PHUNZILO 14

Kumveketsa Bwino Mfundo Zazikulu

Aheberi 8:1

ZOFUNIKILA: Thandizani omvela anu kukutsatilani m’nkhani yanu. Onetsani bwino mmene mfundo yaikulu iliyonse ikugwilizanila na colinga canu, komanso na mutu wa nkhani.

MOCITILA:

Khalani na colinga. Kodi colinga ca nkhani yanu ni kupeleka cidziŵitso, kukhutilitsa omvela anu pa nkhani inayake, kapena ni kuwalimbikitsa? Poikamba, onetsetsani kuti mfundo zazikulu zonse zikuthandizila kukwanilitsa colinga cimeneco.

Dzifunseni kuti: ‘Kodi omvela anga angakhale na mafunso anji pa nkhani imeneyi? Nanga angakhalepo na maganizo osiyana ati? Kodi nikayankha funso lakuti-lakuti, ningautsenso mafunso ati m’maganizo mwawo?’ Sanjani mfundo zanu mwa dongosolo limenelo. Mukatelo, omvela anu adzakutsatilani mosavuta m’nkhani yanu, adzamvetsetsa, ndipo adzakhutila na mfundo zanu.
Gogomezani mutu wa nkhani. M’nkhani yanu yonse, muzikumbutsanso mutu wanu wa nkhani mwa kubweleza mawu ake ofunika kwambili, kapena kuchula mawu ena ofanana nawo tanthauzo.
Mfundo zanu zazikulu zizimveka bwino komanso mosavuta. Sankhani cabe mfundo zothandizila kumveketsa mutu wa nkhani, zimenenso mungazifotokoze bwino m’nthawi imene mwapatsidwa. Cepetsani mfundo zikulu-zikulu, fotokozani iliyonse payokha-payokha, ndipo cokani pa ina kupita pa inzake moonekela bwino.

Mungachule mfundo zazikulu m’mawu anu oyamba kuti omvela anu athe kukutsatilani Kapena mungazibweleze m’mawu anu otsiliza pothandiza omvela anu kuti akazikumbukile.