Re ya Nyakanana Fote a re Makane Lešidi le mo Batho ba na le Dipelo tse Diphifadu (Sekopa Sa 3 Ga 4 Ya Tsona)

1-3. (a) Go ya ka Pisalema 5:4-6, Jehova o tikwa byang ka dilo tsa go befa? (b) Ke ntaba re ka re go hlorisa bananyana a go yelane le “molawo wa Kreste”?

JEHOVA MODIMO o silikisa ke dilo ka mokana ga tsona tsa go befa. (Bala Pisalema 5:4-6.) Tsotsone di ra gore le tso tsa go hlorisa bana ka go ba maka tsa maroga aa kwane natso—ka matlamatla tsa go ba maka lešidi ka tšhinghi! Le rune Dihlatse tsa Jehova re mo yekisela ka go nyenya mokgwa wa go hlorisa bana fote a re nyake le go wo bona ka ho phutegong ya Sekreste.—Maroma 12:9; Maheb. 12:15, 16.

² Mokgwa wo mongwana le wo mongwana wa go hlorisa bana wo ganana le “molawo wa Kreste”! (Magal. 6:2) Ke ntaba re reyano? Ga hlogotaba ya go fela re tšhutiye gore molawo wa Kreste ke dilo ka mokana ga tsona tso Jeso a di tšhutisiyeng, ka tso ne a di bolabola le ka maphelelo yage, fote molawo wone wo šupetsa gore di nyaka re nyakane ka matla fote re sa makane lešidi. Ka gore Makreste ma lawola ke molawo wone, ma maka gore bana ba tikwe ba pasopegiye fote ba nyakiwa tsa mannete. Byalo mara motho ye a hlorisang ngwana aa mo naganele, o naganela yene a ntoši, fote dilo tsone a di makang tsa go sa loka di maka gore ngwana a tikwe a sa pasopega fote le go nyakiwa dhoo.

³ Sa go kwisa go baba ka matla ke gore taba yowa ya go hlorisiwa ga bananyana ka tsa maroga yi ro wa, fote taba yowa yi gona le ho ga Makreste ya mannete. Anthe ke ntaba mara? “Ba go sa loka le ba go timakisa” baa yeketsega fote ba leketsa go gogomela le ka ho phutegong. (2 Thim. 3:13) Go tokegela gana hone, ba bangwana ba go tipotsa gore ke bona Dihlatse, ba yye ba woka ke dilo tsone tsa go silikisa, ba fetsa ba hlorisiye bana ka tsa maroga. Byalo tla re bolaboleneng gore ke ntaba taba ya go hlorisa bana go le selo se segolo. Ke mokane re nyoko bona so di nyakang bagolo ba se maka mo motho a makiye dilo tsa mohlobo wonone tsa go tshosa, tsa go tshwana le go hlorisa bana, fote re nyoko bona gore babelegi ba ka pasopa bana ba bona byang.b

GO SINYA KA MATLA

4-5. Mo motho a hlorisa ngwana o mo sinyela ka matla ka mokgo mang?

⁴ Go hlorisa bana go na le maphomela ya gona. Di kwaletsa ye a hlorisiwang le bo ba mo nyakang matla—mašaga yage le magagabo ya Makreste. Taba yowa ya go hlorisa bananyana ke go sinya ka matla.

⁵ Go sinyela ngwananyana.c Go kwisa ba bangwana go baba le go ba hlorisa ke go ba sinyela. Ga hlogotaba ya go latela, re ko di boneng gore ye a hlorisang ngwana o mo kwaletsa ka matla la go sa hlayisege. O maka gore ngwanene a sa sa tshepa motho le ka go nyana, a fo dula a tikwa gore aa pasopega. Byalo bananyana ba tshwanele gore ba pasopiwe gore ba sa ba make dilo tsowa tsa go befa, fote bowa ba gore ba makiwwe dilo tsowa tsa go befa di nyaka re ba kwela go baba le go ba gelepa.—1 Mathes. 5:14.

