December

Ayitsano Jehova o na le matšhika ya go tsosa bo ba hlokofeleng? A go jiki! Phela ke “wa Matšhika ka Moka.” (Kut. 1:8) Byalo, o na le matšhika ya go hlula lenaba le lengwana le le lengwana, re ra le mong lona likgu. (1 Makor. 15:26) Se sengwana so se makang gore re tshepe taba ya gore Modimo a ka di kgona go tsosa bo ba hlokofeleng, ke gore aa lebale. O bitsa nanedi ye nngwana le ye nngwana ka lebitso. (Jes. 40:26) Fote o gopola bo ba hlokofeleng. (Jobo 14:13; Luk. 20:38) Aa lebale le mong dilo tse dinyananyana ka bo a nyoko ba tsosang go tokegela le mekgwa ya bona le ka mokgo ne ba lebelelega ka gona, tso ba yyeng ba gahlana natso mo ba kene ba phela le tso ba di gopolang. Di fo ba lekgwaying gore re ka dumela ga tsogo ya ku mahlong yo Jehova a re tshepisiyeng yona ka taba la gore re ya di tšiba gore o nabela go di maka tsotsone, fote o na le matšhika ya go di maka. Lebelela se sengwana so se makang gore re dumele ga taba yo Modimo a re tshepisiyeng yona ya tsogo, ke sowa: Jehova o šele a di makiye tsa gore a tsose bo ba kgwileng. Ka dinako tsa Bhayibele, o yye a neya Jeso le banna ba go tlalanyana ba gore baa tshepega matšhika ya gore ba thogo tsosa bo ba kgwileng. w23.04 9-10 ¶7-9

Mo nkare re bolabola nabo gabutši fote re temeka, batho ba ka tikemisela go re theetsela ke mokane ra ya mahlong re kene re bolabola nabo. Ke nnete gore mo ye mongwana a nyaka go phigisana le rune kela go fo poyilanya tso re di dumelang, re sa tihlupe ka go ya mahlong re re re fetolana naye. (Diy. 26:4) Mara, ba go tlala ba ka fo sa be ka mokgonone, re ka fo re ba bangwana ba ko theetsela. Di fo ba lekgwaying gore di nyoko re berekela ka matla mo re temeka. Rapela Jehova gore a go neye matšhika ya o ma hlokang gore o thogo fetola o kgibiye diputsiso tsa go fo go šuhlašuhla kela tsa go fo go poyilanya. O sa lebale gore mo o dula o kgibiye tsotsone di ka poma taba ya go phigisana kela go feleletsa le gwayelana tsa nkare ke moka. Mo o kgibiye fote o šupetsa gore wa hlompa mo o fetola, tsotsone di ka tšhofa bo ba theetseleng gore ba tšhentšhe ka mokgo ne ba re tseya ka gona le ka mokgo ba tseyang nnete ya Bhayibele. Le “duleneng le tikemisele go fetola” ye a butsisang ka tumelo ya lune, “le make tsotsone le bebiye le šupetsa gore le ya hlompa.” (1 Pet. 3:15) Eya, lisetsa go temeka go go neye matšhika! w23.09 19 ¶18-19

Lebelela kanne ya mekgwa yo re ka šupetsang ka yona gore nnete re lefisa pelo. Sa thoko, motho wa gore o lefisa pelo aa yakgoswele go kwata. O liketsa ka matla gore a dule a kgibiye fote aa tshwarane ka pelo mo ba mo šuhlašuhla kela mo a kwa di mo kgahleletsiye. (Ek. 34:6) Sa mabedi, motho wa go lefisa pelo o lita a kene a kgibiye. Mo selo se tseya nako ya go tlala go feta ka mokgo ne a litiye, motho wa go lefisa pelo o liketsa ka matla gore a kganele kgole le taba ya go sa bo pate kela go fo kwa a tshwatisega. (Mat. 18:26, 27) Sa kararo, motho wa go lefisa pelo aa jage. Mo motho wa gore o lefisa pelo a na le mmereko wo mogolo wa gore di nyaka a wo fetse, o liketsa ka matla gore a sa jagele go wo thoma kela go jagela go wo fetsa. So a se makang ke gore o tipeyela nako ya gore a bone gore o nyoko di makisa sekaye. Ke mokane o berekisa nako yone gore a thogo maka mmereko wone gabutši. Sa kanne, motho wa go lefisa pelo o liketsa ka matla gore a tiyisele dintshitshire a sa kokole. O maka so a ka se kgonang gore a ye mahlong a tiyisela a kene a sa nagane tsa go kekema. (Makol. 1:11) Rune Makreste di nyaka re šupetsa mekgwa yowa ka mokana ga yona ya go lefisa pelo. w23.08 20-21 ¶3-6

Selo se segolo so se makang gore re tšhireletse dipelo tsa rune tsa go fo tshwanisela, nka taba la gore Jehova o nyakolla dipelo tsa rune. Tsotsone di rela gore wa di bona dilo tso ba bangwana ba sa kgoneng go di bona fote o tšiba le gore ke rune batho ba mošaga mang. Phela o ko re nyaka ka matla mo re ka dula re nagana ka mayele yage ya gore ma ka re gelepa gore re phele go ya go yye. (Joh. 4:14) Ka mokgonone, re ka sa tsoge re kwaletsiye ke go sa titshware gabutši, matsaka ya Sathane le batho ba dipelo tse di phifadu ba lefase lage. (1 Joh. 5:18, 19) Mo re kene re šutela thina le Jehova, taba ya gore re mo nyaka ka matla le go mo hlompa yi nyoko napa yi tsifa. Ka taba la gore a re nyake go kwisa Papa wa rune go baba, re nyoko hloya le mong go nagana ka taba ya go sinya. Hala Croatia go na le mogageru wa mosadi ye ba reng ke Marta, wa gore o yye a liketsega gore a make dilo tsa go sa hlamatsega, o ngwadiye gore: “Ke mo di nthathafela gore ke nagane gabutši le go lwa le taba ya go nabela go maka tsa go tšwa pateng. Mara go tšhaba Jehova go ntšhireletsiye.” Go tšhaba Modimo go di makiye ka mokgo mang tsotsone? Marta o re o ghayele ka dilo tsa go sasamela tso di ka makegang ka nthago ga mo a makiye dilo tsa go sa hlamatsega. Le rune re ka maka ka mokgonone. w23.06 20-21 ¶3-4

