunika Kunkhala
18 Cinthu ciyakine camene cingatiyavye kupewa “vinthu va m’calo” ni kukumbukila mau ouzhyiliwa a Yohane akuti: “Calo cikuya pamozi na cilakolako cake, koma wocita cifunilo ca Mulungu ankhalepo mpaka kale-kale.” (1 Yohane 2:17) Calo ca Satana cuoneka monga kuti cilipo mpaka kale-kale. Koma siku iyakine, cikawonongewe. Paliye ciliconse m’calo ca Satana camene cinkhalepo mpaka kale-kale. Kukumbukila mfundo izi kungatiyavye kuti tisapusishiwe na macenjela a Satana Maleŵaniya.
Kufufuza Cuma Cauzimu
w13-CN 9/15 peji 10 ndime 14
Zikumbuso za Yehova ni Zodalilika
14 Malemba Acigiriki otikumbusha mowelezhya-welezhya kuti tufunika kukondana. Yesu ekamba kuti lamulo yaciŵili pa malamulo akulu-akulu ni yakuti: “Ukokonda muyako monga ni mwauzikondela weka.” (Mat 22:39) Naye Yakobo, wamene enze mkwake wa Yesu, enena kuti iyi ni “lamulo yacifumu.” (Yak 2:8) Mtumwi Yohane elemba kuti: “Okondeka, nukulembelani lini lamulo yalomba, koma lamulo yakale yamene mwankhala nayo kucokela pa ciyambi.” (1Yo 2:7, 8) Kansi ni lamulo yotyani yamene Yohane enena kuti ni “yakale?” Apa Yohane enzolaŵila za lamulo yakuti tikokondana. Lamulo iyi yenze “yakale” cifukwa cakuti penze pepita vyaka vinyinji kucokela peciipeleka Yesu, kapena kuti “pa ciyambi.” Koma yenze soti “yalomba” cifukwa cakuti ophunzila enzofunika kuoneshana cikondi cololela kuvutikila ayakine. Ophunzila enzofunika kuoneshana cikondi coteti makamaka cifukwa ca mavuto amene enzoyembekezeleka kukumana nao. Masiku ŵano, ŵanthu anyinji m’calo cino ali na mtima wozikonda, ndipo okonda lini ŵanthu ayao. Koma seo tuyamikila kuti tupasiwa malangizo oticenjeza kuti tufunika lini kutolela mzimu wamene uyu.
it-1-E peji 862 ndime 5
Cikhululukilo
N’cinthu lini colakwika kupemphela kwa Yehova kuti akhululukile ŵanthu ayakine. Nthawi ziyakine, tingapemphelele mpingo wonse. Izi niye zecicita Mose ku mtundu wa Aisiraeli. Mose evomelezhya macimo ya mtundu wonse wa Aisiraeli, ndipo esenga cikhululukilo. Yehova ecimvwa pemphelo ya Mose. (Num 14:19, 20) Naye Solomo, pa mwambo wopatulila kacisi, esenga Yehova kuti akokhululukila ŵanthu ŵake ngati alapa pavuli pocimwa. (1 Maf 8:30, 33-40, 46-52) Ezara evomelezhya pagulu macimo ya Ayuda amene ecoka ku ukapolo. Pemphelo yake yocokela pansi pamtima yecitisha kuti ŵanthu acite vinthu vamene vecitisha kuti Yehova aŵakhululukile. (Eza 9:13–10:4, 10-19, 44) Yakobo elemba kuti ngati munthu walwala mwauzimu, ofunika kuluta kuli akulu a mumpingo kuti amupemphelele, ndipo “ngati ecita macimo, akhululukiwe.” (Yak 5:14-16) Koma, pali “cimo yamene yuleta imfwa.” Ngati munthu opitilizhya kucita macimo mwadala koma soti mosalapa, niye kuti ocimwila mzimu ndipo angakhululukiwe lini. Mkhristu ofunika lini kupemphelela ŵanthu oteti.—1Yo 5:16; Mat 12:31; Aheb 10:26, 27; onani mutu wakuti SIN, I (UCIMO, I); SPIRIT (MZIMU).
