Pilatu Wati: “Talei! Omunthu Oyou!”

Pilatu apopila vokuhanda Sesusi aipawe okuti: “Hamuene ehunga nalike lilekesa okuti ovipuka mukahi nokumupopia ovio tyotyili. Tupu nii Helode kamuene natyike.” (Luka 23:14, 15) Pahe mokuovola okuyovola Sesusi, Pilatu apopila ovanthu otyipuka otyikuavo, ati: “Onwe apeho tyina tyamehiki pomuvo wo Pasikwa mokaleya muyelulilwa-mo omunthu wike. Muhanda ndyimuyelulile-mo Ohamba yova Sundeu?” — Suau 18:39.

Pilatu ankho utyii okuti pena onkhuatwa imwe itiwa o Balabasi ikahi mokaleya mokonda youmphulu, ihindila ovanthu okutyitukilapo ovatumini, nokuipaa vakuavo. Moluotyo, Pilatu apulu okuti: “Olie ndyimuyelulila-mo, o Balabasi ine o Sesusi una wiihanwa okuti o Kilisitu?” Mokonda ovanthu ankho vahongiliyua novanene-nakwa, avahaiti Sesusi, avaiti Balabasi. Pilatu evepulu vali okuti: “Puvo vevali olie ndyiyelula-mo?” Avapopila peulu okuti: “O Balabasi.” — Mateusi 27:17, 21.

Otyo atyisoyesa Pilatu, apulu okuti: ‘Iya Sesusi una wiihanua okuti o Kilisitu ndyimulinga ñgeni?’ Aveho avati: “Aipaelwe momuti!” (Mateusi 27:22) Otyo ankho tyikundisa, okuita omunthu uhena etyi alinga aipawe. Pilatu evepulu okuti: “Omokonda yatyi? Otyipuka patyi otyivi omulume ou alinga? Ame hamuene natyike tyimuipaesa. Mandyimuvete vala andyimuyeke.” — Luka 23:22.

Namphila Pilatu ankho atualako okulinga ononkhono, mahi ovanthu ankho vanumana, avapopila peulu okuti: “Aipaelwe momuti!” (Mateusi 27:23) Ononkhalamutwe mbonongeleya ankho vahongiliya ovanthu, pahe ankho vahanda vala aipawe! Mahi ou vahanda aipawe ankho ha-ngangala-ko ine omunthu wiipaa vakuavo. Ankho omunthu uhena etyi alinga, una ankho watambulilwe nawa Ngohamba mo Selusalei ononthiki ononthano konyima. Inkha ovalongwa va Sesusi ankho opo vekahi, kavapopile natyike, tupu kavelilekesile kovanthu.

Pilatu amono okuti ketyivilile okulinga natyike. Ovanthu avahimbika okuyaya, moluotyo apolo omaande, elikoho peke otyo ovanthu aveho vemutala. Evepopila okuti: “Ame hivelwa onombei mbohonde yomunthu ou. Otyo o tyenyi muene.” No ngotyo, ovanthu avahapilulula omalusoke avo. Mahi, avakumbulula okuti: “Ononkhia mbae haa mbupulwa ku onthue no kovana vetu.” — Mateusi 27:24, 25.

Pilatu pahe aovola okuhambukiswa ovanthu, tyipona okulinga etyi ankho ei okuti tyaviuka. Moluotyo, Pilatu ayovola-mo Balabasi ngetyi ovanthu vemuita. Atumu valule Sesusi ovikutu viae, avemuvete.

Etyi omafualali aveta unene Sesusi, aemutuala meumbo liomutumini. Omafualali aeliongiya, aahimbika okulinga Sesusi omukuele. Aalingi ekolowa liomakete, aelipake komutwe wae. Tupu omafualali aapatekesa Sesusi olumbungu kokuvoko kuokulio, aemuhiki otyinyanga tyotyivala tyonkhula, ankho tyivalwa no nohamba. Aemupenye, aati: “Tusapele, Hamba yova Sundeu!” (Mateusi 27:28, 29) Tupu, aemunthili omate, otyo emuveta motyipala. Aapolo Sesusi olumbungu, aemuvete nalo iya omakete “ekolowa” otyo anyingila vali momutwe.

Namphila Sesusi amoneswa ononkhumbi ngotyo, mahi atualako tyapoleya, tyihena owoma, nokulikondola omutima. Otyo atyihuvisa unene Pilatu, asoko okulinga otyipuka otyikuavo opo elipole ponkhali yokuipaa Sesusi, ati: “Talei! Nemueeta pondye opo mutyinoñgonoke okuti ame hamuene natyike tyapenga alinga.” Pilatu ankho wasoka okuti inkha ovanthu vamona Sesusi wavetwa, wepuila monohonde mavapilulula olusoke luavo. Sesusi akala lutai komutwe wovanthu, Pilatu apopi okuti: “Talei! Omunthu oyou!” — Suau 19:4, 5.

Sesusi ankho wavetwa unene, mahi no ngotyo atualako tyapoleya, nokulikondola omutima. Alo umwe Pilatu etyinoñgonoka, mokonda onondaka mbae mbalekesa okuti walinga okankhenda nokuna onthilo.