6-7. Ke ntaba re re go hlorisa bana ke go sinyela phutego le ba go lawola ba mmušo?

⁶ Go sinyela phutego. Mokreste ye go krayegang gore wa di maka tsotsone tsa go hlorisa bana o poyila phutego ka matla. (Mat. 5:16; 1 Pet. 2:12) Mo a maka tsotsone di ra gore aa naganele Makreste ya go tshepega ya dimiliyoni ya gore “ma lwa ntwa ye kgolo ya tumelo”! (Juda 3) Re ka sa di kgone go tiyisela motho wa gore aa tišupetse a nyaka go tšhentšha ga tsa go befa tso a di makang fote a boya a poyilanya lebitso la phutego.

⁷ Go sinyela ba mmušo. Makreste ma tshwanele ma “hlompe ba go lawola ba mmušo.” (Maroma 13:1) Re šupetsa gore re tinyafatsiye ka go hlompa molawo wa naga. Mo Mokreste a ba le molato ka go tshela molawo wa naga, go tshwana le mo a maka tsotsone tsa go hlorisa bana, gabutšibutši o maka dilo tsa gore le ba mmušo a ba kwane natso. (Tshwanisa ka Meber. 25:8.) Bagolo a yi bona bo ba tshwaneleng go bona gore molawo wa naga wa latediwa kela byang, mara a ba wutege mabošayedi ya ma makiyeng ke motho wa go hlorisa bananyana le maphomela ya gona. (Maroma 13:4) Ye a sinnyeng o tshwanele a bune so a se gašiyeng.—Magal. 6:7.

8. Jehova o go tseya byang go sinyela batho ba bangwana?

⁸ Sa go napa se fetelela ka matla ke go sinyela Modimo. (Pis. 51:4) Mo motho a sinyela motho ye mongwana ke setšha a sinyela Jehova. Nagana ka Molawo wo Modimo a wo neyyeng Maisrayele. Ke mo wo re mo motho a maka motho ye mongwana botsotsi kela go mo hlalefetsa, “aa tshepegele Jehova.” (Lef. 6:2-4) Nnete ke gore Mokreste ye a hlorisang ngwana o maka gore ngwanene a tikwe a sa tšhireletsega—fote tsotsone a di makang ke go sa tshepege ga Modimo. Motho yene o poyila lebitso la Jehova. Ka taba lone, re tshwanele re di tšibe gore taba yowa ya go hlorisa bana ka tsa maroga ke go sinyela Modimo ka matla.

9. Ke taba yifeng ya go tšwa Baebeleng ya gore ke botala mokgahlo wa Jehova o bolabola ka yona, fote ke ntaba?

⁹ Ke botala mokgahlo wa Jehova wo kene wo berekisa Baebele go hlatolla taba yowa ya go hlorisiwa ga bana. Mo re beyisa, Sewokamelo le Awake! di hlatolliye gore bo ba yyeng ba hlorisiwa ka tsa maroga ba ka phela byang ka mabadi ya mošaga wonone, tsa bolabola le ka mokgo ba bangwana ba ka ba gelepang, le gore babelegi ba ka pasopa bana ba bona ka mokgo mang. Bagolo ba yye ba tšhutisiwa di kwala, gore ba ka berekana byang le taba ya go hlorisiwa ga bana ba berekisa Baebele. Mokgahlo wo sa fo ya mahlong wo nyakolla taba yowa ya go maka molato wa go hlorisa bana. Ke ntaba? Gore re thogo di bona gabutši gore mokgwa wa rune wa go berekana le ditaba tsowa wo kwana le molawo wa Kreste.

GO TSHWARAGANA LE DITABA TSA MO MOTHO A SINNYE KA MATLA

10-12. (a) Bagolo ba dula ba gopola ying mo ba tshwaragana le melato ye megolo, fote king so ba hlupegang ka sona ka matla? (b) Go ya ka Jakobo 5:14, 15, bagolo ba leketsa go maka ying?

