Omukanda wa Vali Ehipululo
11 Etyi Lombowau ehika ko Selusalei, liwa-liwa akongo ovanthu veumbo lya Sundaa, no vomuhoko wa Mbesamii,+ omafwalali 180.000 okwalongeswa nawa* movilwa vaye vakalwise ova Isilayeli na vakondole ouhamba ku Lombowau.+ 2 Pahe ondaka ya Siovaa aiya ku Semaiya+ omunthu wa Huku yotyotyili aiti: 3 “Popila omona wa Salomau, Lombowau, ohamba yo Sundaa, nae nova Isilayeli aveho veli mo Sundaa, no mo Mbesamii uti: 4 ‘Etyi otyo tyapopia Siovaa wati: “Mwahakalwisei vakwenyi mulilandula navo. Munthu na munthu akondoke meumbo liae, mokonda ame netyilinga.”’”+ Ngwe avetavela ondaka ya Siovaa, avakondoka, avahakalwisa vali Selombowau.
5 Lombowau akala mo Selusalei, atungu omapunda-umbo okwapama mo Sundaa. 6 Ngootyo, atungu* o Mbelei,+ no Etau, no Tekowa,+ 7 no Mbete-Sule, no Soko,+ no Andulau,+ 8 no Ngate,+ no Malesa, no Sife,+ 9 no Andolaii, no Lakisi,+ no Aseka,+ 10 no Solaa, no Aisaloo,+ no Hemboloo.+ Oo ankho omapunda-umbo omo Sundaa, no mo Mbesamii, apamekelwe. 11 Tupu momapunda-umbo oo apamekele, apake-mo ononkhalamutwe mbomafwalali, otyo evepa okulia, nomulela, novinyu. 12 Momapunda-umbo aeho, wapakele-mo onondyakulilo ononene nononthutu, nomaonga. Weepamekele unene. Atwalako okutumina o Sundaa, no Mbesamii.
13 Ovanakwa, novana va Levii ankho vokuli mo Isilayeli aiho, avasi-po onohika mbavo ambuho, avakahula ku Lombowau. 14 Ovana va Levii avasi-po omalihilo avo, nonofika mbavo,+ avaende ko Sundaa no ko Selusalei, mokonda Selombowau novana vae ankho vevepola movilinga vya Siovaa viounakwa.+ 15 Selombowau akoyo ovanakwa vae mwene vo konomphangu mbokwaya peulu,+ opo vaumbile ovilulu vikahi ngovinkhombo,*+ nononthane ankho alinga.+ 16 Ovanthu aveho momihoko vyo Isilayeli, vokwatokolele momutima wavo okwovola Siovaa Huku yo Isilayeli, valandulile ovanakwa novana va Levii, avaende ko Selusalei opo vakalingile Siovaa Huku yovakwaukulu vavo ovilikutila.+ 17 Mokweenda kwomanima etatu, vapamekele ouhamba wo Sundaa, avakwatesako Lombowau omona wa Salomau, mokonda vaendelele mondyila ya Ndaviti, no ya Salomau momanima oo etatu.
18 Lombowau anepe Maalate omona wa Selimote, Selimote omona wa Ndaviti. Ina yae, ankho o Ambiyaili omona wa Eliyambe,+ Eliyambe omona wa Sesee. 19 Mokweenda kwononthiki, atyiti nae ovana: Seusi, na Semaliya na Saau. 20 Konyima, anepe vali Maakaa omutekula wa Ambisalau.+ Mokweenda kwononthiki, atyiti nae ovana: Ambiya,+ na Atai, na Sisa na Selomite. 21 Lombowau ankho uhole vali unene Maakaa omutekula wa Ambisalau tyipona ovakai vae aveho ovakwavo, nononthawa mbae.+ Ankho una ovakai 18, nononthawa 60. Watyitile ovana 28 ovakwendye, novahikwena 60. 22 Lombowau akoyo Ambiya, omona wa Maakaa, opo akale onkhalamutwe, na atumine vana elikwai navo, mokonda ankho wahanda okumukalesa ohamba. 23 Mahi, Lombowau mounongo wae, atumu* ovana vae vamwe monohika ambuho mbo Sundaa, no mba Mbesamii, momapunda-umbo aeho okwapama,+ eveavela ovipuka ovinyingi, tupu eveovolela ovakai ovanyingi.