Jeso ke mo a di tšiba tsa gore tso Jehova a nyakang go di segelela ke gore a gadimise lebitso Lage, go yedisa maraga ya ba le psyirelannyeng ka wona. Ke tsotsone di makiyeng gore Mong wa rune a tšhutise malata yage gore ma rapele ka mokgo: “Papa wa rune wa magedimong, lebitso lago le hlawolege.” (Mat. 6:9) Jeso ke mo a di tšiba gore yowa ke mong taba ye kgolo ya gore ga yona go kena selo se sengwana le se sengwana sa gore se ya phela. Legedimong le lefaseng, aa šiyo ye a yyeng a phala Jeso ka go maka gore lebitso la Jehova le hlawolege. Mara nakwela Jeso ba mo tshwara, manaba yage ma yitseri o sinnye ying? Ke mo ba re o rogelela Modimo! Ke nnete gore Jeso ke mo a tseya gore motho o sinya ka matla mo a sa bolabole tsona ka lebitso la Papage kela a le tlotsanya maraga. Ke mo di mo hlupiye ka matla gore ba mo solela taba yonone ba boya ba mo rwesa molato wa yona. Go ka makega gore ke sona ka matlamatla so se makiyeng gore Jeso a ‘kwe go baba ka matla’ mo ba le thina le go mo tshwara.—Luk. 22:41-44. w24.02 11 ¶11

Ga motabogo wa rune wa lephelo, re tshwanele re nyake Jehova le Jeso ka matla go phala ka mokgo re nyakang mašaga ya rune. (Mat. 10:37) Mara, tsotsone a di rele gore re takise maahlo mmereko wa rune wa ka ho mutšing, re re re makisa ke gore mmereko wone wo re tshwarelela gore re thogo jabodisa Modimo le Kreste. Mara gore re thogo yamogelega ga Modimo le Kreste, di nyaka re make mmereko wa rune wa ka ho mutšing. (1 Thim. 5:4, 8) Mo re ka wo maka, re nyoko jabola stereka. Phela Jehova wa di tšiba gore mitši yi nyoko jabola mo monna le mosadi wage ba nyakanana ba boya ba hlompana, mo babelegi ba nyaka bana ba bona ka matla ba boya ba ba tšhutisa fote le mo bana ba theetsela babelegi ba bona. (Maef. 5:33; 6:1, 4) Mo nkare o monna, o mosadi kela ngwana, di nyaka o berekise mayele ya go hlalefa ya ka ho Bhayibeleng. O sa fo maka tso wene o bonang nkare di lukiye kela di tlwayelegiye mo o dulang kela wa maka tso di hlayang ke bo ba tipotsang gore ba tšhutegiye. Berekisa dikgatiso tsa rune tsa go bolabola ka Bhayibele. Dikgatiso tsowa di ka go yeletsa ka mokgo o ka berekisang ditšhiko tsa Bhayibele. w23.08 28 ¶6-7

Di nyaka mosadi wa Mokreste a tšhute mebereko ya gore yi ka mo gelepa. Mebereko ye mongwana ya gore ngwana ngwannyana o yi tšhuta mo a sa gola yi ka ya mahlong yi mmerekela mo a kene a phela. Mo re beyisa, tšhuta go bala le go ngwala gabutši. Ga ditšo tse dingwana go bala le go ngwala a ba di tseyi go le mmereko wa gore basadi ba ka wo tšhuta. Mara, di gabutši ka matla gore Makreste ka mokana ga wona ma tšhute go bala le go ngwala. (1 Thim. 4:13) Byalo, o sa dumelele selo se go paraka ga taba ya go tšhuta go bala gabutši le go ngwala. Tsotsone di nyoko go gelepa ka ying? Go tšiba mebereko go ka go gelepa gore o kraye sekwetše so o se hlokang gore lephelo le thogo ya mahlong. O nyoko thogo di kwa gabutši mo ba go tšhutisa wa boya wa ba thitšere ya Lentsu la Modimo. Sa go napa se di phala ka moka ke gore o nyoko šutela thina ka matla le Jehova mo o kene o bala Lentsu lage o boya o ghayela ka lona.—1 Thim. 4:15. w23.12 20 ¶10-11

Kgopela Jehova a go gelepe gore o thogo tšhinghela dilo tsa go go woka. Ka taba la gore re batho ba go sa yenela, di nyaka re dula re kikirisana le dilo tsa gore di ka re woka gore re make dilo tsa go tšwa pateng. Sathane o liketsa ka matla gore di re thathafele go lwisana le ntshitshire yone. Mokgwa wo mongwana wo a wo berekisang gore a liketse go re sinya menagano, ke dilo tsa go tijabodisa tsa gore a dya hlamatsega. Dilo tsa mošaga wonone di maka gore re thomise go nagana ka dilo tsa go sa yela—go leng dilo tsa gore di ka maka gore mo Jehova a re lebelele a re bone re thilafele fote dya maka gore re sinye ka matla. (Mar. 7:21-23; Jak. 1:14, 15) Re hloka Jehova gore a re gelepe gore re thogo hlula dilo tso di ka re wokang gore re make dilo tsa go sa loka. Jeso mo a kgopela ga thapelo yage ya mošupetso, o yye a tšhela le mantsu yawa ya gore: “Re gelepe gore re sa phiriketsege, o re phonise ga wa pelo ye phifadu.” (Mat. 6:13) Jehova wa di nyaka go re gelepa, mara di nyaka re mo kgopele gore a re gelepe. Ka nthago ga mo re šele re rapele gore ba re gelepe, di nyaka re liketse ka matla gore re kganele kgole le dilo tsa gore di ka re woka. w23.05 6-7 ¶15-17

