Ova Loma
7 Okuti onwe kamutyii vakuatate, (ndyikahi nokupopila vana vei ovitumino) okuti Ovitumino vitumina omunthu omuvo ena omuenyo? 2 Mongeleka, omukai wanepua wakutilua momulume wae notyitumino putyina omulume wae ena omuenyo; mahi inkha omulume wae unkhia opo wayovoka motyitumino tyomulume wae. 3 Moluotyo, inkha omulume wae una omuenyo ngwe anepwa nomulume omukuavo, utiwa walinga oumbalehi. Mahi inkha omulume wae unkhia opo wayovoka motyitumino tyomulume wae, inkha unepwa nomulume omukuavo kalingile oumbalehi.
4 Ngotyo vakuatate no onwe ankho muakutwa Novitumino. Mahi mokonda yotyilikutila tya Kilisitu, onwe kamuakutilwe vali, pahe muakala va Kilisitu tyetyi watutilisua opo onthue tuave ovinyango pala omunkhima wa Huku. 5 Etyi ankho tuendela momahando olutu, Ovitumino Viapelwe Moisesi vialekesa nawa okuti omahando omavi ohitu, ahindila olutu luetu okulinga onkhali iya onkhali itutuala kononkhia. 6 Mahi pahe tuayovolwa Movitumino ovio, mokonda vitupu vali epondolo mu onthue. Ngotyo katukala vali ovapika mokuhongolelwa Novitumino ovio, mahi tukala ovapika mokuhongolelwa nononkhono mba Huku.
7 Pahe oityi matupopi? Okuti Ovitumino onkhali? Au! Ame tyili-tyili ñgeno hityii oityi onkhali inkha Havitumino ovio. Mongeleka, ame ñgeno hityii okuti otyipululu tyapenga inkha Havitumino Viapelwe Moisesi viati: “Uhakale notyipululu.” 8 Mahi mokonda yovitumino onkhali yavasa omphitilo yokupaka mu ame otyipululu tyovipuka aviho, mokonda tyihena ovitumino onkhali ankho yankhia. 9 Etyi ankho pehena ovitumino ame ankho ndyina omuenyo. Mahi etyi ovitumino viehika, onkhali yakala vali nomuenyo, iya ame andyinkhi. 10 Iya ovitumino ankho vituala komuenyo, andyiimbuka okuti vituala kononkhia. 11 Tyetyi mokonda yotyitumino, onkhali yavasa omphitilo yokunthyongiliya iya aindyipaa. 12 Moluotyo, Ovitumino viasukuka, etyi vipopia tyasukuka, tyaviuka iya otyiwa.
13 Ngotyo, okuti otyiwa tyandyetela ononkhia? Au! Mahi onkhali yetyilinga, opo imoneka nawa mokundyetela ononkhia mokonda yetyi tyaviuka, opo onkhali mokonda yotyitumino ikale vali ombi. 14 Mokonda tutyii okuti Ovitumino ovia Huku, mahi ame ndyihitu, nalandeswa konkhali. 15 Mokonda etyi ame ndyilinga hityinoñgonoka. Tyetyi hilingi etyi nahanda, mahi ndyilinga etyi ndyiyele. 16 Ngotyo, inkha ndyilinga etyi nahahande, ndyitavela okuti Ovitumino vikahi nawa. 17 Ngotyo hameko ndyilinga ovipuka ovio, mahi onkhali ikahi molutu luange. 18 Mokonda ame ndyityii okuti mu ame, mohitu yange, mutupu natyike otyiwa; tyetyi ndyina ehando liokulinga etyi tyaviuka, mahi hityivili okutyilinga. 19 Mokonda hilingi otyiwa nahanda, mahi otyivi ndyiyele otyo ndyilinga. 20 Ngotyo, inkha hilingi etyi nahanda, muaina hame-ko ndyikahi nokutyilinga, mahi onkhali ikahi mu ame.
21 Mu ame muna otyitumino etyi: Tyina nahanda okulinga etyi tyaviuka, mu ame muna etyi tyapenga. 22 Tyotyili ame momutima wange ndyihole ovitumino vya Huku, 23 mahi ndyiete molutu luange otyitumino otyikuavo tyiluisa otyitumino tyomolusoke luange, tyinthuala ngomupika motyitumino tyonkhali ikahi molutu luange. 24 Pahe ndyimunthu patyi! Olie mandyovola kolutu olu lunthuala kononkhia? 25 Ndyipandula Huku menyina lya Sesusi Kilisitu Tatekulu yetu! Ngotyo, nolusoke luange ndyimupika wovitumino vya Huku, mahi nolutu luange ndyimupika wotyitumino tyonkhali.