Ditodi tsa Sepukwane sa Mogahlano wa Maphelelo le Matšhomayelelo

JANUARY 6-12

MAKOLWANE KA TENG GA LENTSU LA MODIMO | GENESI 1-2

“Jehova o Maka Gore go be le Dilo tsa go Phela ho Lefaseng”

(Genesi 1:3, 4) Ke mokane Modimo a re: “Go be le go khanya.” Ke mokane gwa khanya. ⁴ Mo Modimo a fetsa, a bona gore go khanya gone go gabutši ke mokane a thomisa go yaroganya go khanya le letshwifi.

(Genesi 1:6) Ke mokane Modimo a re: “Go be le sekgala segare ga meetši fote go be le go yarogana segare ga meetši le meetši.”

(Genesi 1:9) Ke mokane Modimo a re: “Meetši ya ma leng ka tlase ga legedimo ma hlekeletsane polekeng ka yyoši, fote go nyarele poleke ya go woma.” Gwa ba ka mokgonone.

(Genesi 1:11) Ke mokane Modimo a re: “Lefase le nyaretse mabyang, dimilane tsa gore di na le pewu le mehlare ya diyengwa ka mehlobohlobo, yi nyaretse diyengwa le pewu ho lefaseng.” Gwa ba ka mokgonone.

it-1-E 527-528

Go Maka

Ka Letšatši la Thoko (1) mola Modimo a re, “Go be le go khanya,” di šupa nkare ke go khanya ga gore a go bonale gabutši, go yye gwa kena marung le mo yi le gore ne di soko bane di tšibega gore go khanya mone go tšwa kaye. Di šupa nkare go khanya go yye gwa ba gona ka gonyana ka gonyana go fo tshwana le ka mokgo J W Watts wa go hlatolla a beyyeng ditaba ka gona mo a re: “Go khanya go yye gwa ba gona ka gonyana ka gonyana.” (Gen 1:3, A Distinctive Translation of Genesis) Modimo o makiye gore go be le go yarogana segare ga go khanya le letshwifi, go khanya a re ke motshegare ke mokane a re letshwifi ke bošego. Tsotsone di šupetsa gore lefase ke mo le dukuluga mothalong wa lona mo le kene le dukulugela letšatši, gore bohlabela le bodikela bya lona di thogo kraya dinako tsa go khanya le tsa letshwifi.—Gen 1:3, 4.

Ka Letšatši la Mabedi (2) Modimo o makiye gore go be le sebakabaka ka go maka gore go be le go yarogana “segare ga meetši le meetši.” Meetši ya mangwana ma yye ma šala ho lefaseng, mara ya go tlala ma yisiwwe ku gedimo-dimo ga lefase, ke mokane segare sa wona gwa ba le sebakabaka. Sebakabaka sone Modimo o yitseri ke Legedimo, mara a rela mo o le mo lefaseng, ka taba la gore meetši ya ma yisiwweng ku gedimo ke mo ma sa thiba dinanedi kela dilo tse dingwana tsa ku legedimong.—Gen 1:6-8; bona SEBAKABAKA.

Ka Letšatši la Kararo (3) Modimo o berekisiye matšhika yage ya go maka mohlolo go hlekeletsa meetši ya ho lefaseng ke mokane gwa nyarela ga go woma, Modimo a re gana hone ke lefase. Nka letšatši lolowa, mo Modimo a yyeng a maka gore dilo tse dinyananyana ka matla tsa gore a di bonale ka lehlo di thogo maka gore go thogo ba le lephelo, mabyang, dimilane le mehlare ya diyengwa, a tsa f’lo kutuluga. Dilo tsone ka ditharo tsa thomisa go ntsha tse dingwana di ya ka “mehlobohlobo” ya tsona.—Gen 1:9-13.

(Genesi 1:14) Ke mokane Modimo a re: “Go be le tsa go khanyisa ku sebakabakeng sa magedimong gore go be le go yarogana segare ga motshegare le bošego, fote di nyoko šupetsa dinako tsa go fisa le tsa go bata, matšatši le mengwaga.

(Genesi 1:20) Ke mokane Modimo a re: “Meetši ma tlale ka dilo tsa go phela, fote tso tsa go phurrwa di phurrwe hala sebakabakeng sa magedimong ka kgakala ga lefase.”

(Genesi 1:24) Ke mokane Modimo a re: “Lefase le be mehlobohlobo ya dipholwane, dipholwane tsa gaye, dipholwane tsa go sepela ka dimpa le dipholwane tsa hlaga ka mehlobohlobo ya tsona.” Gwa fo ba ka mokgonone.

(Genesi 1:27) Ke mokane Modimo o yye mahlong a maka motho ka setshwano sage, o mo makiye ka setshwano sage; o makiye monna le mosadi.

it-1-E 528 ¶5-8

Go Maka

A di makatse gore ke ntaba ga Genesi 1:16 go sa berekisiwa lentsu la Seheberu la ba·raʼʹ, la go rela “go nyaretsa.” Mara go berekisiwwe la ʽa·sahʹ, la go rela “go maka.” Ka taba la gore ga Genesi 1:1 mo ba re “magedimo” ba rela le letšatši, ngwedi le dinanedi, di makiwwe go soko segela Letšatši la Kanne (4). Ka letšatši la kanne Modimo o yye a “maka” gore dilo tsone tsa go khanya di thomise go khanyisa ho lefaseng le sebakabakeng. Mo ba re “Modimo o di beyye sebakabakeng sa magedimong gore di khanyise ho lefaseng,” sosone se šupetsa gore di thomisiye go bonala ho lefaseng, nkare ke mo di le mo sebakabakeng sa lefase. Fote dilo tsone tsa go khanya ke mo di “šupetsa dinako tsa go fisa le tsa go bata, matšatši le mengwaga,” mo nako yi kene yi ya, tsa yetetsa batho ka mekgwa ya go tlala.—Gen 1:14.

Ka Letšatši la Kaphetha (5), go makiwwe dilo tsa mathomo tsa go phela, mara batho a ba šiyo gana hone. Modimo aa maka gore pholwane ka yyoši yi tšhentšhatšhentšhe, mara o berekisiye matšhika yage ya go hlawolega gore go be le dipholwane tsa go tlala. Go ngwadiwwe gore: “Modimo o yye mahlong a maka dipholwane tse dikgolo tsa lewatle le dilo ka mokana ga tsona tsa go phela tsa go sepela, tsa gore meetši ma yye ma tlala ka tsona go ya ka mehlobohlobo ya tsona, le dipholwane ka mokana ga tsona tsa go pherera go ya ka mehlobohlobo ya tsona.” Modimo ke mo a kgotsofele ka tso a di makiyeng, ke mokane a di rufa, go tokegela hone, a re ‘di tlale,’ tsotsone ke mo di kgonega, ka taba la gore dipholwane tsowa ke mo di makiwwe gore di thogo belega “go ya ka mehlobohlobo ya tsona.”—Gen 1:20-23.

