“Go Jabola bo ba Dulang ba Tshepega” ga Jehova

1-2. (a) Memmušo yi phigisiye batho ba Jehova ka mokgo mang mara batho bage ba yye ba titshwara ka mokgo mang? (b) Ke ntaba re re motho a ka jabola le mo a hlorisiwa? (Bolabola le ka sethombhe sa ka tawong.)

GANA byalo lowa mmereko wa rune ba wo rakele ga dinaga tsa go teya ka ku ga 30 lefaseng ka mokana ga lona. Ga dinaga tse dingwana, ba go lawola ba mmušo ba bošele magageru ya banna le basadi jele. Anthe mara ba sinnye ying? A baa sinya selo le Jehova wa di tšiba. Ba fo kgwela taba ya gore ba bala ba boya ba tšhuta Bhayibele, baa tšhomayela fote ba ya megahlanong le Makreste ya mangwana. Fote a ba šutele le ka gonyana ga tsa dipolotiki. Le mo ba phigisiwa go baba malata yawa ya Modimo ma f’lo dula ma tshepegab fote ma šupetsiye gore taba ya gore ma tineyele a yi ya go kgana. Wa tšiba taba yone, yi ba jabodisa ka matla!

² Di ka fo makega gore o šele o di bonne dithombhe tsa Dihlatse Tsa Jehova tsa gore di yye dya šupetsa lešiši fote o di bonne le gore ke mo di ngwalangwala. Ba jabodiye ba jabodisa ke taba ya gore baa di tšiba gore Jehova wa jabola mo a ba bona ba ya mahlong ba kene ba tshepega gage. (1 Dikor. 29:17a) Jeso o yitseri: “Go jabola bo ba hlupegisiwang ka taba la gore ba lukiye. . . Napaneng le ro jabola, ka taba la gore patela ya lune ke ye kgolo.”—Mat. 5:10-12.

BA RE BEYISELE

3. Mebereko 4:19, 20, yi re mapostola ya Jeso ya ku botala ma yye ma maka ying nakwela ba ma hlorisa fote ke ntaba ma makiye ka mokgonone?

³ Magageru ma gahlana le tso mapostola ya ku botala ma yyeng ma di tiyisela nakwela ma hlorisiwa ka taba la go tšhomayela ka Jeso. Ke gatleletlele bo ba go yahlula ba khota ye kgolo ya Majuda “ba ma botsa gore ma lisetse go bolabola ka lebitso la Jeso.” (Meber. 4:18; 5:27, 28, 40) Mapostola yawa ma yye ma maka byang? (Bala Mebereko 4:19, 20.) Ke mo ba di tšiba tsa gore go na le ye mogolo ye a ba yetang mahlong wa gore o yitseri ‘ba tšhomayelele batho’ fote ba bolabole tso ba di tšibang ka Kreste. (Meber. 10:42) Bo ba ba yemelang go leng Petro le Johane ba yye ba šišimala ba hlaya gore bona ba ko theetsela Modimo ba ka sa theetsele bo ba go yahlula fote ba hlayye le gore ba ka sa lisetse go bolabola ka Jeso. Gabutšibutši ke mo ba butsisa bo ba go yeta mahlong gore, ‘Ke ntaba le maka nkare lune le hlalefiye ka matla le tseya gore molawo wa lune wo phala wa Modimo?’

4. Mebereko 5:27-29, yi re mapostola ma beyisele Makreste ya mannete ka mokgo mang, fote rune re ka ma kopisela byang?

⁴ Makreste ya mannete ma sa na ma ya mahlong ma kopisela tso mapostola ma ba beyiseleng ka tsona, go leng taba ya gore re “theetsele Modimo ka gore re lawola ke yene, re sa theetsele batho.” (Bala Mebereko 5:27-29.) Ka nthago ga mo ba ma thuwele ka taba la gore maa tshepega, mapostola ma yye ma tloga hone ga khota ye kgolo ya Majuda “ba jabodiye ka matla, ka gore ne ba tshwanele ba hlupegisiwe ka taba la lebitso lage [Jeso],” fote ma f’lo ya mahlong ma kene ma tšhomayela!—Meber. 5:40-42.

