December

Ayitsano ndhuna yela ya Leitopiya ke mo yi resa gore yi tikemisele go kolobetsiwa? Nagana ka taba yowa ša: Leitopiya lowa “ke mo le tšwa go rapeleng ku Jerusalema.” (Meber. 8:27) Di ka makega gore ne le yamogele sedumedi sa Sejuda. A re kamake gore le yye la tšhuta ka Jehova ga Mangwalo ya go hlawolega ya Seheberu. Le mo go le ka mokgonone, ke mo le kwa le nyaka go tšhuta tsa go tlala. Gabutšibutši, nakwela Filipi a gahlana le ndhuna yone ho pateng, o yi krayye yi bala lengwalo la go phutiwa la gore le ngwadiye ke moporofeta Jesaya. (Meber. 8:28) Ke mo yi nyaka go napa yi ro nyipa tsa go tlala. O yye a tloga Etopiya a ya tempeleng ku Jerusalema gore a thogo rapela Jehova. Leitopiya lowa le tšhutiye nnete ya nyuwane ga Filipi ya gore Jeso ke Mesiya. (Meber. 8:​34, 35) Taba ya gore ne a nyaka Jehova le Morwayi wage ka matla yi yye ya hluhlutela. Di yye dya mo tšhofa gore a segelele sepheto se segolo sa gore a kolobetsiwe ke mokane go be lelata la Jeso Kreste. Phela Filipi o di bonne gabutši gore morenene o tikemisele ke mokane a mo kolobetsa. w23.03 8-9 ¶3-6

Motho wa go kwana le letsaka a ka sa mo jabodisi ga Jehova. (Diy. 6:​16, 17) Batho ba go tlala lekgono ba tseya gore go bolabola matsaka ke mokgwa wa go phela, mara rune re tseya dilo ka mokgo Jehova a di tseyang. (Pis. 15:​1, 2) Matsaka wona re kganela kgole nawo mara fote a re nyake go kraya re wutega taba ke mokane re lahla ba bangwana. Fote di nyaka re lisetsa go seba. (Diy. 25:23; 2 Mathes. 3:11) Mo o bona nkare tso le bolabolang ka tsona di šele di tšhuba hlaga, napa o fo yi phendula gana hone ke mokane le bolabole ka tsa go yagisa. Re phela ga lefase la gore mabolabolelo ya dithila go ro ba motlele, byalo di nyaka re ro karakara ka matla gore tso re di ntshang ka ho ganong di jabodise Jehova. O nyoko re rufa mo re karakara ka matla gore re bolabole tsa go yagisa mo re le tšhomong, mo re le megahlanong le mo re bolabola ka moka matšatši. Mo taba ya go kutšetsela ke lefase lowa la gore a le tšibi Modimo yi segela mafelelong, di nyoko ba lula go thanaka Jehova ka tso re di bolabolang.—Juda 15. w22.04 9 ¶18-20

Mo re ghayela ka taba ya gore Jehova le Jeso ba re šupetsiye gore ba re nyaka ka matla, di re tšhofa gore le rune re ba nyake tsa nkare ke moka. (1 Joh. 4:10) Fote re napa re ba nyakisa tsa mohlolo mo re di bona tsa gore Jeso o kgwele ye mongwana le ye mongwana wa rune. Phela Pawulo wa lepostola ke mo a šihlela yona taba yowa mo a šupetsa gore wa leboga, nakwela a ngwalela Magalata a re: “Morwayi wa Modimo . . . o nnyakiye ka matla fote a neyela ka lephelo lage ka taba laka.” (Magal. 2:20) Ga sehlabelo sa Jeso, Jehova o go gogiye gore o thogo nghanelana naye. (Joh. 6:44) Nje a yi go tikisi mara taba ya gore Jehova go na le sa gabutši so a se bonneng ho gago ke mokane a ntsha patela ya go tura ka matla a makela gore wene o thogo ba monghanage? Ayitsano tsotsone a di make gore ga Jehova le Jeso o nape o ro ba mamarela? Re ko ba re maka gabutši mo ka mokana ga rune re tiputsisa gore, ‘Ka taba la gore Jehova le Jeso ba šupetsiye gore ba nnyaka ka matla, tsotsone di ntšhofa gore ke make ying?’ Mo re nyaka Modimo le Kreste ka matla di nyoko re tšhofa gore re šupetse ba bangwana gore re ba nyaka ka matla.—2 Makor. 5:​14, 15; 6:​1, 2. w23.01 28 ¶6-7

Bhayibele ke thulusi ya go tseyediwa gedimo ka matla ya gore Jehova o berekisa yona go gelepa batho bage gore “ba mmerekele ba le ggoši.” Jehova o makiye gore ditlopo tsa go tlala tsa mangwalo di ngwadiwe ka mokgwa wa gore di nyoko kwisisa ke bo ba gore ba di bala ba tinyanafatsiye. (Luk. 10:21) Batho lefaseng ka mokana ga lona baa yi bala Bhayibele. Mara bo ba gore ba tinyanafatsiye ke bona ba gore ba yi kwisisa gabutši le go berekisa tso yi di hlayang. (2 Makor. 3:​15, 16) Re tšhuta ka taba ya go šupetsa gore Jehova o hlalefiye ka ho Bhayibeleng. Jehova aa fo berekisa Mangwalo go re tšhutisa re le mogoba mara o yetetsa a boya a kgomoletsa ye mongwana le ye mongwana wa rune. Mo re bala Lentsu la Jehova, re thogo di bona gabutši gore wa tihlupa ka ye mongwana le ye mongwana wa rune. (Jes. 30:21) A di fele di go makegela tsa gore mo o bula Mangwalo ke mokane wa fo wela temanyana ya gore o kwa nkare ba yi ngwalele wene? Wa tšiba, Bhayibele ba yi ngwalele gore yi thogo kwisisa ke batho ba dimiliyoni. Mara di kgonega byang gore Bhayibele yi tshware molayetsa wa gore wa bereka le lekgono fote wa gore wo berekela wene mong? Tsowa dya kgonega ka taba la gore ye a Ngwadiyeng Bhayibele o hlalefiye go phala batho ka mokana ga bona mo lefaseng.—2 Thim. 3:​16, 17. w23.02 4-5 ¶8-10