Ka Letšatši la Kobodi (6) “Modimo o yye mahlong a maka dipholwane tsa hlaga tsa mo lefaseng go ya ka mehlobohlobo ya tsona, dipholwane tsa gaye go ya ka mehlobohlobo ya tsona le dipholwane tsa go sepela mo fase go ya ka mehlobohlobo ya tsona,” go fo tshwana le tse dingwana tso Modimo a di makiyeng, mmereko wowa ke mo wo bafele.—Gen 1:24, 25.

Mo letšatši la kobodi la go maka dilo le šele le segela mafelelong, Modimo o yye a maka selo sa nyuwane sa go di phala ka mokana ga tsona, sa gore se phala dipholwane mara sa gore sona se phala ke mangeloyi. Ke mo go le motho, wa gore ke setshwano sa Modimo le setshwano sa yene mong. Le mo Genesi 1:27 yi bolabola ka gonyana ka batho, “monna le mosadi ba gore ba makiye ke [Modimo],” taba ya go yelana le yonone ga Genesi 2:7-9 yi šupetsa gore Jehova Modimo o makiye motho ka lerole la ho fase, a butšwelela mowono wa lephelo ka ho dinkong tsage, ke mokane motho gwa ba moya wa go phela, wa gore wo neyiwwe pharadeyisi gore go be mutšing gage le mo a nyoko krayang tsa go ja gona. Mo ga taba yowa, Jehova o berekisiye dilo tsa mo lefaseng ga mmereko wa go maka dilo ke mokane, mo a šele a makiye monna, o yye a maka motho wa mosadi a berekisa hlokoro ya Adamo go mo maka. (Gen 2:18-25) Mo mosadi a šele a makiwwe, “mošaga” wa batho ke mo wo šele wo felegelele—Gen 5:1, 2.

Go Wunyulla Tso di Wutammeng ka Baebeleng

(Genesi 1:1) Ku mathomisong, Modimo o makiye magedimo le lefase.

w15-SE 6/1 5

Sayinsi yi Yama Lephelo Lago go Segela Kaye

Mongwaga wa Lefase le Tso di Leng ku Gedimo

Bo ba sayinsi ba re lefase lowa le na le gana hala ga 4 ya dibhiliyoni tsa mengwaga le gore ka mokana ga tsona tso di leng ku gedimo di ka fo ba di na le 13 go segela ga 14 ya dibhiliyoni tsa mengwaga. Baebele a yi re hlayisele gore dilo ka mokana ga tsona di makiwwe leng. A go na mo yi hlayang gore gabutšibutši lefase lowa le na le mengwaga ka mekaye le le gona. Ka Baebeleng, temanyana ya mathomo yi re: “Ku mathomisong Modimo o makiye magedimo le lefase.” (Genesi 1:1) Taba yone yi maka gore ba sayinsi ba thogo hlatolla mongwaga wa lefase lowa go ya ka melawo ya sayense ya go kwisisega.

(Genesi 1:26) Ke mokane Modimo a re: “Yema re make motho ka setshwano sa rune, a tshwane le rune, ke mokane a lawole dihlapi tsa lewatle le dipholwane tsa go phurrwa tsa magedimong le dipholwane tsa gaye fote a lawole lefase ka mokana ga lona le pholwane ye nngwana le ye nngwana ya go sepela ka dimpa ho lefaseng.”

it-2-E 52

Jeso Kreste

Aa Maka Dilo. Morwayi yewa ke mo a le gona mo mmereko wa go maka dilo o kene o ya mahlong mara tsotsone a di rele gore ke mo a bopa dilo a na le Papage. Matšhika ya go maka dilo ke mo ma tšwa ga Modimo ka moya wage wa go hlawolega, kela matšhika ya go bereka. (Gen 1:2; Pis 33:6) Ka taba la gore Modimo ke tšhiko ya lephelo, dilo ka mokana ga tsona tso di phelang, tsa gore di ya bonala le tsa gore a di bonale, di makiye ke yene. (Pis 36:9). Morwayi yewa a yi yene ye ne a maka dilo, mara ke yene ye Jehova, wa gore ke yene a Makiyeng dilo, ne a mo roma kela go mmerekisa. Jeso ka boyene o thanakiye Modimo ka tso a di makiyeng, go fo tshwana le ka mangwalong.—Mat 19:4-6; bona GO MAKA.

Go Bala Baebele

(Genesi 1:1-19) Ku mathomisong, Modimo o makiye magedimo le lefase. ² Lefase ke mo le sa yemega fote le se na selo, ke mo go fo ba letswifi gedimo ga meetši ya go yisa, fote matšhika ya Modimo ke mo ma sepela-sepela gedimo ga meetši. ³ Ke mokane Modimo a re: “Go be le go khanya.” Ke mokane gwa khanya. ⁴ Mo Modimo a fetsa, a bona gore go khanya gone go gabutši ke mokane a thomisa go yaroganya go khanya le letshwifi. ⁵ Modimo o yitseri go khanya ke motshegare, mara letswifi a re ke bošego. Ke mokane gwa ba ka malobana ke mokane gwa sa, letšatši la mathomo. ⁶ Ke mokane Modimo a re: “Go be le sekgala segare ga meetši fote go be le go yarogana segare ga meetši le meetši.” ⁷ Ke mokane Modimo a maka sebakabaka fote a maka gore go be le sekgala segare ga meetši ya ka tlase ga sona le ya ka gedimo ga sona. Gwa ba ka mokgonone. ⁸ Modimo o yitseri sebakabaka sone ke Legedimo. Ke mokane gwa ba ka malobana ke mokane gwa sa, letšatši la bobedi. ⁹ Byalo Modimo a re: “Meetši ya ma leng ka tlase ga legedimo ma hlekeletsane polekeng ka yyoši, fote go nyarele poleke ya go woma.” Gwa ba ka mokgonone. ¹⁰ Modimo o yitseri poleke yone ya go woma ke Lefase, mara meetši yala ya go hlekeletsana, a re ke Mawatle. Ke mokane Modimo a bona di bafele. ¹¹ Ke mokane Modimo a re: “Lefase le nyaretse mabyang, dimilane tsa gore di na le pewu le mehlare ya diyengwa ka mehlobohlobo, di nyaretse diyengwa le pewu ho lefaseng.” Gwa ba ka mokgonone. ¹² Ke mokane lefase la thoma go nyaretsa mabyang, dimilane tsa gore di na le pewu le mehlare ya gore yi nyaretsa diyengwa le pewu ka mehlobohlobo. Ke mokane Modimo a bona go bafele. ¹³ Byalo gwa ba ka malobana ke mokane gwa sa, letšatši la boraro. ¹⁴ Ke mokane Modimo a re: “Go be le tsa go khanyisa ku sebakabakeng sa magedimong gore go be le go yarogana segare ga motshegare le bošego, fote di nyoko šupetsa dinako tsa go fisa le tsa go bata, matšatši le mengwaga. ¹⁵ Di nyoko maka gore go khanye sebakabakeng sa magedimong gore di thogo gadima gedimo ga lefase.” Gwa ba ka mokgonone. ¹⁶ Ke mokane Modimo a ya mahlong a maka dilo ka dipedi tsa go khanyisa tse dikgolo, so sa go khanyisa ka matla ke mo go le sa motshegare ke mokane so sa go khanyisa ka gonyana ke mo go le sa bošego, le dinanedi. ¹⁷ Nka taba lo Modimo a di beyyeng sebakabakeng sa magedimo gore di gadimise mo lefaseng ¹⁸ le gore di bonale motshegare le bošego fote di yaroganye go khanya le letshwifi. Ke mokane Modimo a bona go le bafele. ¹⁹ Byalo gwa ba ka malobana ke mokane gwa sa, letšatši la bone.