Mo bo ba šadhiyeng ba tseyela gedimo senghana so ba nang naso le Papa wa bona wa legedimong, ba dula ba tikemisela go maka tso ba ba yetetsang ka tsona tsa gore di ba gelepa gore ba kganele kgole le dilo tsa gore di ka ba bakela mathatha ya gore ma ka šepisa taba ya bona ya go nyakanana. Bo ba nang le senghana sa go tiya le Jehova ba karakara ka matla gore ba yekisele mekgwa yage ya go tshwana le go kwelana go baba, go lefisa pelo le go tshwarelana. (Maef. 4:32–5:1) Mo bo ba tseyanneng ba na le mekgwa yone, di ba lula gore go nyakanana ga bona go fo ya go hluhlutela. Mogageru wa mosadi ye ba reng ke Lena, wa gore o na le mengwaga ya go teya ka ku ga 25 a šadhiye o re, “Di lula gore o mo nyake ka matla le go mo hlompa motho wa gore o tlalele ga tso tsa Modimo.” Lebelela mošupetso wa ka ho Bhayibeleng. Mo Jehova a kgeta monna le mosadi ba gore go nyoko ba babelegi ba Mesiya wa gore o sa tla, o kgetiye Josefa le Mariya ga ditlogolwane tsa go tlala tsa Dafita. Ke ntaba mara? Ye mongwana le ye mongwana ne a na le senghana sa thina le Jehova fote Jehova ke mo a di tšiba gore ba nyoko yetisa taba ya go nyaka yene ku mahlong go phala mošadho wa bona. w23.05 21 ¶3-4

Le mo yi le gore Moyetamahlong wa rune Jeso o felegelele mara magageru ya a ma kgetiyeng gore ma yete mahlong ho lefaseng a maa felegelela. Go ka ba ntshitshire gore re ba theetsele ka matlamatla mo ba re re make selo sa gore a re nyake go se maka. Petro wa lepostola le yene di yye dya mo makegela tsa gore a sa nyake go theetsela. Nakwela lengeloyi le botsa Petro gore a je phoolwane ya gore ka tlase ga Molawo wa Moše ne yi sa yela o yye a gana go yi ja—aa gana ga ggoši mara ga kararo! (Meber. 10:9-16) Anthe ke ntaba a ganne? Taba yo ba mmotsang yona gage ne yi sa kwale. Ka nthoko ye nngwana Pawulo wa lepostola o yye a theetsela mo banna ka babedi ba Makreste ba gore ba šele ba gudiye ba ku Jerusalema ba yye ba yeletsa mo gore a tseye kanne ya banna a ye nabo tempeleng fote a ye a make mmereko wa go tiyedisa go šupetsa gore o latelela Molawo. Pawulo ke mo a di tšiba gore Makreste ke mo ma sa sa le ka tlase ga Molawo wone. Fote ke mo a sa sinya selo le ka go twii. Le mo go le ka mokgonone, “ka motshwana wa gona Pawulo a tseya banna bala ba ya ba hlapa.” (Meber. 21:23, 24, 26) Taba ya Pawulo ya gore o yye a theetsela yi yye ya maka gore ba mamarelane go be selo ka ssoši.—Marom. 14:19, 21. w23.10 10 ¶15-16

O ka tseya gore go tšhaba a go nape go hlokega gore batho ba be le senghana sa gabutši. Mara, bo ba nyakang go ba le senghana sa thina le Jehova “baa mo tšhaba.” Ka mokana ga rune di nyaka re gotetsa taba ya go tšhaba Jehova di sa yi ka gore ke botala re mmerekela kela dho. Mara anthe mo ba re go tšhaba modimo ba ra gore king? Motho wa gore ga Modimo o mo tšhaba gabutši o mo nyaka ka matla fote a ka sa make selo sa gore se ka kwaletsa senghana so a nang naso Naye. Le Jeso wa mo “hlompa Modimo.” (Maheb. 5:7) A sanka a tšhaba Jehova lela la go ro hlagasela. (Jes. 11:2, 3) Mara ke mo a mo nyaka tsa nkare ke moka fote a ro di nyaka go mo theetsela. (Joh. 14:21, 31) Go fo tshwana le Jeso, re mo hlompa ka matla ga Jehova fote re mo thinyela letolo ka taba la gore O gabutši ka matla, o hlalefiye, o lukiye fote o na le matšhika. Re ya di tšiba gore Jehova o re nyaka ka matla fote aa di tseyele fase tso re di makang mo a re yetetsa. Jehova o kwa go baba mo re sa mo theetsele mara mo re mo theetsela re mo jabodisa pelo.—Pis. 78:41; Diy. 27:11. w23.06 14 ¶1-2; 15 ¶5