5. Di nyaka re kraya diphetolo tsa diputsiso difeng?

⁵ Tso mapostola ma re beyiseleng ka tsona di maka gore re tiputsise diputsiso. Mo re beyisa, sepheto so ma se segeleleng sa go theetsela Modimo ma sa theetsele batho, se yelana ka mokgo mang le molawo wa ka ho Mangwalong wa gore “di nyaka gore re theetsele bo ba yetang mahlong”? (Marom. 13:1) Byalo, re nyoko di maka byang tso Pawulo wa lepostola a di hlayyeng tsa gore re “ba theetsele ba memmušo le ba go lawola,” ka nthoko ye nngwana re ye mahlong re tshepega ga Modimo go leng ye mogolo wa gona wa go Lawola?—Tito 3:1.

“BO BA YETANG MAHLONG”

6. (a) Ke bomang “bo ba yetang mahlong” bo Maroma 13:1, yi bolabolang ka bona fote rune re tshwanele re ba tshware ka mokgo mang? (b) Re ka re king ka matšhika ya memmušo yo yi lawolang?

⁶ Bala Maroma 13:1. Ga temanyana yowa mantsu ya gore, “bo ba yetang mahlong” ma rela batho ba go lawola ba gore ba na le matšhika ya go lawola batho ba bangwana. Makreste le wona ma yeta mahlong ke memmušo ya lefase lowa. Memmušo yone yi maka gore dilo di sepele gabutši, batho ba latelele molawo fote ka dinako tse dingwana yi yemelela le batho ba Jehova. (Kut. 12:16) Byalo, re theetsela molawo wa gore di nyaka re patela mothelo re theetsela re boya re hlompa bo ba go lawola. (Marom. 13:7) Mara, memmušo yone yi na le matšhika ka taba la gore Jehova o yi dumelele gore yi be nawo. Jeso o makiye gore tšhiko yone yi nape yi kwagala gabutši nakwela Ndhuna ya Leroma yo ba reng ke Pontiyo Pilato a mo hlaba ka diputsiso. Mo Pilato a bolabola ka matšhika ya a nang nawo ya go phonisa Jeso kela go mo lisetsa gore ba mmolaye, Jeso o mmutsiye gore: “Nke o se na matšhika ho gaka, hala o sa ma neya ke Modimo.” (Joh. 19:11) Go fo tshwana le matšhika yaa Pilato ne a le nawo, batho ka mokana ga bona ba go lawola kela ba dipolotiki lekgono matšhika ya bona maa kgera.

7. Ke ga seyemo sefeng ga gore re ka sa ba theetsele bo ba go lawola, fote di nyaka re sa lebale ying?

⁷ Makreste maa tinyanafatsa ga memmušo ya lefase lowa mo nkare melawo ya yona a yi tšhayisane le molawo wa Modimo. Mara a di kgonege gore re theetsele batho mo ba nyaka re maka dilo tsa gore Modimo aa kwane natso kela mo ba re ganetsa go maka tso Modimo a di nyakang. Mo re beyisa, ba ka nyaka gore bo ba gore ba sa gola ba bašomanyana ba kenele tsa ntwa.c Kela ba ka rakela Bhayibele ya rune le dikgatiso tsa rune tsa go bolabola ka Bhayibele ba boya ba re ganela go tšhomayela le go rapela re le ggoši. Mo bo ba go lawola ba sa ma berekisi gabutši matšhika ya bona ya go lawola, ba hlorisa malata ya Kreste ba nyoko tla ba bonana le Modimo. Phela Jehova o di lebelele tso ba di makang!—Mmo. 5:8.

8. Mantsu ya gore “ba go yeta mahlong” le wa “malenghelengheng,” ma fapana mo ma tla kaye fote ke ntaba di nyaka re ma kwisisa?