Rune Makreste ya mannete re mo nyaka ka matla ga Jehova. Re nyaka gore tso re mo makelang tsona go be mong tsa kawone ka matla. Gore re thogo makela Jehova so re ka se kgonang, di nyaka re tšiba tso re tikemiseleng go di segelela tsa go tshwana le go ba le mekgwa yo Makreste ma tshwaneleng go ba nayo, go tšhuta mebereko ye mengwana fote re lebelele gore ba bangwana re ka ba gelepa ka mokgo mang. Ke ntaba di nyaka re karakara ka matla gore re thogo yeketsa tso re di makelang Jehova? Se segolo sa gona ke gore re nyaka go jabodisa Papa wa rune wa legedimong wa gore o re nyaka ka matla. Jehova o jabola ka matla mo a bona re berekisa tso re neyiwweng tsona le tso re kgonang go di maka ga mmereko wage. Go tokegela gana hone, re nyaka go yeketsa tso re di makang ga mmereko wa Modimo gore re thogo gelepa magageru. (1 Mathes. 4:​9, 10) Ka mokana ga rune re ka di kgona go yeketsa ga mmereko wo re wo makelang Modimo, a go na taba gore ke botala re le nneteng kela re sa tšwa go kena. w22.04 22 ¶1-2

Tsa dipolotiki tsa lefase lowa go se botala di nyoko jikela Bhabhilona ye Mogolo go leng memmušo ya dikereke tsa matsaka tsa lefase lo. Taba yonone yi nyoko napa yi thomisa motšhatšhamelo wo mogolo. Ayitsano tsotsone di nyoko napa di maka gore moririmane wa batho wo segelele sepheto sa go thomisa go berekela Jehova? Dho. Mara Kutullo tema 6 yi šupetsa gore ka dinako tsone tsa mo go bifiye bo ba gore a ba berekele Jehova ba nyoko tšhabela ga tsa dipolotiki le tsa dibhizinisi tsa lefase lowa tsa gore ba di tshwanisa le dithaba. Ka taba la gore a baa kgeta go yema le Mmušo wa Modimo, Jehova o ba tseya gore baa mo phigisa. (Luk. 11:23; Kut. 6:​15-17) Nnete ke gore, malata ya Jehova ya go tshepega ka nako yonone ya go sasamela ma ko ma segelele sepheto sa go tshwana se le ntoši. Fote go ko ba go le bona mogoba ka wwoši wa batho ho lefaseng wa gore wo sa na wo berekela Jehova Modimo wo boya wo gana go thega “phoolwane ya hlaga.”—Kut. 13:​14-17. w22.05 16-17 ¶8-9

“Ditaba tsa go bafala tsa Mmušo wa Modimo” a yi fo ba wona fela molayetsa wo batho ba Modimo di nyakang ba wo sabalatsa. (Mat. 24:14) Di nyaka ba boya ba thega mmereko wo wo makang ke mangeloyi ya gore Kutullo tema 8 le 10 yi bolabola ka wona. Mangeloyi ma sabalatsa gore bo ba gananang le tsa Mmušo wa Modimo ba ko tikweleng. Nka taba lo Dihlatse Tsa Jehova di sabalatsang molayetsa wa go yahlula wa go tshwana le “sefako le mollo,” wa gore wo wunyulla ka mokgo Modimo a nyoko yahlulang lefase lowa la go sa loka la Sathane. (Kut. 8:​7, 13) Batho di nyaka ba di tšibe tsa gore dinako tsa mafelelo di šele di segele gore ba yakgoswe ba tšhentšha maphelelo ba thogo phona letšatši la Jehova la gore go ko ba go bifiye. (Zef. 2:​2, 3) Mara molayetsa wowa a wo natefele batho ka moka. Di nyaka re ro šišimala gore re thogo sabalatsa molayetsa wowa. Ka dinako tsa motšhatšhamelo wo mogolo, molayetsa wa mafelelo wa go yahlula wo nyoko teya go baba.—Kut. 16:21. w22.05 7 ¶18-19

Lebelela gore go makega ying mo monna wa gore ke Mokreste le mosadi wage ba ba le ngwana. Mengwaga ya go fela, di ka makega gore ne ba kene ba di theetsela dipolabolo ga taba ya go gudisa bana. Mara gana byalo tso ba ba yeletsang ka tsona ga dipolabolo tsone ba di tseyela gedimo ka matla. Gana byalo di nyaka ba gudisa ngwana wa bona beng. Lone ke mong letogo! Nnete ke gore seyemo se ka tšhentšha ka mokgo re tseyang ditšhiko tsa Bhayibele. Sosone ke sona so se makang gore malata ya Jehova ma dule ma bala Mangwalo fote le magoši ya Maisrayele ne ba ma butsiye gore ma ghayele ka wona “matšatši ka mokana ga wona” mo ma kene ma phela. (Dot. 17:19) Lune babelegi ba Makreste le na le mmereko wa go bafala ka matla, go leng go tšhutisa bana ba lune ka Jehova. Mara a le fo jabodisa ke go ba nganela ka ditaba tsa go tlala tsa go tšwa ga Modimo. So le se nyakang ke gore bana ba lune ba mo nyake ka matla. w22.05 26 ¶2-3