JANUARY 13-19

MAKOLWANE KA TENG GA LENTSU LA MODIMO | GENESI 3-5

“Maphomela ya go Baba ya Letsaka la Mathomo”

(Genesi 3:1-5) Byalo noga ke mo go le pholwane ya go ba le mathayithayi ka matla go phala dipholwane tsa hlaga tso Jehova Modimo a di makiyeng. Ke mokane ya re ga mosadi: “Ayitsano nnetennete Modimo o hlayye gore le sa ji tsa mohlare wo mongwana le wo mongwana le se sengwana so se leng mo tšhomong?” ² Ke mokane mosadi a fetola noga ka gore: “Re ka ja seyengwa sa mohlare wo mongwana le wo mongwana wo wo leng ho tšhomong. ³ Mara mo Modimo a bolabola ka seyengwa sa mohlare wo wo leng gare ga tšhomo o yitseri: ‘Le sa ji, fote, le go se tikisa le sa ro se tikisa; mo le ka sa make sone le nyoko kgwa.’” ⁴ Noga ya napa yi bolabola le mosadi yi re: “Le ka sa ro kgwa. ⁵ Ka taba la gore Modimo wa di tšiba tsa gore ka letšatši lo le nyoko go ja, mahlo ya lune ma nyoko popologa ke mokane le nyoko tshwana le Modimo, la tšiba sa go bafala le sa go befa.”

w17.02-SE 5 ¶9

Tso Jehova a di Nyakang di Nyoko Makega!

⁹ Sathane Diyabolo, o berekisiye noga nakwela a tshokanya Efa, gore a sa sa theetsela Papage Jehova. (Bala Genesi 3:1-5; Kut. 12:9) Taba ya gore bana ba Modimo ke mo ba sa tshwanela go ja ‘ga mohlare wo mongwana le wo mongwana wa hone tšhomong,’ Sathane o napiye a ro yi maka ye kgolo. Ke mo nkare o re: ‘Yii, di ra gore le ka sa make so le se nyakang?’ Ka nthago ga hone, o hlayye mong letsakatsaka a re: “Le ka sa ro kgwa.” O leketsiye go kutšetsela Efa gore a sa tihlupi ka go theetsela Modimo, ka gore: “Modimo wa di tšiba tsa gore ka letšatši lo le ko go ja, mahlo ya lune ma nyoko popologa.” Gabutšibutši Sathane ke mo a ra gore Jehova ke mo a sa nyake ba ja seyengwa sone ka taba la gore ke mo se nyoko maka gore ba hlalefe. Go tokegela gana hone, Sathane o hlayye matsaka a re: “Le nyoko tshwana le Modimo, la tšiba sa go bafala le sa go befa.”

(Genesi 3:6) Ke mokane, mosadi a bona mohlare wone wo le gabutši gore wo ka jiwa, le gore wa nabetsa mo o wo lebelele, wona ke mo wo bafele. Ke mokane a kga seyengwa sa wona a ja. Ka nthagonyana, a se neya le monna wage mo a le naye, ke mokane le yene a kgema a phuretsela.

w00-SE 11/15 25-26

Re ka Tšhuta ga Batho ba Mathomo

Ayitsano so Efa a se makiyeng ke mo se sa tšhabelelege? Awwa! O fo nagana mola go le wene yene. So noga yi se hlayyeng se phendhulannye tso Modimo le Adamo ba di hlayyeng. Ke mo o ka re king mara mo go ka fo segela motho ye mongwana wa gore a o mo tšibi ke mokane a tshokanya motho wa gore o mo nyaka ka matla fote wa mo tshepa? Wa tšiba Efa nke a sa di maka tso a di makiyeng, nke a f’lo šupetsa gore wa di nyenya fote di ya mo silikisa, le go theetsela nke a sa di theetsela. Ga dilo tso ka moka, noga yowa ke mo go le ying yona gore yi šinye yi solasola tso Modimo a di makiyeng le tso monnage a di hlayyeng? Efa le yene nke a kgopele mayele mo a soko segelela sepheto so a se makiyeng, go šupetsa gore o hlompa tšhiko ya goer hlogo yage ke mang. Le rune di nyaka re make ka mokgonone ho nkare go na le tabanyana ya gore a yi yelane le tso Modimo a re butsiyeng tsona. Mara, Efa yene o tshepiye mantsu ya ye ne a mo leketsa, a nyaka go tiponela ka boyenemong sa go bafala le sa go befa. Mo a kene a nagana ka matla ka taba yone, o yye a napa a ro nabela ka matla. O sinnye ka go fo dula a nagana ka dilo tsone tsa go sa yi ka tsela, a sa di ntshi ho monaganong wage kela go bolabola ka taba yone le hlogo ya mutši!—1 Makorente 11:3; Jakobo 1:14, 15.

Adamo o Theetsela Tso Mosadi Wage a Mmotsang Tsona

Efa o yye a kutšetsela le Adamo gore a sinye. Taba yowa ba yyeng ba yi kwanela ke ya bophokophoko wa tšiba, re ka yi hlatolla byang mara? (Genesi 3:6, 17) Adamo ke mo di nyaka a kgete gore o theetsela mang. Ayitsano ke mo a nyoko theetsela ye a mo makiyeng, ye a mo neyyeng dilo ka mokana ga tsona, a boya a theetsela le mosadi wage Efa? Ayitsano Adamo ke mo a ka kgopela Modimo gore a mmotse gore a make ying? Kela ke mo a nyoko theetsela mosadi wage a napa a psyile? Adamo ke mo a di tšiba gabutši tsa gore di ka sa makege tso Efa a naganang gore o nyoko di segelela mo a ja seyengwa so ba ba butsiyeng gore ba sa se ji. Pawulo wa lepostola o ngwadiye gore: “Adamo aa tshokanyiwa, mara mosadi ke yene wa gore ba mo tshokannye lela la mafelelo ke mokane a sinya.” (1 Thimothi 2:14) Byalo Adamo o ro tikgetela go sa theetsele Jehova. Di fo ba lekgwaying gore go tšhaba go lahlegela ke mosadi ke mo go feta tumelo yo a nang nayo ya gore Modimo ke mo a ka lukisa seyemo sone.

