Bíhwiidooʼáłígíí 11
Daʼoodląʼ dóó Éʼélʼįʼ God Doo bił Yáʼátʼéehii
Haitʼéhígííshąʼ daʼoodląʼ dóó éʼélʼįʼ doo ákódatʼéeh da? (1)
Daʼ Christ yidaʼałʼíniish God éí Trinity átʼéego deiyoodlą́ą doo? (2)
Haʼátʼíísh biniiyé tʼááʼaaníí Christ yidaʼałʼínii Késhmish, Easter, doodaiiʼ hóʼdizhchínę́ęjįʼ áneełkahgo doo yaʼahínéikah da? (3, 4)
Daneeznánísh éí dahináanii atíidoolííłgo átʼé? (5)
Daʼ tsin ałnáoszidʼísh Jesus yikááʼ daaztsą́? (6)
God bił hózhǫ́ ídiilnííłii éí haitʼéego ílı̨́? (7)
1. Doo tʼáá ałtso daʼoodląʼ dóó éʼélʼįʼ tʼóó baaʼih da. Ndi God éí doo bił tʼáá áko da, díí doo tʼááʼaaníí nahaghá bitsʼą́ą́dę́ę́ʼ yitʼí ládą́ą́ʼ doodaiiʼ Diyin Bizaad binaʼnitnii yikʼijįʼ nilı̨́įgo.—Matthew 15:6.
2. Trinity: Daʼ Jiihóvahʼísh Trinity átʼé—tááʼ diné tʼááłáʼí God nilı̨́? Ndagaʼ! Jiihóvah, Azhéʼé, tʼáá bí “tʼéiyá tʼááʼaaníí God nilı̨́.” (John 17:3; Mark 12:29) Jesus éí Biyeʼ áłtsé yizhchíinii nilı̨́, dóó bí éí God yiyaadóó dah sidá. (1 Corinthians 11:3) Azhéʼé éí Ayeʼ yiláahdi átʼé. (John 14:28) Níłchʼi diyinii éí doo diné átʼée da; God bibeeʼadziil yee naalnishii átʼé.—Genesis 1:2; Acts 2:18.
3. Késhmish dóó Easter: Jesus éí doo Níłchʼitsoh yiził 25 yoołkáł góneʼé biʼdizhchı̨́i da. Ghąąjíʼ yiził tʼááłáʼí yoołkáł góneʼ daatsʼí biʼdizhchı̨́, ákweʼé yihahgo éí nidaʼniłkaadí bidibé tłʼéeʼgo tʼahdii tłʼóóʼgóó neeshjééʼ ńtʼę́ę́ʼ. (Luke 2:8-12) Jesus bidizhchinii bá ahínaʼildahii bidaʼiłʼíinii tʼáadoo yichʼįʼ yiyííłʼaad da. Áko ndi, bídahoołʼaahii díí dasétsą́ą góneʼ shéédaałniih doo yidííniid. (Luke 22:19, 20) Késhmish dóó biʼéʼélʼįʼ ałkʼidáą́ʼ doo tʼááʼaaníí ndahaghá bitsʼą́ą́dę́ę́ʼ háátʼiʼ. Díí Easter biʼéʼélʼįʼ ałdóʼ tʼáá akótʼé, ayęęzhii dóó gah chooʼı̨́ átʼéhíí. Áłtsé Christ yidaʼałʼínii éí Késhmish doodaiiʼ Easter doo yá ahinééhkah da ńtʼę́ę́ʼ, díí jı̨́įdi tʼááʼaaníí Christ yidaʼałʼı̨́nii ałdóʼ.