Taba ya gore tso re di sinnyeng di re kwisa go baba a ya yenela. Di nyaka re tikemisela go maka se sengwana. Fote so Jehova a se lebelelang mo a nyoko tshwarela motho wa gore o sinnye ke taba ya gore ayitsano o sokologiye. Go sokologa di rela “go tšhentšha.” Mo re fo yi beya, re ka fo re di nyaka motho a tšhentšha maphelelo ke mokane a thomise go maka tso Jehova a di nyakang. (Jes. 55:7) Gore motho yene a thomise go tseya dilo ka mokgo Jehova a di tseyang, di nyaka a lisetse Jehova a mo yetetse. (Marom. 12:2; Maef. 4:23) Fote di nyaka a tikemisela go lomoga ga mokgwa wage wa botala wa go nagana le wa go maka dilo. (Makol. 3:​7-9) Nnete ke gore mo re šupetsa tumelo ga sehlabelo sa Kreste, Jehova o nyoko re tshwarela a boya a sula tso re di sinnyeng. Mara Jehova o nyoko maka gore sehlabelo sone se re berekele mo a di bona tsa gore re wa re tsoga re kene re liketsa go tšhentšha maphelelo ya rune.—1 Joh. 1:7. w22.06 6 ¶16-17

Go tlugisela ku botala batho ba kene ba kwisana go baba. (Mmo. 8:9) Mo re beyisa, bo ba nang le matšhika ya go lawola ba ma berekisa bošayedi, dikgohlane le tsona di f’lo re bhe, bana ba sekolo baa hlorisana fote batho ba bangwana ba maka mašaga ya bona lešidi. A di makatse wa tšiba mo batho ba tšhabanana! Mara taba yonone ya gore batho baa tšhabanana yi mmerekela ka mokgo mang ga Sathane? Sathane o berekisa taba yo ya go tšhaba batho gore a re gapeletse gore re šepise ka matlamatla ga mmereko wa go tšhomayela. Fote mmušo wo yye wa rakela mmereko wa rune wa boya wa re hlorisa wo kutšetsela ke yene Sathane. (Luk. 21:12) Fote Sathane o berekisiye batho bage gore a sabalatse matsaka ka Dihlatse Tsa Jehova. Batho bo ba tshepang matsaka yane ba ka napa ba ro re hloya kela ba re hlasela. (Mat. 10:36) Ayitsano bošakašakane byone bya Sathane bya re makatsa? Dho le ka go twii. Phela ke botala a kene a di maka tsotsone a thomisi gana byalo.—Meber. 5:​27, 28, 40. w22.06 16 ¶10-11

Go nyoko ba go na le bomang fote ga bo “ba go tlala” ba gore ba nyoko ba ba ba tšhutisiye gore ba make tsa go loka? Go nyoko ba go na le ba gore ba ba tsusiye le ba gore ba phonne Aremaghedoni le bananyana ba gore ba ba belegiye ga lefase la nyuwane. Mo go fela 1 000 ya mengwaga batho ka mokana ga bona ho lefaseng ba ko ba ba yenele. Di nyaka re sa lebale gore mo motho a yenele tsone a di rele gore o šele o le krayye lephelo la go ya go yye. Lebelela tso di makegiyeng ka Adamo le Efa. Ke mo ba yenele mara ne di nyaka ba šupetsa gore baa mo theetsela ga Jehova Modimo gore a thogo ba neya lephelo la go ye go yye. Mara sa go kwisa go baba ke gore di ba šitiye tsa go mo theetsela. (Marom. 5:12) Ka taba la gore batho ka mokana ga bona ba nyoko ba ba yenele mo go fela 1 000 ya mengwaga, ayitsano ka mokana ga bona bo ba gore ba ko ba ba yenele ba nyoko yi thega go ya go yye taba ya gore Jehova ke yene ye a lawolang? Kela ba bangwana ba nyoko tshwana le Adamo le Efa ba gore le mo yi le gore ne ba yenele di ba šitiye tsa go tshepega? Di nyaka re kraya diphetolo tsa diputsiso tsowa. w22.09 22-23 ¶12-14

Mo o lebelela mathatha ya go tlala ya ma makegang ho lefaseng, ayitsano ma maka gore di go thathafele go tshepa gore dilo di nyoko ba kawone? Mitši ya pshyayegana. Batho ba go tlala ba kwana le bokgohlane, ba tinyakela tsa bona beng fote ba na le tšhinghi. Fote ba bangwana a ba ba tshepe bo ba go lawola. Mara dilo tsone mo di kene di makega di napa di maka gore o sa kamake gore dilo di nyoko ba kawone. Ke ntaba mara? Ka taba la gore batho ba titshwara ka mokgo seporofeto se hlayyeng mo se bolabola ka “dinako tsa mafelelo.” (2 Thim. 3:​1-5) Mo seporofeto sowa se kene se makega, motho wa go tseya gabutši a ka sa yi phigisi taba ya gore Jeso Kreste o šele a lawola go le Kgoši ya Mmušo wa Modimo. Mara seporofeto sowa go fo ba se sengwana sa go bolabola ka Mmušo wa Modimo. Diporofeto tsone ka mokana ga tsona mo di gahlana di napa di re thalela sethombhe gabutši gore re thogo bona gore re šele re tla kaye ga tso Jehova a hlayyeng gore di nyoko makega. w22.07 2 ¶1-2