(Genesi 3:15-19) Ke nyoko maka gore go sa be le go kwana segare sago le mosadi le segare sa bana bago le bage. O nyoko go psyitlanya hlogo ke mokane wene o nyoko mo loma serethe.” ¹⁶ Ga mosadi o yitseri: “Ke nyoko maka gore go baba mo o go kwang mo o yimme go yeketsege ka matla; o nyoko ba le lešoko mo o belega bana, monna wago o nyoko mo hlologela, fote yene o nyoko go lawola.” ¹⁷ Ke mokane ga Adamo a re: “Ka taba la gore o theetsele so mosadi wago a go butsiyeng sona ke mokane wa ja tsa mohlare wa gore ke go butsiye gabutši gore, ‘O sa ji tsa wona,’ mobu wo nyoko ba le senyama ka taba lago. O nyoko ja tsa go tšwa gona tsa gore o ro karakara ka matla o di berekela matšatši ya lephelo lago ka mokana ga wona. ¹⁸ Wo nyoko go midisela mmotlwa le ngwere, ke mokane o nyoko ja dimilane tsa mašomong. ¹⁹ O nyoko ro bhahla ho sefahlegong gore o thogo kraya sekgwa sa go ja gwa šinya go segela nako yo o boyelang mobung, ka taba la gore o ntshiwwe ga wona. Ka taba la gore ke wene lerole, o nyoko boyela leroleng.”

w12-SE 9/1 4 ¶2

Ayitsano Modimo wa Tihlupa ka Basadi?

Ayitsano Modimo o makiye gore basadi ba be le senyama?

Awwa. Mara ‘noga yo ba reng ke Diyabolo” ke yona ya gore Modimo o makiye gore yi be le ‘senyama.’ (Kutullo 12:9; Genesi 3:14) Hala Modimo a re Adamo o nyoko “lawola” mosadi wage, ke mo a sa rele gore banna ba phidise basadi ba bona go baba. (Genesi 3:16) Ke mo a fo šupetsa maphomela ya ma leyyeng ke go sinya ga monna wa mathomo le mosadi wa mathomo.

w04-SE 1/1 29 ¶2

Monopo wa Puku ya Genesi—I

3:17—Mobu ke mo wo na le senyama ka mokgo mang, fote wo yye wa ba naso go segela leng? Senyama so go bolabodiwweng ka sona sa mobu ke mo se ra gore go lima ke mo go nyoko thathafa. Maphomela ya go baba ya mobu wowa wa go ba le senyama, mmotlwa le ngwere, wo kwele le ke batlogolo ba Adamo ba gore Lameke wa gore ke papa wa Nnowa o šinnye a hlaya gore “matsogo ya rune maa baba ka taba la mobu wowa wa gore Jehova o wo tšhediye senyama.” (Genesi 5:29) Ka nthago ga Mogogola, Jehova o yye a rufa Nnowa le barwayi bage, a šupetsa gore so a se nyakang ke gore ba tlatse lefase. (Genesi 9:1) Senyama so Modimo a yyeng a re se kenne mobung, se yye sa tlusiwa.—Genesi 13:10.

it-2-E 186

Lešoko

Go baba ga go yelana le go belega. Ka nthago ga mo mosadi wa mathomo Efa, a sinnye, Modimo o yye a mmotsa gore go belega bana go nyoko ba byang. Mola a f’lo theetsela, Modimo nke a yye mahlong a mo rufa fote go belega ke mo go nyoko jabodisa tsa mannete, ka taba la gore, ‘go rufa ke Jehova—gwa ghanyisana, fote aa tokegele le ka tsa go baba.’ (Diy 10:22) Mara gana byalo, ka hlago, go sa felegelela ga mmele go nyoko maka gore go belega go babe. Gabutšibutši, Modimo o yitseri (ka taba la gore dilo tso a di lesetsang o boya a di maka): “Ke nyoko maka gore go baba mo o go kwang mo o yimme go yeketsege ka matla; o nyoko ba le lešoko mo o belega bana.”—Gen 3:16.

Go Wunyulla Tso di Wutammeng ka Baebeleng

(Genesi 4:23, 24) Lameke o ngwadiye mantsu yawa a ngwalela basadi bage Adha le Zilla a re: “Theetselaneng lentsu laka, lune basadi ba Lameke; Theetselaneng so ke se bolabolang: Ke bolayye monna ka taba la gore o nkwaletsiye, Eya, mošomanyana ka taba la gore o nteyye. ²⁴ Mo nkare Kayini ba nyoko mo patedisa ga 7, di ra gore Lameke ba nyoko mo patedisa ga 77.”

it-2-E 192 ¶5

Lameke

Sereto so Lameke a se ngwaleleng basadi bage (Gen 4:23, 24) se šupetsa bokgohlane byo ke mo bo le gona ka nako yone. Sereto sa Lameke ke mo se re: “Theetselaneng lentsu laka, lune basadi ba Lameke; Theetselaneng so ke se bolabolang: Ke bolayye monna ka taba la gore o nkwaletsiye, Eya, mošomanyana ka taba la gore o nteyye. Mo nkare Kayini o nyoko patedisiwa ga šupa, di ra gore Lameke o nyoko patedisela ga masomešupašupa.” Di fo ba lekgwaying gore Lameke ke mo a tiphonisa, a re ke mo a sa tikemisela go bolaya, go fo tshwana le Kayini. Lameke ke mo a re, ka go tilwela, o bolayye monna wa gore o mo teyye fote o mo kwaletsiye. Byalo, sereto sage se šupa nkare ke mo go le sa go kgopela go pasopiwa ga ye mongwana le ye mongwana wa gore o nyaka go busetsela ka taba la gore o bolayye ye a mo hlaseleng.

(Genesi 4:26) Sethe le yene ba mmelegele morwayi, ke mokane a mo reya lebitso a re ke Enoše. Ka nako yonone batho ba yye ba thomisa go bitsa lebitso la Jehova.

it-1-E 338 ¶2

Go Dhelela Modimo

“Go bitsa lebitso la Jehova” ga gore go thomisiye ka dinako tsa Enoše mola go soko segela Mogogola ke mo go se ga nnete fote go se ga hlago, Abele yene ke mo go le botala a šele a bitsa lebitso la Modimo. (Gen 4:26; Heb 11:4) Mo nkare go ka mokgo bo ba go tšhutega ba dumelang ka gona, gore go bitsa lebitso la Modimo ka mokgonowa ke mo go le go le berekisa bošayedi fote ba berekisa lebitso lo la Jehova go bitsa batho kela dithombhe, sosone ke mo se ka maka gore go be le bo ba titshwarang ka mokgwa wa go befa.—Bona ENOŠE, ENOSI.