Mo Kgoši Uziya a thomisa go ba le matšhika, o yye a lisetsa go leboga Jehova ga dilo ka mokana ga tsona tsa gabutši tso Jehova a mo makeleng tsona. Re tšhuta ying? Re ko ba re maka gabutši mo re dula re gopola gore ke Jehova ye a re neyang dilo ka mokana ga tsona tsa gabutši tso re di jabolelang mo re kene re phela le ga mmereko wage. A di nyake re titeya sekguba re kganya ka taba la dilo tso re kgonneng go di segelela, mara di nyaka re leboge Jehova ga dilo tsone re kgonneng go di segelela. (1 Makor. 4:7) Di nyaka re tinyanafatse, re gopole gore a re ya yenela fote di nyaka ba re wolole. Mogageru ye mongwana wa gore o na le gana hala ga bo 60 ya mengwaga, o ngwadiye gore: “Ke tšhutiye gore di sa nkwisi go baba kela dya nkgongwetsa mo ba bangwana ba bona tso ke di kekemisiyeng. Mo ba n’wolola ga dilo tsa bophokophoko tso ke felang ke di maka, ke liketsa go potolla ke mokane ke ye mahlong ke berekela Jehova ka mokgo nka kgonang.” Nnete ke gore, mo re theetsela Jehova fote re dula re tinyanafatsiye, re nyoko jabola tsa mannete mo re kene re phela.—Diy. 22:4. w23.09 10 ¶10-11

Ne di nyaka gore Makreste ya ku botala ma tiyisele. Mathatha ya ne ba gahlana nawo ne ma tlwayelegiye mara ne go na le ya mangwana ya gore ba gahlana nawo ka taba la gore ke bona Makreste. Ba go tlala ba bona ne ba sa hlorisi fela ke ba go yeta mahlong ba sedumedi sa Sejuda le ba go lawola mmušo wa Roma mara ne ba hlorisa ke mong mašaga ya bona. (Mat. 10:21) Fote ne di nyaka gore ba bone gore ba sa kutšetsele ke matsaka ya ma tšhutisang ke ba go kgeloga ba gore ne ba liketsa ka matla gore ba yahluganye phutego. (Meber. 20:29, 30) Ke nnete gore Makreste yane ma yye ma tiyisela. (Kut. 2:3) Ka mokgo mang? Ma yye ma sa takisi maahlo mošupetso wa go tiyisela wa gore wo tšwa ka Mangwalong wa go tshwana le wa Jobo. (Jak. 5:10, 11) Ba yye ba rapela gore ba be le matšhika. (Meber. 4:29-31) Fote ba yye ba sa lebale gore Jehova o nyoko ba rufa mo ba ka fo tiyisela. (Meber. 5:41) Le rune re ka di kgona go tiyisela mo nkare re dula re tšhuta ga mešupetso ya go tiyisela ya gore yi ka Lentsung la Modimo, ga dikgatiso tsa rune re boya re ghayela ka tso re di badiyeng. w23.07 3 ¶5-6

Le ka letšatši la mohlolo Jehova le Jeso ba ka sa tsoge ba re ngalele. Ka nthago ga mo Petro wa lepostola a phigiye Jeso, ne di nyaka a segelele sepheto se segolo. Ayitsano o nyoko lisetsa kela o nyoko fo ya mahlong a le lelata la Kreste? Jeso o yye a kgopela Jehova gore tumelo ya Petro yi sa šepi. Jeso o yye a botsa Petro ka taba yone a yi rapeleleng fote ne a sa kamake gore ka nthago Petro le yene o nyoko tiyisa magagabo. (Luk. 22:31, 32) O fo nagana gore di yye dya mo kgomoletsa ka mokgo mang ga Petro mo a gopola mantsu ya Jeso! Mo di nyaka gore re segelele sepheto se segolo, Jehova a ka berekisa ba go disa gore ba re gelepe re thogo dula re tshepega. (Maef. 4:8, 11) Go fo tshwana le mo Jehova a yye a pasopa Petro le mapostola ya mangwana ka tso ba di gayelang, le rune a ka sa lisetsi go re pasopa ka tso re di gayelang mo re ka yetisa mmereko wa go tšhomayela ku mahlong mo re kene re phela. w23.09 24-25 ¶14-15

Jehova o bona le mong se senyananyana sa gabutši so re se makelang ba bangwana. O se tseya go le sehlabelo sa mayemo ya gedimo ka matla fote go le sekoloto sa gore o nyoko se patela. Mo nkare sa le wa bereka o le lelata la ka ho phutegong kela o le mogolo, Jehova o gopola mmereko wo o wo makiyeng ku botala le taba ya gore o mo nyaka ka matla ke yona yi go hlohletseleng gore o mmerekele. (1 Makor. 15:58) Fote o lebelele mo o kene o ya mahlong o šupetsa go nyakanana. Jehova o nyaka gore ka mokana ga rune re tšheletse taba ya go mo nyaka ka matla le go nyaka ba bangwana. Re ka tšheletsa taba ya go nyaka Jehova ka matla ka go bala Lentsu lage, re ghayele ka lona fote re bolabole naye ka thapelo. Re ka gudisa taba ya go nyaka magageru ka go ma makela dilo tse dingwana. Mo go nyakanana ga rune go ya mahlong go gula, re nyoko napa re šutela thina ka matla le Jehova le magageru. Fote re nyoko tikwisa ka senghana sone go ya go yye! w23.07 10 ¶11; 11 ¶13; 13 ¶18

