Swau
5 Konyima yotyo, akukala otyipito tyova Sundeu, iya Sesusi ainduka no ko Selusalei. 2 Ko Selusalei ponthele Yombundi Yonongi ankho pena etangi lina omuvanda una onomphandyi kononthele, litiwa Betesata mo Hebeleu. 3 Ankho muna ovavei ovanyingi velangi, ovamphoki, novilema, novanthu velionya omaoko novikalo. 4 —— 5 Mahi ankho pena omulume umwe ukahi-ale nokuvela omanima 38. 6 Etyi Sesusi atala omulume oo ankho ulangi, amono okuti ukahi-ale nokuvela omuvo omunyingi, emupulu okuti: “Uhanda okukala nawa?” 7 Omuvei akumbulula okuti: “Tatekulu, petupu nawike umphaka metangi tyina omaande amapikita, mahi tyina nahanda okuenda-mo vakuetu vamphita komutwe.” 8 Sesusi emupopila okuti: “Katuka! Pola-po evinda* liove enda. 9 Iya omulume liwa-liwa aveluka, apolo-po evinda liae ahimbika okueenda.
Onthiki oyo ankho Otyasapalo. 10 Ova Sundeu avahimbika okupopila omulume wavelulua, avati: “Hono Otyasapalo, movitumino katyaviukile okutyinda evinda.”* 11 Mahi ngwe evekumbulula okuti: “Wokuambelula oe wati ‘Pola-po evinda* liove, enda.’” 12 Avemupulu okuti: “Olie omulume wekupopila okuti: ‘Pola-po evinda liove, enda’?” 13 Mahi omulume wokuavelulua, ankho kei olie, mokonda Sesusi ankho kamoneka apa ekahi mokonda yovanthu ovanyingi ankho veli-po.
14 Konyima Sesusi avasi omulume oo mondyuo ya Huku, emupopila okuti: “Tala, waveluka. Uhalinge vali ononkhali, opo uhakale notyitateka otyinene tyipona etyi.” 15 Omulume oo aende akapopila ova Sundeu okuti o Sesusi wemuhakula. 16 Moluotyo, ova Sundeu ankho veyele Sesusi, mokonda ankho ulinga ovipuka ovio Motyasapalo. 17 Mahi evepopila okuti: “Tate yange ukahi nokuundapa alo pehepano, na ame ndyikahi nokuundapa.” 18 Otyo ankho ova Sundeu vahandela okumuipaa, mokonda ankho kaundapa vala Motyasapalo tupu ankho uti Huku o Tate yae, okuhanda okulifwa na Huku.
19 Ngotyo, Sesusi evepopila okuti: “Ame ndyimupopila otyili okuti Omona kapondola okulinga natyike kohaluae muene. Mahi, ulinga vala etyi amona ku Tate yae. Mokonda ovipuka He alinga, Nomona ovio alinga. 20 Mokonda He uhole Omona iya umulekesa ovipuka aviho alinga, iya memulekesa ovilinga ovinene vali tyipona evi, opo mukale tyahuva. 21 Ngetyi He apindula-po vokuankhia evekalesa nomuenyo, tupu Omona waavela omuenyo ou ahanda. 22 Mokonda He kakoyesa nawike. Mahi waavela Omona ovilinga aviho viokukoyesa, 23 opo aveho vahumbe Omona ngetyi vahumba He. Una uhahumbile Omona, kahumbile He wemutuma. 24 Ndyimupopila otyili okuti, una utehelela ondaka yange, etavela ku Una wanthuma, una omuenyo uhapu, moluotyo, kamakoyeswa, mahi watunda mononkhia weya momuenyo.
25 “Tyotyili ndyimupopila okuti: Omuvo ukahi nokuya, pahe weya-le, omuvo vokuankhia mavekeiva ondaka Yomona wa Huku, vana vamatehelela nawa mavakakala nomuenyo. 26 Mokonda ngetyi He ena epondolo liokuava omuenyo, tupu waavela Omona epondolo liokuava omuenyo. 27 Iya wemupa epondolo liokukoyesa, mokonda oe Omona womulume. 28 Muhahuvei mokonda yotyo, mokonda makuya oola aveho vana vekahi momalangalo mehinangelo lya Huku, mavekeiva ondaka yae, 29 avatundu-mo, vana valinga ovipuka oviwa, avatutila pala okukala nomuenyo, mahi vana valinga ovipuka ovivi, avatutila pala ekoyeso. 30 Hipondola okulinga otyipuka natyike ko haluange muene. Etyi ndyiiva otyo ndyikoyesa iya ekoyeso ndyilinga liaviuka, mokonda hiovola okulinga etyi ame muene nahanda, mahi ndyilinga ehando lya una wanthuma.
31 “Inkha ame ndyipopia konthele yange muene opo oumbangi wange ha wotyotyili-ko. 32 Kuna ou upopia konthele yange iya ame ndyityii okuti oumbangi aava konthele yange owotyili. 33 Onwe muatuma ovanthu ku Suau iya ngwe aave oumbangi wotyili. 34 Mahi ame hitavela oumbangi ovanthu vaava, mahi ndyipopia ovipuka evi opo onwe muhupe. 35 Omulume oo ankho otyimimi tyatema, nokualiaima, mahi onwe muahambukililwe unene otyimimi tyae momuvo uhehi. 36 Mahi ame ndyina oumbangi omunene vali tyipona wa Suau, mokonda ovilinga Tate anthuma ovio ndyikahi nokulinga iya viaava oumbangi wokuti o Tate wanthuma. 37 Iya Tate wanthuma, nae muene waava oumbangi konthele yange. Onwe kamueivile ondaka yae, nii kamuamuene oñgeni ekahi, 38 iya ondaka yae kaikahi mu onwe, mokonda onwe kamutavela ku una atuma.
39 “Onwe muovolola Ovihonekwa, mokonda musoka okuti mamukala nomuenyo uhapu mokonda yavio; ngwe ovio* viaava oumbangi konthele yange.” 40 Iya onwe kamuhande okuya ku ame opo mukale nomuenyo. 41 Ame hitavela okunkhimanekwa novanthu 42 mahi ame ndyityii nawa okuti onwe mutupu ohole na Huku mokati kenyi. 43 Ame neya menyina lya Tate, mahi onwe kamunthambula. Mahi inkha umwe weile menyina liae muene, ñgeno muemutambula. 44 Oñgeni mamutavela tyina mukahi nokulinkhimaneka poyenyi, amuhaovola omunkhima utunda ku Huku? 45 Muhasokei okuti ame mandyikemuvela onombei ku Tate; kuna ou umuvela onombei, Moisesi, mu una onwe muapaka ekevelo lienyi. 46 Inkha muetavelele Moisesi, ñgeno na ame muenthavela, mokonda wahoneka konthele yange. 47 Mahi inkha kamutavela etyi ahoneka, opo oñgeni mamutavela etyi ame ndyipopia?”