Ayitsano Jehova o ko Mfetoleng mo ke Rapela?

1-2. Re ka maka king gore re kwe nkare Jehova aa fetole mo re rapela?

“MO LISETSE ga Jehova a go jabodise tsa nkare ke moka, fote o nyoko go neya tso pelo yago yi di nabelang.” (Pis. 37:4) Yi bafele ka matla taba yo ba yi tshepisang howa! Mara nje di nyaka re yemela gore se senyana le se senyana so re se kgopelang ga Jehova o nyoko napa a re neya ka nako yonone? Ke ntaba re ka yi butsisa putsiso yone? Lebelela dilo tse dingwana ke tso. Mogageru wa mosadi wa gore aa šadha o rapelela go ya ga Sekolo sa Batšhomayedi ba Mmušo. Mara mengwaga yi fo takamela ba sa mmitsi. Mogageru wa gore go sa le mosogana o kgopela Jehova gore a mo yalafe ga bolwele bya gore bo mo gogisa go baba, o nabela go bereka ka matlanyana ka phutegong. Mara bolwele byage a bo pomege. Babelegi ba gore ke Makreste ba rapelela gore ngwana wa bona a ngangarele nnete. Mara ngwanene o lisetsa go berekela Jehova.

² Di ka makega gore le wene o yye wa rapelela se sengwana ga Jehova, mara le lekgono o sa na o yemme. Tsotsone di ka fo maka gore o tseye nkare Jehova wa ba fetola ba bangwana mo ba rapela, wene yene ayya. Kela o ka fo tseya nkare go na le sa gore o yye wa kekemisa ga sona. Mogageru wa mosadi ye ba reng ke Janiceb ke mo a fo reyane. Yene le monnage ba yye ba rapela, ba re ba nabela gwe bereka Bethele. O re: “Ke mo ke tiputsiye gore go se botala re nyoko ba re le Bethele.” Gwa feta dikgwedi, gwa feta mengwaga ba soko ba bitsa. Janice o re: “Ke yye ka kgongwela ka boya ka sa sa tšiba ditaba tsaka. Ke mo ke tiputsisa gore ke makiye ying mara sa go kwisa Jehova go baba. Ke mo ke mo thuletsele ke re a re yetetse. Ke ntaba a sa mfetola mo ke mo rapela?”

3. Re nyoko bolabola ka ying ga hlogotaba yowa?

³ O ka kraya re tiputsisa gore nje ka nnete Jehova wa re theetsela mo re rapela. Taba yo yi yye ya hlupa le mong banna ba go tshepega ba ku botala. (Job. 30:20; Ps. 22:2; Hab. 1:2) O ka maka king gore o nape o di tshepa tsa gore Jehova o nyoko go fetola mo o mo rapela? (Pis. 65:2) Gore re thogo fetola putsiso yone, re nyoko thomisa ka go fetola tsowa: (1) Re ka yemela gore Jehova a make ying? (2) Jehova o nyaka gore re make ying? (3) Ke ntaba go ka fo nyaka gore re tšhentšhe tse dingwana tsa dilo tso re di kgopelang?

RE KA YEMELA GORE JEHOVA A MAKE YING?

4. Jehova o re tshepisa ying ho ga Jeremiya 29:12?

⁴ Jehova wa re tshepisa gore o nyoko re theetsela mo re mo rapela. (Bala Jeremiya 29:12.) Modimo wa rune o kwana ka matla le bo ba gore ba mmerekela ka go tshepega, byalo le ka tšatši la mohlolo a ka sa ba teyisi moya mo ba mo rapela. (Pis. 10:17; 37:28) Mara taba yowa a yi re gore o nyoko re neya dilo ka mokana ga tsona tso re di kgopelang. Tse dingwana tsa dilo tso re di kgopelang di ka fo nyaka re di yemele gore re tle re di kraye ga lefase la nyuwane.