NOVEMBER 11-17
CUMA CUPEZEKA M’MAU A MULUNGU | 2 YOHANE 1–YUDA
“Tufunika Kucita Khama Kuti Tipitilizhye Kunkhala m’Cendi”
w04-CN 9/15 mapeji 11-12 ndime 8-9
“Pitilizhyani Kupeza Mphamvu Kucokela kwa Asikulu”
8 Malemba otiuzhya njila zakuseŵenzesha Satana. Tetyo, tuziŵa bwino misampha yake. (2 Akorinto 2:11) Satana Maleŵaniya eseŵenzesha njila zosiyanasiyana polimbana na munthu wolungama Yobu. Eseŵenzesha mavuto akulu a zacuma, imfwa za okondeka ŵake, kusushiwa na a m’banja mwake, matenda, na kuzuzuliwa paliye cifukwa na ŵanthu amene enzonena kuti ni ayake. Yobu evutika maganizo ndipo eyamba kuganiza kuti Mulungu emutaya. (Yobu 10:1, 2) Olo kuti Satana angacitishe lini mavuto aŵa mwacindunji masiku ŵano, Akhristu anyinji okhuziwa na mavuto aŵa. Ndipo Maleŵaniya angapezelepo mpata pamene apo.
9 M’masiku ŵano osilizhya, pali vinthu vinyinji vamene vingatisokoneze mwauzimu. Tunkhala m’calo mwamene ŵanthu anyinji oona kuti cuma niye cofunika ngako kupambana kunkhala na zolinga zauzimu. Nthawi zinyinji, zinthu monga mawailesi, mapulogilamu a pa TV, na manyuzipepela zuonesha kuti kucita ciwelewele kuleta cimwemwe osati mavuto. Ndipo ŵanthu anyinji ‘okonda zosangulusha m’malo mokonda Mulungu.’ (2 Timoteyo 3:1-5) Ngati ‘tuchaya lini nkhondo yotang’a yacikhulupililo,’ maganizo amene aŵa angatifookeshe mwauzimu.—Yuda 3.
Kufufuza Cuma Cauzimu
it-2-E peji 279
Vikondwelelo Vooneshana Cikondi
Baibolo yufotokoza lini kuti vikondwelelo vooneshana cikondi venze cinji, kapena kuti venzocitika kanyinji-kanyinji tyani. (Yuda 12) Ni Yesu lini olo atumwi amene elamula kuti akocita vikondwelelo ivi. Paliye enzofunika kukakamizhyiwa kucita vikondwelelo ivi. Ayakine okamba kuti iyi yenze nthawi pamene Akhristu olemela enzocita maphwando ndipo enzoita Akhristu osauka kuti ankhale nao pa vikondwelelo ivi. Ŵana amasiye, anakazi amasiye, olemela na osauka enzolyela pamozi cakulya mwacikondi.
it-2-E peji 816
Mwala
Cuoneka kuti mau ayakine a Cigiriki akuti spi·lasʹ, onena za mwala wamene uli m’manzi. Yuda eseŵenzesha mau aŵa ponena za ŵanthu amene eloŵa mumpingo wacikhristu mozhyeŵa na zolinga ziipa. Masitima a pamanzi onkhala pangozi cifukwa ca miyala ya m’manzi. N’cimozimozi na ŵanthu amene eloŵa mumpingo wacikhristu mozhyeŵa. Eika pangozi umoyo wauzimu wa Akhristu mumpingo. Ponena za aŵa ŵanthu, Yuda ekamba kuti: “Aŵa ŵanthu ali monga ni miyala ikulu-ikulu yofisika m’manzi, pamene akulya namwe pamozi pa maphwando ŵanu ŵamucita kuti muoneshane cikondi.”—Yuda 12.
wp17.1-CIN peji 12 ndime 1
“Mulungu Ekondwela Naye”
Kansi ulosi wa Inoki wenze wakuti tyani? Wenze wakuti: “Onani! Yehova ewela na magulu ŵake atuŵa, kuzopeleka ciweluzo kwa onse nogamula kuti ŵanthu onse osayopa Mulungu apezeka na mlandu cifukwa ca nchito zao zonyoza Mulungu zecicita mosayopa Mulungu, koma soti cifukwa ca vinthu vonse vonyoza Mulungu vecicita ŵanthu ocimwa osayopa Mulungu.” (Yuda 14, 15) Payakine mungadabwe kuti pokamba ulosi uyu, Inoki elaŵila monga kuti Mulungu ecita kale vinthu velaŵiliwa mu ulosi uyu. Umu niye mweyelembewela maulosi anyinji pavuli pake. Inoki elaŵila ulosi uyu monga kuti wecitika kale cifukwa penzeve cikaikilo cakuti zecikamba zikacitike cendi.—Yesaya 46:10.
