Elongeso 10
Ovituwa Huku Eyele
Una okukala uliivite ñgeni kombinga yovipuka vina Huku ati okuti ovivi? (1)
Ovituwa patyi vyokulinga ovipengi vyapenga? (2)
Oñgeni Omukristau ena okutala ounkhembi? (3), otyituwo tyokuyumba? (jogatina) (3), oumphulu? (3), oungangala? (4), oumbanda? (5) nounkholwa? (6)
Oñgeni omunthu apondola okuyovoka kovituwa ovivi? (7)
1. Ovaumbili va Huku vehole tyina okuti otyiwa. Anthi ovo tupu vena okulilongesa okuyala otyivi. (Salmo 97:10) Otyo tyihangununa okulityilika kovituwo vina Huku eyele. Ovipi vimwe povituwo vyatyo ovyo?
2. Okulinga ovipengi: Okulinga ovipengi putyino nkhele uhenenepe, okulinga ovipengi kondye yotyinepo, okulinga ovipengi novinyama, okulinga ovipengi nombunga, nokulinga ovipengi omulume nomulume aviho ovyo ononkhali ononene ku Huku. (Levítico 18:6; Romanos 1:26, 27; 1 Coríntios 6:9, 10) Inkha ovanthu vevali vakala kumwe anthi avahanepele, ovo vena okuliyapuka ine okulinepa ngetyi tyitola otyitumino. — Hebreus 13:4.
3. Ounkhembi, Otyituwo tyokuyumba ( jogatina), Noumphulu: Yehova Huku kapondola okukemba. (Tito 1:2) Ovanthu vana vokwahanda okutavelwa na Huku vena yokulityilika kounkhembi. (Provérbios 6:16-19; Colossenses 3:9, 10) Ovituwo aviho vyokuyumba (Jogatina) vyayambuliswa noluli. Mokonda yotyo Ovakristau kavapondola okulinga onthele kovituwo vyatyo ovyo vyokuyumba, ngo lotaria, okuhateka nononkhambe, nobingo. (Efésios 5:3-5) Ovakristau kavavake. Ovo kavalande ovipuka vei okuti vyavakwa ine okupola ovipuka vahapelwe. — Êxodos 20:15; Efésios 4:28.
4. Onyengo onene, Oungangala: Onyengo onene ipondola okutwala koungangala. (Gênesis 4:5-8) Omunthu wongangala kapondola okukala epanga lya Huku. (Salmo 11:5; Provérbios 22:24, 25) Hatyiwako okukondolela ouvi kuvana hamwe vokwetulinga ovipuka ovivi. — Provérbios 24:29; Romanos 12:17-21.
5. Omauanga, Noumbanda: Ovanthu vamwe vaita epondolo lyo nondele opo vahakule omauvela. Ovakwavo vayumba omauanga konondyale mbavo opo vevevelese ine okuveipaa. Epondolo lyokukahi konyima yovituwo evi aviho o Satanasi. Molwotyo Ovakristau kavapondola okulinga onthele kovituwo ovyo. (Deuteronômio18:9-13) Okulihikiya ku Yehova olyo eameno ewa komauanga hamwe vakwetu vapondola okutuyumba. — Provérbios 18:10.
6. Ounkholwa: Hatyiviko okunwa katutu ovinyu, osalavesa, ine ovikunwa ovikwavo. (Salmo 104:15; 1 Timóteo 5:23) Okunwa unene nounkholwa otyivi komaiho a Huku. (1 Coríntios 5:11-13; 1 Timóteo 3:8) Okunwa unene tyipondola okuhanyauna ekongoko lyove nokuyapaula ombunga yove. Otyo tupu tyipondola okukutwala kokutokela liwaliwa momahetaiko omakwavo. — Provérbios 23:20, 21, 29-35.
7. Ovanthu vana vokulinga ovipuka Huku ati okuti ovivi “kavakapiñgana Ouhamba wa Huku.” (Gálatas 5:19-21) Inkha ove tyilityili una eholelo na Huku ya uhanda okumuhambukiswa, motyivili okuliyovola movituwo evi. (1 João 5:3) Lilongesa okuyala tyina Huku ati otyivi. (Romanos 12:9) Lipaka kumwe novanthu vana vokuna ovituwa oviwa. (Provérbios 13:20) Omapanga Ovakristau vokwapia kespilitu vapondola okukala ekwateso. (Tiago 5:14) Kombanda yatyiho, yumba onthumbi kekwateso lya Huku pokati kelikwambelo. — Filipenses 4:6, 7, 13.
[Elitalatu kemẽla 20]
Huku uyele ounkholwa, oumphulu, otyituwo tyokuyumba (jogatina), noungangala