1 Ova Kolindu
11 Kalei ovahetekeli vange ngetyi ame ndyihetekela Kilisitu.
2 Vakuatate, ame ndyimupandula mokonda movipuka aviho munthyinangela iya onwe mukahi nokulinga ovipuka aviho ame nemulongesa. Moluotyo, ndyimupopila okuti etyi mukahi nokulinga tyaviuka. 3 Mahi ame nahanda munoñgonoke okuti, omutwe womulume o Kilisitu; omutwe womukai omulume; iya omutwe wa Kilisitu o Huku. 4 Omulume ulikuambela ine uula notyipuka tyimwe komutwe, ukundisa omutwe wae; 5 mahi omukai ulikuambela ine uula tyihelikutile komutwe ukundisa omutwe wae, mokonda otyo tyikahi ngomukai wakululua. 6 Mokonda, inkha omukai kelikutu komutwe, una okukululwa onohuki mbae; mahi inkha okukululwa ine okukeyua tyikundisa, opo una okulikuta komutwe.
7 Ngotyo omulume kapondola okulikuta komutwe, mokonda watungwa otyifuika tya Huku nomunkhima wae, mahi omukai omunkhima womulume. 8 Mokonda omulume katundile momukai, mahi omukai watunda momulume. 9 Iya tyihe-otyo vala, omulume katungililwe omukai, mahi omukai watungilwa omulume. 10 Otyo omukai esukisila okukala nenyingilikilo lioutumini komutwe, mokonda yonoandyu.
11 Ngotyo, mu Tatekulu, omukai keya-ko vala apehena omulume iya omulume keya-ko vala apehena omukai. 12 Mokonda ngetyi omukai atunda momulume, tupu nomulume utunda momukai; mahi ovipuka aviho vitunda ku Huku. 13 Sokei onwe muene: Okuti tyikahi nawa omukai okulikuambela ku Huku tyihelikutile komutwe? 14 Okuti onkhalelo ovanthu vatungwa kaitulongesa okuti omulume okukala nonohuki ononde tyimukundisa, 15 mahi omukai okukala nonohuki ononde omunkhima kwe? Mokonda onohuki wembupeua opo mbukale ngatyina elikuta komutwe. 16 Mahi inkha omunthu umwe uhanda okuyaya konthele yotyituwa otyikuavo, onthue tutupu vali otyikuavo, nii omawaneno a Huku etupu.
17 Mahi putyina ndyimuavela onondonga ombu, ame himuhilivika, mokonda kamuliongiya pala ouwa wenyi, mahi opala okulinyona vali. 18 Mokonda, tyo tete neiva okuti tyina muliongiya mewaneno tyimoneka okuti mueliyapauka iya ame otyo ndyityitavela. 19 Mokonda pokati kenyi mapakala eliyapauko, opo vana vokuapandwa na Huku pokati kenyi tupu vamoneke nawa.
20 Tyina muliongiya pomphangu ike, kamuliongiya pala okulia Ondalelo ya Tatekulu. 21 Mokonda tyina mulia ondalelo oyo, onwe mutetekela okulia ondalelo yenyi muene iya atyiti ou waliwa nondyala mahi omukuavo wakolua. 22 Mutupu onondyuo pala okulila nokunuina? Ine muatomba ewaneno lya Huku iya amukundisa vana vehena natyike? Oityi ndyipondola okumupopila? Okuti ndyipondola okumuhilivika? Konthele yotyo ame himuhilivika.
23 Mokonda ame natambula ku Tatekulu etyi ndyikahi nokumulongesa, okuti monthiki Tatekulu Sesusi ankho mapakulwa, wapola ombolo, 24 etyi elikuambela, eivembula, ati: “Etyi otyilekeso tyolutu luange pala ouwa wenyi. Tualeiko okutyilinga opo munthyinangele.” 25 Tupu, ngatyo alinga nokopo, etyi vamana okulia, ati: “Okopo ei otyilekeso tyomphango omphe mokonda yohonde yange. Tualeiko okulinga ngetyi, tyina muinwa pala okuhinangela ame.” 26 Mokonda apeho tyina mulia ombolo ei nokunwa okopo ei, mukahi nokuivisa ononkhia mba Tatekulu, alo eya.
27 Ngotyo, una ulia ombolo nokunwa kokopo ya Tatekulu ngwe kapondola, makavelwa onombei konthele yolutu nohonde ya Tatekulu. 28 Tete, omunthu elisoke nawa iya akala nonthumbi iya konyima ali ombolo iya anu okopo. 29 Mokonda una ulia nokunwa ahasoko okuti tyihangununa olutu lwa Tatekulu, ulia nokunwa ekoyeso palae muene. 30 Otyo ovanyingi pu onwe vahapamenene nokuavela iya ovanyingi vekahi nokunkhia.* 31 Mahi inkha tuasokele nawa etyi onthue tukahi, ñgeno katuakoyesilwe. 32 Mahi tyina tukoyeswa, tukahi nokuviyulwa na Siovaa, opo tuhahitisilwe kumwe nouye. 33 Ngotyo, vakuatate, tyina muameliongiya opo mulie ondalelo oyo, likevelei. 34 Inkha umwe waliwa nondyala, alie keumbo, opo tyina muameliongiya muhakoyeswe. Mahi ovipuka ovikuavo, mandyiya okuviviukisa tyina nameya oko.