5. King sa gore Jehova wa se lebelela mo a re theetsele mo re rapela? Hlatolla.

⁵ Jehova wa lebelela gore nje re kgopela tsa go yelana le tso a nyakang go di segelela. (Jes. 55:8, 9) Se sengwana ga dilo tso a nyakang go di segelela ke go tlatsa lefase lo ka banna le basadi ba go lawola ke yene ba gore ba jabodiye fote ba mamarelanne. Mara Sathane o re batho ba ka jabola ka matla mo ba ka fo tilawola bona beng. (Gen. 3:1-5) Jehova o lisetsiye batho gore ba tilawole gore di nape di šupetsa gore Diyabolo wa re tshokanya ka tso a di hlayang. Mathatha ya go tlala ya re gahlanang nawo lekgono ma maka ke gore go lawola batho. (Mmo. 8:9) Re di kwisisa gabutši gore Jehova a ka sa tlose mathatha yawa ka mokana ga wona gana byalo. Mo a ka fo ma tlosa, batho ba bangwana ba ka tseya gore di ra gore motho wa di kgona tsa go lawola le gore wa di kgona go lukisa tso di hlupang batho.

6. Ke ntaba di nyaka re sa kamake gore Jehova o nyoko dula a maka selo sa go šupetsa gore o re nyaka ka matla fote o lukiye?

⁶ Mo re rapela re kgopela selo sa go tshwana, Jehova a ka fo re fetola ka ditsela tsa go sa tshwane. Mo re beyisa, nakwela Kgoši Hezekiya a lwala ka matla, o yye a ro mo fawa ga Jehova gore a mo gelepe a fole. Jehova o yye a mo yalafa. (2 Mag. 20:1-6) Mara mo Pawulo wa lepostola a thinya letolo a re Jehova a tlose “mmutlwa mo mmeleng,” wa gore go ka makega gore ke mo go le bolwele bya mohlobo wa byona, Jehova aa bo tlosa bothatha byone. (2 Makor. 12:7-9) Lebelela le taba ya Jakobo wa lepostola le Petro wa lepostola. Kgoši Heroda o yye a ba tshepisa ka babedi ga bona gore o nyoko ba bolaya. Phutego yi yye ya rapelela Petro, fote go šupa le Jakobo yi mo rapelele. Jakobo ke yene wa gore ba yye ba mmolaya, mara gwa fo makega mohlolo wa go phonisa Petro. (Meber. 12:1-11) O ka kraya re tiputsisa gore, ‘Ke ntaba Jehova a mo phonisiye ga Petro mara a lisetsiye Jakobo?’ Bhayibele a yi hlaye.c Sa gore a re kamake ga sona ke gore ditsela tsa Jehova “di ka sa tsoge di kekemme.” (Dot. 32:4) Fote re di tšiba gabutši tsa gore Jehova ke mo a ba yamogela ba le ka babedi ga bona Petro le Jakobo. (Kut. 21:14) Di ka fo makega tsa gore phetolo yo re yi krayang go be ya gore ke mo re sa yi yemela. Mara re ya di tshepa tsa gore Jehova o dula a re šupetsa gore o re nyaka ka matla fote aa makane lešidi mo a re fetola ga tso re di rapelelang, byalo a re kokole mo a kgeta go re fetola ka mokgo mongwana.—Job. 33:13.