Go Bala Baebele

(Genesi 4:17–5:8) Ka nthago ga hone Kayini o yetsele le mosadi wage, ke mokane a yima a belega Enoše. Ke mokane ba thomisa go yaga mutši wo mogolo ke mokane a wo reya ka lebitso la morwayi wage Enoko. ¹⁸ Ka nthago ga hone Enoko a belegediwa Iradi. Ke mokane Iradi gwa ba papa wa Mehujayele, ke mokane Mehujayele gwa ba papa wa Methushayele, ke mokane Methushayele gwa ba papa wa Lameke. ¹⁹ Lameke a tseya basadi ka babedi gwa ba bage. Lebitso la mosadi wa mathomo ke Adha, ke mokane la wa bobedi ke mo go le Zilla. ²⁰ Adha a belega Jabhali. Ke mo go le yene wa mathomo ga bo ne ba dula matenteng fote ba na le dipholwane tsa go tlala. ²¹ Bhuti wage ke mo ba re ke Jubhali. Ke mo a yetiye mahlong bo ne ba kgana harepa le phayiphi. ²² Fote Zilla a belega Tubhali-kayini, wa gore ke mo a maka dithulusi tsa go makiwa ka morodi le tsa tshipi. Ke mokane sesi wa Tubhali-kayini ke mo go le Naama. ²³ Lameke o ngwadiye mantsu yawa a ngwalela basadi bage Adha le Zilla a re: “Theetselaneng lentsu laka, lune basadi ba Lameke; Theetselaneng so ke se bolabolang: Ke bolayye monna ka taba la gore o nkwaletsiye, Eya, mošomanyana ka taba la gore o nteyye. ²⁴ Mo nkare Kayini ba nyoko mo patedisa ga 7, di ra gore Lameke ba nyoko mo patedisa ga 77.” ²⁵ Adamo o yye a yetsela le mosadi wage, ke mokane a mmelegela morwayi. A mo reya gore ke Sethe ka taba la gore a re, “Ka taba la gore Kayini o bolayye Abele, Modimo o nneyye ngwana ye mongwana.” ²⁶ Ke mokane Sethe a belegediwa morwayi a mo reya gore ke Enosi. Ka yona nako yonone, batho ba yye ba thomisa go bitsa lebitso la Jehova.

5 Yowa ke puku ya ditaba tsa ku botala tsa Adamo. Ka letšatši lo Modimo a makiyeng Adamo, Modimo o mo makiye ka setshwano sage. ² O makiye monna le mosadi. Ka letšatši lo a ba makiyeng ka lona, o ba rufiye ke mokane a re Batho. ³ Adamo o phidiye 130 ya mengwaga ke mokane gwa ba papa wa morwayi wa go tshwana naye, wa setshwano sage, ke mokane a mo reya gore ke Sethe. ⁴ Ka nthago ga gore go be papa wa Sethe, Adamo o phidiye 800 ya mengwaga. Ke mokane gwa ba papa wa barwayi le barwediya. ⁵ Adamo o phidiye 930 ya mengwaga, ke mokane a kgwa. ⁶ Sethe o phidiye 105 ya mengwaga ke mokane gwa ba papa wa Enoše. ⁷ Ka nthago ga gore go be papa wa Enoše, Sethe o phidiye 807 ya mengwaga. Ke mokane gwa ba papa wa barwayi le barwediya. ⁸ Sethe o phidiye 912 ya mengwaga, ke mokane a kgwa.

JANUARY 20-26

MAKOLWANE KA TENG GA LENTSU LA MODIMO | GENESI 6-8

“O Makiye ka Mokgonone”

(Genesi 6:9) Tsowa ke ditaba tsa botala tsa Nnowa. Nnowa ke mo a lukiye. O tišupetsiye a lukiye segare ga bo ne a phela nabo. Nnowa ke mo a sepela le Modimo wa nnete.

(Genesi 6:13) Ka nthago ga mone Modimo a botsa Nnowa a re: “Ke nyaka go fetsa ka nama ka mokana ga yona, ka taba la gore ba tlatsiye lefase lowa ka bokgohlane, byalo ke nyoko fetsa ka bona le lefase lowa.

w18.02 4 ¶4

Nnowa, Daniyele le Jobo ke mo ba na le Tumelo Fote ba Theetsela—Tshwana Nabo

⁴ Tso di leketsiyeng go phiriketsa Nnowa. Ka dinako tsa bokokwane wa kokwane wa Nnowa ye ba reng ke Henoge, batho ke mo ba sa nyake go kwa selo ka Modimo. Ke mo ba biye ba bolabola “dilo tsa go tshosa” ka Jehova. (Juda 14, 15) Ba go ba le lešidi ke mo ba fo yeketsega ba yeketsegiye. Gabutšibutši, ka dinako tsa bo-Nnowa, “ba go ba le lešidi ke mo ba tlele ka matla mo lefaseng.” Mangeloyi yala ya dipelo tse diphifadu ma yye ma titšhentšha gore ma tshwane le batho ba mo lefaseng, ma titseyela basadi ka tšhinghi ke mokane ma ba belegisa bana ba digoboro ba go ba le swele. (Gen. 6:2-4, 11, 12) Mara Nnowa yene a sanka a tšhentšha. “Nnowa ke mo a rata ke Jehova. . . . Le selibilibi ke mo a se naso gare ga batho bo ke mo a phela nabo. Nnowa o sipidiye le Modimo wa mannete.”—Gen. 6:8, 9

(Genesi 6:14-16) Byalo timakele areka ka diphata tsa mohlare wa borofi. O make dikamara ka mo teng ga areka, ke mokane o yi kgakgape ka sekontiri ka teng le ka tawong. ¹⁵ O yi make ka mokgo: Areka yowa go be ya 300 ya dikhubhiti ka go lefa, 50 ya dikhubhiti ka bokoto, fote go be ya 30 ya dikhubhiti go ya gedimo. ¹⁶ O make le lefastere gore go thogo khanya ka mo arekeng, go be la khubhiti ka yyoši go tloga gedimo. Sekwalo sa areka yowa se be ka mo thoko fote o make gore yi be le lebato la ka tlase le la bobedi le la boraro.

w13-SE 4/1 14 ¶1

O “Sipidiye le Modimo”

Mmereko wone wo ka fo ba wo ba tsere 40 go segela ga 50 ya mengwaga gore ba wo fetse. Ke mo di nyaka ba kopetsela mehlare, ba yi kwetla ke mokane ba yi betla, ba yi maka dikwata, ba boya ba yi gahlanisa. Ke mo di nyaka areka yowa yi ba le mabato ka mararo, dikamara tsa go tlala nyana, le sekwalo ka ho thoko. Di fo ba lekgwaying gore ke mo go na le mafastere ku gedimo, di ka makega gore le hlaka ya gona ke mo yi hlabiye mo segare gore yi thogo falatsa meetši.—Genesi 6:14-16.

(Genesi 6:22) Nnowa o di makiye ka mokana ga tsona tso Modimo a mmutsiyeng. O f’lo maka ka mokgonone.

w11-SE 9/15 18 ¶13

Tiyisela mo o Taboga

¹³ Malata yawa ya Jehova ma gelepiye king gore ma tiyisele fote ma phomelele mo ma kene ma taboga? Bona so Pawulo a se ngwadiyeng ka Nnowa. (Bala Maheberu 11:7.) “Mogogola wowa wa gore wo yye wa tla ho lefaseng [ke mo wo ka sinya] nama ka mokana ga yona,” Nnowa “ke mo a soko di bona” tsotsone. (Gen. 6:17) Ke mo di soko bane di makega, ke mo go nyoko ba go le la mathomo. Atšiya, Nnowa aa f’lo re ke mo di ka sa makege, di ka sa kgonege kela a di tshepege. Ke ntaba? Ka taba la gore ke mo a na le tumelo ga tso Jehova a di hlayyeng, Jehova o nyoko di maka. Nnowa aa kwa nkare tso ke mo a butsiwwe gore a di make di nyoko thathafa. Mara, “o f’lo maka ka mokgonone.” (Gen. 6:22) Mo o lebelela tso ne di nyaka Nnowa a di maka—go yaga areka, go hlekeletsa dipholwane, go hlekeletsa tsa go ja tsa mutši wage le tsa dipholwane, go tšhomayela a pasopisa batho, le go maka gore ba mutši wage ba dule ba tiyelele ka mo ga tsa Modimo—ke mo go le mmereko wo mogolo wa gore a di lula go fo wo maka ‘ka mokgonone.’ Mara, tumelo ya Nnowa le go tiyisela gage di makiye gore yene le ba mutši wage ba phone fote ba rufiwe.