Ka nako ya bolwele byowa bya go sabalala bya COVID-19 ba yye ba re botsa tso di nyakang re di maka gore re thogo tshwara megahlano ya phutego re boye re ye mahlong ka mmereko wa go tšhomayela. Ka go yakgoswa re yye ra thomisa go kena megahlano ya Sekreste, megahlano ye mogolonyana le megahlano ye megolo re berekisa dividiyo. Fote re yye ra thomisa go tšhomayela re berekisa mangwalo le difowunu. Jehova o yye a re rufa ka matla mo re kene re karakara. Makala ya go tlala ma hlayye gore le nombhoro ya batšhomayedi yi šele yi yeketsegiye. Gabutšibutši ba go tlala ba yye ba makegela ke tsa go ba tiyisa ka nako yonone. Di ka makega gore batho ba bangwana ne ba bona nkare mokgahlo wo na le magaba nakwela go nyarela bolwele byowa bya go sabalala. Mara mo nako yi kene yi ya di f’lo bonala tsa gore tso ba re yetetsang ka tsona di ya kwagala fote di ya bereka. Fote mo re kene re ghayela ga taba ya ka mokgo Jeso a yetetsang batho bage a kene a ba šupetsa gore o ba nyaka ka matla, tsotsone di maka gore re sa kamake gore le mo go ka nyarela tsa mošaga mang Jehova le Morwayi wage ye a mo nyakang ka matla ba nyoko fo dula ba na le rune.—Maheb. 13:​5, 6. w22.07 13 ¶15-16

Go tokegela ga taba ya go thanaka Jehova mo re rapela di re tšhofa gore re mo leboge ka taba la dilo tsa gabutši tso a re makelang tsona. Mo re beyisa, re ka mo leboga ka taba la dikhalakhala tsa go bafala tso re di bonang ho mabhlomung, tsa go ja tsa mohlobohlobo tsa go natefa le banghana ba gabutši bo re jabolelang go fokatsa nabo. Papa wa rune wa gore o re nyaka ka matla o re neyye dilo tsowa le tse dingwana gore re thogo jabola. (Pis. 104:​12-15, 24) Fote mong selo se segolo so re ka se lebogang ga Jehova ke taba ya gore o re tšhutisa ka tsa go tlala tsa go tšwa ka Lentsung lage fote o re neyye tshepo ya tsa ku mahlong. Di ka ba lula go lebala gore re leboge Jehova ga dilo ka mokana ga tsona tso a re makelang. Mara king so se ka re gopotsang gore re sa lebale? O ka ngwala fase dilo tso o yye wa di kgopela ke mokane o dule o lebelela ka mokgo Jehova a fetudiyeng merapelo yago. Ke mokane o rapele o mo leboge gore o go gelepiye.—Makol. 3:15. w22.07 22 ¶8-9

Nnete ke gore re ya di tšiba gore a di ya yenela go fo tšhuta nnete nje. Gore yi thogo re berekela gabutši di nyaka re phela ka yona di relang gore di nyaka re berekisa tso re di tšhutang mo re kene re phela. Mo re maka ka mokgonone nnete yowa yi nyoko maka gore re jabole. (Jak. 1:25) Mara re nyoko di tšibela kaye gore nnete yowa re sa na re yi ngangarele a yi soko re khwanyugela? Mogageru ye mongwana o re di gabutši ka matla go tinyakolla gore re thogo tšiba tso re di makang gabutši le ga gore di nyaka re potolla. Pawulo wa lepostola o f’lo yi beya ka mokgo: “Mara ka gore ne re šele re thomisiye go maka tsa gabutši koriyeneng mahlong re maka ka mokgonone.” (Mafil. 3:16) A re kamake gore di nyoko re berekela mo re karakara gore “re ye mahlong re kene re ngangarele nnete”! Nnete yowa a yi fo maka gore lephelo la motho le be kawone mara yi maka gore Jehova le magageru ba jabole. (Diy. 27:11; 3 Joh. 4) Ayitsano di gona tso di makang gore re yi nyake ka matla nnete yowa fote re phele ka yona? w22.08 18-19 ¶16-18

Bagolo ba ka šupetsa ka mokgo mang gore ga Jehova le Jeso ba ba nyaka ka matla? Selo se segolo so ba ka se makang ke gore ba pasope dinku tsa Jeso ka tso ba di gayelang. (1 Pet. 5:​1, 2) Jeso a sanka a yi jikajika taba yowa mo a bolabola le Petro wa lepostola. Ka nthago ga mo Petro a phigiye Jeso gararo, o yye a nyakana le mašuba ya gore a šupetse gore o mo nyaka ka matla ga Jeso. Ka nthago ga mo Jeso ba mo tsusiye o butsisiye Petro gore: “Simone morwayi wa Johane, wa nnyaka mara?” A re kamake gore Petro nke a makiye se sengwana le se sengwana gore a šupetse Mong wage gore o mo nyaka ka matla. Jeso o butsiye Petro gore: “Disa dinku tsaka.” (Joh. 21:​15-17) Fote Petro o yye a pasopa dinku tsa Morena wage lephelo lage ka mokana ga lona go šupetsa gore ke mo a mo nyaka ka matla ga Jeso. Lune bagolo le ka šupetsa ka mokgo mang gore mantsu yaa Jeso a ma butsiyeng Petro le ma tseyela gedimo ka matlamatla? Le ka šupetsa gore ga Jehova le Jeso le ba nyaka ka matla, mo le dula le tipeyela nako ya go vakašela magageru go fo re le ma tiyise le go gelepa bo ba gore baa bata ga tso tsa Modimo gore ba boyele ga Jehova.—Hezek. 34:​11, 12. w23.01 29 ¶10-11