wp17.1-CIN peji 12 ndime 3
“Mulungu Ekondwela Naye”
Cikhulupililo ca Inoki cufunika kutilimbikisha kuzifufuza kuti tione ngati tuona cino calo monga ni mwakucionela Mulungu. Uthenga waciweluzo wecilengeza Inoki ni cenjezo ku ŵanthu onse masiku ŵano, monga ni mwewenzele m’nthawi ya Inoki. Molingana na cenjezo ya Inoki, Yehova ewononga ŵanthu osayopa Mulungu na cigumula m’nthawi ya Nowa. Ciwonongeko ici ni cisanzo ca ciwonongeko cikulu camene cikuza kusogolo. (Mateyu 24:38, 39; 2 Petulo 2:4-6) Masiku ŵano, molingana na masiku akale, Mulungu pamozi na angelo ŵake atuŵa, ni okonzeka kupeleka ciweluzo ku ŵanthu osayopa Mulungu. Aliyense wa seo ofunika kumvwila cenjezo ya Inoki na kucenjezako ayakine. Tikacita izi, abanja ŵasu na ayasu angaleke kukatizhyana nase. Nthawi ziyakine, tingayambe kuona kuti tiliye ayasu. Koma tufunika kukumbukila kuti Yehova aliyomusiye Inoki, ndipo angasiye lini atumiki ŵake okhulupilika!
NOVEMBER 18-24
CUMA CUPEZEKA M’MAU A MULUNGU | CHIVUMBULUTSO 1-3
“Nuziziŵa Nchito Zako”
w12-CN 10/15 peji 14 ndime 8
Kansi Muonesha Mzimu Wotyani?
8 Kuti tipewe mzimu uyu, tufunika kukumbukila kuti Baibolo yuonesha kuti Yesu ali na “nyenyezi 7” kukwanja yake yamalendi. “Nyenyezi” izi zupanamila oyanganila ozozewa, koma soti akulu onse m’mipingo. Yesu angasogolele “nyenyezi” zamene zili m’manja mwake m’njila iliyonse yakufunilamo. (Chiv 1:16, 20) Tetyo, monga Mutu wa mpingo wacikhristu, Yesu oziŵa ciliconse cokhuza akulu mumpingo. Ngati pali mkulu muyakine wamene ofunika kuzuzuliwa, Yesu, wamene ali na menso monga ni “mulilo woyaka,” aonesheshe kuti izi zacitika m’nthawi na m’njila yoyenelela. (Chiv 1:14) Koma patuyembekeza kuti Yesu acitepo kanthu, tufunika kulemekeza ŵanthu amene aikiwa na mzimu utuŵa. Paulo elemba kuti: “Mukomvwila amene osogolela pakati panu ndipo mukoŵagonjela. Ove oyanganila miyoyo yanu monga ŵanthu amene akayankhe mlandu. Mukoŵamvwila noŵagonjela kuti acite nchito yao mwacimwemwe, osati modandaula, cifukwa akacita tetyo zingankhale zokuwonongani.”—Aheb 13:17.
w12-CN 4/15 peji 29 ndime 11
Yehova Otiteteza Kuti Tikapulumuke
11 Mensomphenya amene ali m’buku ya Chivumbulutso capitala 2 na 3, oonesha kuti Yesu Khristu monga Mfumu oyendela mipingo 7 ya ku Asia Minor. Mensomphenya aŵa oonesha kuti Khristu oona vinthu venevene vamene vucitika m’mipingo iyi. Nthawi ziyakine, enzotomola mazina ya ŵanthu ayakine. Mpingo uliwonse enzouyamikila pa vinthu vewenzocita luweme, olo kuupasa malangizo oyenelela. Kansi izi zutanthauzanji? Pa kukwanilishiwa kwa ulosi uyu, mipingo 7 yupanamilako Akhristu ozozewa kuyambila mu 1914. Koma malangizo amene epelekewa ku mipingo iyi oseŵenza soti ku mipingo yonse ya ŵanthu a Mulungu masiku ŵano. Tetyo, tinganene kuti Yehova osogolela ŵanthu ŵake poseŵenzesha Mwana wake. Kansi tingalole tyani Yehova kutisogolela?