¹⁰ Mo bagolo ba berekana le taba ya mo motho a sinnye ka matla, a ba lebale gore molawo wa Kreste wo nyaka gore ba šupetse morape wa Modimo gore ba wo nyaka ka matla, fote ba maka dilo tso Modimo a di nyakang le tso a reng di lukiye. Mo bagolo ba di kwelela gore motho o sinnye ka matla, go na le dilo tsa go tlala tso ba tshwaneleng go di nyakolla gore ba thogo bona gore taba yowa yi ya le lefeng. Bagolo ba hlupega ka matla ka taba ya gore lebitso la Modimo le sa thilafatsiwi. (Lef. 22:31, 32; Mat. 6:9) Fote so ba napang ba hlupega ka matla ka sona, ke seyemo sa magageru ka ho phutegong, fote ba di nyaka ka matla go gelepa bo ba yyeng ba hlorisiwa.

¹¹ Go tokegela gana hone, mo o kraya gore ye a makiyeng molato ke wa ka ho phutegong, bagolo ba leketsa ka matla gore mo go kgonega ba mmusetse pateng. (Bala Jakobo 5:14, 15.) Mokreste ye a nabelang go maka dilo tsa go befa ke mokane a feleletsa a di makiye, di ra gore maphelelo yage a ma sa mo jabodisa ga Modimo. Sosone se rela gore senghana sage le Jehova se ya tekateka.d Bagolo ke setšha go le botogotela ga tso tsa Modimo. Ba leketsa ka matla gore ba “bhantiše wa go lwala [ba ra motho yenewa wa gore o sinnye].” Mo bagolo ba mo yeletsa ka Mangwalo, sosone se maka gore senghana sage le Modimo se be gabutši fote, mara tsone di makega mo a tisola tsa mannete.—Meber. 3:19; 2 Makor. 2:5-10.

¹² Di fo ba lekgwaying gore bagolo ba na le mmereko wo mogolo. Ba hlupega ka matla ka morape wo Modimo a ba neyyeng gore ba wo pasope. (1 Pet. 5:1-3) Ba nyaka gore magageru ka mokana ga wona ma tikwe ma sa hlagasele ka ho phutegong. Tsotsone ke tsona di makang gore ho ba kwa taba ya go befa ya go tshwana le go hlorisa bana, ba yakgoswe ba berekana nayo. Lebelela diputsiso tso di nyarelang mathomisong ga direle 13, 15, le 17.

13-14. Nje bagolo baa wo latelela molawo wa mmušo wa go tl’laga motho wa gore o hlorisiye ngwananyana? Hlatolla.

¹³ Nje bagolo baa wo latelela molawo wa mmušo wa go tl’laga motho wa gore o hlorisiye ngwananyana? Eya. Bagolo ba dipolekeng tsa gore go na le molawo wowa ba leketsa ka matla gore ba latelele molawo wa mmušo wa gore mo motho a hlorisiye ngwana ba mo tl’lage. (Maroma 13:1) Melawo yone a yi ganetsane le molawo wa Modimo. (Meber. 5:28, 29) Mo bagolo ba ka fo di kwelela gore mogageru ye mongwana o di makiye tsotso tsa go hlorisa ngwana, ba yakgoswa ba nyakana le mayele ya gore ba ka latela melawo byang gore taba yone yi bigiwe.

¹⁴ Bagolo ba re batho bo ba hlorisiwweng, babelegi ba bona le ba bangwana bo ba tšibang ka taba yone ba sa tšhabe go tl’laga bo ba makiyeng taba yowa ya go hlorisa bana ga bo ba go lawola ba mmušo. Byalo re nyoko re king mo taba yone yi makiye ke mogageru ka ho phutegong ke mokane wa kraya yi šele yi tlele le poleke? Nje Mokreste ye a bigiyeng taba yone o tshwanele a hlupege gore nakwenngwana ke yene a makiyeng gore lebitso la Modimo le sinyege? Dhoo. Ye a sinnyeng ke yene a poyilang lebitso la Modimo.