7. Re liketsa go kganela kgole le ying, fote ke ntaba re maka tsotsone?

⁷ Re liketsa gore re sa tseye seyemo sa rune ra se tshwanisa le sa ba bangwana. Mo re beyisa, re ka fo kgopela Jehova gore a re gelepe ga taba ya gore yi hlupa rune beng, mara o kraya a sa re neye selo sone re se kgopelang. Ka nthago o kraya re tla re di kwelela tsa gore motho ye mongwana o yye a kgopela selo sosone, fote di šupa nkare Jehova o yye a mo neya. Tsotsone di makegiye ga mogageru wa mosadi ye ba reng ke Anna. O yye a rapela gore nkare khensa ya monnage ye ba reng ke Matthew yi ka yalafega. Ka nako yonone, ke mo go na le magageru ka mabedi ya basadi ya gore ke Makreste fote ke mo ma gudiye ka matlanyana, le wona ne ma na le khensa. Anna o yye a rapelela Matthew le magageru yane ya basadi a šwennye. Magageru yawa ya basadi ma yye ma fola, mara Matthew o yye a hlokofala. Mathomisong, Anna ke mo a tiputsisa gore ayitsano Jehova o tšhediye letsogo gore magageru yawa ya basadi ma yalafege. Mo nkare go ka mokgonone, ke ntaba yene a sa mo fetola mo a rapelela gore monnage a fole? Ke nnete gore a re nape re tšiba gore go makiye byang gore magageru yala ya basadi ma fole. So re se tšibang ke gore Jehova o nyoko napa a tlosa dilo ka mokana ga tsona tsa gore dya re hlupegisa, fote o yi yemele ka maahlo ya makhubedu nako ya gore a tle a tsose banghana bage ba gore ba timele.—Job. 14:15.

8. (a) Jesaya 43:2 yi re Jehova o re tiyisa byang? (b) Go rapela go ka re gelepa ka mokgo mang mo re lebanne le tsa go re kgahleletsa? (Lebelela vidiyo ya gore Go Rapela go re Gelepa Gore re Tiyisele.)

⁸ Jehova o nyoko dula a na le rune. Jehova ke Papa wa rune fote o re nyaka tse dingwana tsa go sa hlayisege, aa jabole mo a re bona re kwa go baba. (Jes. 63:9) Fote aa tlose dilo ka mokana ga tsona tsa gore dya re phika, tsa gore ba fela ba di tshwanisa le nooka kela mollo. (Bala Jesaya 43:2.) Mara wa re tshepisa gore o nyoko re gelepa gore re “fete” ga tsona. Fote a ka sa lisetsi tsa go re phika di napa di ro re kogetsa. Jehova o dula a re neya moya wage wa go hlawolega wa go ba le matšhika gore re thogo tiyisela. (Luka 11:13; Mafil. 4:13) Ka taba la tsotsone, di nyaka re di tshepe tsa gore ka moka matšatši re nyoko ba le tso re di nyakang gore re thogo tiyisela fote re dule re tshepega gage.d

JEHOVA O NYAKA GORE RE MAKE YING?

9. Jakobo 1:6, 7 yi re šupetsa byang gore di nyaka re mo tshepa ga Jehova gore o nyoko re gelepa?

⁹ Jehova o nyaka gore re mo tshepe. (Maheb. 11:6) Go gongwana mo re lebelela mathatha ya rune, re ka fo bona go le mong thaba. O ka kraya re boya re ro kamaka gore nje Jehova o nyoko re gelepa. Mara Bhayibele yi re tshepisa gore Modimo a ka re neya matšhika ya go “taka lepharo.” (Pis. 18:29) A di nyake re lisetsa tso tsa go kamaka di re kgongwetsa, mara di nyaka re rapela re kene re na le tumelo ya go tiya, re di tshepe tsa gore Jehova o nyoko re fetola mo re rapela.—Bala Jakobo 1:6, 7.

10. Re beyisele tso re ka ga di maka tsa go yelana le tso re di rapelelang.

¹⁰ Jehova o nyaka gore re make dilo tsa go yelana le tso re di rapelelang. Mo re beyisa, mogageru a ka fo kgopela Jehova gore a mo gelepe ba mo lisetse gore a sa yi mmerekong gore a thogo ya ga mogahlano wo mogolo. Jehova a ka fetola byang mo motho a rapela ka mokgonone? A ka gelepa mogageru yene gore a šišimale gore a thogo ya ga ye a mo hiriyeng a ye bolabola naye. Mara di sa na di nyaka yene mogageru yewa gore a tlogamele a ye kgopeleng. Di ka nyaka gore a kgopele gatleletlele. Go gongwana a ka kgopela le go tšhentšhisana dinako tsa mmereko le motho wa gore o bereka naye. Fote mo nkare di ya nyakega, a ka boya a ro kgopela gore ba sa mo golele ka matšatši yane ya gore o ko ba a sa thewogela.