w01-CN 1/15 mapeji 20-21 ndime 20
Mukoyendela Pamozi na Gulu ya Yehova
20 Kuti tiyendele pamozi na gulu ya Yehova yamene yupita pasogolo, tufunika kuzindikila kuti Mulungu wapasa Yesu udindo wonkhala “mutu wa mpingo.” (Aefeso 5:22, 23) Mfundo iyakine yofunika ili pa Yesaya 55:4. Pa lemba iyi, tuŵelenga kuti: “Onani! Neo [Yehova] namupeleka monga mboni ku mitundu ya ŵanthu, koma soti monga msogoleli na wolamulila mitundu ya ŵanthu.” Yesu oziŵa bwino nchito yosogolela. Oziŵa soti mbelele zake na zocita zao. Ndipo peciyendela mipingo 7 ya ku Asia Minor, nthawi zokwanila 5 enena kuti: “Nuziziŵa nchito zako.” (Chivumbulutso 2:2, 19; 3:1, 8, 15) Yesu oziŵa soti zosoŵa zasu, molingana na mwakuziŵila Awisi, Yehova. Yesu akaliyopeleka Pemphelo Yacisanzo, elaŵila kuti: “Ausuwanu oziŵa zamufunikila olo mukaliyosenga.”—Mateyu 6:8-13.
Kufufuza Cuma Cauzimu
kr-CIN peji 226 ndime 10
Ufumu wa Mulungu Ukawononge Adani Ŵake
10 Kulengeza za Ciweluzo. Adani onse a Mulungu akaone vinthu vamene vikayangizhyile mantha yao. Yesu ekamba kuti: “Akaone Mwana wa munthu akuza m’mikumbi na mphamvu ikulu koma soti ulemelelo.” (Maliko 13:26) Mphamvu izi zodabwisa zikaoneshe kuti Yesu wawela kuzolengeza za ciweluzo. Mu ulosi uyakine wonena za masiku osilizhya, Yesu efotokoza mfundo zoyangizhyilika ponena za ciweluzo cati cikalengezewe pa nthawi iyo. Tupeza mfundo izi mu fanizo ya mbelele na mbuzi. (Ŵelengani Mateyu 25:31-33, 46.) Ŵanthu onse amene ocilikiza Ufumu wa Mulungu akaweluziwe monga “mbelele” ndipo ‘akanyamule mitu yao’ poziŵa kuti “cipulumuso cao cafwika.” (Luka 21:28) Koma adani a Mulungu akaweluziwe kuti ni “mbuzi” ndipo “akazigugude pacifuŵa cifukwa ca cisoni” pozindikila kuti asala patontho kuwonongewa.—Mat 24:30; Chiv 1:7.
w09-CN 1/15 peji 31 ndime 1
Mfundo Zikulu za m’Buku ya Chivumbulutso—I
2:7—Kansi “paladaiso wa Mulungu” n’cinji? Pofwana kuti mau aŵa olaŵiliwa kuli Akhristu ozozewa, paladaiso wotomolewa pa lemba iyi otanthauza moyo uweme kululu. Akhristu ozozewa okhulupilika akapasiwe mwayi wa “kulya va m’cimuti ca moyo.” Akapasiwe moyo wosafwa.—1Akor 15:53.
NOVEMBER 25–DECEMBER 1
CUMA CUPEZEKA M’MAU A MULUNGU | CHIVUMBULUTSO 4-6
“Okwela pa Mahosi Okwanila 4”
wp17.3-CIN peji 4 ndime 3
Kansi Ŵanthu 4 Okwela pa Mahosi Opanamila Ŵani?
Kansi wokwela pa hosi ituŵa ni ŵani? Yankho yupezeka m’buku imozimozi ya Chivumbulutso. M’capitala ciyakine m’buku iyi, oitiwa kuti “Mau a Mulungu.” (Chivumbulutso 19:11-13) Yesu Khristu niye oitiwa kuti Mau, cifukwa ni wolaŵililako Mulungu. (Yohane 1:1, 14) Oitiwa soti kuti “Mfumu ya mafumu na Asikulu wa asikulu onse,” koma soti “Wokhulupilika na Wacendi.” (Chivumbulutso 19:16) N’zoonekelatu kuti monga mfumu yankhondo, Yesu ali na mphamvu zinyinji. Koma mphamvu zake oziseŵenzesha lini molakwika. Koma powela soti makonsho ayakine.
wp17.3-CIN peji 4 ndime 5
Kansi Ŵanthu 4 Okwela pa Mahosi Opanamila Ŵani?