Pasopa o sa tikraye o tseya nkare ntshitshire yo o gahlanang nayo aa šiyo le ka wweši ye a ka kwisisang gore o tikwa ka mokgo mang. Mo o ka fo nagana ka mokgonone, tsotsone di ka maka gore o fetse ka gore a go na tshepo ga seyemo so o leng ga sona le gore go nabela tsa go kekema go fetsiye ka wene. Mara Bhayibele yi bolabola ka mokgo mongwana. Yi re: “Mara mo go nyarela dilo tsa go liketsa tumelo ya lune o nyoko le gelepa gore le tiyisele.” Byalo, le mo go ka nyarela tsa go kekema tso re di nabelang, re ka di kgona go tiyisela. Mo re gelepa ke Jehova re ka di kgona go kganela kgole le go maka dilo tsa go kekema. O sa lebale taba yowa: Ka taba la gore a re ya yenela, go nabela tsa go kekema re ka sa ro di kgona go di thibelela. Mara mo di re tlela, re ka di tšhabelela ka go yakgoswa go tshwana le ka mokgo Josefa a makiyeng mo a tšhabelela mogatsa Potifaro. (Gen. 39:12) O sa nape o yikela go nabela tsa go kekema go go maka lebhantiti! w23.01 12-13 ¶16-17

Jehova o tšibega ka gore o lukiye. (Dot. 32:4) Go loka go yelana ka matla le go sa hlawolane, fote Jehova aa hlawolane. (Meber. 10:​34, 35) Gore aa hlawolane re bona ka mebolabolo yo ba yi berekisiyeng mo ba ngwala Bhayibele. Jehova o tshepisiye gore ka dinako tsa mafelelo, “go tšiba nnete” yo yi leng ka ho Bhayibeleng “go nyoko sabalala.” Ba go tlala ba nyoko yi kwisisa. (Dan. 12:4) Se sengwana so se gelepiyeng gore nnete yone ya Lentsu la Modimo yi sabalale ke gore ba yi hlatolliye, ba yi gatisa fote ba yi sabalatsa ba boya ba sabalatsa dikgatiso tsa go bolabola ka Bhayibele. Batho ba Jehova gana byalo ba šele ba hlatolliye Lentsu la Modimo le felegelele kela go le sekopa ka mebolabolo ya go teya ka ku ga 240 fote ye mongwana le ye mongwana a ka kraya Bhayibele mahala. Ka taba la tsotsone, batho ba ditšhaba ka moka ba tšhuta ka “ditaba tsa go bafala tsa Mmušo” mo go soko bane go segela nako ya mafelelofelelo. (Mat. 24:14) Modimo wa rune wa gore o lukiye o nyaka go thulela batho ba go tlala mašuba gore ba thogo mo tšiba ka go bala Lentsu lage. O makiye tsotsone ka taba la gore o re nyaka stereka. w23.02 5 ¶11-12

Ayitsano le wene o kwana natso tsa go loka? Phela a re kamake le ka gonyana gore o kwana natso. Mara ka mokana ga rune a re ya yenela fote mo re sa pasope lefase lowa le nyoko re fokola ke mokane re tseya taba yowa ya go maka tsa go loka ka mokgo mongwana. (Jes. 5:20) Mo batho ba nagana ka motho wa gore o lukiye ba go tlala ba nagana gore ke motho wa go ba le magetla wa go kwana le go yahlula ba bangwana kela wa go tseya nkare yene o lukiye go phala batho bo ka mokana ga bona. Mara Modimo aa kwane naye motho wa mošaga wonone. Nakwela Jeso a le ho lefaseng o yye a wolola bo ba go yeta dikereke mahlong ka taba la gore ba tipeyele molawo wa gore ke sefeng sa gore se lukiye. (Mmo. 7:16; Luk. 16:15) Motho wa gore o maka tso Jehova a reng di lukiye aa tseyi gore yene o phala ba bangwana. Go loka ke mokgwa wa gabutši ka matla. Mo re fo yi beya go rela go maka dilo tsa go loka mahlong ga Jehova Modimo. Ka ho Bhayibeleng Mantsu ya ba ma berekisiyeng go hlatolla taba ya “go loka” ma bolabolela taba ya go phela ka melawo ya gore ya kwagala go leng melawo ya Jehova. w22.08 27 ¶3-5

Jeso ke mo a ba tshepa bo ba mo latelelang le mo yi le gore ne ba fela ba kekemisa go gongwana. (Joh. 15:16) Nakwela Jakobo le Johane ba kgopela Jeso gore a ba beye ga mayemo Mmušong, Jeso a sanka a kamaka gore king so se ba tšhofang gore ba berekele Jehova fote a sanka a re aa sa di nyaka gore go be mapostola yage. (Mar. 10:​35-40) Ka nthagonyana, ka mokana ga bona bo ba mo latelelang ga Jeso ba yye ba mo šiya a le ntoši bošego bya mo a tshwariwa. (Mat. 26:56) Mara Jeso o yye a fo ya mahlong a ba tshepa. Ne a di tšiba tsa gore a baa yenela fote “o ba nyakiye go segela mafelelong.” (Joh. 13:1) Mo Jeso ba mo tsusiye ga bo ba kgwileng o yye a neya mapostola yage ya go tshepega 11 ya wona mmereko wo mogolo ka matla wa go yeta mahlong ga taba ya go maka gore batho go be malata ba boye ba pasope le dinku tsage. (Mat. 28:​19, 20; Joh. 21:​15-17) Phela ne a sa sinyi mo a tshepa banna bowa ba gore a baa yenela. Ka mokana ga bona ba yye ba berekela Jehova ka go tshepega go segela ba kgwa. A re kamake gore Jeso o re beyele mošupetso wa gabutši ga taba ya go tshepa batho ba gore a baa yenela. w22.09 6 ¶12