11. Ke ntaba di nyaka re rapela gatleletlele ka tso di re hlupang?

¹¹ Jehova o nyaka gore re rapele gatleletlele ka dilo tsa gore re hlupega ka tsona. (1 Mathes. 5:17) Jeso o hlayye gore dilo tse dingwana tso re di kgopelang di ka fo sa makege ka nako yonone. (Luka 11:9) Byalo o sa lahle tewu! Rapela di go baba fote di make gatleletlele. (Luka 18:1-7) Mo re fo ya mahlong re rapelela taba, re šupetsa Jehova gore so re se kgopelang re se tseyela gedimo ka matla. Fote re šupetsa gore re na le tumelo ya gore yene o nyoko re gelepa.

KE NTABA DI NYAKA RE SA KGERE GA TSO RE DI KGOPELANG?

12. (a) Ga tso re di kgopelang, di nyaka re tiputsisa ying se sengwana, fote ke ntaba? (b) Re ka maka byang gore tso re di rapelelang di šupetse gore ga Jehova re ya mo hlompa? (Lebelela lebhokisi la gore “Ayitsano Tso ke di Kgopelang di Šupetsa Gore ga Jehova ke ya mo Hlompa?”)

¹² Mo re sa kraye so re se kgopeleng mo re rapela, di ka nyaka re tiputsisa kararo ya diputsiso. Ya mathomo ke gore, ‘Ayitsano selo so ke se rapelelang se gabutši?’ Ga go tlala re tseya gore re tšiba sa gabutši so re se nyakang. Mara mo nako yi kene yi ya, o ka kraya dilo tso re yyeng ra di kgopela go sa nape go le tsona tso re di hlokang. Mo go na le bothatha byo re bo rapelelang, o ka kraya gore go na le tsela ya kawone ya go bo lukisa go feta yo rune re yi rapelelang. Fote dilo tse dingwana tsa gore re ya di kgopela, o ka kraya di sa yelane le tso Jehova a di nyakang. (1 Joh. 5:14) Mo re beyisa, tla re bolabole ka babelegi bala re hlayyeng tsa bona ka ho kgakala. Ke mo ba kgopele Jehova gore a make gore ngwana bona a ngangarele nnete. Taba yone go kwagala go le yona. Mara Jehova a ka sa tšhofe motho gore a mmerekele. O nyaka gore ka mokana ga rune, le bana ba rune, re kgete go mmerekela. (Dot. 10:12, 13; 30:19, 20) Byalo, sa gore kela babelegi bowa ba ka se kgopela ke gore Jehova a ba gelepe gore ba thogo segelela pelo ya ngwana wa bona, a kwe di mo tšhofa gore ga Jehova a mo nyake tsa mannete fote a be monghanage.—Diy. 22:6; Maef. 6:4.

13. Maheberu 4:16 yi šupetsa gore Jehova o nyoko re gelepa neng? Hlatolla.

¹³ Putsiso ya mabedi ke yowa, ‘Ayitsano ke yona nako ya gore Jehova a nneye so ke se kgopelang?’ Re ka fo kwa nkare re nyaka ba re fetola ka nako yonone ga tso re di rapelelang. Mara gabutši Jehova o tšiba nako ya gore ke mong yona ya gore a re gelepe. (Bala Maheberu 4:16.) Mo re bona re sa yakgoswe re kraya so re se kgopeleng, re ka tseya nkare Jehova wa gana go re neya selo sone. Mara o kraya gabutšibutši a fo ba a re ‘O fo tšwa o yemmenyana.’ Mo re beyisa, o ka fo ba o mo gopola ga mogageru yela wa gore o kgopele gore ba mo yalafe bolwele. Hala Jehova a yye a fo maka mohlolo wa gore a mo yalafe, Sathane ke mo a ka fo re nka ssoši selo so se makiyeng gore mogageru yewa a ye mahlong a berekela Jehova, ke gore o yye a mo yalafa. (Job. 1:9-11; 2:4) Go tokegela gana hone, Jehova o šele a beyye nako ya gore a tle a yalafe malwele ka mokana ga wona. (Jes. 33:24; Kut. 21:3, 4) Re sa na re yemele nako yone, gana byalo a re ya yemela gore re yalafege ka mohlolo. Byalo mogageru yewa a ka kgopela Jehova gore a mo neye matšhika fote a make gore a kgibe gore a thogo tiyisela bolwele byage a boye a ye mahlong a berekela yene Modimo ka go tshepega.—Pis. 29:11.