Ni lini analume aŵa pecikwela pa mahosi noyamba kuutuka? Onani kuti wokwela pa hosi yoyamba, Yesu, eyamba ulwendo wake pecipasiwa cisote cacifumu. (Chivumbulutso 6:2) Kansi ni lini Yesu peciikiwa kunkhala Mfumu kululu? Yesu aliyoikiwe pampando wacifumu pavuli pakuti wangowelela kululu. Baibolo yuonesha kuti enzofunika kuyembekezela. (Aheberi 10:12, 13) Yesu efotokozela ophunzila ŵake mwati akaziŵile kuti nthawi yoyembekezela yasila, na kuti wayamba kulamulila kululu. Efotokoza kuti kuciyambi kwa ulamulilo wake, vinthu pacalo vikaipe ngako. Penze kuzonkhala nkhondo, njala, na milili. (Mateyu 24:3, 7; Luka 21:10, 11) Nkhondo yoyamba ya pacalo conse peyeyamba mu 1914, umboni weonekelatu wakuti mtundu wa ŵanthu waloŵa m’nthawi yovuta yamene Baibolo yukamba kuti “masiku osilizhya.”—2 Timoteyo 3:1-5.
wp17.3-CIN peji 5 ndime 2
Kansi Ŵanthu 4 Okwela pa Mahosi Opanamila Ŵani?
Wokwela pa hosi iyi opanamila nkhondo. Onani kuti ocosa mtendele pacalo conse, osati tyala m’vyalo vitontho. Mu 1914, kwa nthawi yoyamba, pacalo peuka nkhondo yamene yekhuza vyalo vonse. Pavuli pake, peuka soti nkhondo yaciŵili ya pacalo conse. Nkhondo yaciŵili yewonongesha vinthu vinyinji kupambana nkhondo yoyamba. Malipoti oonesha kuti ŵanthu opitilila 100 miliyoni afwa pankhondo kucokela mu 1914! Kuyangizhyila apo, ŵanthu anyinji ecitika vilonda voyofya pa nthawi iyi.
wp17.3-CIN peji 5 ndime 4-5
Kansi Ŵanthu 4 Okwela pa Mahosi Opanamila Ŵani?
“Penelolesha, neona hosi ifipa. Wokwelapo wake enze na sikelo kukwanja yake. Pavuli pake, necimvwa mau amene enzomvwika monga kuti ocokela pa zamoyo 4. Mau aŵa enze akuti: ‘Kilogilamu imozi ya tiligu, mtengo wake unkhale dinari imozi, ndipo makilogilamu atatu a balele, mtengo wake unkhale dinari imozi. Koma musawononge mafuta a maolivi na vinyu.’”—Chivumbulutso 6:5, 6.
Wokwela pa hosi iyi opanamila njala. Lemba iyi yuonesha kucepa kwa vakulya cakuti kilogilamu imozi ya tiligu ingaguliwe na dinari imozi, yamene yenze malipilo a siku yonse m’vyaka 100 voyambilila. (Mateyu 20:2) Ndalama imozimozi ingagule makilogilamu atatu a balele, cakulya camene ŵanthu enzocikonda lini ngako polinganizhya na tiligu. Kansi banja ikulu ingalye masiku angani cakulya ici? Ŵanthu ocenjezewa kuti asawononge cakulya olo ceenzokulya nthawi zonse, monga mafuta a maolivi na vinyu.
wp17.3-CIN peji 5 ndime 8-10
Kansi Ŵanthu 4 Okwela pa Mahosi Opanamila Ŵani?
Wokwela pa hosi ya 4 opanamila imfwa yamene yucitika cifukwa ca milili na vinthu viyakine. Pecepita caka ca 1914, cimfine ca ku Spain cepaya ŵanthu mamiliyoni anyinji. Cuoneka kuti ŵanthu okwanila 500 miliyoni elwalako cimfine ici, pafupifupi munthu m’mozi pa ŵanthu atatu aliwonse pa nthawi iyo!
Koma cimfine ca ku Spain cenze tyala ciyambi. Akaswili ofotokoza kuti ŵanthu ofwika m’mahandiledi miliyoni ecifwa na matenda a nthonyola m’vyaka va m’ma 1900. Mpaka masiku ŵano, ŵanthu anyinji akufwa na matenda monga AIDS, TB, na maleliya, olo kuti acipatala ayesayesa kufufuza mankhwala.