Sathane re nyoko mo tsosa fase mo a re tshosetsa mo nkare a re yi kamake taba ya gore Jehova o re nyaka tsa nkare ke moka fote o dula a le ka nthoko ga rune. Mo re beyisa, ye a ngwadiyeng Pisalema 118 o yye a gahlana le dintshitshire tsa go mo kgongwetsa. Ke mo a na le manaba fote ya mangwana ya gona go le batho ba mayemo (ditemanyana 9, 10). Ka dinako tse dingwana, ke mo go na le tso di mo kgahleletsang (temanyana 13). Fote Jehova ke mo a mo wolodiye a sa jikajiki (temanyana 18). Mara, mopisalema yene o yye a yepelela a re: “Nka sa tšhoge selo.” Ke mo a di tšiba tsa gore le mo Jehova a yye a mo wolola a tiyisiye letsogo, tsotsone ne di šupetsa gore Papage wa ku legedimong wa mo nyaka. Fote ke mo a sa kamake gore le mo a ka gahlana le dintshitshire tsa mošaga mang Modimo wage wa gore o mo nyaka ka matla a ka sa mo lahle o dula a tikemisele go mo gelepa. (Pis. 118:29) Di nyaka re sa yi kamake taba ya gore Jehova o nyaka ye mongwana le ye mongwana wa rune ka matla. Mo re ka tshepa taba yone yi nyoko re gelepa gore re fo teya re tshwarelele ga dilo tsowa ka diraro: (1) go tshosanya ke taba ya go šitega go pasopa ba mutši ka tso ba di gayelang, (2) taba ya go tšhaba batho le (3) go tshosanya ke likgu. w22.06 15 ¶3-4

Di nyaka re bone gore taba ya go rapela Jehova re yi yetisa mahlong mo re kene re phela. Ka taba la gore Jehova ke yene a re Makiyeng, a di roni mo re rapela yene. (Kut. 4:11; 14:​6, 7) Byalo, di nyaka re yi yetisa mahlong taba ya morapelo fote re wo make ka mokgo yene a wo yamogelang, ka ‘moya wa go hlawolega fote re mo rapele re resa.’ (Joh. 4:​23, 24) Re ya di nyaka tsa gore moya wa go hlawolega wa Modimo wo re yetetse ga taba ya morapelo gore wo thogo yelana le nnete yo re yi krayang ka Lentsung lage. Taba ya go makela Jehova morapelo di nyaka yi yeta mahlong, le mo re dula ga dinaga tsa gore mmereko wa rune ba wo rakele. Gana byalo, magageru ya banna le basadi ya go teya ka ku ga 100 ba ma kwalele jele go le ka taba la gore ke Dihlatse Tsa Jehova. Le mo go le ka mokgonone, ba ya mahlong ba maka se sengwana le se sengwana gore ba rapele, ba tšhute fote ba botse ba bangwana ka Modimo le ka Mmušo wage. Mo di ka re tlela tsa gore ba re kweranye kela ba re hlorise le rune di nyaka re dula re jabodisa ke taba ya gore re ya di tšiba tsa gore Jehova a ka sa re lisetse fote o nyoko re rufa.—Jak. 1:12; 1 Pet. 4:14. w22.10 9 ¶13

Ga puku ya Diyema o re yetetsa ka tsa gore mo re ka di berekisa, re ka sa tisole. Lebelela mešupetso ka mmedi ya tso a re yeletsang ka tsona. Sa mathomo kgotsofala ka so o nang naso. Diyema 23:​4,5 yi re yeletsa ka mokgo: “O sa nape o tisamela ka matla ga taba ya go nyaka go ghanya. . . . Ka taba la gore go nyoko mela mafofa go tshwana le segotšane mo se pherera se ya ku legedimong.” Mara ka mokana ga bona ba go ghanya le ba go tihlupegela ba šekela ka matla ka taba ya go hlekeletsa tšheleta. Nka taba lo ga go tlala ba makang dilo tsa gore di ba sinya mabitso, di sinya senghana sa bona di boya di ba hlafisela lephelo. (Diy. 28:20; 1 Thim. 6:​9, 10) Sa bobedi, thomisa ka go nagana o soko bolabola. Mo re ka sa pasope, mantsu ya rune go ka ba ya go thunuga. Bhayibele yi re: “Mo motho a bolabola a sa nagana, di tshwana le mo ba go hlaba ka segale mara lleme la motho wa gore o hlalefiye le ya yalafa.” Re ba re maka gore go bebe, mo re kganela kgole le taba ya go seba ka tso ba bangwana ba di kekemisiyeng.—Diy. 20:19. w22.10 21 ¶14; 22 ¶16-17

Ne di nyaka Hezekiyele a tšibe a boye a kwisise molayetsa wo a tshwaneleng a wo sabalatse. Ke mo di nyaka a dula a nagana ka wona fote di šupetse gore wa mo tikisa le yene beng. Ke mokane go yye gwa makega selo sa go makatsa ka matla. Mo Hezekiyele a ja lengwalo lone la go phutiwa “ke mo le tswetswenya go tshwana le mamapo.” (Hezek. 3:3) Ke ntaba? Taba ya gore Hezekiyele ke yene ye a yemelang Jehova ke mo yi tswetswenya fote yi jabodisa. (Pis. 19:​8-11) Hezekiyele ke mo a sa yi tseyi ka gonyana taba ya gore Jehova o mo kgetiye gore a bereke go le yene moporofeta wage. Ka nthagonyana, Jehova o butsiye Hezekiyele gore: “Tseyela hlogong o boye o theetsele mantsu ka mokana ga wona ya ke go botsang wona.” (Hezek. 3:10) Jehova ke mo a botsa Hezekiyele gore mantsu yane ba ma ngwadiyeng ga lengwalo la go phutiwa a ma tshware ka hlogo a boye a ghayele ka wona. Mo Hezekiyele a kene a maka tsotsone, ke mo di nyoko tiyisa tumelo yage. Fote ke mo di nyoko mo gelepa gore molayetsa wone a tshwaneleng a wo sabalatse wo tikise batho. (Hezek. 3:11) Mo molayetsa wone wa Modimo wo šele wo le ka pelong ya Hezekiyele, a wo kwisisa gabutši fote wo le ho molomong wage, tsotsone di rela gore Hezekiyele o ko ba a šele a tilukisiye gore a ye maka mmereko wo ba mo neyyeng wona. w22.11 6 ¶12-14

