Sowele
1 Ombu onondaka Siovaa apopila Sowele* omona wa Petuweli:
2 “Tehelelei onwe vakulu,
Tehelelei nawa, amuho mukala motyilongo omu.*
Okuti otyipuka ngeetyi tyamonekele-ale mononthiki mbenyi?
Okuti tyamonekele-ale pononthiki mbovakwaukulu venyi?+
3 Tyipopilei ovana venyi,
Ovana venyi veketyipopile ovana vavo,
Ovana vavo haa veketyipopile ava vekeya konyima yavo.
4 Etyi emphunia-mphunia liokulia unene liasa-po, ekaka liovimphunia-mphunia alityili-po.+
Etyi ekaka liovimphunia-mphunia liasa-po, emphunia-mphunia lihena omavava alityili-po.
Etyi emphunia-mphunia lihena omavava liasa-po, emphunia-mphunia liokulia unene alityili-po.+
5 Pindukei-po onwe vokunwa unene,+ lilei!
Liyavei amuho vokunwa ovinyu,
Mokonda ovinyu yokuhoholola mweisokolwa komilungu vienyi.+
6 Ovanthu votyilongo tyimwe veya motyilongo tyange. Vena ononkhono, ovanyingi unene, katyitavela okuvevalula.+
Omayo avo omayo onkhulika,+ oviñge viavo oviñge vionkhulika.
7 Vahanya-po omuti wange wonouva, omukuyu wange veutyitula otyihingi.
Vevitukula-po aviho-viho, aveviyumbuhi.
Onompha mbavio vembusa mbutunda too, mbutupu omapeta.
8 Lila ngeetyi tyilila omuhikwena* wavalekwa otyikutu tyosaku
Mokonda yokwahiwa-po nomukwendye wae.
9 Mondywo ya Siovaa kamulingwa vali oviawa viovilia+ noviawa viovikunwa,+
Mokonda ovaundapi va Siovaa ovanakwa vena omutambo.
10 Epia liahanywa-po, eheke lina omutambo,+
Mokonda ovikuna viahanywa-ko, ovinyu omphe yakukuta, omulela wapwa.+
11 Ovalimi vasoya, vokutwika omiti vionouva vekahi nokuliyava,
Mokonda yotiliku nosevata.
Mokonda ovikuna momapia vianyonwa.
12 Omuti wonouva wakukuta,
Omukuyu wauvuka.
Omulomaa,* nomundende, nomupelu,
Omiti viatyo aviho momapia viakukuta-mo.+
Ehambu liali pokati kovanthu aveho pahe liakala olukundo.
Vaundapi va Huku yange, valei ovikutu vionosaku amulala navio otyinthiki atyiho.
Mokonda nawike vali ukahi nokweta oviawa viovilia+ noviawa viovikunwa+ mondywo ya Huku yenyi.
14 Popilei* ovanthu vahalie natyike. Kongei ovanthu amulingi otyonge otyinene.+
Ongiyei ovakulu novanthu aveho vo motyilongo,
Veongiyei mondywo ya Siovaa Huku yenyi,+ amuliyave ku Siovaa opo emukwateseko.
15 Onthiki oyo maikala ombi unene!
Onthiki ya Siovaa ikahi popepi,+
Maiya nehanyu litunda Komuvili wa Atyiho!
16 Mondywo ya Huku mutupu vali ehambu.
Onthwe tutupu vali okulia.
17 Ombuto* vapala nonopaa mbavo yakukuta.
Ovimbundu viahanyauka.
Ovimbundu viawa-po mokonda ovilia viakukuta.
18 Atee umwe ovipako vikahi nokukema!
Onongombe mbalimbililwa mokonda mbutupu oku mbukalia!
Onongi mbukahi nokumona ononkhumbi.
19 Mandyiliyave kwoove Siovaa!+
Mokonda eholi liali mohika liapia-mo notupia,
Otupia twayoka omiti aviho viali momapia.
20 Atee umwe ovinyama viomohika vihanda uvikwateseko,
Mokonda onondongi mbakukuta,
Eholi mohika liapia-mo notupia.”