Kulaŵila cendi, ŵanthu anyinji afwa cifukwa ca nkhondo, njala, kapena milili. Manda yopitilizhya kutola ŵanthu, ndipo yopeleka lini ciyembekezo ciliconse.
Kufufuza Cuma Cauzimu
re-CN mapeji 76-77 ndime 8
Ulemelelo wa Mpando Wacifumu wa Yehova
8 Yohane enzoziŵa kuti ansembe niye enzoikiwa kutumikila m’cihema cakale. Tetyo, cuoneka kuti edabwa kuona vinthu vokonkhapo vecifotokoza. Elaŵila kuti: “Kuzungulila mpando wacifumu, penze soti mipando yacifumu yokwanila 24. Pa mipando yacifumu yamene iyo, penze nkhezi akulu okwanila 24. Enzovwale malaya akunja atuŵa, na visote vacifumu vagolide pamitu pao.” (Chivumbulutso 4:4) M’malo mwa ansembe, Yohane eona akulu 24, amene enze nkhezi pa mipando yacifumu ndipo enzovwale visote vacifumu monga ni mafumu. Kansi akulu aŵa opanamila ŵani? Opanamila Akhristu ozozewa a mumpingo wacikhristu, pavuli pakuti aukishiwa nopasiwa udindo weciŵalonjeza Yehova kululu. Ndaŵa yanji tanena tetyo?
re-CN peji 80 ndime 19
Ulemelelo wa Mpando Wacifumu wa Yehova
19 Kansi zamoyo izi zupanamila ŵani? Mensomphenya yeciona mneneli Ezekieli, yotiyavya kupeza yankho. Ezekieli eona Yehova wankhala pa mpando wacifumu wamene wenze pa galeta yakululu. Pafupi na galeta yamene iyo, penze zamoyo zolingana na zeciona Yohane. (Ezekieli 1:5-11, 22-28) Pavuli pake, Ezekieli eona soti galeta imozimozi yonkhala na mpando wacifumu na zamoyo 4. Koma pa nthawi iyi, ekamba kuti zamoyo izi zenze akerubi. (Ezekieli 10:9-15) Tetyo, cuoneka kuti zamoyo 4 zeciona Yohane zupanamila akerubi anyinji a Mulungu. Ndipo akerubi ni zolengewa za udindo ukulu ngako m’gulu ya Mulungu ya zolengewa zauzimu. Cuoneka kuti Yohane aliyodabwe peciona kuti akerubi apanama pafupi ngako na Yehova. Zili tetyo cifukwa pa nthawi yamene Aisiraeli enzolambila Mulungu pa cihema, palulu pa covwinikilila likasa ya pangano penzonkhala akerubi aŵili agolide. Akerubi aŵa enzopanamila mpando wacifumu wa Yehova. Yehova enzopeleka malamulo ku mtundu wa Aisiraeli kucokela pakati pa akerubi aŵili amene aŵa.—Eksodo 25:22; Salimo 80:1.
cf-CN peji 36 ndime 5-6
“Onani! Nkhalamu ya Fuko ya Yuda”
5 Nkhalamu (kapena kuti mphondolo) ni cinyama cotang’a mtima ngako. Kansi mweonanapo kale menso-na-menso na nkhalamu ikulu inalume? Ngati izi zekucitikilamponi, payakine nkhalamu iyo yenze m’malo osungila vinyama vakusanga, ocingilizhyiwa na mpanda. Koma olo kuti nkhalamu ili mumpanda, yucitisha mphela wowa. Ngati muloleshana menso-na-menso na nkhalamu, yamene ni cinyama cikulu koma soti camphamvu, mungaganize lini kuti ingayope ciliconse nothaŵa. Baibolo yufotokoza kuti ‘nkhalamu ni yamphamvu ngako pa vinyama vonse vakusanga ndipo yuyopa lini ciliconse nowelela kuvuli.’ (Miyambo 30:30) Naye Khristu ni wotang’a mtima monga ni nkhalamu.
6 Lomba, tiyeni tikambilane njila zitatu zamene Yesu eoneshela kutang’a mtima monga ni nkhalamu. Tilaŵizhyane mwecioneshela kutang’a mtima poteteza cendi, pokonkha cilungamo na penzosushiwa. Kuyangizhyila apo, tione kuti nase tingakwanishe kutolela kutang’a mtima kwa Yesu, kaya nise acikanga mwacibadwa olo yai.