⁸ Mantsu ya gore “ba yeta mahlong” ma rela gore ke ba “ba bagolo kela ba ka kgakala.” Mara a ma rele gore ba “ba phala ka moka, ke ba ba kgolo ka matla kela ba ka kgakala ga ka mokana ga bona.” Mantsu yane ma hlatolla lentsu la gore “malenghelengheng.” Le mo yi le gore mo ba bolabola ka memmušo ya batho ba re ke “bo ba yetang mahlong,” go na le ye a nang le matšhika ya magolo go ba phala ka mokana ga bona go leng wa malenghelengheng. Ke ga kanne ka ho Bhayibeleng mo ba hlatollang Jehova Modimo go le “wa ku malenghelengheng.”—Dan. 7:18, 22, 25, 27.

“WA KU MALENGHELENGHENG”

9. King tso moporofeta Daniyele a di bonneng ga mmono wage?

⁹ Moporofeta Daniyele o yye a bona mmono wa go šupetsa gore Jehova o na le matšhika ya go phala batho ka mokana ga bona bo ba yetang mahlong. Daniyele o thomisiye a bona kanne ya diphoolwane tsa go tshosa tsa gore di tshwanisela memmušo ya lefase ya ku botala le ya gana byalo—go leng Bhabhilona, Mede le Peresiya, Gerika, Roma le wo wo tshwereng gana byalo go leng mmušo wa Makgowa le Maamerikha. (Dan. 7:1-3, 17) Ke mokane Daniyele a bona Jehova Modimo a duli ga setulo sa go lawola ga khota ya ku legedimong. (Dan. 7:9, 10) Tso moporofeta yene wa go tshepega a di bonneng ka nthago, di pasopisa bo ba go lawola lekgono.

10. Daniyele 7:13, 14, 27, yi re Jehova o ma neya bomang matšhika ya go lawola lefase fote tsotsone di napa di šihlela taba yifeng ka yene?

¹⁰ Bala Daniyele 7:13, 14, 27. Modimo o tseya matšhika ya go lawola ka mokana ga wona ga memmušo ya lefase, ke mokane a yi neya ba bangwana ba gore ma ba tshwanela fote ba na le matšhika ya magolo. Mara ke bomang bobone? O ma neya “wa go tshwana le morwayi wa motho,” go leng Jeso Kreste le “ba go hlawolega ba wa ku Malenghelengheng,” go leng ba 144 000 ba gore ba nyoko lawola “go ya go yye.” (Dan. 7:18) Di fo ba lekgwaying gore Jehova ke yene “wa ku Malenghelengheng,” ka taba la gore ke yene a le ntoši wa go ba le matšhika ya go maka tsotsone.

11. King se sengwana so Daniyele a se ngwadiyeng sa go šupetsa gore Jehova ke wa ku malenghelengheng ga ditšhaba ka mokana ga tsona?

¹¹ Tso Daniyele a di bonneng ga mmono di kwana le se sengwana so a se hlayyeng ku nthagonyana. Daniyele o yitseri, “Modimo wa magedimo o tlosa magoši a boya a beya ya mangwana.” Fote o ngwadiye gore: “Wa ku Malenghelengheng ke yene a Lawolang memmušo ya batho fote o wo neya ye a nyakang go mo neya wona.” (Dan. 2:19-21; 4:17) Ayitsano di yye dya makega tsa gore Jehova a tlose ba go lawola ke mokane a beye ba bangwana? Eya di yye dya makega!

12. Re beyisele gore Jehova o yye a ma tlosa ka mokgo mang magoši ya ku botala ga ditulo tsa wona tsa go lawola. (Lebelela sethombhe.)

