Opo tunoñgonoke nawa omaulo Ombimbiliya tuna umwe okwiita tukwatesiweko. Soka ñgeno mwapita potyilongo tyimwe ove wehei nawa, mahi epanga liove ou mwaenda nae una upei umwe nawa. Apa muli upei umwe nawa, nonondyila mbatyo oku mbenda nako ukwii. Tyotyili ove mopandula etyi epanga liove etavela mwende nae potyilongo opo! Na Siovaa haityo ñgoo, ngwe wii umwe nawa opi tuli, opi tuhungi, neevi matukamona komutwe. Naina opo tunoñgonoke umwe nawa omaulo Ombimbiliya twesukisa okuliola omutima, atwiiti ku Siovaa etukwateseko. (Ndan. 2:28; 2 Pet. 1:​19, 20) Siovaa ukahi umwe ngomukulu uhole ovana vae, wahanda onthwe tukakale nehambu komutwe wandyila. (Sele. 29:11) Mahi pahe Siovaa ha ngovo tate yetu vehei etyi matyikamoneka komutwe. Ngwe upondola okutupopila etyi matyikamoneka komutwe wandyila ya apeho etyi apopia otyili. Wapaka umwe omaulo Mondaka yae tunoñgonoke ovipuka ovinene mavimoneka tyina nkhele viheneye. — Isa. 46:10. w23.08 8 §§ 3-4

Huku wetyipa Sesusi tyokumana-ko ovitateka aviho viovanthu. Ovipuka vihuvisa Sesusi alingaile, vialekesa umwe nawa okuti ngwe utyivila okumana-ko ovipuka onthwe twehevili-ale okumana-ko. Ngwe utyivila umwe okumana-ko omwii watyo weeta ovitateka viovanthu, onkhali twapiñgana, neevi vituka-ko, omauvela, nononkhia. (Mat. 9:​1-6; Loma 5:​12, 18, 19) Ovipuka vihuvisa alingile vialekesa umwe okuti utyivila okuhakula “omauvela atyo aeho,” nokututilisa umwe vana vanyima. (Mat. 4:23; Swau 11:​43, 44) Tupu utyivila umwe okutalameka onomphepo ononene, nokuhukulula ovanthu kovilulu. (Malu. 4:​37-39; Luka 8:2) Tyipameka omutima okunoñgonoka okuti Siovaa wapa Omona wae otyilinga otyo otyinene! Onthwe tuyumba-ko umwe onthumbi okuti komutwe wandyila matukamona oviwa ovinyingi Mouhamba wa Huku. Ovipuka vihuvisa Sesusi alingile etyi ali pano pohi, vitunoñgonokesa etyi makalinga mouye auho tyina Ouhamba wa Huku wamahimbika okutumina pano pohi. w23.04 3 §§ 5-7

Ine mewaneno muli muna ovanthu ovanyingi, iya mokonda ovanyingi vayela omavoko vahanda okwaava omakumbululo, ove pahe otyo ulambwa-lambwa vala wahalekeswa, wahayeke-ko. Fwiika omakumbululo omanyingi. Ine pu limwe kwalekehilwe, apa eliongiyo liakapwila tyipondola una umwe apa molekehiwa oave ekumbululo. Tyina uli nokulilongehila keumbo Omutala Womulavi, otyo usoka oñgeni onopalangalafu mbelikwata umwe nawa neetyi tyapopia osapi yatyo yonthele. Ine otyo ulinga otyo, matyikukwatesako omono etyi mokapopia tyina haa mukelilongesa-o mewaneno. Otyipuka otyikwavo upondola okulinga, okulifwiika ukaave ekumbululo ponopalangalafu mbokwalema umwe mbupopia otyili tyaya kohi ty’Ombimbiliya. Omokonda yatyi? Omokonda yeetyi ponopalangalafu mbatyo ombo kavehi pamwe vembunoñgonoka nawa vetyivila okwaava omakumbululo. Pahe molingi ñgeni ine wahetekela ovipuka ovio mahi otyo momaliongiyo amwe uyela vala okuvoko otyo wahalekeswa-le? Popia nou maendesa onthele yatyo tyina eliongiyo liehenehimbike omutolela epulo wahanda okukumbulula. w23.04 21-22 §§ 9-10