Go Wunyulla Tso di Wutammeng ka Baebeleng

(Genesi 7:2) O tseye dipholwane ka mokana ga tsona, go ya ka mehlobohlobo ya tsona tsa go yela kašupa kašupa, ya pholo le ya tshadi, ke mokane ga tsa go sa yela o tseye ka dipedi ka dipedi, ya pholo le ya tshadi;

w04-SE 1/1 29 ¶7

Monopo wa Puku ya Genesi—I

7:2—Ne go rorebeng mo go šinya go ba le dipholwane tsa gore di yediye le tsa gore a di ya yela? Go fo ba lekgwaying gore dihlabelo tso ne di makiwa ke mo di ya ka gore sehlabelo sone ke sa ying mara di sa yi ka gore king tso ne di jiwa le tsa gore ne di sa jiwi. Nakwela go soko segela Mogogola, nama ya pholwane ke mo yi sa jiwi. Taba ya go kgetiwa ga tsa go ja tsa “go yela” le tsa “go sa yela” yi thomisiye go ba gona ka Molawo wa Moše, ke mokane nakwela go fela ka wona, taba yone ya sa sa ba gona. (Mebereko 10:9-16; Maefeso 2:15) Di šupetsa nkare Nnowa ke mo a tšiba gore ke dihlabelo tsa mošaga mang tso ne di tshwanele go makediwa Jehova. Ka nthago ga gore a tšwe ku arekeng, “o yye a yagela Jehova altare ke mokane a tseya tse dingwana tsa dipholwane tsa go yela le tse dingwana ga tsa go phurrwa ke mokane a maka sehlabelo sa go leboga mone altareng.”—Genesi 8:20.

(Genesi 7:11) Mo Nnowa a na le 600 ya mengwaga, ka kgwedi ya bobedi, ka letšatši la bo 17 la kgwedi yone, ka lona letšatši lolone gwa ba le didiba tsa meetši ke mokane ku magedimong gwa yahlama digheyiti tsa meetši.

w04-SE 1/1 30 ¶1

Monopo wa Puku ya Genesi—I

7:11—Di šupa nkare meetši ya Mogogola ke mo ma tšwa kaye? Ka “letšatši” la bobedi la mo dilo di makiwa, nakwela go makiwa “sebakabaka” sa mo lefaseng, ke mo go na le meetši “ka tlase ga sebakabaka” le meetši “ka kgakala ga sebakabaka.” (Genesi 1:6, 7) Meetši “ya ka tlase” ke ya gore ke mo ma na ma le gona mo lefaseng. Meetši ya ka “kgakala” ke mo go le maru ya gore ma beyiwwe gedimo ga lefase, ma makiye “meetši ya go tlala.” Meetši yawa ma yye ma kgotologela mo lefaseng ka dinako tsa Nnowa.

Go Bala Baebele

(Genesi 6:1-16) Byalo mo batho ba thomisa go tlala mo lefaseng, fote ba belegediwa barwediya, ² barwayi ba Modimo wa mannete ba thomisa go di bona tsa gore barwediya ba batho ba bafele. Ba thomisa go tseya basadi ka mokana ga bona ba gore ba ro tikgetela. ³ Ke mokane Jehova a re: “Nka sa di kgone go lefisela motho pelo go ya go yye, ka taba la gore go fo ba nama. Byalo, matšatši yage ya lephelo ma nyoko kgera ga 120 ya mengwaga.” ⁴ Manefelimo ke mo ma le gona mo lefaseng le ka nthago ga hone. Ka nako yone, barwayi ba Modimo wa nnete ke mo ba ya mahlong ba yetsela le barwedi ba batho, fote ba ba belegela barwayi. Ke mo go le ba bagolo ka matla ba dinako tsa ku botala, banna ba go tšibega. ⁵ Mara, Jehova a bona gore dilo tsa go befa tso batho ba di makang mo lefaseng di napa di ro ya ka matla fote ke mo ba dulela go nagana dilo tsa go befa ka ho dipelong tsa bona.⁶ Jehova a tisola gore ke mo a sa ba makela ying batho mo lefaseng, ke mokane a kgongwela. ⁷ Ke mokane Jehova a re: “Ke nyoko suwelanya batho bo ke ba makiyeng ho lefaseng, batho le dipholwane tsa gaye, tsa go sepela ka dimpa, le tsa go phurrwa ku magedimong, ka taba la gore ke tiputsisa gore anthe ke mo ke sa ba makela ying.” ⁸ Mara Nnowa ke mo a le gabutši ka matla mahlong ga Jehova. ⁹ Tsowa ke ditaba tsa botala tsa Nnowa. Nnowa ke mo a lukiye. O tišupetsiye a lukiye segare ga bo ne a phela nabo. Nnowa ke mo a sepela le Modimo wa nnete. ¹⁰ Mo nako yi kene yi ya, Nnowa o yye a ba le barwayi ka bararo, Šeme, Hama le Jafeta. ¹¹ Mara lefase ke mo le sinyegiye mahlong ga Modimo wa nnete, fote ke mo le tlele ka bokgohlane. ¹² Byalo Modimo a lebelela mo lefaseng, a bona le sinyegiye; nama ka mokana ga yona ke mo yi sinnye lefase. ¹³ Ka nthago ga mone Modimo a botsa Nnowa a re: “Ke nyaka go fetsa ka nama ka mokana ga yona, ka taba la gore ba tlatsiye lefase lowa ka bokgohlane, byalo ke nyoko fetsa ka bona le lefase lowa. ¹⁴ Byalo timakele areka ka diphata tsa mohlare wa borofi. O make dikamara ka mo teng ga areka, ke mokane o yi kgakgape ka sekontiri ka teng le ka tawong. ¹⁵ O yi make ka mokgo: Areka yowa go be ya 300 ya dikhubhiti ka go lefa, 50 ya dikhubhiti ka bokoto, fote go be ya 30 ya dikhubhiti go ya gedimo. ¹⁶ O make le lefastere gore go thogo khanya ka mo arekeng, go be la khubhiti ka yyoši go tloga gedimo. Sekwalo sa areka yowa se be ka mo thoko fote o make gore yi be le lebato la ka tlase le la bobedi le la boraro.