¹² Jehova o makiye gore di šupetse gore ke yene wa ku malenghelengheng ga “bo ba yetang mahlong.” Lebelela kararo ya mešupetso ke yowa. Faro wa ku Egepita o yye a maka batho ba Jehova mabhantiti, fote ke gatleletlele a gana go ba lisetsa gore ba sepele. Mara Modimo o yye a ba tlemolla ke mokane a maka gore Faro a kgwele ku Lewatleng le Lekhubedu. (Ek. 14:26-28; Pis. 136:15) Kgoši Bhelešatsara wa ku Bhabhilona o yye a maka monyanya wo mogolo “a fo ba le magetla mahlong ga Morena wa magedimo” fote “o thanakiye medimo ya silva le gholdi” a sa thanake Jehova. (Dan. 5:22, 23) Mara Modimo o yye a mo nyanafatsa monna yene wa go tipotsa. Bhelešatsara ba yye ba mmolaya “bošego bobone,” ke mokane mmušo wage ba wo neya Mamede le Maperesiya. (Dan. 5:28, 30, 31) Kgoši Heroda Aghripa wa mathomo wa ku Palestine o yye a bolaya Jakobo wa lepostola ke mokane a bošela Petro wa lepostola jele, a tikemisele gore o nyoko fetsa ka yene. Mara Jehova a sanka a dumela gore polane yone ya Heroda yi phomelele. “Lengeloyi la Jehova la maka gore a lwale ka nako yonone,” ke mokane a kgwa.—Meber. 12:1-5, 21-23.

13. Re beyisele gore Jehova o yye a ma hlula ka mokgo mang magoši ya gore ke mo ma timakiye ngata ka yyoši.

¹³ Fote Jehova o šupetsiye gore ke yene wa ku malenghelengheng ga magoši ya gore ke mo ma timakiye ngata ka yyoši. O yye a lwela Maisrayele gore ma hlule 31 ya magoši ya ku Kanana fote a ma gelepa gore ma tseye dipoleke tse dikgolo tso ne di le ga Naga yo ne ba ba Tshepisiye yona. (Još. 11:4-6, 20; 12:1, 7, 24) Jehova o yye a gelepa Maisrayele gore ma teye ma tshwarelele mo ma hlula Kgoši Bhenehadada le 32 ya magoši ya mangwana yaa ne ma lawola Siriya ya gore ke mo yi lwa le Israyele.—1 Mag. 20:1, 26-29.

14-15. (a) King so Kgoši Nebukhadhinezara le Dariyase ba se hlayyeng ga taba ya gore Jehova ke yene a lawolang lefase ka moka? (b) King tso Mopisalema a di hlayyeng ka Jehova le ka setšhaba Sage?

¹⁴ Ke gatleletlele Jehova a šupetsa gore ke yene wa ku Malenghelengheng! Mo Kgoši Nebukhadhinezara wa ku Bhabhilona a yi takisa maahlo taba ya gore Jehova ke yene a ntoši ye a tshwaneleng go thanakiwa, o yye a thomisa go ba le magetla ‘ka matšhika ya a nang nawo le taba ya gore ba gadimisa mmušo wage’, Jehova o yye a maka gore a thomise go kotela maphephe dya sa sa tseya gabutši. Ka nthagonyana mo Nebukhadhinezara a thomisa go tseya gabutši o yye a “thanaka wa ku Malenghelengheng” a yi dumela taba ya gore “[Jehova] bogoši byage bo nyoko ba gona go ya go yye.” O tokegele ka gore: “A go na ye a ka mo šitisang.” (Dan. 4:30, 33-35) Ka nthago ga mo Daniyele ba mo liketsiye ga taba ya go tshepega ga Modimo fote Jehova a mo phonisiye ku sekoting sa ditawu, Kgoši Dariyase o yye a ntsha molawo wa gore: “Batho ka moka ba tshwanele ba tšhabe Modimo wa Daniyele. Ka gore ke Modimo wa go phela, O dula a le gona go ya go yye. Mmušo wage o ka sa psyitlanyiwe.”—Dan. 6:7-10, 19-22, 26, 27.

¹⁵ Mopisalema o hlayye gore: “Jehova o dhunghannye tso ditšhaba di tikemiseleng go di maka; o šehlollannye dipolane tso batho ba di makiyeng.” Fote o tokegele ka gore: “A yi go jabola ga sona setšhaba sa gore Modimo wa sona ke Jehova, batho ba gore yene mong o ba kgetiye gore go be bage.” (Pis. 33:10, 12) Phela taba yone ke yona yo yi makang gore re dule re tshepega ga Jehova!