Mo nkare tso mokgahlo wo di tšhentšhang di liketsa taba yago ya gore wa tshepega, o ka maka ying mara? Thega tso mokgahlo o di tšhentšhang. Mo Makohathi ma kene ma sepela ku mašahleng, ne ma rwadisana areka ya go kwanisanya mahlong ga batho ka mokana ga bona. (Dip. 3:​29, 31; 10:33; Još. 3:​2-4) Phela yane go ro ba mong mayemo! Mara, dilo di yye dya tšhentšha mo Maisrayele ma ye dula ga Naga yo ne ma Tshepisiwwe yona. Ke mo di sa sa nyaka gore ba dule ba rurisa Areka yone. Byalo, Makohathi ba yye ba ma neya mebereko ye mengwana. (1 Dikor. 6:​31-33; 26:​1, 24) A go na mo re kwileng ba re Makohathi ma yye ma kokola kela ma re ma nyaka mmereko wa mayemo ya gedimo ka taba la gore ma yye ma bereka mmereko wa go hlawolega. Re tšhuta ying ga taba yowa? Di nyaka re thega tso mokgahlo wa Jehova wo di tšhentšhang ka dipelo tsa rune ka mokana ga tsona, le mo go ka ba tsa gore di tšhentšha mmereko wo o wo makang. Jabolela mmereko wo mongwana le wo mongwana wo o wo makang. O sa lebale gore mmereko wago a yi wona wo wo makang gore Jehova a go tseyele gedimo kela dho. Jehova o tseyela gedimo taba ya gore wa theetsela go phala mmereko le mo go ka ba wofeng. w22.11 23 ¶10-11

Onesiforase o yye a nyakana le Pawulo wa lepostola, mo a mo kraya o yye a mo gelepa ka tso a di hlokang. Ka mokgonone, Onesiforase o yye a beya lephelo lage kotsing. Re tšhuta ying mara? Re sa yikele taba ya go tšhaba batho yi re tshosanya kela yi re šitisa go thega magageru ya gore maa hlupegisiwa. Mara, tla re makeneng so re ka se kgonang gore re thogo ma gelepa. (Diy. 17:17) Baa re hloka fote ba nyaka re ba thege. Lebelela ka mokgo magageru ya ku Russia ma yyeng ma gelepa magagabo ya gore ba ma tshwere. Mo ba bangwana ba ba yisa khota, magageru ya go tlala ya banna le ya basadi maa tlogamela ke mokane ma ye ba thegeng. Re tšhuta ying mara? Mo magageru ya gore ma yeta mahlong ba ma poyilanya, ba ma bošela jele kela ba ma hlupegisa re sa tšhoge. Ba rapeleleneng, pasopaneng ba mitši ya bona fote le lebelele so le ka se makang gore le thogo ba gelepa.—Meber. 12:5; 2 Makor. 1:​10, 11. w22.11 17 ¶11-12

Bagolo ba na le mmereko wo mogolo wa gore ba tiyise magageru ba berekisa Bhayibele ba boya ba gelepa bo ba gore di ba kgahleletsiye. (1 Pet. 5:2) Mo magageru ma wele ke kotsi, bagolo ke bona bo ba lebelelang gore ayitsano ma tšhireletsegiye, ma na le tsa go ja, dikobo le ga go dula. Mara se sengwana ke gore magageru ma sa na ma nyaka go kgomoletsiwa ka Bhayibele ma boya ma thegiwa ga taba ya ka mokgo ma tikwang. (Joh. 21:15) Harold wa gore o bereka ga Komiti ya Lekala wa gore fote o yye a bona magageru ya go tlala ya gore ma yye ma gahlana le dikotsi o re, “Di tseya nako gore motho a tikwe a le kawone. Ba thomisa ka gonyana ka gonyana go lebala tso ba di lobiyeng mara taba ya gore ba lobiye mašaga ya bona, dilo tsa bona tsa go bafala kela go nagana ka seyemo sa go befa so ba gahlanneng naso tsona di ka tseya nako ya go lefa di kene di ba hlupa. Go nagana ka dilo tsa mošaga wonone go ka maka gore ba dule ba kwa go baba. Mara tsotsone a di rele gore a ba na tumelo, nka mokgo batho ba leng ka gona.” Bagolo ba yi maka taba yo ya gore le “lleneng le bo ba llang.”—Marom. 12:15. w22.12 22 ¶1; 24-25 ¶10-11

