Ovakoyesi
19 Pononthiki opo, pweetyi mo Isilayeli muhena ohamba,+ omulume umwe womuhoko wa Levii ukala kotyilongo tyimwe tyo kokule notyilongo tyonomphunda mbo Efalaii+ anepe omukai, ombalehi yae ko Mbelei+ yo Sundaa. 2 Omukai wae alala nomukwendye omukwavo, ayeke-po omulume wae, aende keumbo lya he ko Mbelei yo Sundaa. Akakala-ko onohanyi ononkhwana. 3 Omulume wae emulandula opo ekemuwane; aende nomukwatesiko wae, novimbulu vivali. Omukai evetambula meumbo lya he. Etyi he emumona, ahambukwa. 4 He-ivi emukengelela opo vakale nae ononthiki ononthatu; ankho valia, vanwa, ngako alala.
5 Monthiki ya kwana etyi vapinduka-po komuhuka vende, he-ivi emupopila okuti: “Lia-po katutu opo ukale nononkhono,* haa amwende.” 6 Aveho vevali avakala pohi, avali aveho, avanu. Konyima he-ivi emupopila okuti: “Mbambavo lala vali kuno, matyikuhambukiswa.”* 7 Etyi omulume akatuka vende, he-ivi emutyiki vali alale oko, etavela ngako alala.
8 Monthiki ya tano etyi apinduka-po komuhuka opo ende, he-ivi emupopila okuti: “Mbambavo lia-po katutu opo ukale nononkhono.”* Ngako vehimama atee lietaka, aveho vevali otyo valia. 9 Etyi omulume akatuka opo vende nomukai wae, nomukwatesiko wae, he-ivi, tate yomuhikwena wae, emupopila okuti: “Tala! Kwanthyikovela-e. Mbambavo lalei vala kuno. Ekumbi liapita. Lalei vala, matyimuhambukiswa. Muhuka amupinduka-po vala komuhuka, amwende keumbo lienyi.”* 10 Omulume ehetavela vali okulala, akatuka aende atee ko Sembusi, ko Selusalei.+ Una ovimbulu viae vivali, nomukai wae, nomukwatesiko wae.
11 Pweetyi veli popepi no Sembusi lietaka-le unene. Omukwatesiko wae emupulu okuti: “Tupondola okutalama mepunda-umbo eli liova Sembusi, ngamo tulala?” 12 Mahi tatekulu yae emupopila okuti: “Katupondola okutalama mepunda-umbo liovanthu tuhei, veheva Isilayeli. Twendei atee ko Simbeaa.”+ 13 Apopila vali omukwatesiko wae okuti: “Tuhetekelei okweenda atee ko Simbeaa ine oko Lamaa; atukalala pomphangu imwe pu ombo.”+ 14 Avatwalako nokweenda, ekumbi alihimbika okunyingila etyi vekahi popepi no Simbeaa, otyilongo tyova Mbesamii.
15 Avatalama mo Simbeaa, ngamo vanyingila opo valalele-mo. Etyi veli mepunda-umbo, avapumphama popalasa, mahi apahamoneka nawike uvepola-po vakalalele meumbo liae.+ 16 Etyi kwanthikovela, akuya ombwale imwe itundilila kepia liayo. Oyo kotyilongo tyonomphunda mbo Efalaii,+ mahi nkhele ankho ikala mo Simbeaa; mahi vakala mepunda-umbo olio o vomuhoko wa Mbesamii.+ 17 Ombwale tyina itala, popalasa yepunda-umbo pena ongendi, aimupulu okuti: “Wenda napi, watunda-pi?” 18 Ngwe akumbulula okuti: “Twatunda ko Mbelei yo Sundaa, tukahi nokwenda no kotyilongo tyo kokule tyonomphunda mbo Efalaii; oko o kotyilongo tyange. Naile ko Mbelei yo Sundaa,+ pahe ndyienda kondywo ya Siovaa,* mahi nawike wanthambula meumbo liae. 19 Mwene tuna olwinge neholi lituuka ovimbulu vietu,+ tuna okulia+ novinyu yetu, naame nomukai wange, nomukwatesiko wetu. Natyike twakamba.” 20 Ombwale aimupopila okuti: “Twende ukalalele peumbo liange! Ame mandyikwavela atyiho wahanda. Wahalale popalasa.” 21 Evetwala keumbo liae, aavela ovimbulu viavo okulia.* Avakoho konomphai mbavo, avali, avanu.
22 Pweetyi vekahi nokutomphola vahambukwa, akuya ovalume vamwe omakongombanda o mepunda-umbo avelisete nondywo otyo vatontha pepito nononyengo, avapopila ombwale he-kulu yeumbo okuti: “Lupula pondye omulume wanyingila meumbo liove tulale nae.”+ 23 Omukulu he-kulu yeumbo alupuka, evepopila okuti: “Nondenge mbange muhalingei otyipuka otyo otyivi mbambavo. Omulume ou omwenda wange. Muhalingei otyipuka otyo tyikundisa. 24 Ndyina omona wange wehenelale nomulume, nomukai womulume ou. Mandyiveeta pondye, muvelinge etyi muhanda.*+ Mahi muhalingei omulume ou otyipuka otyo tyikundisa.”
25 Ovalume avehemutavela; pahe omulume akwata omukai wae,+ emutwala pondye kuvo. Avemukwata kononkhono, avalala nae otyinthiki atyiho atee kombimba. Pahe avemuyeke aye tyina kutya. 26 Komuhuka-huka tyina omukai ehika, atokela pombundi yondywo omu omulume wae eli, ngapo akala atee kwaandyuluka. 27 Etyi omulume wae apinduka-po komuhuka aikula epito opo alupuke, atwaleko noungendi wae, tyina atala, omukai wae watokela pombundi yondywo, omavoko akwatelela pohi pombundi. 28 Emupopila okuti: “Katuka twende.” Omukai ahakumbulula mokonda wankhia-le. Emupake kotyimbulu, aende no keumbo liae.
29 Etyi ehika meumbo, apolo okatana, akwata omukai wae emutyoka-tyoka ovinthimbu 12, atumu otyinthimbu-otyinthimbu kovilongo aviho vyo Isilayeli. 30 Aveho vetyimwene avati: “Etyi otyipo, otyipuka etyi katunetyimone nkhele ova Isilayeli vatundile kotyilongo tyo Isitu atee hono. Tyisokei nawa,* amulipulu,+ amutupopila etyi tuna okulinga.”