Di nyaka Mokreste ye mongwana le ya mongwana a tikgetele gore o nyaka go yalafiwa byang. Phela ka ho Bhayibeleng go fo ba le melawo ya go sa tlala ya gore yi yama sepheto sa Mokreste gore o nyaka go yalafiwa byang, ya go tshwana le go kganela kgole le madi le go maka tsa madimona. (Meber. 15:20; Magal. 5:19, 20) Ga taba yonone, di nyaka ye mongwana le ye mongwana a tikgetele. Di ka makega gore a re kamake gore mokgwa wo mongwana wo re wo tšibang wa re gelepa kela wa re kwaletsa mara di nyaka re hlompe tso magageru ma di kgetiyeng ga taba ya gore ma nyaka go yalafiwa byang. Ga taba yowa, di nyaka re sa lebale dilo tsa go latela ke tsowa: (1) Ke Mmušo wa Modimo fela wo nyoko fetsang ka dilo ka moka re boya re yalafiwa go ya go yye. (Jes. 33:24) (2) Mokreste ye mongwana le ye mongwana di nyaka a “tshepe” gore se sengwana le se sengwana so a se kgetang ga taba ya go yalafiwa ke mong sona. (Marom. 14:5) (3) Re sa yahlule ba bangwana kela ra beya sa gore se nyoko ba phiriketsa. (Marom. 14:13) (4) Makreste maa nyakanana fote ma di kwisisa ka matla gore mo phutego go le ngata ka yyoši sosone ke selo se segolo ka matla go phala tso bonabeng ba di kgetang.—Marom. 14:15, 19, 20. w23.07 24 ¶15

Ayitsano o yi tseyela gedimo yo ya gore ke wene monghana wa Jehova? A re kamake gore o yi tseyela gedimo! Go tlugisela ku botala, batho ba go tlala ka matla le bona ke mo ba tikwa go tshwana nago. (Pis. 104:33, 34) Ba go tlala ba tikonne dilo gore ba thogo berekela Jehova. Ke mo go fo ba ka mokgonone ka batho ba Israyele ya ku botala bo ba reng ke Manazari kela ba go tineyela. Lentsu lowa le fo napa le yi yedisa ya gore ke mo go na le Maisrayele ya mangwana ya go ba le matšato fote ma tikona tse dingwana gore ma berekele Jehova ka mokgwa wa go hlawolega. Molawo wa Moše ke mo wo dumela gore monna kela mosadi a ka makela Jehova kano ya go hlawolega ka go kgeta go fetsa nako a phela go le Lenazari. (Dip. 6:1, 2) Ga kano yone, kela go tshepisa, ke mo go kena le taba ya go latelela melawo ya gore Maisrayele ya mangwana ka mokana ga wona ke mo ma sa wo latelele. Leisrayele ke mo le ka maka king gore le make kano ya go ba Lenazari? Di šupa nkare Leisrayele la mohlobo wonone ke mo le tšhofa ke taba ya gore ga Jehova le mo nyaka tsela tsa go sa hlayisege fote le leboga le šwennye gore o le rufiye ka matla.—Dot. 6:5; 16:17. w24.02 14 ¶1-2

Ka ho Bhayibeleng mantsu ya Seheberu ya gore “go tshepega,” kela “go nyakanana tsa mannete” ma hlatolla ka mokgo Modimo a šupetsang malata yage gore o ma nyaka ka matla. Bhayibele yi boya yi bolabola ka taba ya go tshepega ya gore malata ya Modimo ma dula ma šupetsana yona. (2 Sam. 9:6, 7) Go tshepega ga rune go ka ya mahlong go kene go hluhlutela mo nako yi kene yi ya. Tla re boneneng ka mokgo go tshepega ga Daniyele go yyeng gwa tiyelela ka gona. Ke ga go tlala ga gore ne di nyaka Daniyele a šupetse gore wa tshepega ga Jehova kela dho. Mara nakwela a na le mengwaga ya go teya ka ku ga 90 o yye a gahlana le tsa go thathafa ka matla. Dindhuna tso ne di berekela kgoši Dariyase ke mo di hloyye Daniyele fote ne di sa hlompe le Modimo wage. Byalo ba yye ba polana gore Daniyele a bolayiwe. Ba yye ba ntsha molawo wa gore wo nyoko liketsa Daniyele gore ayitsano o nyoko tshepegela Modimo wage kela kgoši. So Daniyele ne a tshwanele go se maka ke go šupetsa gore wa tshepega ga kgoši, ke gore a lisetse go rapela Jehova 30 ya matšatši. Daniyele o kgetiye go tshepegela Jehova.—Dan. 6:12-15, 20-22. w23.08 5 ¶10-12

Jehova o nyaka gore re ye mahlong re šupetsa magageru gore re ma nyaka ka matla. Mo ye mongwana a šitega go šupetsa mokgwa wa Sekreste, re ka fo tseya gore wa di nyaka go latelela ditšhiko tsa Bhayibele, mara o fo ba a yye a thelela ke mokane a maka dilo a sa nagana. (Diy. 12:18) Modimo o ma nyaka ka matla malata yage ya go tshepega le mo ma šitega ga tse dingwana. Mo go na le tsa gore a ra di maka gabutši, aa nape a re lisetsa; fote aa duli a kwatiye. (Pis. 103:9) Di nyaka re tseyele ga Papa wa rune wa gore wa tshwarelana! (Maef. 4:32–5:1) Ye nngwana yo di sa nyakeng re yi lebala ke gore di nyaka re dula re mamarelanne le magageru mo go kene go šutela nako ya gore go fele ka lefase lowa. Tsa gore re nyoko hlupegisiwa go baba di nyaka re fo dula re di yemele. Re ka fo tsoga jele ka taba la tumelo ya rune. Mo tsotsone di ka makega, re nyoko kwa re napa re nabela go ba thina ka matla le magageru.—Diy. 17:17. w24.03 15-16 ¶6-7

