Mateusi
4 Konyima Sesusi ahongolelwa nononkhono mba Huku moluhandya opo akalolwe Neliapu. 2 Etyi akala ovitenya 40 novinthiki 40 tyihali, aliwa unene nondyala. 3 Iya Eliapu aliya opo limulole alimupopila okuti: “Inkha umona wa Huku, popila omamanya aa opo akale onombolo.” 4 Mahi akumbulula okuti: “Tyahonekwa okuti: ‘Omunthu kakala vala nomuenyo mokonda yombolo, mahi ukala nomuenyo mokonda yonondaka ambuho mbutunda momulungu wa Siovaa.’”
5 Konyima Eliapu alimutuala mo Selusalei,* alimupake keulu* liondyuo ya Huku, 6 alimupopila okuti: “Inkha umona wa Huku, lomboka, mokonda tyahonekwa okuti: ‘Huku matumu onoandyu mbae ku ove’ opo ‘mbukuyakule, iya ambukutyindi pomavoko, opo uhavete omphai yove kemanya.’” 7 Sesusi apopila Eliapu okuti: “Tupu tyahonekwa okuti: ‘Uhalole Siovaa, Huku yove.’”
8 Eliapu alimutuala vali komphunda imwe yaya unene peulu alimulekesa omauhamba aeho omouye nomunkhima wao. 9 Iya alimupopila okuti: “Ovipuka evi aviho mandyikupe-vio inkha wiikila konongolo ofende ku ame.” 10 Iya Sesusi emupopila okuti: “Pita Satanasi! Mokonda tyahonekwa okuti: ‘Una okufenda Siovaa Huku yove, oe vala una okuumbila.’” 11 Pahe Eliapu alimusi-po, iya onoandyu ambuya ambuhimbika okumukuatesako.
12 Etyi eiva okuti Suau wakuatua, aende ko Galileia. 13 Tyihe-otyo vala, etyi atunda ko Nasalee, akakala ko Kafalanau konthele yelunga, kovilongo vyo Sebulau no Nafitalii, 14 pala okufuisapo etyi tyapopile omuuli Isaiya, etyi ati: 15 “Galileia yomalongo, otyilongo tyo Sebulau no Nafitalii, ove wokukahi mondyila yenda no kelunga koutakelo wo Solondau! 16 Ovanthu vekahi menthiki vamona otyimimi otyinene, iya vana vepumphi pohika ili mokahi kononkhia, otyitei tyeveliaimina.” 17 Okutuka opo Sesusi ahimbika okuivisa okuti: “Livelei, mokonda Ouhamba wo keulu ukahi popepi.”
18 Puetyi ekahi nokutyama Nelunga lyo Galileia, amono Simau utiwa o Petulu na Andelee ondenge* yae, vekahi nokuyumba owanda melunga, mokonda ankho ovafwi vombisi. 19 Iya ngwe evepopila okuti: “Ndandulei opo ndyimukalese ovafwi vovanthu.” 20 Liwa-liwa, avasi-po omawanda avo, avemulandula. 21 Etyi atunda opo, amono vali Tiaku omona wa Sebedeu nondenge yae Suau. Ankho vekahi mowato na tate yavo Sebedeu, vanyika omawanda avo iya eveihana. 22 Liwa-liwa avasi-po owato, na tate yavo, avemulandula.
23 Etyi atunda opo, aenda-enda mo Galileia aiho, otyo alongesila monondyuo mbavo mbokufendela, nokuivisa onondaka onongwa Mbouhamba, nokuhakula ovanthu omauvela aeho. 24 Omunkhima wae auliyandyana mo Silia aiho iya ovanthu avemuetela aveho vavela omauvela elikalaila, na vana ankho vena ovilulu, no vokuna otyinthonya, novilema, ngwe evehakula aveho. 25 Moluotyo ovanthu ovanyingi vatunda ko Galileia no ko Dekapoli* no ko Selusalei no ko Sundeia na vana vatunda koutundilo wo Solondau, avemulandula.