NTWA YA MAFELELO

16. Ga taba ya “motšhatšhamelo wo mogolo,” king sa gore a re se kamake fote ke ntaba? (Lebelela sethombhe.)

¹⁶ Re tšhutiye tso Jehova a di makiyeng ku botala. Byalo, gana byalo king so re liteleng gore se makege ku mahlong? A re kamake gore Jehova o nyoko phonisa malata yage ya go tshepega ga “motšhatšhamelo wo mogolo.” (Mat. 24:21; Dan. 12:1) O nyoko maka ka mokgonone mo ditšhaba tsa go timaka ngata ka yyoši, go leng Ghogho wa Maghogho, di liketsa go hlasela ka bošidi batho ba gore baa tshepega ga Jehova. Le mo yi le gore ga ngata yone go kena le 193 ya dinaga tso di leng ga Ditšhaba tsa go Mamarelana, so se šalang ke gore ba ka sa bone selo ga Ye wa ku Malenghelengheng le masole yage ya ku legedimong! Jehova o tshepisa gore: “Ke nyoko tigadimisa, ke make gore ke hlawolege, ke boye ke make gore ke tšibege ga ditšhaba tsa go tlala; fote ba nyoko di tšiba tsa gore ke nna Jehova.”—Hezek. 38:14-16, 23; Pis. 46:10.

17. Bhayibele yi re go nyoko makega ying ku mahlong ka magoši ya lefase lowa fote go nyoko makega ying ka bo ba gore ba dula ba tshepega ga Jehova?

¹⁷ Go kutulugela ke Ghogho go hlohla Aremaghedoni mo Jehova a fetsa ka “magoši ya lefase ka mokana ga lona.” (Kut. 16:14, 16; 19:19-21) Gabutšibutši, “ke ba go loka fela ba gore ba nyoko dula ho lefaseng, fote le ba go tshepega ba nyoko phela ga lona.”—Diy. 2:21.

KORIYENENG MAHLONG RE KENE RE TSHEPEGA

18. King so Makreste ya go tlala ya mannete ma tikemiseleng go se maka fote ke ntaba? (Daniyele 3:28)

¹⁸ Go tlugisela ku botala, Makreste ya go tlala ya mannete a sanka ma llela go lokologa fote ma yye ma beya maphelo ya wona kotsing ka taba la gore ma nyaka Jehova gore go be yene ye a Lawolang lefase ka mokana ga lona. Makreste yane ya mannete ke mo ma tiputsiye gore ma nyoko fo dula ma tshepega ga Jehova. Ma tshwana le kararo ya Maheberu yala ya gore ma f’lo dula ma tshepega ga Ye wa ku Malenghelengheng ke mokane ba ma phonisa ga mollo wo mogolo.—Bala Daniyele 3:28.

19. Jehova o nyoko yahlula batho a lebelele ying fote o nyaka gore rune re make ying gana byalo?

¹⁹ Mopisalema Dafita mo a hlatolla gore ke selo se segolo gore re dule re tshepega ga Modimo o yitseri: “Jehova o nyoko yahlula batho. Barena Jehova, n’yahlule o lebelele tsa go loka tso ke di makang fote o lebelele le gore ke ya tshepega.” (Pis. 7:8) Fote, Dafita o ngwadiye gore: “Nkare go tshepega le go kwana le tsa go loka go ka mphonisa.” (Pis. 25:21) Mokgwa wa gore wo kawone ka matla wa go phela lephelo la rune ke wa gore re dule re tshepega ga Jehova, le mo go ka teya leduma la mošaga mang, re sa tsoge re makiye le selo se senyana sa gore se nyoko šupetsa gore a re tshepege gage! Mo re ka maka ka mokgonone, re nyoko tikwa go tshwana le mopisalema wa gore o ngwadiye gore: “Go jabola bo ba dulang ba tshepega . . . , bo ba sepelang ka melawo ya Jehova.”—Pis. 119:1.