Mangwalo ma tshwere ditaba tsa bo ba gore ba sa gola ba gore ba yye ba šutela thina le Jehova, a ba rufa ke mokane dilo dya ba sepelela gabutši mo ba kene ba phela. Ye mongwana wa bona ne go le Dafita. Mo a sa gola, o yye a kgeta go ba monghana wa Modimo ke mokane ka nthago a ba kgoši ya gore ya tshepega. (1 Mag. 3:6; 9:4, 5; 14:8) Mo o bala ka Dafita, mošupetso wage wo nyoko go hlohletsela gore o berekele Jehova o kene o tshepega. Kela o ka tšhuta tsa go tlala ka go lebelela mošupetso wa Mareka kela wa Thimothi. O ko di boneng gore ba berekele Jehova mo ba sa gola fote ba yye mahlong ba mmerekela ba kene ba tshepega. Phela gore lephelo lago le nyoko ba byang ku mahlong le di ya ka gore wene o maka ying gana byalo. Mo o ka tshepa Jehova wa sa tshepi wenebeng, yene o nyoko go gelepa gore o segelele dipheto tsa gabutši. O ka ba le lephelo la gore le ya jabodisa la gore fote le tlele morufo. O sa lebale, Jehova o di tseyela gedimo tso o mo makelang tsona. A wo šiyo mokgwa wo mongwana wo o ka berekisang lephelo lago gabutši go phala go berekela Papa wa rune ye a re nyakang ka matla, Jehova. w23.09 13 ¶18-19

Pawulo wa lepostola ke mo a di tšiba tsa gore magagabo ya Makreste a maa yenela. Mo re beyisa, ke mo ba sa mo tseye gabutši mo a sa tšo thomisa go ba ka mo phutegong. (Meber. 9:26) Ka nthago, ba bangwana ke mo ba mo seba gore ba mo sinye lebitso. (2 Makor. 10:10) Pawulo o bonne monna wa gore o butšwiye a segelela sepheto sa gore se ka fo ba se kwaletsiye ba bangwana. (Magal. 2:11, 12) Monghana ye mongwana ye mogolo wa Pawulo ye ba reng ke Mareka, o yye a mo tšebisa ka matla. (Meber. 15:37, 38) Pawulo ne a ka fo sepelela ku kgole le batho bone a re ba mo kwisiye go baba. Mara o f’lo ya mahlong a tseya magagabo gabutši, a boya a berekela Jehova a kene a tshepega. Pawulo o gelepiye king gore a sa khwanyudisi? Pawulo ke mo a ma nyaka ka matla magagabo. Pawulo ke mo a šupetsa batho ba bangwana gore o ba nyaka ka matla, tsotsone di makiye gore a sa make gore tso ba kekemisang ga tsona go be tsona tso a di gorolelang maahlo, mara ke mo a lebelela ka matla mekgwa ya bona ya gabutši. Taba yo ya gore ke mo a ba nyaka ka matla yi mo gelepiye ga Pawulo gore a make tso ba di hlayyeng ga temanyana ya lekgono. w24.03 15 ¶4-5

Bhayibele yi na le mešupetso ya go tlala ya go šihlela taba ya gore go temeka ke mong selo se segolo. Tseya ka mošupetso wa Isaka. Nakwela Isaka a dula nageng ya Mafilisita ku Gherare, bayagelani bage ba gore ba na le jelase ba yye ba fatelanya didiba tsa gore di yepiye ke malata ya papage. Mara Isaka a sanka a lwela gore didiba tsone go be tsage, o yye a fo tseya ba mutši wage ke mokane ba ya ga poleke ya kgole fote a yepa didiba tse dingwana. (Gen. 26:12-18) Mara Mafilisita ma f’lo re meetši yane ke ya wona. Ga dilo ka mokana ga tsona, Isaka o yye a šupetsa gore o bebiye. (Gen. 26:19-25) O gelepiye king gore a dule a kgibiye le mo ba bangwana ne ba tikemisele go mo šuhlašuhla? Ke mo a libelele mošupetso wa babelegi bage fote o tšhutiye mokgwa wa go beba wa Abhrahama le taba ya Sara ya gore ne a ‘yitseri tse fote a bebiye.’—1 Pet. 3:4-6; Gen. 21:22-34. w23.09 15 ¶4

Jehova o yye a romela Morwayi wage wa letšibula lefaseng gore a tšhutise batho ka Mmušo fote a neyele ka lephelo lage gore a re lepolle ga taba ya go sinya le likgu. Ke mokane Jehova o yye a tsosa Jeso gore a boyele legedimong gore a lawole go le Kgoši ya Mmušo wa Modimo. Phela mong taba ye kgolo ka ho Bhayibeleng ke gore lebitso la Jehova le nyoko hlatswiwa mo a kene a segelela tso ne a tikemisele go di maka ho lefaseng a berekisa Mmušo wage wa gore wo lawola ke Kreste. Tso Jehova a tikemiseleng go di maka di ka sa tšhentšhi. O tshepisa gore dilo ka mokana ga tsona di nyoko makega ka mokgo yene a hlayyeng. (Jes. 46:10; Maheb. 6:17, 18) Lefase le nyoko ba pharadeyisi, fote ditlogolwane tsa Adamo le Efa tsa gore di yenele di nyoko ‘tikwisa ka lephelo go ya go yye.’ (Pis. 22:26) Mara tsowa a yi tsona fela tso Jehova a tikemiseleng go di segelela. Selo se segolo so a tikemiseleng go se maka ke gore a gahlanise malata yage ka mokana ga wona ku legedimong le ho lefaseng gore go be selo ka ssoši. Ke mokane batho ka mokana ga bona ba nyoko theetsela Jehova go le yene ye a ba Lawolang. (Maef. 1:8-11) Nje mokgwa wo wa go bafala wo Jehova a wo berekisang gore a segelele tso a tikemiseleng go di maka, a wo go šiyi o yahlamme? w23.10 20 ¶7-8