JANUARY 27–FEBRUARY 2

MAKOLWANE KA TENG GA LENTSU LA MODIMO | GENESI 9-11

“Lefaseng ka Mokana ga Lona ke mo go Bolabodiwa Mmolabolo ka Wwoši”

(Genesi 11:1-4) Byalo, lefaseng ka mokana ga lona ke mo go bolabodiwa mmolabolo ka wwoši fote go berekisiwa mošaga ka wwoši wa mantsu. ² Mo ba kene ba sepela ba ya bohlabela, ba kraya poleke nageng ya Šinara ke mokane ba thomisa go dula hohone. ³ Ke mokane ba botsanana ba re: “Tla re kwaneneng! Tla re makeneng ditina fote re di tšhube.” Byalo ba berekisiye ditina, a baa berekisa matlapa fote ba berekisiye sekontiri go le leraga. ⁴ Byalo ba re: “Tla re kwaneneng! Tla re tiyageleneng mutši wo mogolo fote re yage sewokamelo sa go segela ku magedimong, fote tla re timakeleneng lebitso la go tšibega, gore re sa tlalagane le lefase lowa.”

it-1-E 239

Bhabhilona ye Mogolo

Tso Bhabhilona ya ku Botala yi Tšibegang ka Tsona. Go thomisa ga mutši wa Bhabhilona le go leketsa go yaga Sewokamelo sa Bhabele di makegiye magahla. (Gen 11:2-9) Sewokamelo sone le mutši wone wo mogolo ke mo ba sa di yagele gore di gadimise lebitso la Modimo mara bo ne ba yaga, ke mo ba makela gore bona beng, ba ‘timakele lebitso la go tšibega.’ Taba ya gore diwokamelo tsa mošaga wonone tse dikgolo di krayiwwe mašuping ya Bhabhilona ya ku botala le kaye-kaye Mesopotamiya, yi šupetsa gore sewokamelo sela sa mathomo, le mo se ka fo ba se yagiwwe byang, ke mo go le sa sedumedi. Di fo ba lekgwaying gore Jehova Modimo ke mo a di tseya go le sedumedi sa matsaka, ka taba la gore aa jikajika go segelela sepheto sa go šašisa go yagiwa ga tempele yone. Lebitso la mutši wone la Seheberu la gore Bhabele le ra gore “go sa kwisisi”, la Sesumeri la gore (Ka-dingir-ra) le la Seakhadiya la gore (Bab-ilu) ma ra gore “Gheyiti ya Modimo.” Bo ba yyeng ba šala ba duli hone ga mutši wone ba le tšhentšhiye ka gore ba tšhabelele hlatollo yela ya lona, ya go yelana le go yahludiwa, mara mokgwa wone wa nyuwane wa go le bitsa wo sa na wo šupetsa gore mutši wone ke mo go le wa sedumedi.

it-2-E 202 ¶2

Mmolabolo

Ditaba tso di leng ga Genesi di hlatolla taba ya gore ba bangwana ga batho bo ba phidiyeng ka nthago ga Mogogola, ba yye ba hlekeletsana gore ba make mmereko wa gore wo phigisana le tso di nyakang ke Modimo, ka mokgo Nnowa le barwayi bage ke mo ba butsiwwe ka gona. (Gen 9:1) Ke mo ba sa nyake go tlalagana ba boya ba “tlatsa lefase,” ke mo ba tikemisele gore batho ba dule ggoši, ba hlekeletsiwwe ga poleke ka yyoši, ya gore yi yye ya tšibega go le Moyedi wa Šinara ku Mesopotamiya. Di šupetsa gore ke mo ba nyoko rapela gana mone ga gore go na le sewokamelo sa sedumedi.—Gen 11:2-4.

(Genesi 11:6-8) Ke mokane Jehova a re: “Wa di bona! Ke batho ba mošaga ka wwoši, ba gore ba bolabola mmolabolo ka wwoši fote ba thomisiye go maka tsotso. Byalo se sengwana le se sengwana so ba ka naganang go se maka, ba ka sa šitege. ⁷ Koriye! Tla re thewoge, re ye dhunghanya mmolabolo wa bona gore ba sa sa kwisisana mo ba bolabola. ⁸ Ke mokane Jehova a maka gore ba tlalagane le lefase lowa ka mokana ga lona, ka gonyana ka gonyana ba lesetsa go yaga mutši wone.”

it-2-E 202 ¶3

Mmolabolo

Modimo wa matšhika ka moka o makiye gore ba šitege go ya mahlong ka mmereko wone wa bona ka go maka gore ba sa sa kgona go maka selo ggoši, tsotsone o di segelele ka go maka gore ba sa sa kwana mo ba bolabola. Di makiye gore di sa sa kgonega gore ba tshwarisane hone ga mmereko wone wa bona fote tsa maka gore ba tlalagane le lefase lowa ka mokana ga lona. Go dhunghanya mmolabolo wa bona fote ke mo go nyoko maka gore go maka tsa go tšwa pateng, go leng go maka tsa gore a di yelane le Modimo, go sa be lula ku mahlong, ka taba la gore ke mo di nyoko maka gore batho ba sa sa kgona go gahlanisa dihlogo le matšhika ya bona gore ba thogo maka dilo, fote tsa maka gore go sa be lula go tšhuta se sengwana sa gore se tšiba ke batho ba mmolabolo wo mongwana, go leng go tšhuta ka tso di makegeleng batho kela tso ba di wunyulliyeng, go se tsa Modimo. (Tshwanisa le Mmo 7:29; Dot 32:5) Byalo, le mo yi le gore go dhunganya mmolabolo wa batho go makiye gore go thomise go ba le go yarogana segare ga bona, mara gabutšibutši go ro gelepa ka taba la gore ke mo di ka sa sa ba lula gore ba nyake go maka dilo tsa kotsi tsa gore fote di ka fetsa di ba kwaletsa. (Gen 11:5-9 tshwanisa le Jes 8:9, 10) Mo motho a lebelela tso di makegang gana byalo ka taba la tso batho ba di tšibang le go sa di berekisi ga bona gabutši, di napa di ba lekgwaying gore Modimo ke mo a bona gore go nyoko makega ying mo a ka fo lesetsa taba ya go yagiwa ga Bhabele yi ya mahlong.

(Genesi 11:9) Nka taba lo ba yyeng ba re ke Bhabele, ka taba la gore gana mone, Modimo o dhunghannye mmolabolo wa lefase lowa ka mokana ga lona fote Jehova o makiye gore ba tlalagane le lefase lowa ka mokana ga lona.

it-2-E 472

Ditšhaba

Byalo ka taba la gore ke mo ba sa sa kwana mo ba bolabola, ba bangwana le ba bangwana ba yye ba thomisa go ba le setšo sa bona, mokgwa wa bona le sedumedi sa bona, ba bangwana le ba bangwana ke mo ba timakela dilo ka mokgo ba nyakang. (Lef 18:3) Ka taba la gore ke mo ba šele ba tšhurugiye ga Modimo, batho bone ba mošagašaga ba yye ba timakela dithombhe tsa go tlala tsa medimo ya bona ya matsaka.—Dot 12:30; 2Mg 17:29, 33.

Go Wunyulla tso di Wutammeng Baebeleng

(Genesi 9:20-22) Ke mokane Nnowa a thomisa go lema fote a gaša didhrivha. ²¹ Mo a šele a nwile wayini yone, o yye a tlayila a boya a titšula a le ka teng ga letente lage. ²² Hama, wa gore ke papa wa Kanana, a bona papage a sa tšwara ke mokane a ye botsa bobhuti wage ka ku tawong.