15-16. (a) Go ya ka 1 Thimothi 5:19, ke ntaba go nyakega dihlatse ka dipedi go ya gedimo pele bagolo ba ka tseya sepheto? (b) King so bagolo ba se makang mo go ka ba go na le ye a hlorisiyeng ngwana ka ho phutegong?

¹⁵ Mo bagolo ka ho phutegong ba tshwere komiti ya go yahlula, ke ntaba go tshwanele go be nyana le dihlatse ka dipedi? Sosone se napa se fo re kwatla mo ga taba yowa ye kgolo ya go yelana le molawo wa Baebele wa gore batho ba sa tshwariwi lešidi. Mo motho a sa thuletsi gore o makiye ying, di nyaka go be le dihlatse ka dipedi tso di begang taba yone gore bagolo ba thogo ya mahlong ba berekana nayo. (Dot. 19:15; Mat. 18:16; bala 1 Thimothi 5:19.) Nje tsotsone di ra gore di nyaka go be le dihlatse ka dipedi mo taba yone yi šele yi ya ga ba mmušo? Dhoo. Taba yowa a yi nape yi rela gore bagolo kela batho ba bangwana di nyaka ba ye ba le ka babedi mo ba nyaka go bega taba yone mmušong.

¹⁶ Mo bagolo ba kwa gore ka ho phutegong go na le ye a hlorisiyeng ngwana, ba latelela molawo wa naga ka go bega taba yone ga ba mmušo, ke mokane bona ba berekana le taba yone go ya ka so se ngwadiwweng ka ho Baebeleng. Mo motho yene a phiga taba, di ra gore bagolo ba ko ya ka so se bigiwang ke dihlatse. Komiti ya go yahlula yi makiwa mo go na le dihlatse ka dipedi—go le ye a begang taba yone le motho ye mongwana wa gore wa mo hlatsela gore nnete motho yene o hlorisiye ngwana.e Le mo go ka fo sa be le motho wa bobedi wa go hlatsela taba yone, a di rele gore ye a begang molato o bolabola matsaka. Bagolo ba ka sa bereke taba yone mo yi se na dihlatse ka dipedi, mara sosone a se rele gore bagolo a ba boni gore taba yi gona, fote o kraya gore yi kwisiye batho ba bangwana go baba. Byalo bagolo ba ya mahlong ba tiyisa ye mongwana le ye mongwana ye a kwisiwweng go baba. Go tokegela gana hone, bagolo ba ya mahlong ba kene ba hlahlamme gore ba tšhireletse phutego ga motho yene wa go hlorisa bana.—Meber. 20:28.

17-18. Hlatolla mmereko wa komiti ya go yahlula.

¹⁷ Mmereko wa komiti ya go yahlula ke wofeng? Lentsu lowa la gore “yahlula” a le rele gore bagolo ke bona ba yahlulang taba le go segelela sepheto ga molato wone, fote a yi bona ba fetsang ka gore taba yone yi tshwanele yi ye ga ba mmušo kela byang. Bagolo a ba kenakene ga dilo tsa molawo wa naga, ba lesetsa mmušo gore wona go bereke ditaba ka mokgwa wo wona wo di berekang. (Maroma 13:2-4; Tito 3:1) Bagolo bona ba yahlula ba lebelele gore nje motho yene a ka ya mahlong a gahlanela le phutego kela byang.