Mo Majuda ya gore ma tlugiye Bhabhilona ma segela Jerusalema, ke mo di soko ya kgole mo ba thomisa go goga go baba ka taba la go gayela sekwetše le tsa go sa sepele gabutši tsa dipolotiki ba boya ba ro phigisiwa. Ba bangwana ba makiye ke tsotsone mo ba šinya ba šitega le go nagana ka tsa go yaga tempele ya Jehova ka bonyuwane. Ke mokane Jehova o yye a roma baporofeta ka babedi, Haghayi le Zakariya, gore ba ye ba hlohletsele batho bowa gore ba be le matšato le go ba tiyisa ka matla. (Hagh. 1:1; Zak. 1:1) Mara mo go šele go fitiye gana hala ga 50 ya mengwaga, Majuda ma yye ma boyela ga tsetsela tsa go lepoga mo ma maka dilo. Ezera, wa gore ke mo go le segele ga tsa go kopolla Molawo, o yye a tloga Bhabhilona a ya Jerusalema gore a ye tiyisa batho ba Modimo gore tso tsa morapelo wa mannete go be tsona tso ba di yetisang mahlong. (Ezera 7:1, 6) Diporofeto tsa Haghayi le Zakariya di gelepiye batho ba Modimo ba ku botala gore ba ye mahlong ba mo tshepa ga Jehova le mo ba ba phigisa, byalo le rune di ka re gelepa gore re di tshepe tsa gore re ka tisamela ka Jehova le mo re kwa nkare re fo ya re kene re logela.—Diy. 22:19. w23.11 14-15 ¶2-3

Re ba šupetsa ka ying ga magageru gore re ba nyaka tsa mannete? Mokgwa wo mongwana wa go maka tsotsone nka go ba kgomoletsa. Re ko di kgoneng go ‘ya mahlong re kgomoletsana’ mo re ka fo tšhofa ke go kwelana. (1 Mathes. 4:18) Re ka maka byang gore mollo wa rune wa go nyakanana wo sa timi? Ka go karakara gore re tshwarele magageru mo ba maka tsa go fo tikela ku. Ke ntaba go le taba ye kgolo ka matla lekgono gore re nyakanane tsa mannete? Theetsela gore Petro o re ke ntaba, o re: “Dilo [ka mokana ga tsona] di bakiye mafelelong, byalo … le nyakanane ka matla.” (1 Pet. 4:7, 8) Mo nako yi kene yi šutela ka matla ya gore go fele ka lefase lo, re ka yemela gore go makege ying? Jeso o hlayye botala mo a bolabola ka malata yage, a re: “Le nyoko hloya ke ditšhaba ka mokana ga tsona ka taba la lebitso laka.” (Mat. 24:9) Mo re nyaka go hlula go hloyiwa ka mokgonone, di nyaka re dule re mamarelanne. Mo re kene re maka tsotsone, Sathane o nyoko teya fase mo a re o liketsa go re yahluganya, ka taba la gore go nyakanana go makiye gore re be selo ka ssoši.—Mafil. 2:1, 2. w23.11 13 ¶18-19

Nnete ya Lentsu la Modimo yi na le matšhika ya go sa hlayisege. Mo re tšhutisa batho ka Jehova re boya re ba šupetsa gore gabutšibutši o byang, re bona go makega selo se sengwana sa go jabodisa. Hala ga gore Sathane o kwadiye ka matsaka gore ba tšhirege gwa bulega pitšanepitšane, ke mokane batho bowa le bona ba thomisa go tshwana le rune ka mokgo re tseyang Papa wa rune wa gore o re nyaka tsa nkare ke moka. Ba šala ba sa sa tšiba mo ba di kwelela gore matšhika yage a ma na mokgero. (Jes. 40:26) Ba napa ba mo mamarela mo ba kwa gore aa na lešidi le ka gonyana. (Dot. 32:4) Difahlego tsa bona di napa di yela ‘paa’ mo ba di bona tsa gore aa šiyo wa gore wa le beya gage ka go hlalefa. (Jes. 55:9; Marom. 11:33) Fote ba kwa di ba kgomoletsa mo ba kwa gore o re nyaka tsela tsa go sa hlayisege. (1 Joh. 4:8) Mo ba kene ba šutela ga Jehova, ba napa ba di tshepa ka matla tsa gore ke bona bana bage ba gore ba nyoko phela go ya go yye. Lešuba lo le thulegiyeng la gore go be rune re gelepang batho gore ba šutele thina le Papa wa bona le re jabodisa ka matla! Mo re maka ka mokgonone, Jehova o re “re berekisana” naye.—1 Makor. 3:5. w24.02 12 ¶15

Mo nkare ba kene ba go tšhutisa Bhayibele kela mo nkare o gudisa ke babelegi ba gore ke Dihlatse, ayitsano o kene o nagana ka taba ya go kena meetšing? Yi bafele ka matla taba yone! Mara mo o soko kolobetsiwa, di nyoko nyaka gore o thomise ka go tineyela ga Jehova. O tineyela byang ga Jehova? Wa rapela o mo tshepisa gore o nyoko berekela yene a ntoši wa boya wa maka gore tso di nyakang ke yene di yete mahlong lephelong lago. Gabutšibutši, o tshepisa Jehova gore o nyoko ya mahlong o mo nyaka “ka pelo yago ka mokana ga yona, bowene byago ka mokana ga byona, ka monagano wago ka mokana ga wona le ka matšhika yago ka mokana ga wona.” (Mar. 12:30) Tsa go tineyela o di maka o tikwalele kayekaye o le ntoši, makhukhung, ke tsago le Jehova. Mara mo o šele o kolobetsiwa, di bona ke batho ka moka; di ba šupetsa gore wene o tineyele. Tso o di tshepisang mo o tineyela ke kano ya go hlawolega fote Jehova o yemele gore o di make, byalo di nyaka o ro loma le molomo wa ka fase.—Mmo. 5:4. w24.03 2 ¶2; 3 ¶5