14. O tšhuta ying ga taba ya Janice?

¹⁴ O ka fo ba o sa na o yi gopola taba ya Janice, wa gore o yye a rapelela gwe bereka Bethele. Go fitiye 5 ya mengwaga a soko di bona tsa gore gabutšibutši Jehova o mo fetodiye ga tso a di rapeleleng. O re: “Ka nako yone, Jehova ke mo a ntšhutisa a boya a nlokotša. Ke mo di nyaka ke tšhute go napa ke mo tshepa ka matla. Ke mo di nyaka ke lukise taba ya go titšhutisa Bhayibele ke le ntoši. Fote ke mo di nyaka ke tšhute go jabola le mo seyemo se se ka mokgo ke se nabelang. Ka nthago, Janice le monnage ba yye ba ba kgopela gore ba make mmereko wa go potologa. Mo Janice a nagana tsa ku nthago, o re: “Jehova o mfetudiye mo ke rapela, mara nna ke mo ke sa nagana tsona tso. Go ntsere nako go bona gore o mfetudiye ka mokgwa wa go bafala wa tšiba, mara ke leboga ke sa fetsi gore o nšupetsiye gore o nnyaka ka matla fote o ntshwere gabutši.”

15. Ke ntaba di sa nyake re kgera ga tso re di kgopelang? (Lebelela le dithombhe.)

¹⁵ Putsiso ya kararo ke yowa, ‘Ayitsano ne di nyaka ke rapelela selo se sengwana?’ Tsona di gabutši go thuletsa so o se nyakang mo o rapela, mara re ka kgona go bona gore Jehova yene o nyaka ying ka rune mo re ka fo mmotsa tsa rune mara ra di šiyela gage mo nkare a ka fo tla a di bona ka mokgo mongwana. Lebelela taba ya mogageru yela wa mosadi wa gore aa šadha, yela wa gore ke mo a nabela go ya ga Sekolo sa Batšhomayedi ba Mmušo. O nyaka go ya ga sekolo so gore a thogo ya ga poleke ya gore go gayela batšhomayedi. Byalo mo a kene a rapelela gore ba mmitse ga sekolo sowa, a ka kgopela Jehova gore a mo gelepe a bone lešuba le lengwana la gore le ka fo ba le thulegiye la gore a yeketse ga mmereko wage. (Meber. 16:9, 10) Ke mokane o nyoko ba a maka dilo tsa go yelana le tso a di rapeleleng mo a ka butsisa mopotulugi gore kela yi gona phutego ya thina ya gore yi ka nyaka go ba le mašupatsela ya go tlalanyana. Kela a ka fo ngwalela lekaleng a butsise gore batšhomayedi ba go tlalanyana ba Mmušo ba nyakega kaye.e

16. King sa gore di nyaka re sa kamake ga sona?

¹⁶ Re tšhutiye gore di nyaka re sa kamake gore mo re rapela, Jehova o nyoko re fetola ka mokgwa wa go šupetsa gore o re nyaka ka matla a boya a re tshwara gabutši. (Pis. 4:3; Jes. 30:18) Go gongwana re ka fo sa kraye phetolo yo ne re yi yemele. Mara Jehova a ka sa re teyisi moya mo re rapela. O re nyaka tsa nkare ke moka. Fote le ka tšatši ka lloši a ka sa re lahle. (Pis. 9:10) Byalo, ariye mahlong o kene o mo “tshepa ka dinako ka moka,” o rapele o nape o ro kgotolela gage tso di leng ka ho pelong yago.—Pis. 62:8.