(Genesi 9:24, 25) Mo Nnowa a šele a hlahlamme, a kwa tso morwayi wage wa lekotwana a mo makiyeng tsona, ²⁵ a re: “Kanana a wele ke senyama. Go be lebhantiti la go sa re selo ga bobhuti wage.”

it-1-E 1023 ¶4

Hama

Di ka makega gore Kanana ka boyene mong ke mo a le gona mo di makega le gore Hama, papage, o šitegiye go mo wolola. Kela di ka makega gore Nnowa ke mo a bolabola tsa boporofeta a butšwelediwwe, a bona tsa ku mahlong, gore mokgwa wa go befa wa Hama, wa gore di ka makega gore ke mo wo šele wo bonala le ga morwayi wage Kanana, ke mo wo nyoko tshilela bana ba Kanana. Senyama sone se thomisiye se makega ka nakwela Maisrayele ya Semitiki ma hlula Makanana. Bo ba gore a ba napa ba fetsa ka bona, go tshwana le Maghibhiyoni [Još 9] ba ba makiye mabhantiti ya Israyele. Mo go šele go fitiye dikete tsa mengwaga, se yye mahlong se makega, ka nakwela ditlogolwana tsa Kanana wa gore ke morwayi wa Hama, di lawola ke memmušo ya lefase ya Jafeta ya Mameda le Maperesiya, Gerika le Roma.

(Genesi 10:9, 10) O yye a ba wa go tsoma wa go ba le matšhika, wa go phigisana le Jehova. Nka taba lo ba reng: “Go fo tshwana le Nimiroti, wa go tsoma wa go ba le matšhika, wa go phigisana le Jehova.” ¹⁰ Mmušo wage wo thomisiye Bhabele, Erekhe, Akhadi le Khalene nageng ya Šinara.

it-2 503

Nimiroti

Mmušo wage wo thomisiye Bhabele, Erekhe, Akhadi le Khalene, tsa gore ka moka di nageng ya Šinara. (Gen 10:10) Byalo di ka makega gore ke yene a hlayyeng gore go yagiwe Bhabele le sewokamelo sa yona. Sepheto so se yelana le ka mokgo Majuda ya ku botala ke mo ma yi bona ka gona. Josefase o ngwadiye gore: “[Nimiroti] o tšhentšhiye mokgwa wa mmušo ka gonyana ka gonyana gore go be wa go kgahleletsa, a tipotsa gore, gore a thogo lisisa batho go tseyela Modimo gedimo, di nyaka a make gore ba tisamele ka mmušo wo wage. Ke mo a tshepisa gore mo Modimo a nyaka go lawola lefase fote, yene o nyoko mo patedisa, ka taba la gore ke mo a nyaka go yaga sewokamelo sa go lefa, lela la gore le meetši ke mo ma ka sa se segelele, a patedisa tso di makegeleng bokokwane wa kokwane wage. Batho ke mo ba di nyaka ka matla go maka tso di hlayang ke [Nimiroti], ba re go theetsela Modimo ke bobhantiti, ke mokane ba thomisa go yaga sewokamelo . . . fote se yye sa yagiwa ka go yakgoswa.”—Jewish Antiquities, I, 114, 115 (iv, 2, 3).

Go Bala Baebele

(Genesi 10:6-32) Barwayi ba Hama ke mo go le Kuši, Mizirayimi, Puti le Kanana. ⁷ Barwayi ba Kuši ke mo go le Seba, Havila, Sabita, Raama le Saputika. Barwayi ba Raama ke mo go le Šeba le Dhedhana. ⁸ Kuši gwa ba papa wa Nimiroti. Wa gore ke mo go le yene wa mathomo wa go ba le matšhika ho lefaseng. ⁹ O yye a ba wa go tsoma wa matšhika, wa go phigisana le Jehova. Nka taba lo ba reng: “Go fo tshwana le Nimiroti, wa go tsoma wa go ba le matšhika, wa go phigisana le Jehova.” ¹⁰ Mmušo wage wo thomisiye Bhabele, Erekhe, Akhadi le Khalene nageng ya Šinara. ¹¹ Go tloga hone ga naga yone a ya Asiriya a ye yaga mutši wa Ninive, wa Rehobothire, wa Khala, ¹² le wa Resene segare ga Ninife le Khala: Wo ke wona mutši wo mogolo. ¹³ Mizirayimi gwa ba papa wa Ludima, Anamimi, Lehabimi, Nafutuhimi, ¹⁴ Phaturusimi, Khasuluhimi (wa gore Mafilisita ma tšwile gage) le Khafotorimi. ¹⁵ Kanana gwa ba papa wa Sidoni, letšibula lage, le Hethe, ¹⁶ le Majebusi, Maamoro, Maghighašayiti, ¹⁷ Mahivi, Maakite, Masinayite, ¹⁸ Maarivadite, Mazamara le Mahamathi. Ka nthago, mitši ya Makanana ya tlalagana. ¹⁹ Byalo Makanana ke mo ma kgera go tlugisela ka Sidhoni go segela ka Ghera, thina le Ghaza, go segela le ka Sodhoma, Ghomora, Adhina le Zebhoyimo, thina le Laša. ²⁰ Bo ke mo go le barwayi ba Hama di ya ka mitši ya bona le mmolabolo wa bona, ka dinaga tsa bona le ka ditšhaba tsa bona. ²¹ Šeme le yene o yye a ba le bana, wa gore ke kokwane wa barwayi ba Ebhere ka mokana ga bona le bobhuti wa Jafeta ye mogolo. ²² Barwayi ba Šeme ke mo go le Elama, Ašuri, Aphakišadi, Ludi le Araama. ²³ Barwayi ba Araama ke mo go le Uzi, Hulu, Gheda le Maši. ²⁴ Aphakišadi gwa ba papa wa Šela ke mokane Šela gwa ba papa wa Ebhere. ²⁵ Ebhere o yye a ba le barwayi ka babedi. Ye mongwana ke mo go le Pelege, ka taba la gore ka nakwela a phidiyeng ka yona ke mo go na le go yarogana ho lefaseng. Lebitso la bhuti wage ke mo go le Jokothani. ²⁶ Jokothani gwa ba papa wa Alomodhadha, Šelefe, Hazamavethe, Jera, ²⁷ Hadhoramo, Uzala, Dhikila, ²⁸ Obhala, Abhimayele, Šeba, ²⁹ Ofiri, Havila le Jobhabha, bo ka mokana ga bona ke mo go le barwayi ba Jokotani. ³⁰ Poleke yo ne ba dula ga yona yi yye ya yeketsega, go thomisa ka Meša go segela ka Sefara, dithabeng tsa bohlabela. ³¹ Bowa ke mo go le barwayi ba Šeme di ya ka mitši ya bona le mmolabolo wa bona, ka dinaga tsa bona le ka ditšhaba tsa bona. ³² Yowa ke mitši ya barwayi ba Nnowa ka go lategetsana ga bona le ka ditšhaba tsa bona. Ditšhaba di yye tsa tlalagana ho lefaseng di tšwa ga bobowa ka nthago ga Mogogola.