4. Hóʼdizhchínę́ęjįʼ Anayííłką́ągo: Tʼáá naakihígóó tʼéiyá Diyin Bizaad yaa halneʼ hóʼdizhchínę́ęjįʼ anayííłką́ągo bá ahíʼiildééʼ díí éí diné tʼáá áłah doo Jiihóvah yichʼįʼ nahałáa da ńtʼę́ę́ʼ. (Genesis 40:20-22; Mark 6:21, 22, 24-27) Áłtsé Christ yidaʼałʼínii daazlı̨́ʼę́ę hóʼdizhchínę́ęjįʼ áneełkahgo doo ahínéikah da ńtʼę́ę́ʼ. Hóʼdizhchínę́ęjįʼ áneełkahgo ahínáʼiilda biʼéʼélʼįʼ ałkʼidą́ą́ʼ doo tʼááʼaaníí nahaghá bitsʼą́ą́dę́ę́ʼ háátʼiʼ. Tʼááʼaaníí Christ yidaʼałʼı̨́nii tʼáá yihahgo naalyéhé ałchʼįʼ ádeiłʼı̨́ dóó tʼáá bánáhooʼaah góneʼ ił hózhǫ́ biniiyé ahínéikah.
5. Daneeznánii Bináhádzidii: Daneeznánii doo haʼátʼíida łáʼ ánáánéidoodlííł da índa doo daʼaniih da. Nihí doo bíká adiilwoł da, índa doo atínihidoolííł da. (Psalm 146:4; Ecclesiastes 9:5, 10) Ńdídzihii éí daatsaah, éí daaztsą́ądoo doo hiináa da. (Ezekiel 18:4) Ndi łahda níłchʼi ndaalʼaʼí doo yáʼádaashxóonii, demons daolyéhígíí, daneeznánée biníłchʼi áńdaʼdiilʼįįh. Tʼáá háiiʼda biʼéʼélʼįįł, daneeznáanii báházid doodaiiʼ bichʼįʼ nahadlá bídadéétʼiʼii éí doo ákódaatʼée da.—Isaiah 8:19.
6. Tsin Ałnáoszid: Jesus éí doo tsin ałnáoszid yikááʼ daaztsą́ą da. Bí éí tsin yikááʼ daaztsą́. Greekjí saad “tsin ałnáoszid” (cross) deiłnínígíí tʼóóʼahayóí Diyin Bizaad dabiyíʼ éí tsʼídá tʼááłáʼí tsin sitą́ą́góó ááhyíłní. Tsin ałnáoszid yá sizinii éí ałkʼidáą́ʼ doo tʼááʼaaníí nahaghá bitsʼą́ą́dę́ę́ʼ háátʼiʼ. Áłtsé Christ yidaʼałʼínii tsin ałnáoszid tʼáadoo chodayoosʼįįd da doodaiiʼ doo yichʼįʼ ndahałáa da ńtʼę́ę́ʼ. Ákohgo, baa ntsíníkeesgo daʼ tʼáásh akótʼé tsin ałnáoszid nahadláago choidiilʼįįłígíí?—Deuteronomy 7:26; 1 Corinthians 10:14.
7. Tʼáá shı̨́ı̨́ yéego nanitłʼago átʼé díí łáʼ daʼoodląʼ dóó éʼélʼįʼ yóóʼ adidííʼááłígíí. Nikʼéí dóó nikʼis danilíinii shı̨́ı̨́ niʼoodląʼ łahgo óhlééhlágo daniłníigo nighaʼdaʼdiitʼaah doo. Ndi God bił hózhǫ́ óółzinígíí éí bílaʼashdlaʼii bił hózhǫ́ óółzinígíí bilááh átʼéego ílı̨́.—Proverbs 29:25; Matthew 10:36, 37
[Picture on page 22]
God éí doo Trinity átʼée da
[Picture on page 23]
Késhmish dóó Easter éí ałkʼidáą́ʼ doo tʼááʼaaníí ndahagháígíí bitsʼą́ą́dę́ę́ʼ háátʼiʼ
[Picture on page 23]
Tʼáadoo biniiyéhégóó daneeznánii bichʼįʼ nahwiijiłáa doo doodaiiʼ béédeiildzid doo