सोमबार, जून १६
पवित्र शक्तिले यो कुरा स्पष्ट पारेको छ कि पहिलो पाल अस्तित्वमा रहुन्जेलसम्म पवित्र ठाउँमा पस्ने बाटो प्रकट गरिएको थिएन।—हिब्रू ९:८.
वासस्थानको र पछि यरुसलेममा बनाइएको मन्दिरको भित्री भाग उस्तै थियो। भित्री भागमा दुई वटा कोठा थिए—“पवित्र कोठा” र “महापवित्र कोठा।” यी दुई कोठालाई बुट्टा भरिएको पर्दाले छुट्ट्याएको थियो। (हिब्रू ९:२-५; प्रस्थ. २६:३१-३३) पवित्र कोठाभित्र सुनको पानस, धूप बाल्ने वेदी र भेटीको रोटी राख्ने टेबुल थियो। ‘पुजारीको रूपमा सेवा गर्न अभिषेक गरिएका’ पुजारीहरू मात्र पवित्र कोठाभित्र पस्न पाउँथे। (गन्ती ३:३, ७, १०) महापवित्र कोठाभित्र सुनले बनाइएको करारको सन्दुक थियो, जसले यहोवाको उपस्थितिलाई सङ्केत गर्थ्यो। (प्रस्थ. २५:२१, २२) वर्षमा एक चोटि प्रायश्चितको दिनमा पर्दापछाडि रहेको महापवित्र कोठाभित्र प्रधानपुजारी मात्र पस्न पाउँथे। (लेवी १६:२, १७) तिनी आफ्नो र पूरै राष्ट्रको पापको प्रायश्चितको लागि जनावरको रगत लिएर महापवित्र कोठाभित्र पस्थे। समयको दौडान यहोवाले वासस्थानका यी भागहरूको वास्तविक अर्थ खुलाउनुभयो।—हिब्रू ९:६, ७. w२३.१० पृ. २७ अनु. १२
मङ्गलबार, जून १७
तिमीहरू आपसमा प्रेम गरिरहो।—युह. १५:१७.
बाइबलमा पटक-पटक “आपसमा प्रेम गर” भन्ने आज्ञा दिइएको छ। (युह. १५:१२; रोमी १३:८; १ थिस्स. ४:९; १ पत्रु. १:२२; १ युह. ४:११) तर प्रेम एउटा भावना हो, जुन मानिसको आँखाले देख्न सक्दैन। त्यसोभए अरूलाई प्रेम गरेको हामी कसरी देखाउन सक्छौँ? आफ्नो बोली र व्यवहारबाट। भाइबहिनीलाई प्रेम गरेको देखाउने थुप्रै तरिका छन्। केही उदाहरण विचार गरौँ: “एकअर्कासित साँचो बोल्नू।” (जक. ८:१६) “आपसमा शान्ति कायम राख।” (मर्कु. ९:५०) “एकअर्काको आदर गर्नमा अगुवाइ लेओ।” (रोमी १२:१०) “एकअर्कालाई स्वीकार गर।” (रोमी १५:७) “एकअर्कालाई . . . क्षमा गरिरहो।” (कल. ३:१३) “एकअर्काको बोझ बोक्ने गर।” (गला. ६:२) “एकअर्कालाई . . . सान्त्वना दिइरहो।” (१ थिस्स. ४:१८) “एकअर्काको उत्थान गरिरहो।” (१ थिस्स. ५:११) “एकअर्काका लागि प्रार्थना गर।”—याकु. ५:१६. w२३.११ पृ. ९ अनु. ७-८
बुधबार, जून १८
आशामा रमाओ।—रोमी १२:१२.
हामी हरेक दिन बलियो विश्वास चाहिने विभिन्न निर्णय गर्छौँ। जस्तै: कसलाई साथी बनाउने, कस्तो मनोरञ्जन रोज्ने, कुन विषय लिएर पढ्ने, कस्तो काम गर्ने, कोसित विवाह गर्ने, बच्चा जन्माउने कि नजन्माउने। हामीले आफैलाई यस्ता प्रश्नहरू सोध्नु बेस हुन्छ: ‘के मेरा निर्णयहरूबाट यो संसार चाँडै बितेर जाँदै छ र त्यसको ठाउँमा नयाँ संसार स्थापना हुनेछ भन्ने कुरामा विश्वस्त भएको देखिन्छ? अथवा मरेपछि सबै सक्यो भन्ने मानिसहरूको जस्तो सोचाइ झल्किन्छ कि?’ (मत्ति ६:१९, २०; लुका १२:१६-२१) नयाँ संसार नजिकै छ भन्ने कुरामा हाम्रो विश्वास बलियो छ भने हामीले सही निर्णयहरू गर्न सक्नेछौँ। हामीलाई कुनै-कुनै परीक्षा सहन बलियो विश्वास चाहिन्छ। हामीले खेदो, गम्भीर स्वास्थ्य समस्या वा निराश बनाउने अन्य परीक्षाहरू भोग्नुपर्ने हुन सक्छ। सुरुमा त हामीलाई यस्ता परीक्षाहरू सहन सक्छौँ जस्तो लाग्न सक्छ। तर त्यस्ता परीक्षाहरू अक्सर लामो समयसम्म रहिरहन्छ। त्यसैले त्यो सहन र रमाएर यहोवाको सेवामा लागिरहन हामीलाई बलियो विश्वास चाहिन्छ।—१ पत्रु. १:६, ७. w२३.०४ पृ. २७ अनु. ४-५