2 Ova Kolindu

2 Ame mandyiya oko mahi natokola okuhemunumanesa vali. 2 Mokonda inkha ame ndyimunumanesa, olie manthyambukiswa tyihe ava nanumanesa? 3 Otyo nemuhonekelela ngotyo, opo tyina ndyiya oko anahanumaneswa na vana ankho vena okunthyambukiswa; mokonda ndyina onthumbi yokuti etyi tyindyetela ehambu, no onwe tyimuetela ehambu. 4 Mokonda ame nemuhonekela nononkhumbi ononene, nomutima weihama unene, nononkhuka ononyingi, mahi hapala okumunumanesa opala munoñgonoke okuti ndyina oluembia olunene no onwe.

5 Tyetyi inkha umwe unumanesa ame, hame anumanesa, wanumanesa onwe. Mahi ame hihande okupopia unene konthele yotyo. 6 Etyi omunthu oo aviyulwa novanyingi tyatuuka; 7 pahe onwe muna okukala nokankhenda amumuevela iya amumupameka opo ahasoye mokonda yokuanumana unene. 8 Ame ndyimupopila okuti lekesei okuti mumuhole. 9 Mokonda tupu otyo nemuhonekelela, pala okutala inkha mamulekesa okuti muvataveli movipuka aviho. 10 Inkha onwe muevela omunthu motyipuka tyimwe, na ame ndyimuevela. Tyotyili, etyi ame naevela (inkha ndyina etyi naevela) opala ouwa wenyi komaiho a Kilisitu, 11 opo tuhatiliswe* na Satanasi, mokonda tutyii nawa etyi ahanda okulinga.*

12 Etyi nehika ko Toloade pala okuivisa onondaka onongwa konthele ya Kilisitu iya andyipewa omphitilo movilinga vya Tatekulu,* 13 andyikala unene notyiho mokonda havasile Titu omukuatate wange. Ngotyo, andyivelekela andyiende no ko Masedonia.

14 Mahi ndyipandula Huku una utuhongolela ngatyina tumafualali atunda kovilwa tyafinda kumwe na Kilisitu, iya mokonda yetu, ukahi nokuyandyanesa* omuniko ukahi nawa wenoñgonoko liae konomphangu ambuho! 15 Tyina tupopia konthele ya Kilisitu tukahi ngomuniko ukahi nawa ku Huku no ku vana mavayovoka na vana mavahanyuako. 16 Ko vokuesaililwa omuniko wononkhia utuala kononkhia, ko vokuatetekela omuniko womuenyo utuala komuenyo. Iya olie wafuapo pala ovipuka ovio? 17 Onthue tuafwapo, mokonda onthue katuvalandesi* vondaka ya Huku ngetyi ovanthu ovanyingi valinga, mahi onthue tupopia otyili ngovatumwa va Huku, komaiho a Huku kumwe na Kilisitu.