Swau
3 Pova Faliseu ankho pena omulume umwe utiwa o Nikondemu, omutumini wova Sundeu. 2 Aende ku Sesusi kounthiki ati: “Mulongesi,* tutyii okuti umulongesi watumua na Huku, mokonda kutupu nawike upondola okulinga omahuviso ngaa ove ulinga inkha Huku kekahi nae.” 3 Sesusi emukumbulula okuti: “Ame ndyikupopila otyili okuti, inkha omunthu katyitwa tuvali* kapondola okumona Ouhamba wa Huku.” 4 Nikondemu emupopila okuti: “Oñgeni omunthu apondola okutyitwa vali tyina ekula-le? Okuti upondola okukondoka otyivali meimo lya ina atyitwa vali, tyitavela?” 5 Sesusi akumbulula okuti: “Ame ndyikupopila otyili okuti, inkha omunthu katyitwa nomeva, no kononkhono mba Huku, kapondola okunyingila Mouhamba wa Huku. 6 Etyi tyityitwa nohitu, ovana vovanthu, mahi etyi tyityitwa kononkhono mba Huku, ovana va Huku. 7 Uhahuve etyi nekupopila okuti: Muna okutyitwa otyivali. 8 Omphepo ifila oku yahanda, iya ove utehelela omuyuelo wayo, mahi, kutyii oku itunda noku yenda nako. Ongotyo tyikala vana vatyitwa kononkhono mba Huku.”
9 Nikondemu emupulu okuti: “Oñgeni ovipuka ovio vilingwa?” 10 Sesusi emukumbulula okuti: “Ove kwii ovipuka ovio, ngwe umulongesi wo Isilayeli? 11 Ame ndyikupopila otyili okuti, onthue tupopia etyi twii, iya tuava oumbangi wetyi tuamona, mahi onwe kamutavela oumbangi tuava. 12 Ame nemupopila ovipuka vya pano pohi mahi onwe kamutavela, oñgeni mamutavela inkha ndyimupopila ovipuka vyo keulu? 13 Tupu nawike unelonde keulu, mahi oyouna vala watunda-ko, Omona womulume. 14 Iya ngetyi Moisesi atulikile onyoka puetyi eli mehoko, ongotyo Omona womulume makatulikwa, 15 opo aveho vemutavela vakamone omuenyo uhapu.
16 “Mokonda Huku una unene oluembia nouye, waave Omona wae wongunga, opo kese omunthu ukala nekolelo mwe ahakahanyue-ko, mahi akakale nomuenyo uhapu. 17 Mokonda, Huku katumine Omona wae mouye, opo akoyese ouye, mahi wemutumine opo ayovole ouye. 18 Una ukala nekolelo mwe, kamakakoyeswa. Una uhena ekolelo mwe, wakoyesua-le mokonda kakalele nekolelo menyina Liomona wa Huku ongunga. 19 Pahe makoyeswa mokonda yetyi: otyitei tyeya mouye, mahi ovanthu vahumba vali enthiki tyipona otyitei, mokonda ovilinga viavo ovioundingavivi. 20 Una ulinga ovipuka ovivi, uyele otyitei, keya motyitei tyetyi ovipuka alinga kamavitavelwa.* 21 Mahi una ulinga etyi tyaviuka, uya motyitei opo ovilinga viae vimoneka nawa, mokonda etyi alinga tyelikuata nehando lya Huku.”
22 Konyima yotyo, Sesusi novalongwa vae avaende no motyilongo tyo Sundeia iya akala-mo katutu navo, otyo ambatisala. 23 Suau nae ankho ukahi nokumbatisalela ko Enome popepi no Salimi, mokonda ankho pena omaande omanyingi iya ovanthu ankho vatualako okuya, otyo vambatisalwa; 24 mokonda Suau ankho nkhele kenepakwe mokaleya.
25 Pahe ovalongwa va Suau aveliyayesa nomu Sundeu umwe konthele yokulisukukisa. 26 Moluotyo, avaende ku Suau avemupopila okuti: “Mulongesi,* omulume una ankho muna-e popepi nondongi yo Solondau, una ankho upopia-popia, ukahi nokumbatisala iya ovanthu aveho vekahi nokuenda no kwe.” 27 Suau evepopila okuti: “Omunthu kapondola okulinga otyipuka natyike, ehetyipelwe na Huku keulu. 28 Onwe muene munombangi mbetyi napopia, etyi nati: ‘Ame hame-ko Kilisitu, mahi natumwa komutwe wae.’ 29 Ou una omphunga oe omphunga. Mahi epanga liomulume omphunga, tyina likatuka iya aliivi ondaka yomphunga, likala nehambu enene. Ngotyo, ehambu liange liafuapo. 30 Omunthu oo, ovilinga viae vina okutualako okuliyawisa, mahi viange vina okutepuluka.”
31 Una utunda keulu, omunene vali tyipona vakuavo aveho. Una watuka pano pohi owa pano pohi iya upopia ovipuka vya pano pohi. Una utunda keulu omunene vali tyipona vakuavo aveho. 32 Waava oumbangi wetyi amona netyi eiva, mahi nawike omunthu utavela oumbangi wae. 33 Mahi una utavela oumbangi wae, wetavela* okuti Huku owotyotyili. 34 Una Huku atuma, upopia onondaka mba Huku, mokonda Huku tyina aava ononkhono mbae kayongo.* 35 He uhole Omona, moluotyo ovipuka aviho wevipakula pomavoko ae. 36 Omunthu ukala nekolelo mo Mona, una omuenyo uhapu. Omunthu uhetavela Komona kamakamona omuenyo, mahi onyengo ya Huku maikala apeho kombanda yae.