ONONDAKA MBOKUHIMBIKA

Ombimbiliya Ikola, omukanda Huku etuhonekela onthwe atuho. Tuna okulilongesa-yo tunoñgonoke Hekulu yayo. (Swau 17:3; 2 Timotiu 3:16) Mombimbiliya omo Siovaa Huku apopia etyi apangela ovanthu neumbo liavo, ohi. — Ehimbikilo 3:15; Eholololo 21:3, 4.

Kutupu vali omukanda nawike ukwatesako unene ovanthu ngo Mbimbiliya. Ombimbiliya itukwatesako okukala nolwembia nga Siovaa, nokankhenda, notyali. Itupopila oviwa matukamona komutwe, tupu ikwatesako ovanthu avetyivili okukoleleya no movitateka umwe vialema. Ihololola ovipuka viouye uno vipikiya etyi Huku ahanda tyaviuka. — Oviimbo 119:105; Hembeleu 4:12; 1 Swau 2:15-17.

Ombimbiliya po tete yahonekelwe melaka lyo Hembeleu, nomo Alamaiku, nomo Ngeleku. Pahe hono ili momalaka alamba 3.000, momalaka amwe omoili aiho, momakwavo ilimo vala onthele imwe. Ombimbiliya omukanda wapitiywa vali unene, wahahana vali mouye auho. Mahi omo umwe, Ombimbiliya yetyipopile-ale okuti: “Oviwa ovipe Viouhamba, mavikapopiwa kombanda yohi aiho, ovanthu aveho vomihoko nomihoko mwene avekeliivilako, onthyulilo pahe aiya.” — Mateusi 24:14.

Mokonda tutyii umwe okuti etyi tyipopia Ombimbiliya tyesukisa unene, twalinga umwe ononkhono, hamokupopia vala etyi mwene tyapopilwe umwe po tete, mahi tupu twalinga ononkhono tupopie etyi tyayandyuluka, tyehepwiya pokutyitanga. Oku kokwati Ovipuka Viapotoyolwa, “Onondongwa Mbalulika Otyilinga Tyokupitiya,” “Ovipuka Vialingwa-mo Mokweitala Vali Nawa,” “Oñgeni Ombimbiliya Yehika Kwoonthwe,” kwapopiwa onondongwa twalandula pokupitiya Ombimbiliya ei.

Vokuhole Siovaa Huku, vemufenda, vahanda Ondaka ya Huku ipopie umwe etyi tyapopilwe po tete, tupu ayehepwiya okwiinoñgonoka. (1 Timotiu 2:4) Otyo twapitiyila Ombimbiliya ei melaka lyo Lunyaneka, mokwahanda ikale vali momalaka omakwavo. Onthwe tuli nokulikwambela opo ove motange Ombimbiliya ei ikukwateseko mononkhono uli nokulinga ‘mbokwovola Huku . . . umuvase umwe.’ — Ovilinga 17:27.