Batho ka mokana ga bona ba gore ba šadhiye ba na le tso ba ghulanang natso. Bhayibele yi fo napa yi di beya lekgwaying tsa gore batho ba gore ba šadhiye “ba nyoko gahlana le dintshitshire.” (1 Makor. 7:28) Di maka king mara? Di maka ke gore batho bo ka babedi ba gore ba gahlanisiye ke go šadha a baa yenela, mekgwa ya bona a yi tshwane fote tso ba kwanang natso le tso ba sa kwaneng natso a di tshwane. Bo ba šadhiyeng ba ka fo ba ba tšwa ga ditšo tsa go sa tshwane fote ba sa gudisiwa go tshwana. Mo nako yi kene yi ya, go ka nyarela mekgwa ya gore ke mo yi sa bonale mo ba soko šadha. Dilo tsone di ka leya mathatha. Motho wa gore o šadhiye di nyaka a lebelela gore yene o makiye ying sa gore se ka fo ba se napiye se galakisa taba ke mokane a bone gore ba ka yi tumula byang, mara o kraya a bona bothatha go le ye a šadhiyeng naye. O ka kraya ba šele ba re go kawone ba šupetsane dikodi, ba re tsa bona di ko loka mo ba ka fo sudisa, ye mongwana le ye mongwana a rwale dijumbha tsage, a tšwe ka yage pata. Mara nje ke tsona? Awwa. Jehova o re monna le mosadi ba gore ba šadhiye ba dule ggoši le mo nkare ye mongwana aa berekege. w24.03 16 ¶8; 17 ¶11

Ka nthago ga mo o šele o tineyele o boya o kolobetsiwa, tshepo ya go phela go ya go yye ga lefase la gore ke pharadeyisi mo o ya mahlong o tšhuta tsa go tlala fote o butšwa ga tso tsa Modimo, tshepo yago yi napiye yi hluhlutela. (Maheb. 5:13–6:1) Nakwenngwana o bonne o makegela ke tso di hlayang ke Maroma 5:2-4. O yye wa gahlana le dintshitshire tsa mohlobohlobo, mara o tiyisele ga tsona ke mokane wa di bona mo Jehova a go yamogela. Ka taba la gore wa di tšiba tsa gore Jehova o go nyaka ka matla fote wa go yamogela, gana byalo o na le dilo tso di makang gore o sa kamake gore o nyoko di kraya tso a di tshepisang. Tshepo yago yi tiyye mong go tiya go phala mathomisong. Ke mong yona-yona ho gago, ba bangwana ba ka sa di kwisisi. Yi go yama la go sa hlayisege, yi yama selo se sengwana le se sengwana ga lephelo lago fote yi tšhentšha ka mokgo o tshwarang ba genu kela mutši wago, ka mokgo o segelelang dipheto re ra le mong ka mokgo o berekisang nako yago. Pawulo wa lepostola le tokegela ka taba ye nngwana ye kgolo ga taba ya tshepo yo o nang nayo ka nthago ga mo Modimo a go yamogele. O tshepisa gore tshepo yago yi nyoko makega.—Marom. 15:13. w23.12 12-13 ¶16-19

Mo re tlela ke tsa go baba, o ka kraya re sa sa tikwa, re sa sa nagana kela go maka dilo go tshwana le matšatši. Re ka fo kwa nkare re fo talagana. Jehova o re gelepa ka mokgwa mang mo re yilametsa ke tsa mohlobo wonone? Wa re tshepisa gore o nyoko re tiyisa. Mo sekepe se gahlana le sedingwane, se ka thomisa go tseyatseya ke moya se šinye se maka nkare se nyoko ketuga. Dikepe tsa go tlala di na le dilo tsa go maka gore di sa rwale ke moya tsa gore ba di beyye ka ku tlase, mahlaya ka moka ya sekepe gore se fo re kikinini. Dilo tsowa di ka gelepa ka matla gore sekepe se sa yi se ghulanya matlapa, dya maka gore seyemo se kgibe le gore bo ba kalammeng sekepe ba sa nape ba tšhoga ka matla. Mara dilo tsa go tlala tsa go gelepa sekepe gore se sa tseyatseyege di bereka gabutši mo sekepe sone se kene se sepela. Le rune Jehova o nyoko re gelepa gore re fo re kikinini mo re ka fo ya mahlong re sepela ka go tshepega mo re tlela ke tsa go re phika. w24.01 22 ¶7-8

Mo o kwa o tšhaba, tiputsise gore, ‘King sa gore Jehova o šele a se makiye?’ O fo nagana ka dilo tso a šeleng a di makiye. Mo re beyisa, mo re ‘lebelela gabutši’ ka mokgo Jehova a pasopang dinonyane le mabhlomu—tsa gore aa di maka ka setshwano sage le tsa gore a di kgone go mo rapela—sosone se nyoko maka gore re nape re mo tshepa gore le rune o nyoko re pasopa. (Mat. 6:25-32) Nagana le ka so Jehova a se makeleng bo ba mo rapelang. O ka fo bala ka motho wa ka Bhayibeleng wa gore o šupetsiye gore o na le tumelo ya go tiya, kela o ka fo bala ka ditaba tsa lelata la Jehova la gana byalo. Go tokegela gana hone, ghayela ka taba ya gore Jehova o šele a šupetsiye gore wa tihlupa ka wene. O makiye byang mo a go goga gore o tle nneteng? (Joh. 6:44) O go fetodiye ka mokgwa mang mo o rapela? (1 Joh. 5:14) Di go gelepa go segela kaye ka moka matšatši tso Morwayi wage wa gore o mo nyaka ka matla a go makeleng tsona ka sehlabelo sage?—Maef. 1:7; Maheb. 4:14-16. w24.01 4 ¶6; 7 ¶17