¹⁸ Mo bagolo ba le komiting ya go yahlula, ba gelepa motho yene gore senghana sage le Jehova le sa magageru ka ho phutegong se sa nape se kgwa. Ba berekisa mangwalo gore ba thogo di bona gore motho yene wa tisola kela dhoo. Mo a sa šupetsi gore wa tisola, wa kgawodiwa, ke mokane ba maka gore phutego yi tšibe ka taba yone. (1 Makor. 5:11-13) Mo a tisola, ba ka fo mo lesetsa a le ka ho phutegong. Mara bagolo ba nyoko mmotsa gore o nyoko goga mengwaga ya go tlala a sa berekisiwi ka ho phutegong kela lephelo lage ka moka a sa sa berekisiwa. Ka taba la gore bagolo ba hlupega ka matla ka bana, ba ka fo vakašela babelegi ba bona ba ka ho phutegong ba ye ba botsa gore ba dule ba lebelela gore mo motho yene a na le bana ba bona, a sa ba make dilo tsa nkare a di gabutši. Mo bagolo ba kene ba pasopisa babelegi ka taba yowa ya go hlorisiwa ga bana, ditaba tsone tsa motho ye a sinnyeng tsa gore fote di kwisiye mutši wone go baba, a ba di bolabole le batho ba bangwana.

KA MOKGO O KA PASOPANG BANA BAGO

19-22. Babelegi ba ka maka byang gore ba pasope bana ba bona? (Lebelela sethombhe sa ka tawong.)

¹⁹ Ke mmereko wa mang go pasopa bana gore ba sa kwaletsiwi? Ke wa babelegi.f Bana bago ke makolwane, ‘phahlo ya go tšwa ga Jehova.’ (Pis. 127:3) Babelegi, ke mmereko wa lune gore le pasope phahlo yo. O ka maka byang gore bana bago ba sa hlorisiwi?

²⁰ Sa mathomo, tšhuta ka taba yowa ya go hlorisiwa. Tšhuta mohlobo wa batho ba go hlorisa bana le gore ba berekisa ying gore ba ba woke. Dula o budiye mahlo gore o thogo bona batho bo ba ka makang tsotsone tsa go hlorisa bana. (Diy. 22:3; 24:3) O sa lebale gore ga go tlala ke batho bo ngwana a ba tšibang ba gore ba ka mo hlorisa.

²¹ Sa bobedi, maka gore bana bago ba sa tšhabe go bolabola nago. (Dot. 6:6, 7) Sone se rela gore le wene o ba theetsele. (Jak. 1:19) O sa lebale gore bana baa tšhaba go bolabola gore bona ba hlorisiwwe. Ba ka fo tšhaba go bolabola ka taba yone, ba nagana gore a go na ye a ka ba tshepang, kela wa kraya ye a ba hlorisiyeng a ba tshosetsiye gore ba sa boye ba ro botsa motho ka taba yone. Mo o bona nkare go na le so se sa sepeleng gabutši ka ngwanene, mmutsise diputsiso o sa mo lakatse, ke mokane o lefise pelo mo o kene o mo yemele gore a fetole.

²² Sa boraro, tšhutisa bana bago. Tšhutisa bana bowa ka ditaba tsowa tsa ka mapaying gore ba di tšibe, go ya ka mengwaga ya bona. Ba tšhutise gore ba tshwanele ba re king le gore ba make ying mo motho a ka fo ba tshwara ga gore a yi gona. Berekisa dilo tso mokgahlo wa Modimo wo re makeleng tsona go re gelepa gore re pasope bana bowa.—Lebelela lebhokisi la gore “Titšhutise o Boye o Tšhutise Bana Bago.”

23. Taba yowa ya go hlorisiwa ga bana ka tsa maroga re yi tseya byang, fote hlogotaba ya go latela yi nyoko fetola putsiso yifeng?

²³ Rune Dihlatse tsa Jehova re tseya taba yowa ya go hlorisa bana go le selo se sengwana se segolo ka matla fote yi napa yi ro silikisa. Ka taba la go lawola ke molawo wa Kreste, diphutego tsa rune a di wutetse batho bowa ba go hlorisa bana kela go maka gore ba sa kraye maphomela ya tso ba di makiyeng tsa go befa. Byalo king so re ka se makang gore re gelepe bo ba gore ba hlorisiwwe? Hlogotaba ya go latela yi nyoko fetola putsiso yone.