Ka taba la gore Jehova aa konane o re neya moya wage wa go hlawolega gore re thogo lwela go maka tsa go loka. Mo re bala Lentsu la Modimo re ba re dumelela moya wage wa go hlawolega gore wo re kutšetsele. Fote moya wone wa go hlawolega re wo kraya fote mo re ba gona megahlanong. Ga megahlano yone ya Sekreste, re ka fetsa nako re na le magageru ya gore ma tshwana le rune ya gore ma liketsa ka matla gore ma make dilo tsa gabutši fote tsotsone di re tiyisa ka matla. (Maheb. 10:​24, 25; 13:7) Fote mo re šutela ga Jehova ka thapelo re mo kgopela gore a re gelepe mo re kwa gore re ya lelemela, o nyoko re neya moya wage wa go hlawolega gore re thogo lwa re kene re simme. Le mo yi le gore dilo tsowa ka mokana ga tsona di ka sa nape di maka gore tsa go kekema tso re di nabelang di nyamalale, mara di ka re gelepa gore re hlule taba ya go re hlohletsela gore re make tsa go kekema tso re di nabelang. Mo nkare re šele re thomisiye go maka dilo tsa gore di ka re gelepa gore re be le senghana sa gabutši le Jehova, di ka ba gabutši ka matla gore re dule re gotetsa taba yone re karakare gore re nabele tsa gabutši. w23.01 11 ¶13-14

Le mo Bhayibele go se puku ya gore yi re botsa gore re tilekelele ka mokgo mang gore re thogo philega kela ya go re botsa gore re je tsa mošaga mang, yi re botsa tsa go tlala tso Jehova a di naganang ga ditaba tsa mošaga wonone. Mo re beyisa, o re hlohletsela gore re “kganele kgole le dilo tsa go kwaletsa” tsa gore di ka sinya mmele wa rune. (Mmo. 11:10) Bhayibele yi re re sa kwane le go ghimbha ka matla kela go gaputlela mokgete ka taba la gore dilo tsone, le go re bolaya di ka re bolaya. (Diy. 23:20) Jehova o nyaka gore re be le mokgwa wa go titshwara mo di tla ga taba ya gore re nyoko ja byang fote ra nwa byang. (1 Makor. 9:25) Ke rune beng bo re ka segelelang sepheto sa go šupetsa gore re ya mo leboga ga Modimo gore o re neyye lephelo ka go berekisa monagano wa rune gabutši. (Pis. 119:​99, 100; Diy. 2:11) Mo re beyisa, re nyoko šupetsa ka go kgeta gabutši tso re di jang. Mo nkare go na le tsa go ja tso re kwanang natso ka matla mara di re lwadisa, di nyaka tsa go ja tsa mošaga wonone le go di lebelela re sa di lebelele. Fote re šupetsa gore re berekisa monagano gabutši, mo re sa tikone boroko, re tiwolola ka moka matšatši, re dula re yediye runebeng fote re sa tshwatele taba ya go yedisa ka mutšing ga rune. w23.02 21 ¶6-7

O ka maka byang gore o kraye makolwane mo o bala Bhayibele? Lebelela so 2 Thimothi 3:​16, 17 yi se hlayang. Temanyana yowa yi re, “Mangwalo ka mokana ga wona ma . . . gelepa” ka go (1) tšhutisa, (2) ka go kgala, (3) ka go wolola le ka (4) go yetetsa. Dilo tsone ka dine tsa gore di ka go berekela o ka di kraya le ga dipuku tsa Bhayibele tsa gore a yi ga go tlala o di vakašela. Pombhola taba yone o bone gore yi ka go tšhutisa ying ka Jehova, tso a nyakang go di segelela kela ka ditšhiko tsage. Lebelela gore yi gelepa ka mokgo mang ga taba ya go kgala. Maka tsotsone ka go lebelela ka mokgo ditemanyana tsone di go gelepang gore o thogo bona dilo gabutši, o kganele kgole le mekgwa ya go sa loka fote o dule o tshepega ga Jehova. Nyakolla gore taba yone yi ka berekisiwa ka mokgo mang gore o thogo yetetsa kela go potolla mokgwa wa go sa bone dilo gabutši, nakwenngwana ye mongwana ku tšhomong ne a sa kwisisi taba ye nngwana gabutši. Fote lebelela gore ditemanyana tsone di yi tšhela ka mokgo mang taba ya go wolola gore yi thogo go gelepa gore o tseye dilo ka mokgo Jehova a di tseyang. Mo o ka dula o nagana ka dilo tsowa ka dine, o nyoko kraya makolwane ya gore ma nyoko go gelepa gore taba ya go bala Bhayibele yi go berekele. w23.02 11 ¶11

Seporofeto so se leng ga puku ya Daniyele se hlayye gore Jeso ba nyoko mo neya Mmušo mo go fela kašupa ya dinako. Ayitsano dya kgonega go tšiba gore nako yone ya go jabodisa yi yye ya makega leng? (Dan. 4:​10-17) “Kašupa ya dinako” yi yemela 2 520 ya mengwaga. Nako yone yi thomisiye ka 607 B.C.E. mo Mabhabhilona ma tlosa kgoši ya mafelelo ga setulo sa go lawola sa Jehova ku Jerusalema. Ke mokane ya felela ka 1914 C.E. mo Jehova a beya Jeso—“yene ye di mo tshwanelang go ya ka molawo”—gore go be Kgoši ya go lawola ga Mmušo wa Modimo. (Hezek. 21:​25-27) Seporofeto sowa se ka re berekela ka mokgo mang? Go tšiba ka taba ya “kašupa ya dinako” yi re gelepa gore re sa kamake gore tso Jehova a di tshepisiyeng o nyoko di maka ka nako yo a yi beyyeng di ka sa diyege. Mo nkare yene o di kgonne tsa go hlaya gore Mmušo wage wo nyoko thomisa leng go lawola, tsotsone di rela gore le diporofeto tso tse dingwana di nyoko makega ka nako yo yene a yi beyyeng. Nnete ke gore, letšatši la Jehova “le ka sa diyege!”—Habak. 2:3. w22.07 3 ¶3-5