Zimene Mungacite Kuti Kuŵelenga Baibo Kwanu Kukhale Kopindulitsa Komanso Kokondweletsa

Yoswa akuŵelenga Cilamulo; mpanda wa Yeriko ukugwa koma nyumba ya Rahabi siikugwa; Yoswa wakweza manja m’mwamba ndipo akupemphela

YOSWA anapatsidwa nchito yaikulu kwambili. Anafunika kutsogolela mtundu wa Aisiraeli kukaloŵa m’Dziko Lolonjezedwa, ndipo anali kuyembekezela kukumana na adani oopsa. Koma Yehova anamulimbikitsa na kumutsimikizila kuti adzapambana. Anamuuza kuti: ‘Khala wolimba mtima ndipo ucite zinthu mwamphamvu. Uzitsatila malamulo anga onse. Uziwaŵelenga usana ndi usiku, kuti uonetsetse kuti ukutsatila zonse zolembedwamo. Ukatelo, udzakhala ndi moyo wopambana, ndipo udzacita zinthu mwanzelu.’—Yos. 1:7, 8.

Popeza tikukhala m’masiku otsiliza komanso ovuta, nafenso timakumana na mavuto aakulu. (2 Tim. 3:1) Mofanana ndi Yoswa, tingapambane ngati titsatila malangizo amene Yehova anam’patsa. Tifunika kumaŵelenga Baibo tsiku lililonse, na kuseŵenzetsa mosamala mfundo zimene taŵelengazo pamene takumana na ciyeso.

Ambili a ise tingavomeleze kuti zoŵelenga-ŵelenga sitizikonda komanso kuphunzila kumativuta. Komabe, popeza kuti kuŵelenga Baibo n’kofunika ngako, onani pa kamutu kakuti “Yesani Kucita Izi,” pamene pali malangizo abwino amene angakuthandizeni kuti kuŵelenga Baibo kwanu kukhale kopindulitsa na kokondweletsa.

Wamasalimo anaimba kuti: “Ndiyendetseni m’njila ya malamulo anu, pakuti ndikukondwela ndi njila imeneyi.” (Sal. 119:35) Na imwe mungapeze cimwemwe coculuka poŵelenga Mau a Mulungu. Pamene mupitiliza kuphunzila Baibo mwakhama, mudzapeza mfundo zambili zothandiza.

N’zoona kuti sitinapatsidwe udindo wotsogolela mtundu wa anthu monga umene Yoswa anapatsidwa. Koma na ise timakumana na mavuto. Conco, mofanana ndi Yoswa, tifunika kumaŵelenga Mau a Mulungu na kuwaseŵenzetsa. Ngati ticita zimenezi, ifenso tidzakhala na umoyo wopambana, komanso tidzacita zinthu mwanzelu.

YESANI KUCITA IZI

Muzipemphela musanayambe kuŵelenga. Baibo ni mau ouzilidwa na Mulungu Wamphamvuyonse amene analembedwa kuti akuthandizeni. Conco, pamene muŵelenga Baibo, muzimupempha kuti akuthandizeni kuimvetsetsa, kukumbukila mfundo zimene mwaŵelenga, na kuziseŵenzetsa mu umoyo wanu.—Ezara 7:10.
Muzidzifunsa mafunso pamene muŵelenga Baibo kapena mabuku ofotokoza Baibo. Mungadzifunse kuti, ‘Kodi nkhaniyi iniphunzitsa ciani ponena za Yehova? Kodi igwilizana bwanji na mfundo yaikulu ya Baibo yonse? Kodi ningaseŵenzetse bwanji mfundo zimenezi pothandiza ena?’
Muzisinkhasinkha zimene mwaŵelenga. Pamene muŵelenga, mungaime pang’ono na kuyamba kusinkha-sinkha. Dzifunseni kuti, ‘Kodi nkhaniyi ikunicititsa kumvela bwanji? N’cifukwa ciani nimvela mwanjila imeneyi? Kodi igwilizana bwanji na zimene zinanicitikila m’mbuyomu, zimene zikunicitikila lomba, kapena zimene zinganicitikile m’tsogolo? Ningaseŵenzetse bwanji mfundo za m’Baibo zimenezi kapena malangizo amenewa mu umoyo wanga?’ (Yobu 23:5; Sal. 49:3) Yesani kuona ngati mungakwanitse kufotokoza cifukwa cimene Yehova amalangizila anthu ake kupewa makhalidwe ena ake. Kapena ganizilani mmene zinthu zikanayendela ngati munthu wa m’nkhani imene mwaŵelengayo akanacita zinthu mosiyanako.—Deut. 32:28, 29.
Muziyelekezela m’maganizo mwanu kuti mukuona kapena kumva zimene muŵelenga. Mwacitsanzo, poŵelenga nkhani ya Yosefe, yelekezelani m’maganizo mwanu kuti mukuwaona abale ake akumugulitsa kwa Aisimaeli. (Gen. 37:18-28) Kodi mukuona ciani? Mukumvela zotani? Nanga mukumva fungo la ciani? Komanso, yesani kudziyelekezela kuti ndinu munthu amene mukuŵelenga m’nkhaniyo. Kodi iye akuganizila ciani? Nanga akumvela bwanji? Kuyelekezela kwaconco kungacititse kuti kuŵelenga kwanu Baibo kukhale kothandiza kwambili.
Muziseŵenzetsa zida zothandiza pophunzila zimene tili nazo kuti mupeze mfundo zothandiza. Zidziŵeni bwino zida zofufuzila za m’citundu canu, zopulintiwa ngakhale za pa webusaiti. Musacite manyazi kupempha ena kuti akuthandizeni kudziŵa moseŵenzetsela bwino zida zimenezi. Zida monga Watch Tower Publications Index kapena Buku Lofufuzila Nkhani la Mboni za Yehova, zingakuthandizeni kupeza zofalitsa zofotokoza nkhani zosiyana-siyana, ndi zina zofotokoza mavesi ambili a m’Baibo. Mungaseŵenzetsenso zakumapeto mu Baibulo la Dziko Latsopano la Malemba Opatulika, kapena kabuku kakuti Buku Lothandiza Pophunzila Mau a Mulungu. Zida izi zimafotokoza zambili ponena za malo, madeti a zocitika, kulemela kwa zinthu na kapimidwe kake, ndi zina zaconco.
Muzibwelelamo mu mfundo zikulu-zikulu zimene mwaŵelenga. Kucita izi kudzakuthandizani kukumbukila zimene mwaphunzila. Cofunikanso kwambili ni kuuzako ena zimene mwaphunzila. Ngati mwapeza mfundo inayake yothandiza mu ulaliki, iseŵenzetseni. Mwa kucita izi, ndiye kuti mukukhomeleza mfundozo m’maganizo mwanu na kuziseŵenzetsa pothandiza ena.